Zãa 7

Yesu gɛa Lakpɛdɔa dikpɛu

1Bee gbɛa Yesu lɛ́ Galile busu kɛɛlɛ, asa a ye bɛbɛ Yudeo, kɛ́ Yuda gbãadeɔ lɛ́ aà wɛ yãi. 2Yudaɔ Lakpɛdɔa dikpɛ kãikũ̀,#Iko 16.13 3ɔ̃ aà dãunaɔ òɛ̀: Fɛlɛ lakĩi ǹ gɛ Yude, kɛ́ n iwa pɔ ku weɔ yã pɔ nlɛ kɛɔ e sɔ̃. 4Tó gbɛ̃́ ye tɔbɔ, ìli a yãɔ kɛ asii guuo. Lá nlɛ yãɛ beeɔ taa kɛ, ǹ nzĩa ɔlɔ dũniaɛ. 5Baa aà dãunapiɔ i aà naaikɛo. 6Ɔ̃ Yesu ònɛ́: A gɔɔ i kamɛɛ yãao. Apiɔ sɔ̃, iɔ zɛ́ vĩ gɔɔpiiɛ. 7Dũnia a we zaáguo, ãma a zamagu, kɛ́ mi mɛ aà yãkɛa vãi yãi. 8À gɛ́ dikpɛpiu, malɛ gɛ́uo, asa a gɔɔ i kamɛɛ yãao. 9Aà yãpi oa gbɛa à gɔ̃̀ Galileɛ.

10Kɛ́ aà dãunapiɔ gɛ̀ dikpɛpiu, ɔ̃ à gbàsa gɛ̀. I gɛ́ bila wáao, à gɛ̀ asii guuɛ. 11Yuda gbãadeɔ lɛ́ aà wɛɛlɛ dikpɛpiu aa mɛ̀: Aapi ku má ni? 12Bila guu wàlɛ yãkũkũ'o maamaa aà musu. Gbɛ̃eɔ mɛ̀: Gbɛ̃maaɛ. Gbɛ̃eɔ mɛ̀: Aawo, àlɛ gbɛ̃́ɔ sãsãɛ. 13Gbɛ̃e i aà yã'o gupuauo, kɛ́ wàlɛ vĩakɛ gbãadepiɔnɛ yãi.

14Kɛ́ dikpɛ kà a guo, Yesu gɛ̀ Lua ua, àlɛ yãdanɛ́. 15Aà yã bɔ̀ gbãadepiɔ saɛ aa mɛ̀: Gbɛ̃́ pɔ i kyokɛo mɛ́ lá dɔ̃ kɛ́waa? 16Ɔ̃ Yesu ònɛ́: Yã pɔ mi danɛ́á mazĩa yã no, gbɛ̃́ pɔ ma zĩ yãɛ. 17Tó gbɛ̃́ ye zɛ ń Lua pɔeãkɛao, tó ma yãdanɛ dɛ aà pɔ ũ ge mazĩa yã malɛ o, aɔ dɔ̃ɛ. 18Gbɛ̃́ pɔ ì azĩa yã'o lɛ́ wɛɛlɛ à tɔbɔɛ. Gbɛ̃́ pɔ ì wɛɛlɛ à gbɛ̃́ pɔ a zĩ tɔbɔ, ade mɛ́ sĩande ũ, a mɔafili vĩo. 19Mɔizi i ikoyãdaɛ́o le? Á gbɛ̃e yãpi kũa sɔ̃o. Bɔyãi álɛ ma wɛi?

20Ɔ̃ bila òɛ̀: Ń tãa vĩɛ. Demɛ lɛ́ n wɛi? 21Yesu ònɛ́: Yã mɛndo má kɛ̀, ɔ̃ à bɔ̀ á saɛ ápii. 22Mɔizi tɔ̃zɔ̃yã dàɛ́,#Lev 12.3 ɔ̃ i tɔ̃zɔ̃ kãmabogɔɔzĩ. (Kási i kɛ Mɔizi mɛ́ dàalɛo, à bɔ̀ á dezikaauɔ kĩiɛ.)#Daa 17.10 23Lá wì tɔ̃zɔ̃nɛ́ɛ kãmabogɔɔzĩ, kɛ́ wasu bɔ Mɔizi ikoyã kpɛo yãi, bɔyãi á pɔ paamazi, kɛ́ ma gbɛ̃́ mɛ̀ bṹu gbà aafia kãmabogɔɔzĩi?#Zãa 5.9 24Ásuli yãsɛ lá á wɛ́ lɛ́ ewao. Àli yãsɛ a zɛ́wa.

