Text: © The Bible Society of Zambia, 2003 Audio: ℗ 2012 Hosanna

Lunda - 2003 Edition (Drama - NT)

The Holy Bible in Lunda Ndembu © United Bible Societies, 2003. 

Hamulungu dodifuku datachi, hiyakwinza kwijamu hankunku yakucha, anasendi nyitondu yamavumba amawahi yanaloŋeshuwu.
Hiyakuwana ilola anadilaŋumuni dehi, anadifumishi kwijamu.
Hiyakwiŋilamu, kuwana mujimba waMwanta Yesu mwosi.
Chadiŋi nakujinokawu chumichi, kutala amayala ayedi anemani kwakwihi, anavwali mahina atoŋeka chejeji.
Ambanda hiyakutiya woma, anoŋama nimesu awu hamaseki. Owu amayala hiyakwila nawu, Mudi nakukeŋeladi wamumi mukachi kawafu?
Hadi munuku, wasaŋuka dehi mudi afu. Anukenu chayilejeliyi hadiŋiyi muŊaliliya,
nindi, Mwana kaMuntu chiŋa akamulubula kumakasa awakwanshidi, akamupopela hakulusu, wakasaŋuka mudi afu hefuku damuchisatu.
Hiyakwanuka mazu indi,
hiyakufuma kwijamu kwayiluwu, hiyakuleja ikumi nawumu (11) niakwawu ejima yuma yejimiyi.
Owu ambanda adiŋi niMariya Mandaleni, niYowana, niMariya mama yaYakoba, hamu nawambanda amakwawu nawa, hiyakuleja apostolu yumiyi.
Mazu awa hiyakuyitiya neyi adi nakuhosha tuhu; kuyikuhwelela kwawu nehi.
Petulu hakunyamuka, hakuya lufuchi kwijamu, hakubandama nakutalamu; hakumona mahina atooka adi hakankawawu. Hakufunta kwiindi nakujinoka yuma yanamoniyi.

Kutala akwawu ayedi adi nakuya ifuku dodenodu kumukala ijina dawu Emawusi, wekala chintampu naYerusalema kafwampi neyi 11 km.
Adiŋi nakuhanjika yuma yinamwekani yejima.
Chadiŋi nakuhanjikawu nakudihujola, yomweni Yesu hakukundama kwakwihi, hakwenda nawu.
Ilaŋa mesu awu akaŋenyi kumwiluka.
Hakuyila nindi, Oyu nsaŋu yimudi nakuya nakuhosha, hinsaŋwinyi? Wena hiyakwimana ku-ka nakudihomba.
Wumu ijina dindi Kilopa, hakumwakula nindi, Eyi yeyi mwenyi kankaweyi muYerusalema, wunabuli kwiluka yuma yinamwekanumu mafuku anu?
Hakuyila nindi, Yumanyi? Wena hiyakumwakula nawu, YaYesu wakuNazareta, wadiŋi kaprofwetu wasweja nikunyidimu yindi nikumazu indi, kumesu aNzambi nikumesu awantu;
ninichi chamulubulawu kudi akulumpi jawatupristu hamu nawanyuuli jetu, akamuhishi namuloŋa wakumujaha, amupopela nihakulusu.
Ilaŋa etu twadiŋi nakukuhwelela netu diyi wukukeŋa kukuula Isarela. Eŋaŋi, hayuma yejimiyi hanalundami ninsaŋu yikwawu; lelu ifuku damuchisatu kufumisha helawu yumiyi.
Akwetu ambanda amenekela kwijamu anatuhayamishi.
Chanawanuwu mujimba windi mwosi, hiyakwinza nakwila nawu amona chimwenu chawaŋelu ela nawu yena wamumi.
Akwetu amakwawu twadiŋi nawu aya kwijamu, amona mwomwashimunawu ambanda, ilaŋa yena kumumona nehi.
Yena hakuyila nindi, Mayalenu, O chimwabula kashinshi, O chimwalemendenda kukuhwelela yuma yejima yahosheli atuprofwetu!
Hichawahilili Kristu kukabakana yumiyi, akeŋili nimulubanji lwakulema kwinduku?
Hakuyilumbulwila munyikanda yajila, kutachika hadi Mosi niatuprofwetu ejima, yuma yamutenenuwu yomweni.
Cheliluwu hiyakushika kwakwihi namukala kwadiŋi nakuyawu, yena hakwila nindi apandakani.
Ilaŋa wena hiyakumushinjila nawu, Kamaku hanu hetu, muloŋa kuneli dehi melela, itaŋwa dahita dehi. Yena hakwiŋila ashakami nawu.
Chanashakamiyi nawu nakudya, hakunona dinkendi, hakukiswila nkisu, hakudihumuna, hakuyinka.
Mesu awu atona nikutona, amwiluka nikumwiluka. Yena hakujimina kumesu awu.
Hiyakudileja wumu namukwawu nawu, Twatiyilahu nyichima yetu mumavumu bu-su, chadiŋi nakutulejayi munjila, hadiŋi nakutulumbulwilayi nyikanda yajila.
Hiyakunyamuka mpinji yoyenoyu, hiyakufunta kuYerusalema, kuwana ikumi nawumu (11) anapompi dehi hamu, ninawa adiŋuwu nawu.
Wena nawu, Chalala Mwanta nasaŋuki mudi afu, wamwekana dehi nikudi Shimona.
Akwawu ayedi hiyakushimuna yuma yanamonuwu munjila, nichanamwilukuwu hakuhumuna dinkendi.


