Luka 20
20
Jeso Mbwaakabuzhiwa Bwami Bwakwe
(Matayo 21:23-27; Maako 11:27-33)
1Bumwi buzuba Jeso naakaakuyiisha bantu muŋanda ya Leza u kukambauka Makani Mabotu, bapaizhi bakando u balembi kubicilizha ubakando ba cishi, bakeza kwakwe 2boombuzha ati, “Tushimwine, no ninsanaanzhi nshucisha shintu sheshi? No nguni wakakupa insana shesho?”
3Jeso wakabaingula ati, “Ame ndamubuzha mubuzho. Amuŋambile, 4nguni wakamutuma Johani kupapatiza, ngu Leza na mbantu?”
5Inzho bakakanka kubuzhanya beni ubeni ati, “Anu twaambe acani? Kuti twaambe ati ngu Leza wakamutuma, ulatubuzha ati, no kaamboonzhi mwiina nimwakamushoma? 6Pele kuti twaambe ati, lwakahwa ku bantu, bantu boonse baba balatuuma mabwe, kaambo balizhi ati Johani kali mushinshimi.” 7Ubobo bakamwiingula ati, “Tatumwizhi wakamutuma.”
8Jeso wakabaambila ati, “Ame nshimushimwini wakampa insana shincisha sheshi.”
Cikozhano ca Balimi mu Muunda wa Misaansa
(Matayo 21:33-46; Maako 12:1-12)
9 #
Aiz 5:1
Inzho Jeso wakabaambila bantu cikozhano ceci, ati, “Muntu umwi wakashimpicila micelo ya misaansa mu muunda wakwe. Wakooshisha mu matashi abalimi waya ku cishi cimwi kukala ciindi cilamfwu. 10Nicakashika ciindi ca kutebula misaansa, wezo muntu wakatuma musebezhi ku balimi babo kwaamba bamupe aze mwaabilo wakwe. Pele balimi bakamuuma musebezhi wezo ukumutanda cinkambaminwe. 11Kuhwaawo wakatuma uumwi musebezhi ku balimi kwaamba bamupe micelo, aze bakamuuma bamutubulusha bamutanda cinkambaminwe. 12Ulimwi wakatuma musebezhi watatu, wezu walo bakamuyasa bamusowela kunze ku muunda. 13Inzho mukamwini muunda wa masaansa wakaamba ati, no ndacita buti? Ndatuma mwanangu nakufwunwa ambweni balakamulemeka! 14Pele balimi nibakamubona bakalihwiya ati, nguwezu shimulyazhina, atumuyaye kwaamba muunda ube wesu! 15Ubobo bakamuyaya bamusowela kunze ku muunda wa masaansa.”
Jeso wakababuzha ati, “No mukamwini muunda ulabacita buti bantu babo? 16Ulakeza kubayaya balimi u kupa bantu banji muunda wakwe wa masaansa.”
Bantu nibakateelela bobo bakaamba ati, “Pe pe kutabi bobo!”
17 #
Inte 118:22
Pele Jeso wakabalanjilila, wababuzha ati, “No maŋwalu aza aambilaanzhi ati,
“Ibwe ndibakasowa bazashi,
lyaba ndiibwe lizandika lya mucooko ca ŋanda, cilapandululaanzhi?
18“Kufwumbwa muntu uukaawila ebwe leli ulaacokauka, ulimwi muntu ngulikaawila ibwe leli lilakamupondaula.”
Makani a Mutelo
(Matayo 22:15-22; Maako 12:13-17)
19Inzho balembi u bapaizhi bakando bakasoleka kwaamba bamukwate Jeso awo ngoona, kaambo bakezhiba ati mbaakaakukumbilizha mucikozhano ceci, pele bakatiya bantu. 20Ubobo bakakanka kumoongelezha kwaamba bayane ciindi cakumukwata. Bakatuma bantu bashikoopoopa amenso kumulingalinga mu twaambo kwaamba bamukwashe ukumubetesha kunkuta ya mweendelezhi. 21Baba bantu bakamwaambila Jeso ati, “Mwiiyi, tulizhi ati uwe ulaamba u kuyiisha shiluleme. Ulimwi tulanga cimo uciwa ca muntu, pele ulayiisha inzhila ya lushinizho. 22Twaambile, sa tulyeelele kutela mutelo ku muleli mukando waku Loma na pe?”
