آیات محبوب کتاب مقدس از SAN MATEO 6

به اشتراک گذاشتن

Mexinxin cain tiempo ditticaon ra cain tti jehe Ndo ttetonha Ndo, co nchehe ra tti jehe Ndo rinao Ndo, co jamé sayehe ra cain cosa jihi.

Co taha ra joachjaon de ixin queẍén sinchehe ra ndoe, ixin ndoe tsiaho ojé problema. Nchanho co nchanho chonda problemé, pero jaha ra chonda ra confianza ngain Dios ixin jehe tti sinttaẍaxaon ra quehe sinchehe ra.

Cai ndac̈ho Jesús: ―Co janha rrindattjo ra que taha ra joachjaon de ixin tti sintte ra co de ixin tti sihi ra para sinttechonxin ra, ni taha ra joachjaon de ixin lontto para sinttengaha ra ixin icha rentte vidé ni que tti jine ni, co icha rentte cuerpoe ni que lonttoe ni. Ixin Dios chjá ra vida que techonxin ra, mexinxin jehe tti rrochjá ra cain cosa que rrogondaha ra ngain vida jihi.

Mexinxin are jaha ra sinchecoanxinhi ra Dios, dixinhi ra nchiandoi ra co ttejehe ra puerté nchia co nchecoanxinhi ra Dios Ndodá ra que ttjen nganji nttiha, jaho ra conixin jehe Ndo. Co Dios tti sicon tti jaha ra tenchehe ra, co jehe Ndo tsjengaha ra Ndo hna.

Mexinxin jaha ra nchecoanxinhi ra Ndo janhi: Padre soixin que ttjen ngajni, nombrea soixin jiquininxin tsosayehe. Siquetonha nttihi soixin. Co tsonhe inchin soixin rinao nttihi ngataha nontte, jañá inchin tonhe nttiha ngajni.

Chjana ra jai tti sine na que rrogondana na.

Nchetjañana ni ra tti jianha que jointtaha na, jañá inchin janha na jointtatjañá na tti chojni que joinchehe jianha nganji na.

Nchegattoha ni ra tangui; tanc̈hjandaha ni ra ngain tti jianha. Ixin soixin tti ttetonha co soixin tti chonda cainxin joachaxin co gloria para cainxin tiempo. Amén.

’Ixin si jaha ra nchetjañehe ra tti chojni que nchehe jianha nganji ra, Ndodá ra que ttjen ngajni sinttatjañaha ra Ndo jaha ra cai.

Tsjehe ra que cain conttoa que tjaganga va ngataonhe c̈hintto; jehe va ẍonhi ttenga va ngataon jngui, co jamé ẍonhi cosecha tsín va, ni ttenchjianha va cosecha ngain ná nchia. Pero masqui jamé, Ndodá ra que ttjen ngajni danjo Ndo tti jine cainxin coxigochjan mé. Co jaha ra seguro que icha rentte ra que cain coxigochjan mé.

Cai ndac̈ho Jesús: ―Datseha ra tsje cosa nttihi ngataha nontte, nttihi tti ndattjehe cochí co nttihi tti cain cosa ndaditján, co nttihi tti jí tti chehe que tté cain cosa. Icha jian datse ra tsje cosa para ngajni, nttiha tti ẍonhi cochí jí para tsjehe cain cosa, ni cain cosa diha chjín, ni tti chehe coha nttiha para tsé. Ixin ngain lugar tti jaha ra rrochonda ra cosa icha importante para ixin jaha ra, cai nttiha sehe joarrixaoan ra co ansean ra.

’Ẍonhi chojni nchao sinchehe ẍé yó xinajni ngain nacoa tiempo, ixin icha sinao ná xinajni co rroningaconhe iná xinajni, o icha sitticaon ngain ná xinajni co ngain iná xa isincheha caso. Jañá cai c̈hoha sinao ni tomi co sinao ni Dios ngain nacoa tiempo.

Si Dios jañá nchetsá cain ca que jeho jai jí ca ngataon jngui co ndoe ondarroxema ca co rroche ca ngain ẍohi, mexinxin Dios sinchehe icha jian nganji jaha ra masqui ẍa ditticaonha ra jian ngain Dios.

Mexinxin jaha ra are tsjenguijna ra chojni noa, ẍonhi chojni ttequinhi ra, ni chojni icha amigoa ra ndacheha ra. Rroc̈ho que ttjenguijna ra chojni mé, pero jimao. Co Ndodá ra que ttjen ngajni sicon Ndo tti jaha ra sinchehe ra; co jehe Ndo tsjengaha ra Ndo hna.

’Nchehe ra tti jian jeoha are tatetsjehe icha chojni para que jehe na sicon ra na co rroẍaxaon na ixin jaha ra anto jian ra. Si jamé sinchehe ra, Ndodá ra que ttjen ngajni ẍonhi tsjengaha ra Ndo hna.

Co Jesús ndac̈ho cai: ―Are jaha ra sinttecjáño ra para ixin Dios, dinttechinha ra inchin tti chojni que ncheha inchin ndac̈ho. Chojni mé ndac̈ho na ixin tecjáño na para ixin Dios pero nahi, ixin chojni mé dinttechín na para que icha chojni dicon que ixin jehe na tecjáño na. Pero janha rrindattjo ra seguro que chojni mé Dios ẍonhi tsjenguehe na hna ixin ochonda na tti sacha na. Pero jaha ra are sinttecjáño ra para ixin Dios, tontti ra jinda ngá con ra co nchejinji ra já ra jian, para que icha chojni rroẍaxaonha na que ixin jaha ra tecjáño ra para ixin Dios. Jeho Ndodá ra que ttjen nganji tsonohe Ndo, co jehe Ndo tsjengaha ra Ndo hna.