ṮAKWIIN 2
2
1Wakan momis dhali mony’cesh uni ’baarkunu mo dhali aris to kun ’koni bwaman uni mo. 2Dhali ka cim ma pesu/ mo tani Arumgimis ’baarki miim piti jin miikina a’di mo, dhali a’di ki si is ka cim ma pesu/ ’pena ris miin tom piti kun miikina a’di mo. 3Wakan Arumgimis ki ’bora cim ma pesu/ mii mo dhali kar a’di ki she/ ki dhelel dhelel mo, haali/ eya cim ma pesu/ yan mo tani Arumgimis ki si is mo ’pena ris tom piti kun miikina a’di ki uḵ jin uḵkina a’di to mo.
4Uni gwansan itana nyaḵum yil ki momis mo dhali mony’cesh mo me’d jin ’konu mmo/uḵ uni mo be.
Ka tee jin uḵa Tap̱a Arumgimis mony’cesh mo dhali momis mo tani 5ki to jin sinu e mombunto p̱iyi’d e mony’cesh naskina/ mo dhali to jin miinuwa ’tash ’koki ’ko e bunto mo mmo’ka/a le/ naskina/ mo – haali/ Tap̱a Arumgimis diki dhal uniya sho’k bway mo mmohetha p̱o/ mony’cesh mo, dhali wathimpa en’thi/ p̱iyi’d mmoḵora ’cesh mo. 6Hili jasa shile/ a’di icuki mis ’peni mony’cesh mo dhali ya’th bwam/e gi mony’cesh ki jap̱em piti mo – 7dhali yan’ko’d Arumgimis ki ’diḵil wathimpa en’thi/ ’peni bu’da’cesh mo, dhali p̱i shi/in e shush piti, shi/in jin di ki e mo dhali wathimpa en’thi/ warki’d ki jin di ki e mo. 8Dhali Tap̱a Arumgimis thosonki bwaagoŋ e Idin, e mom’pesho’k mo dhali e mun mo a’di ki kar wathi/ jin uḵkina a’di icine/ mo. 9Dhali ’pena ’cesh mo tani Tap̱a Arumgimis ki kara ’cesh jin mina cwa ’ka a’diya p̱o/ mo, aris cwa ’baar mo kun ’bora’bor kun minu hil mo dhali kun ’boron kun minu shwa maman ’peni nycine/ mo. Dhali cwa gi mondiki/e si’da/ di’d e bwaman ma goŋ mo dhali cwa jin minu nyiṯẖ to jin ’boro’d dhali jin shiyi’d diki’d si’da/ mo.
10Yi’de/ guski’d ’peni bwaman ma goŋ ma Idin mo, a’di jin wolki’d e bwaagoŋ mo dhali a’di ḵwa/kunu bwa mo mmo’ko ’kusi doŋon mo. 11Dhali gway gi yi’de/ jin ṯwa/a/ yuḵu gway ka P̱ishun mo, a’di jin guski’d mmokulum bampa/ gi Pam Hawiila isi ’baar mo e mo jin ’kokina ’dolkon gana/ mo. 12Dhali ’dolkon gana/ gi mony’cesh yan mo tani uni ’bora’bor mo. Dhala ’bica wasin dhela/ dhala wasin dhela/ jin ta’da jamas kush mo uni ’kokin mo. 13Dhali gway ḵumma/ yi’de/ jin ’kon ma p̱o/i su/ mo tani yuḵu gway ka Jihun mo, a’din ṯal ’de/ jin guski’d mo mmo’kama ’cesh gi Paŋ Kush is mo. 14Dhali ḵumma/ yi’de/ jin ’kon ma p̱o/i kwara mo tani a’di yuḵu gway ka Hiddaagil mo, a’di jin guski’d ’kup̱ki mom’pesho’k ki Pan Ashshuur mo. Dhali yi’de/ jin ’kon ma p̱o/i doŋon mo yuḵu gway ka Elp̱uraat mo.
15Dhali Tap̱a Arumgimis ki bu’th wathimpa en’thi/ mo mmokar a’di e bwaagoŋ ma Idin mmoḵorki a’di mo dhali mmokar a’di mo. 16Dhali Tap̱a Arumgimis ḵanki wathimpa en’thi/ gwo mo mmo/o gwo mo ki: /E mini shwa aris cwa gi bwaman bwaagoŋ ’baḵany mo 17hili cwa jin minu ’bi’th e ki miim ’boro’d mo dhali ki mii shiyi’d mo tani /e mini dhalki a’di ki shwa mo, haali/ ka tee jin mina /e shwa a’di mo tani /e mini wu mo be.
18Dhali yan’ko’d Tap̱a Arumgimis ki o gwo mo ki: A’di diki ’bor mmokar wathimpa en’thi/ a’di ’de/ kan mo. Aha/ mina mii uḵ ki a’di amanwoṯẖ, a’di jin midi gam ki a’di mo. 19Wakan ’pena ’cesh mo tani Tap̱a Arumgimis ki uḵa ris tombwaasho mo dhali aris ’dii kun p̱en e momis mo, dhali a’di ki ’doyu uni wathimpa en’thi/ mmohil mo ki a’di midi yer uni gway mo, dhali ma gway gunn kun yerkina wathi/ to/e kun uḵkunu mo kun ’ko ki e mo tani a’di ita gway kun yeru uni mo. 20Wathi/ en’thi/ ki c̱i aris to/e gway ’baar mo dhali aris ’dii kun p̱en e momis mo dhali aris tombwaasho mo. Hili gom wathi/ en’thi/ mo tani wathi/ p̱iyi’d jin gamkunu jin midi woṯẖ a’di, a’di jin midi gam gom a’di mo. 21Wakan Tap̱a Arumgimis ki dhal mo jin ’ce’du e kagahara mmobiṯa p̱o/ wathimpa en’thi/ mo, dhali ki a’di di’di mmo/ish e mo tani a’di bu’thki’da simaŋ gwar ṯal ’de/ ’peni a’di mo dhali a’di ki ’dap̱ki buŋgwar is ki shuman ’twa/ mo. 22Dhali ’pena simaŋ gwar jin bu’thkina Tap̱a Arumgimis ’peni wathiŋ gwaṯẖ mo tani a’di ki uḵ a’di mmota a’bom mo dhali guya yim e wathiŋ gwaṯẖ mo. 23Dhali yan’ko’d wathiŋ gwaṯẖ ki o gwo mo ki:
Hayyiye ayaase ita’da simam pema
dhali buŋgwar is ki shuman is pema.
Ayim minu yuḵ gway ka A’bom mo,
haali/ ayim a’di bu’thkunu ’peni Wathiŋ Gwaṯẖ mo.
24Dhali gom gwo gi wakan mo tani wathiŋ gwaṯẖ midi dhal com ’pen mo dhali kum mo dhali ’dap̱ is piti me’d ki ash mo dhali uni su/ warkina buŋgwar is ki isa ’de/ mo. 25Dhali wathiŋ gwaṯẖ dhali ashim piti mo tani uni ’ko ki is ’te/ mo dhali uni ’kona is ki ’theya ’the mo.
Currently Selected:
ṮAKWIIN 2: Udk
Tõsta esile
Share
Copy
Want to have your highlights saved across all your devices? Sign up or sign in
©Society for International Ministries, 2013