23Jeso wakaazhiba maanu abo, ngoonaawo wakabaambila ati, 24“Amuntondezhe ili. No cikozhano ceci izhina leli nshakani?” Bakamwiingula ati, “Nshaka Kaizala waku Loma.”
25Inzho wakabaingula ati, “Cabota! Amupe muleli mukando waku Loma shintu shakwe, ulimwi amupe Leza shinakwakwe.”
26Inzho bakakacilwa kumuyanina kaambo kakumubetesha, ubobo bakaliinza bulyo, kwiingula kwakwe kwakabazoosha.
Makani Akubuka ku Bafwu
(Matayo 22:23-33; Maako 12:18-27)
27 #
Inc 23:8
Ba Saduki bakeza kwa Jeso. Babo baamba ati bafwu tabakabuci. Bakamubuzha ati, 28#Ciz 25:5“Mwiiyi, Mozesi wakatulembela mulawo waamba ati, kuti munyoko wafwa katwele mukaintu pele wiina kuzhala bana, munina ulyeelele kumukona mukamufwu kwaamba amuzhalile bana mufwu. 29Inzho kakuli babunina mu lushomo bali ciloba, mukando wabo wakatwala mukaintu pele wakafwa katana kuzhala mwana. 30Uumucilila wakamukona mukamufwu, 31ulimwi uwatatu mbubona, pele aze wakafwa. Kabaya bufwa boonse mpaka kushicila kuli wa ciloba, kabatashiyi bana. 32Ku mamanino aze mukaintu wakafwa. 33Inzho bwakashika buzuba bafwu mbubakaabushiwa, wezu mukaintu ulakaba mukani?”
34Jeso wakabaingula ati, “Balombwana u bakaintu baano mazuba balatwalana, 35pele babo boonse bakaatambulwa muciindi cizhiza, ukubushiwa ku bafwu, tabakatwali ulimwi tabakatwazhiwa. 36Balakaba ukoya baanjelo, ulimwi tabakafwi linji pe. Balakaba bana baka Leza kaambo babuka kuhwa ku bafwu. 37#Kul 3:6Aze Mozesi wakaamba kaanzambwene ati bafwu balakabushiwa. Nkaambo naakalemba makani a cisoko cizaka mulilo, wakamwaambila Mwami ati, Leza waka Abulahamu, Leza waka Aizeki, ulimwi u Leza waka Jakobo. 38Ngu Leza wa bantu balanga tali Leza wa bantu bafwu, kaambo kumenso akwe boonse balalanga.”
39Inzho balembi bamwi Bakaamba ati, “Koko nkwiingula kubotu mwiiyi!” 40Ubobo bakatiya kumubuzha mibuzho iinji.
Sa Kilisito Mwanakwe Ni?
(Matayo 22:41-46; Maako 12:35-37)
41Jeso wakababuzha mubuzho ati. “No Bantu balaambilaanzhi ati, Munanike wa Leza ndunungu lwa Devidi?” 42#Inte 110:1Nkaambo Devidi lwakwe mwini wakaamba mwibuka lya Ntembauzho ati,
“Mwami Leza wakaambila Mwami wangu ati,
‘Kala kululyo lwangu,
43mpaka nkabice ba shinkondonoko kwaamba cibe cilyatilo ca matende ako.’
44Bolya Devidi mbwakamwaamba ati, ‘Mwami.’” No ulakonzha buti kuba mwanakwe?
Jeso Waamba Amubacenjelele Bamaayi ba Mulawo
45Inzho boonse bantu nibakaakupupulele Jeso wakabaambila ba shiciiya bakwe ati, 46“Amubacenjelele balembi, babo bazanda kweendeenda balisamine masani malamfwu. Ulimwi balifwini kwaanzhiwa ca bulemu mu shisambalilo, u kusala shuuna shibotu mushikombelo shaba Juda, u masena a bulemu mu mapobwe. 47Balacenga bamuka bafwu ukubananga maanda abo. Ulimwi balazanda kucita mambonwa ku bantu kwiita mu kukomba shikombyo shilamfwu. Leza ulakabapa cibebyo cibaala kubiya!”
Currently Selected:
Luka 20: ILL
Tõsta esile
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.