Keyagana: Atafa Kotalakeʼe Saufa Kotalakeʼeʼmae Bible

Atafa Kotalakeʼe Saufa Kotalakeʼeʼmae

Gotilamiyapiʼmo malage huʼa mono huʼa neʼapataya vayaʼaiteʼmo yagaiʼa apateʼnaya vayanagi vayatama vayanagi keʼaepa gemo avoʼmo kaeʼa aliʼa apaya neʼmalaya vayanagi magoʼe kanisole vayanagi huʼa ge huge afige huʼnae. Huteʼapaeʼmo Yesuʼa ayatalateʼmo nofi kiʼa ateteʼa avaleliʼuʼa kiyape vekamo agiʼamo Pailati ayapiʼmo ateʼnae. Pailatiʼa hunoʼaeʼmo, Yu vayaʼaiteʼmo yagaika apateʼnana kini vekamo maiʼnapiye, huno afi geʼnigenoʼaeʼmo, he, ani alagi gemo nehane, huno huʼniye. Mono huʼa neʼapataya vayaʼaiteʼmo yagaiʼa apateʼnaya vayaʼmogi huʼapaeʼmo, ina hosu kava huʼniye ma hosu kava huʼniye, huʼa huteʼa huʼa faipa huʼa ateʼnae. Halate Pailatiʼa hunoʼaeʼmo, ani geleʼmo aeka atagaina huka mago gemo afaʼa osugapiye. Muki kavaʼaeʼmo kagaefeʼmo nehaya gemo afiyo, huno huʼnigeno Yesuʼa halate magoʼe huno ge osuno maiʼnigenoʼaeʼmo Pailatiʼa hau aiʼniye.


Pailatiʼa Yu vayaʼai hopa afinaʼmo Pasova neʼyaʼmo yagita nehaya afinaʼmo kalavusi huʼa apateʼnaya vayapatiʼmo muki vayaʼmogimo kafugaʼae kafugaʼaeʼmo magoke vekamo lekana paiʼa ateʼnaya vekamo ategeno ute ute huʼnae. Ani afinaʼmo mago vekamo agiʼamo Malamasiʼa kalavusi huʼa ateʼnaya vekamo maiʼniye. Malamasiʼe mago vayaʼmogiʼeʼmo gamani vayaʼaina kamitimo apamagiteʼa aliʼa hapa faiʼa apatalesayafeʼmo huʼnageʼapaeʼmo kalavusi huʼa apateʼnae. Asole vayaʼmo aliʼa anupa huʼa maiʼneʼa Pailatifeʼmo huʼapaeʼmo, muki kafugaʼae kafugaʼaeʼmo nehana agufa kavakeʼmo huka lato, huʼa huʼnagenoʼaeʼmo Lapakaeteʼmo yagaino lapateʼniya kini vekatapimo hatu maeta atesayafeʼmo nehafiye, huno apafi geʼniye. Agaefeʼmo mono huʼa neʼapataya vayaʼaiteʼmo yagaiʼa apateʼnaya vayaʼmogi apaipa kafamo haeʼnayaʼmofeʼmo avalaliʼeʼa nayapiʼmo ateʼnae, huno agesa afiʼniye. Afiʼniyaʼmofeʼmo Yesufeʼmo ge huno apafi geʼniyaʼmonanafa mono huʼa neʼapataya vayaʼaiteʼmo yagaiʼa apateʼnaya vayaʼmogi muki vayaʼai apaipafiʼmo huʼa fugali huʼapaeʼmo, Pailatifeʼmo hutapaeʼmo, Malamasikeʼmo ato, hutapa ha paiyo, huʼa huʼnae. Pailatiʼa halate asole vayaʼaifeʼmo hunoʼaeʼmo, Malamasina hatu maeʼna atesuvana Yu vayaʼaiteʼmo yagaino neʼapateya kini vekae hutapa agi neʼaya vekalegamo na kavaʼmo hisuve, huno apafi geʼniye. Apafi geʼnigeʼapaeʼmo alopa gefatiʼmo halate huʼapaeʼmo, malipu yosaleʼmo nili aiteka alika he tika ato, huʼa huʼnageno na agufa hosu kavaʼmo huʼnigetapaeʼmo malipu yosaleʼmo nili aigefeʼmo nehae, huno apafi geʼnigeʼapaeʼmo, malipu yosaleʼmo nili aiyo, nili aiyo, huʼa huʼnae. Pailatiʼa asole vayaʼmogimo amuse huʼa atesayafeʼmo apakaetefeʼmo Malamasiʼmo hatu maeno ateʼnigeno uʼniye. Hatu maeno ateteno ati vayaʼaifeʼmo hunoʼaeʼmo, Yesuʼa nofi kayotetiʼmo amagiyo, huno huteno ati vayaʼai apayapiʼmo malipu yosaleʼmo nili aiteʼa aliʼa he tiʼa atesayafeʼmo avaleno apamiʼniye.


