Luk 10

Gbɛ̃ɔn baaɔ̃kwi ń plaoɔ zĩa

(Mat 11.20-27, 13.16-17)

1Bee gbɛa Dii gbɛ̃ɔn baaɔ̃kwi ń plao pãleɔ dìlɛ, ɔ̃ à ń zĩ́ gbɛ̃ɔn plapla aaɔ dɔaaɛ wɛ̃lɛɔ guu ń gu pɔ á ye à gɛ́uɔ pii. 2A ònɛ́: Pɔkɛkɛa zɔ̃ɔ mɛ́ a kɛkɛnaɔ bilao. À wabikɛ Budewa aà zĩkɛnaɔ gbaɛ pɔkɛkɛi. 3À da zɛ́u. Malɛ á zĩ lan sãɔwa awalɛwanaɔ guuɛaɔ! 4Ásu mɔkpɛ sɛ́o ge babalabɔɔ ge kyaleɔ. Ásu zɛ zɛ́u à fɔkpa gbɛ̃ewao. 5Ua pɔ a gɛ̃u pii, à o gĩ́a Lua uapi gba aafia. 6Tó aafiade ku we, á fɔ aafiade a gɔ̃ɛ̀. Tó a ku we sɔ̃o, a ɛa suwáɛ. 7Àɔ ku uapiu, à pɔ pɔ wa kpàwá ble ge pɔmia, asa zĩkɛna kà à a asea eɛ. Ásu àɔ sɔ̃kĩikpakpao. 8Wɛ̃lɛ pɔ a gɛ̃u mɛ́ wà á dilɛ, à pɔ pɔ wà mɔ̀òɛ́ ble. 9À wɛ̃lɛpi gyãeɔ gbãgbã, í o gbɛ̃́ɔnɛ kia pɔ Lua kpà kàńnɔ kãi. 10Tó a gɛ̃ wɛ̃lɛu mɛ́ wi á dilɛo sɔ̃, à bɔlɛ gãaɛ, í mɛ: 11Baa á wɛ̃lɛ luutɛ̃ pɔ kpà wá gbáwa, wá kɔɔlɛòwáɛ.#Luk 9.5 Àɔ dɔ̃ sãasã kɛ́ kia pɔ Lua kpà kà kãi. 12Malɛ oɛ́, yãkpalɛkɛgɔɔzĩ ĩa pɔ Lua a da Sɔdɔũdeɔwa a ká wɛ̃lɛpideɔ pɔwao.#Daa 19.24-28

13Waiyoo Kɔlazɛnideɔ! Waiyoo Bɛsaidadeɔ! Dabudabu pɔ má kɛ̀ á wɛ̃lɛɔ guu, tó má kɛ̀ Tii ń Sidɔ̃o yãa, dɔ̃ wɛ̃lɛpideɔ ulakasaɔ dà, aa zɔ̃̀lɛ tufua à gɛ̃̀gɛ̃ nɔsɛlilɛa seela ũ. 14Yãkpalɛkɛgɔɔzĩ á ĩadama aɔ dɛ Tiideɔ ń Sidɔ̃deɔ pɔa.#Isa 23.1-18; Yoɛ 3.1-4 15Á Kapɛnaũdeɔ sɔ̃, á gbã à zɔ̃ luawa yã? Wa ɔzɔ̃áziɛ e bɛdau.#Isa 14.13-15

16Ɔ̃ Yesu ò a iwapiɔnɛ: Gbɛ̃́ pɔ á yãmà, ade ma yãmàɛ. Gbɛ̃́ pɔ gìázi, ade gìmaziɛ. Gbɛ̃́ pɔ gìmazi sɔ̃, ade gì gbɛ̃́ pɔ ma zĩziɛ.#Luk 9.48

17Gbɛ̃ɔn baaɔ̃kwi ń plaopiɔ gɛ̀, ɔ̃ aa ɛ̀a sù ń pɔnao aa mɛ̀: Dii, baa tãaɔ misìilɛwɛ̃ɛ n tɔ́ yãi. 18Yesu ònɛ́: Malɛ gugwa, ma Setãu è, à bã̀ɛ musu lan loupilɛawa. 19Ma iko kpàwá à taa'o mlɛɔ ń soiɔ ń á ibɛɛ gbãaowa pii, pɔe a á kɛ'ĩao.#Soũ 91.13 20Ń beeo ásu pɔnakɛ ń tãaɔ misiilɛaɛ́oo. À pɔnakɛ kɛ́ á tɔ́ɔ kɛ̃a láu luabɛ yãi.

21Zĩ́ bee Lua Nisĩna Yesu pɔ kɛ̀ na maamaa à mɛ̀: Baa, zĩlɛ ń musuo Dii, lá n yãpiɔ ùlɛ yãdɔ̃naɔnɛ ń ɔ̃nɔnaɔ, mɛ́ n bɔò ladɔ̃nsaiɔnɛ, ma n saaukɛ̀. Ao, Baa, a kàngu màaɛ. 22Ma Mae pɔpii nàmɛɛ ma ɔzĩɛ. Gbɛ̃e Lua Nɛ dɔ̃o, mɛ́ i kɛ Mae Lua baasio, mɛ́ gbɛ̃e Mae Lua dɔ̃o, mɛ́ i kɛ aà Nɛ ń gbɛ̃́ pɔ Nɛpi yei à aà ɔlɔnɛ́ɔ baasio.

