Daa 12
12
Dii oa Ablaũɛ aà bɔ a busuu
1Dii ò Ablaũɛ: Bɔ n busuu n buiɔ guu n mae bɛ, ní gɛ́ busu pɔ má ɔlɔnɛu.#Zĩn 7.2-3; Hɛb 11.8
2Má tó n bui dasikũ,
má baaadangu, mí n tɔbɔ,
n kĩi ɔ̃ wali ɛfãai eu.
3Má baaada gbɛ̃́ pɔ aa samaa'onɛɔgu,
mí gbɛ̃́ pɔ aa savãi'onɛɔ ká.
Dũnia bui pii a ɛfãai e n sabai.#Zĩn 3.25; Gal 3.8
4Ɔ̃ Ablaũ dà zɛ́u lá Dii òɛwa. Lɔtu gɛ̀aanɔ. Aà wɛ̃̀ basiiɔ̃ sɔosaideu ɔ̃ à bɔ̀ Halana 5ń a na Salaio ń a vĩi nɛ Lɔtuo ń ń aizɛɛ pɔ aa vĩɔ ń gbɛ̃́ pɔ aa è Halanaɔ. Màa aa bɔ̀lɛ Halana aa dà Kanaa zɛ́u.
Kɛ́ aa kà we, 6aa pã̀ busupia e aa kà Mɔle gbɛ̃́nɛ lí kĩi Sikɛũ. Kanaaɔ ku busupiu gɔɔ bee. 7Ɔ̃ Dii bɔ̀ à mɔ̀ Ablaũwa à mɛ̀: Má busuɛ bee kpa n buiɔwaɛ.#Daa 13.15, 15.18, 17.8; Zĩn 7.5; Gal 3.16 Ɔ̃ à Dii gbagbakĩi kɛ̀ we. 8Kɛ́ à fɛ̀lɛ we, à mipɛ̀ gbɛsĩsĩ pɔ ku Bɛtɛli gukpɛɔwa, ɔ̃ à bookpà we, Bɛtɛli ku bɛ'aɛ oi, Ai ku gukpɛ oi. À Dii gbagbakĩi bò we lɔ, ɔ̃ à aà sìsi. 9Ɔ̃ à dà zɛ́u lɔ, à mipɛ̀ Nɛgɛvɛwa.
10Kɛ́ imina kà busupiu, ɔ̃ Ablaũ gɛ̀ gɔɔplakɛi Egipi, asa iminapi kɛ̀ zaiɛ. 11Kɛ́ à kãikũ̀ ń Egipio, a ò a naɛ: Má dɔ̃ nɔanan n ũ. 12Tó Egipiɔ n e, aa mɛ ma nan n ũ, aa ma dɛɛ, aai n tó. 13Onɛ́ ma dãen#Daa 20.2, 26.7 n ũ, kɛ́ wà e wà ma kũ ɔplapla n yãi. Lá ńyɔ̃ ma misin we. 14Kɛ́ aa kà Egipi, Egipiɔ è nɔɛpi maa kɛ̀ zai. 15Kɛ́ Egipiɔ ki Falaɔ̃ iwaɔ aà è, aa aà maabòɛ̀, ɔ̃ wà aà sɛ̀ wà gɛ̃̀ò Falaɔ̃ɛ a bɛ. 16Ɔ̃ à Ablaũ yaaekɛ̀ maamaa aà yãi, à sãɔ kpàwà ń zuɔ ń zaa'ĩnaɔ ń zɔgɔ̃ɛɔ ń zɔnɔɛɔ ń yiongoɔ. 17Ɔ̃ Dii gyã pãsĩɔ kà Falaɔ̃gu ń a bɛdeɔ Ablaũ napi yãi. 18Ɔ̃ Falaɔ̃ Ablaũ sìsi a òɛ̀: Bɔ́ yã ń kɛ̀mɛɛ màai? Bɔyãi ni oimɛɛ n naɛo ni? 19Bɔyãi n mɛ̀ n dãeɛ, ɔ̃ ma aà sɛ̀ nɔ ũi? N nɔ kɛ! Ǹ n pɔ sɛ́ ǹ taò. 20Falaɔ̃ yã'ò a gbɛ̃́ɔnɛ Ablaũ yãmusu, ɔ̃ aa gɛ̀ zɛ̀ɛ̀ ń a nao ń a aizɛɛɔ pii.
اکنون انتخاب شده:
Daa 12: Boo2024
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Boko Bible © SIM International, 2024.