Ati vayaʼmogimo avaleliʼuʼa gamani vayaʼaiteʼmo yagaino neʼapateya vekamo nopiʼmo uʼa haiʼa ateʼneʼa muki ati vayaʼaifeʼmo ge huʼnageʼa eʼa aliʼa anupa huʼa maiʼnae. Apakaemo haesa yatala kukenamo yagaiʼa neʼapataya kini vayaʼmogi neʼvaiya agufa kukenamo aigofe kukena vaiʼa ateteʼa aufe nofiʼmo aliʼa aigofe kakolitamo yagaiʼa apateʼnaya kini vayaʼmogi neʼmalaya agufa kakolitamo alo huteʼa agenopaleʼmo maleʼa ateʼnae. Maleʼa ateteʼa he tiʼa aepa faiʼa huʼapaeʼmo, Yu vayaʼaiteʼmo alaʼapimo yagaika neʼapatana kini vekaʼapimogae, huʼa, Alagepa huka maiyo, huʼa aigofe gemo huteʼa huʼa amuse huʼa ateʼnae. Agenopaleʼmo kayotetiʼmo amagige apaviʼna heʼa atege huteʼa apaleʼya faiʼneʼa aigofe mono huʼnae. Huʼa ami maleteʼa kigi yokalo gemo huʼa ateʼa hano huteʼapaeʼmo haesa kukenamo asagiʼa maleteʼa agaiʼa kukenamo aliʼa vaiʼa ateʼnae. Vaiʼa ateteʼa malipu yosaleʼmo nili aiteʼa aliʼa he tiʼa atesayafeʼmo avaleliʼa uʼnae.


Kateʼmo neʼvagenoʼaeʼmo Saimoniʼa Sailini kotega vekamo Alekasanaʼe Lufasiʼeʼmo afoʼanimo koʼamo ataleno neʼegeʼa fotu huʼnae. Ati vayaʼmogi huʼapaeʼmo, malipu yosamo alika kofilika uvo, huʼa huteʼa aliʼa kofiʼa ateʼnageno kofilino uʼniye. Uʼa Gogatagayagae huʼa agi neʼaya agimo aepaʼamo anu ayamufagayagamo uʼa avaʼyi huʼnae. Uʼa avaʼyi huteʼa nofi alagafati anipiʼmo atu neheya malasinimo agiʼamo meamo aliʼa lakiteʼa amiʼnayana oʼneʼniye. Apakaemo malipu yosaleʼmo nili aiteʼa aliʼa he tiʼa ateʼnae. Kukenaʼamo alisayafeʼmo yafatetiʼmo yokalo leteʼa aliʼa fako huʼa aliʼnae. Yegemo leno hakale huʼnigeʼapaeʼmo aliʼa he tiʼa ateʼnae. Pailatiʼa mago avoʼmo ina kava huʼnigetaeʼmo amagiʼnone, huʼa avoʼmo nekaya agufa avoʼmo kaeʼniye. Ani gemo avoʼmo kaenoʼaeʼmo, Yu vayaʼaiteʼmo ala vekaʼapimo yagaino neʼapateya kini vekae, huno avoʼmo kaeteno agenopaleʼmo maleʼniye. Lole vekalaʼmoganimo vayaʼmo apamagiteʼana kumayaʼmo neʼaliʼa vekalaʼmo agaeʼeʼmo malipu yosaleʼmo nili aiteʼa mago vekamo lamaga haopaleʼmo aliʼa he tiʼa ateteʼa mago vekamo hoga haopaleʼmo aliʼa he tiʼa ateʼnae. Ani kavafeʼmo Goti mukufiʼmo avoʼmo kae maleʼniya gemo afole aiʼniye. Ani gemoʼa hunoʼaeʼmo,
agaeʼe keʼaepa gemo amagiʼa neʼatalaya vayaʼeʼmo magoke agufa vayaʼmo maiʼnae, huʼa apakesa afiʼnae,
huno huʼniye. Kateʼmo u eʼa huʼnaya vayaʼmogimo ageteʼa keka huteʼapaeʼmo, he, huʼa, alopa mono noʼmo heʼna halagape vaiteʼna loleʼe magoʼe afinaʼmo halate kiʼna hano huguve, huka huʼnana vekamogi kagaika kagufamo alika katika kahau vaiyo, huʼa huteʼa huʼa faipa huʼa ateʼnae. Ina kava huʼa mono huʼa neʼapataya vayaʼaiteʼmo yagaiʼa apateʼnaya vayaʼe keʼaepa gemo avoʼmo kaeʼa aliʼa apaya neʼmalaya vayaʼmogiʼeʼmo apakaiʼapimo huʼapaeʼmo, alu vayaʼaina afaʼa hapa maeʼniyanageno agaiʼamo afaʼa hau oʼvaigiye. Kalaisi vekamo Isaleli vayaʼaiteʼmo yagaino neʼapateya kini vekamogeno aino akaino eminesigeta agetetaeʼmo lama gemo nehiye, huta hugune, huʼa huteʼa huʼa faipa huʼa ateʼnae. Ani agufa gemo huʼana lole vekalaʼmo agaeʼeʼmo magokepi nili aiteʼa aliʼa he tiʼa anateʼnaya vekalaʼmoganiʼeʼmo huʼana faipa huʼana ateʼnaʼae.


