Luk 13

Nɔsɛlilɛa

1Gɔɔ bee wà mɔ̀ wà Galile gbɛ̃́ pɔ Pilati ń dɛdɛ̀ à ń au yã̀alɛ ń ń sa'obɔ auoɔ yãsìu Yesuɛ. 2Ɔ̃ Yesu ònɛ́: Kɛ́ Galile gbɛ̃́piɔ gaa kɛ̀ màa, álɛ e an duuna dɛ Galile gbɛ̃kĩniɔla yã? 3Aawo! Malɛ oɛ́, tó i nɔsɛlilɛo, ápii á kaalɛ láńwaɛ. 4Gbɛ̃ɔn baoplasai pɔ Siloe zɛgikĩi kwɛ̀má aa gàgaɔ sɔ̃, álɛ e an tàae dɛ gbɛ̃kĩni pɔ aa ku Yelusalɛũɔla yã? 5Aawo! Malɛ oɛ́, tó i nɔsɛlilɛo, ápii á kaalɛ láńwaɛ.

6Ɔ̃ à yãɛ bee lɛ̀ɛũnɛ́ à mɛ̀: Gbɛ̃e mɛ́ figi lí bà a swaluu, ɔ̃ à gɛ̀ a bɛ wɛɛlɛi, i eo. 7Ɔ̃ a ò a zĩkɛnaɛ: Gwa, a wɛ̃̀ aaɔ̃n la, kɛ́ mi mɔ bɛ wɛɛlɛi figipiwa, mili eo. Zɔ̃. Wá to à gusi pã yã? 8Ɔ̃ zĩkɛnapi òɛ̀: Mae, to we wɛ̃a lɔ. Má gubi mà liaiɛ, mí zugbɔ̃ kau. 9A gi nɛ'ii ziia? Tó i i sao, mí zɔ̃.

Nɔɛ kaaũa gbãgbãa

10Kãmabogɔɔe zĩ́ Yesu lɛ́ yãdanɛ́ luasisikpɛu. 11Nɔɛe ku we, tãa aà kɔ̃ɔkũ̀, à kàaanɔ wɛ̃̀ baoplasai. Ìɔ kooaɛ, ìli fɔ̃ pòoo baa yɔɔ. 12Kɛ́ Yesu aà è, ɔ̃ à lɛzùaazi a òɛ̀: Nɔɛ, n kɔ̃ɔkɛ gòma. 13Ɔ̃ à ɔnàwà. Wegɔ̃ɔ à pòo, ɔ̃ à Lua saaukpà.

14Ɔ̃ luasisikpɛ gbɛ̃zɔ̃ɔ pɔ pà, kɛ́ Yesu aà gbã̀gbã kãmabogɔɔzĩ yãi, ɔ̃ à fɛ̀lɛ, a ò bilaɛ: Gɔɔ soolo mɛ́ ku kɛ́ wì zĩkɛu.#Bɔa 20.9-10 Àli mɔ́ wà á gbãgbã gɔɔ beeɔwa, kãmabogɔɔ baasi. 15Ɔ̃ Dii a zãsìwà à mɛ̀: Mɔafilideɔ! Kãmabogɔɔ á baade lí a zu ge zaa'ĩna polo a dɔkĩi à gɛ̀ ikpaiwào le? 16Ablahaũ bui nɔɛɛ bee sɔ̃, Setãu aà yè, a wɛ̃̀ baoplasain kɛ. Aà bapi poloawà kãmabogɔɔzĩ zɛ́ vĩo le? 17Kɛ́ a ò màa, ɔ̃ wí aà ibɛɛɔ kũ̀ pii, ɔ̃ bila pɔ kɛ̀ na yã bɛɛɛde pɔ ìɔ kɛɔwa pii.