23Ɔ̃ Yesu aɛdɔ̀ a iwaɔwa a ònɛ́ ntɛ̃ɛ: Baaadeɔn á ũ yã pɔ á wɛ́ lɛ́ e yãi. 24Malɛ oɛ́, ãnabiɔ ń kiaɔ ku yãa dasi, aa ye yã pɔ álɛ eɔ e, aai eo. Aa ye yã pɔ álɛ maɔ ma, aai mao.

Samali gbɛ̃maa

25Ikoyãdɔ̃nae mɛ́ fɛ̀lɛ àlɛ likpalɛ Yesuwa à mɛ̀: Mɛtulu, kpelewa má kɛ mà aizãna ei? 26Yesu òɛ̀: Kpelewa a ku Mɔizi ikoyã guui? Ni a kyokɛ ǹ ma kpelewa ni? 27Gbɛ̃́pi wèwà à mɛ̀: Ǹyɔ̃ ye Dii n Luazi ń nɔsɛmɛndoo teasisai n gbãapualɛu, n sɔ̃ iɔ kuwà,#Iko 6.5 níɔ ye gbɛ̃́i lan nzĩa wɛ̃niwa.#Lev 19.18 28Yesu òɛ̀: Ń wè maaɛ. Ǹyɔ̃ kɛ màa, ńyɔ̃ɔ ku.#Lev 18.5 29Ɔ̃ gbɛ̃́pi ye yãnakpa azĩawa, ɔ̃ à Yesu là à mɛ̀: Demɛ ma gbɛ̃dee ũi?

30Ɔ̃ Yesu òɛ̀: Gbɛ̃e mɛ́ bɔ̀ Yelusalɛũ àlɛ gɛ́ Yeliko, ɔ̃ kpãiwɛliwɛɔ kpàaũaanɔ. Aa aà pɔɔ wòlowà, aa aà gbɛ̃̀ dúuduu e à kà gaa. Ɔ̃ aa aà tò we wà gɛ̃̀zɛa. 31Zĩ́ bee sa'onae zɛ́ doũpi sɛ̀. Kɛ́ à aà è, ɔ̃ à dɔ̀aazi. 32Màaɛ lɔ kɛ́ Levi buie kà gupiu, à aà è, ɔ̃ à dɔ̀aazi. 33Samali busu gbɛ̃e bɛ zɛ́piu. Kɛ́ à mɔ̀ à aà è, ɔ̃ à kɛ̀ɛ̀ wɛ̃naũ. 34À sɔ̃̀aazi, à ɛsɛ mà aà gu pɔ kɛ̀'ĩaɔwa, à nisi ń vɛ̃ɛo kàwà, à pɔ yèyewà. Ɔ̃ à aà sɛ̀ a dì a zaa'ĩna kpɛ, à gɛ̀aanɔ nibɔɔ pilakĩi, à aà gwà we. 35Kɛ́ gu dɔ̀, ɔ̃ à ãnusu ɔwatɛ̃ bɔ̀ mɛn pla a kpà pilakĩidewa à mɛ̀: Ǹ aà gwamɛɛ. Tó n ɛa n ɔ̃ablè dɛ beea aà yãmusuɛ, tó ma su, má a fĩabonɛ.

36Tɔɔ, gbɛ̃ɔn aaɔ̃piɔ guu, an demɛ gbɛ̃kɛkɛ̀ gbɛ̃́ pɔ kpãiɔ kpàaũaanɔpiɛi? 37A wèwà à mɛ̀: Gbɛ̃́ pɔ wɛ̃nadɔ̃̀ɛ̀ɛ. Ɔ̃ Yesu òɛ̀: Gɛ ǹ kɛ màa sɔ̃.

Yesu kua Maata ń Maliamao bɛ

38Gɔɔ pɔ aa bɛ zɛ́u, aa kà wɛ̃lɛu, ɔ̃ nɔɛ pɔ wì mɛ Maata Yesu dìlɛ. 39A dãuna vĩ, wì mɛ Maliama, à zɔ̃̀lɛ Dii gbázĩ, àlɛ aà yãma. 40Kĩna zĩ dà Maatala, ɔ̃ à mɔ̀ Yesu kĩi à mɛ̀: Dii, kɛ́ ma dãuna ma to zĩpiɛ mado, i kɛnɛ yãe ũo le? Oɛ̀ aà dɔmalɛ. 41Ɔ̃ Dii wèwà à mɛ̀: Maata, Maata, nlɛ yãkãakɛ, nlɛ ĩada nzĩawa ń yãɔ dasi. 42A mɛndo mɛ́ zɛ́ vĩ. Maliama baa maa sɛ̀ mɛ́ wa siwào.

اکنون انتخاب شده:

Luk 10: Boo2024

های‌لایت

به اشتراک گذاشتن

کپی