Kɔ̃kpaalɛa Yesu yãi

25Ɔ̃ Yelusalɛũdeeɔ mɛ̀: Gbɛ̃́piá gbɛ̃́ pɔ wàlɛ wɛ nolo? 26Gwa, àlɛ yã'o gupuau kee, mɛ́ gbɛ̃e lɛ́ lɛdaaazioa? Gbãadeɔ aà dɔ̃̀ Mɛsi ũ sĩana yã̀ mɔɔɔ? 27Wá dɔ̃ gu pɔ gbɛ̃́pi bɔ̀u. Tó Mɛsi mɔ̀, waɔ dɔ̃ gu pɔ à bɔ̀uo. 28Ayãmɛto gɔɔ pɔ Yesu lɛ́ yãdanɛ́ Lua ua, à pũ̀na à mɛ̀: Á ma dɔ̃ mɛ́ á dɔ̃ gu pɔ ma bɔu. Kási mi mɔ ń mazĩaoo. Gbɛ̃́ pɔ ma zĩá sĩandeɛ, mɛ́ á aà dɔ̃o. 29Má aà dɔ̃, asa ma bɔ aà kĩiɛ, aapi mɛ́ ma zĩ. 30Ɔ̃ aalɛ wɛɛlɛ wà aà kṹ, ãma gbɛ̃e i ɔkãwào, asa aà gɔɔ i pa yãao. 31Bila guu wà Yesu naaikɛ̀ dasi wà mɛ̀: Tó Mɛsi mɔ̀, a dabudabukɛ dasi dɛ a pɔ pɔ gbɛ̃́ɛ bee kɛ̀a yã?

32Kɛ́ Falisiɔ mà wàlɛ yãkũkũ'o zã guu aà yãmusu, ɔ̃ sa'onkiaɔ ń Falisipiɔ dɔaiɔ zĩ̀ aà kũi. 33Ɔ̃ Yesu mɛ̀: Ma kuaánɔ gɔ̃̀ yɔɔ, mí gbasa mà ta gbɛ̃́ pɔ ma zĩ kĩi. 34Á ma wɛɛlɛ à kuaa, asa á fɔ̃ gɛ́ gu pɔ má kuuo.#Zãa 12.26, 14.3, 17.24 35Ɔ̃ gbãadepiɔ lɛ́ kɔ̃lala aa mɛ̀: Má a ye gɛ́u, wí kuawài? A ye gɛ́ wá gbɛ̃́ pɔ lala'ò buipãleɔ guuɔ kĩi à yãda buipãlepiɔnɛ yã? 36Yã pɔ a òpi mi dɛa ni? À mɛ̀ wá a wɛɛlɛ wà kuawa, gu pɔ á kuu, wá fɔ̃ gɛ́ weo.

37Dikpɛgɔɔ gbia pɔ dɛ kaa'isizĩ ũ, Yesu fɛ̀lɛ à pũ̀namá à mɛ̀: Gbɛ̃́ pɔ imi lɛ́ dɛ aà mɔ ma kĩi, 38gbɛ̃́ pɔ lɛ́ ma naaikɛ aà imi, í pɔ ì ń ká wɛ̃niwa iɔ bɔ aà nɔ̀sɛ guu, lá wa kɛ̃̀ láuwa.#Isa 55.1; Zkl 14.8 39À bee ò Lua Nisĩna pɔ gbɛ̃́ pɔ aalɛ a naaikɛɔ e yãmusuɛ. Aai Lua Nisĩnapi e gĩ́ao, kɛ́ Yesu i tɔbɔ yãao yãi.

40Kɛ́ bila yãpi mà, gbɛ̃eɔ mɛ̀: Gbɛ̃́piá ãnabipiɛ sĩana. 41Gbɛ̃eɔ mɛ̀: Gbɛ̃́piá Mɛsiɛ. Ɔ̃ gbɛ̃eɔ mɛ̀: Mɛsi a bɔ Galilee? 42Wa kɛ̃̀ wà mɛ̀ Mɛsiá Davidi buiɛ,#2 Sam 7.12 a bɔ Davidi bɛ wɛ̃lɛ Bɛtɛlɛũɛ.#Mis 5.1 43Ɔ̃ bila kɔ̃kpaalɛ̀ Yesu yãi. 44An gbɛ̃eɔ ye wà aà kṹ, ãma gbɛ̃e i ɔkãwào.

45Ɔ̃ dɔaiɔ ɛ̀a tà sa'onkiaɔ ń Falisiɔ kĩi. Ɔ̃ aa ń lá aa mɛ̀: Bɔyãi i aà kũ a suòo ni? 46Dɔaipiɔ wèmá aa mɛ̀: Gbɛ̃e i yã'o lan gbɛ̃́piwa yãao. 47Ɔ̃ Falisiɔ ònɛ́: À á sãsã sɔ̃ yã? 48Gbãadee ge Falisie aà naaikɛ̀e? 49Bila bee Lua ikoyã dɔ̃o, láaipɔɔnɛ. 50Nikodɛũ pɔ gɛ̀ Yesu kĩi#Zãa 3.1-2 yãaá gbãadepiɔ doɛ. A ònɛ́: 51Wá ikoyã guu wà mɛ̀, wásu yãda gbɛ̃́la aà yãmasai ge yã pɔ a kɛ̀ dɔ̃saio. 52Aa òɛ̀: Galile gbɛ̃́n n ũ sɔ̃a? Wɛtɛi ǹ gwa. Ńyɔ̃ e ãnabie a bɔ Galileo. 53Ɔ̃ baade tà a bɛ.

اکنون انتخاب شده:

Zãa 7: Boo2024

های‌لایت

به اشتراک گذاشتن

کپی