Yãlɛɛũa ń kpala pɔ Lua kpào

(Mat 7.13-14, 7.21-23, 13.31-33; Maa 4.30-32)

18Ɔ̃ Yesu mɛ̀: Kpala pɔ Lua kpà bɔ̀ bɔ́wà ni? Bɔ́ má lɛɛũòi? 19Doe ku a wɛna bɔ̀ lan ɛfɔ wɛnawa, ɔ̃ gbɛ̃e sɛ̀ a tɔ̃̀ a kaau. Kɛ́ à bɔ̀lɛ à kɛ̀ lí ũ, ɔ̃ bãɔ mɔ̀ sakpɛdà a láu.

20Ɔ̃ a ò lɔ: Bɔ́ má kpala pɔ Lua kpà lɛɛũòi? 21À bɔ̀ pɛ̃ɛsɛ'ɛsɛ pɔ nɔɛ sɛ̀ a kà pɛ̃ɛti zaa lɛ aaɔ̃ guu a lìa piiwaɛ.

22Gɔɔ pɔ Yesu lɛ́ gɛ́ Yelusalɛũ, àlɛ pã mɛɛwiaɔ ń zɔ̃ɛwiaɔla, àlɛ yãdanɛ́, 23ɔ̃ gbɛ̃e aà là à mɛ̀: Mae, asi aizãna'enaɔ waɔ dasioa? Ɔ̃ Yesu ò bilaɛ: 24À ãiakɛ à gɛ̃ bɔlɛ tuuna guu. Malɛ oɛ́, gbɛ̃́ dasideɔ wɛɛlɛ wà gɛ̃u, kási aa eo. 25Tó uabele fɛ̀lɛ a zɛtà a làa, tó a gɔ̃ bàasi, mɛ́ álɛ gbalɛ, álɛ mɛ: Mae, gbawɛ̃wɛ̃ɛ, a oɛ́ á á dɔ̃ gueio. 26Bee gbɛa tó á òɛ̀ à pɔblè à imìánɔ, mɛ́ à yãdànɛ́ á bɛ gãaɛ, 27a oɛ́ á á dɔ̃ gueio. À goala ápii vãikɛnaɔ.#Soũ 6.9

28Tó a Ablahaũ ń Izaakio ń Yakɔbuo ń ãnabiɔ è pii kpala pɔ Lua kpà guu, mɛ́ wà á zú bàasi, we á ɔdi á musu à ɔɔlɔu. 29Wa bɔ gukpɛ ń bɛ'aɛo ń gugbãntooo ń gɛɔmidɔkĩio, wi mɔ blɛblei kpala pɔ Lua kpà guu. 30Gbɛ̃́ zã́ɔ gɔ̃ dɔaaa mɛ́ gbɛ̃́ pɔ dɔ̀aaɔ gɔ̃ zã́.

Yesu ɔɔlɔa Yelusalɛũdeɔ yãmusu

(Mat 23.37-39)

31Gɔɔ bee gɔ̃̀ɔ Falisieɔ mɔ̀ Yesu kĩi aa òɛ̀: Fɛlɛ ǹ go lakĩi, asa Helodi ye à n dɛɛ. 32Ɔ̃ a ònɛ́: À gɛ́, à o awalɛwanapiɛ malɛ tãaɔ gonɛ́, malɛ gyãeɔ gbãgbã gbã ń ziao, a gɔɔ aaɔ̃de má a zĩ midɛ. 33N beeo sema mà gɛ́ aɛ gbã ń ziao ń ziabaasio, asa i kũ ãnabi ga gueio, sema Yelusalɛũ. 34Yelusalɛũdeɔ, Yelusalɛũdeɔ, i ãnabiɔ dɛdɛ, i gbɛ̃́ pɔ Lua ń zĩwáɔ papa ń gbɛo à ń dɛdɛ. Miɔ ye mà á kãaamazi mɔɔmɔɔ, lá ko ì gãsĩa ku a nɛɔlawaɛ, kási ili weio. 35Lua a á kpɛ́ toɛ́ɛ sa. Malɛ oɛ́, á ma e lɔo e à omɛɛ, baaaden gbɛ̃́ pɔ lɛ́ mɔ́ ń Dii tɔ́o ũ.#Soũ 118.26

اکنون انتخاب شده:

Luk 13: Boo2024

های‌لایت

به اشتراک گذاشتن

کپی