Felugakukuʼmo muki haopalegamo loleʼe magoʼe aovamo hani huteno uneʼmo yegemo leʼniye. Une afafamo Yesuʼa alopa gefatiʼmo keya aeno ge hunoʼaeʼmo, Eloi, Eloi lama samakatani, huno huʼniye. Ani ge huʼniya gemo aepaʼamo
Gotiʼnimo, Gotiʼnimo, huno, na kava higeka nataleka uʼnane,
huno huʼniye. Huʼnigeʼa mago vayaʼmo haopaleʼmo he tiʼa maiʼnaya vayaʼmogimo ani gemo afiteʼapaeʼmo, Afiyo, huʼa, Ilaiyafeʼmo keya neʼae, huʼa huteʼa mago vekamo nagu nagu hununo kakiʼnofikana yaʼmo alino nofi alagafati anipiʼmo aeteno yatala kanipa kayoteʼmo faino lanu paiteno nesiyafeʼmo amiʼniye. Amitenoʼaeʼmo, afaʼa ageta maigetao, huno, Ilaiyaʼa emineno malipu yosaletiʼmo aino akaino atesifigeta agegaune, huno huʼniye. Yesuʼa alopa gefatiʼmo keya aeno ge huteno faliʼniye.
Faliʼnigenoʼaeʼmo alopa mono nopiʼmo alapaʼage kena aeʼa akani maleʼnaya kena anagatiʼmo aeno apake ailino lamino afelaga lole huʼniye. Ati vayaʼaiteʼmo yagaino apateʼniya vekamoʼmo aulagaleʼmo he tino maiʼneno afiʼnigeno alopa gefatiʼmo keya aeno ge huteno faliʼnigeno agetenoʼaeʼmo, lama ge nehuve. Ani vekamo Goti mafaʼneʼamo maiʼniye, huno huʼniye. Mago aʼne anagamo aise afagiʼaleʼmo he tiʼa maiʼneʼa aulu heʼa ageʼa maiʼnae. Ani aʼnefiʼmo Maliyaʼa Maganala kotega anagi Maliyaʼa henaga Yemisigani Yosesigani itaʼanimoʼagi Salomeʼagi huʼa maiʼnae. Yesuʼa hogoteno Galeliya kotegamo umenitata nehigeʼapaeʼmo ani aʼnemogimo akame huʼa neʼuʼapaeʼmo ha maeʼnae. Mago asole aʼne anagamo agaeʼeʼmo Yulusalemu kotegatiʼmo eʼnaya aʼneʼeʼmo anifiʼmo maiʼnae.


Yegemo uno lamino falegefe huʼnigenoʼaeʼmo Yosefeʼa Alamatiya kotega hogote kanisole vekamoʼmo Gotiʼa yagaino apateʼniya kavaʼmo afole aisiya afinafeʼmo agava maiʼniya vekamo eʼniye. Ani afinaʼmo alo nehaya afinaʼmo haneʼniyaʼmofeʼmo egamo Sapati afinaʼmo afole aigiye, huno huteno Yosefeʼa lokiyaʼamo alitenoʼaeʼmo koli aipamo okaliʼnigeno uno Pailatifeʼmo hunoʼaeʼmo, Yesu agufaʼamo aligesuve, huno afi geʼnigeno Pailatiʼa hunoʼaeʼmo, ago malage huno faliʼnifiye, huno huteno agesa alaʼamo afino hau aiteno ati vayaʼaiteʼmo yagaino apateʼniya vekaeʼmo ge huʼnigeno eʼnigenoʼaeʼmo, ago faliʼnifiye, huno afi geʼnigenoʼaeʼmo, ago faliʼniye, huno huʼnigeno Yosefefeʼmo hunoʼaeʼmo, kanalenagi uka aliyo, huno ha paiʼniye. Yosefeʼa yaveyave kenamo miya failineno maleʼneno Yesu agufamo aino akaino alinine emineno kenafiʼmo hayaeteno alininuno yafa kapiʼmo kino ateteno alopa yafaʼmo alino heleve heleve hulinuno yafa ka avayaleʼmo aino akani maleʼniye. Maliyaʼa Maganala kotega aʼe hamoʼamo Maliyaʼmo Yosesi itaʼamoʼeʼmo ageʼnaʼageno kino ateʼnigeʼana ageʼnaʼae.

بشنويد Maki 15