Hadiŋi nakuhoshawu yumiyi, kukasumuka yomweni Yesu nemani dehi mukachi kawu. Hakuyila nindi, Kuwunda kwikali nanenu.
Ilaŋa wena hiyakutiya woma, afwa nimutentu, hiyakutoŋojoka nawu tunamoni musaalu.
Yena hakuyila nindi, Munaakaminidi? Mukudihujoleladi munyichima yenu?
Talenu makasami ninyendu yami, yami aweni hohu. Nkwatakwatenu muntiyi, musaalu hakweti musunyi nimafwaha, neyi ichi chimunanmonamuku.
Chanahoshiyi ochu, hakuyileja makasindi nimadatilu indi.
Iku achidi kanda akuhweleli namuzaŋalu wawu nikujinoka, yena hakuyila nindi, Kunu mukweti yakudya?
Hiyakumwinka chibalu chanshi chakuteleka dehi, nimutu wawuchi.
Yena hakutambula, hakudya, iku adi nakumutala.
Hakuyila nindi, Diwu mazu nahosheli hinadiŋi nanenu, akwila nami, yuma yasonekeluwu munyikanda yajila yejima, yamunshimbi yaMosi, nimudi atuprofwetu, nimumasamu yantenenuwu, chiŋa yakalumbuluka hohu.
Hakujikula kashinshi kawu kulonda eluki mwalumbulukila nyikanda yajila.
Hakuyila nindi, Anasoneki nawu Kristu chiŋa akakaba, akasaŋuka mudi afu ifuku damuchisatu;
akashimwaŋena mwijina dindi nsaŋu yakubalumuka mumuchima, nikuyanakena nshidi, mwahita nyunza yejima, kutachikila kuYerusalema.
Nindi, Enu yenu ayinsahu yayumiyi.
Tiyenu, nukutemesha hadenu Kukana kwakaniniyi Tata yami; ilaŋa chiŋililenu muŋanda, kushika nihakayivwikawu ŋovu yakufuma kwiwulu.

Hakuyilombola nichashikiluwu kwakwihi naBetani. Hakwolola makasindi kwiwulu, hakuyikiswila nkisu.
Iku wudi nakuyikiswila nkisu hakwambuka nawu, amutwala nimwiwulu.
Wena hiyakudifukula kudi yena, hiyakufunta kuYerusalema namuzaŋalu waweni.
Hiyakwikalaŋa muTembeli hefuku hefuku nakumukiswila Nzambi nkisu.

بشنويد Luka 24