Luka 18
18
Cikozhano ca Mukamufwu Umubeteshi
1Inzho Jeso wakabaambila cikozhanyo cakubayiisha kwaamba ati balyeelele kukomba lyoonse bataakulengaana. 2Wakabaambila ati, “Mu munzhi umwi kamuli mubeteshi wezo watakaakutiya Leza, ulimwi katalemeka bantu. 3Mu munzhi wezo nguwena kamuli mukamufwu wakaakwiza kumubeteshi wezo kulyeenzelela ati, ‘Nkoswela kaambo kashimulanduma!’ 4Kwakaita ciindi cilamfwu mubeteshi wezu ulakaka, pele limwina, wakatweluka mu monzo waakwe ati, ‘Nikuba kwaamba ati nshimutiyi Leza, ulimwi nshilemeka muntu, 5pele kaambo kakuti mukaintu wezu wansubula, ndamukoswela mulandu wakwe ndikalile, atampenzha linji.’”
6Ngoonaawo Jeso wakabaambila ati, “Amuteelele mbwaamba wezu mubeteshi uutaluleme. 7Sa Leza takonzha kubacitila shiluleme basale bakwe bamukwiilila muunza u mashiku kwaamba abayohwe? Ulimwi sa tafwambaani kubayohwa? 8Ndamushimwina ati, ulakabakoswela twaambo twabo ca kufwambaana. Sa Mwanaa Muntu akashika ano anshi ulakayana lushomo?”
Cikozhano camu Falisi u Shimutelo
9Ulimwi Jeso wakaamba cikozhanyo ceci ku bantu balishoma bululami kubaala bamwi. 10Wakaamba ati, “Kakuli balombwana bobile bakaya muŋanda ya Leza kukomba. Umwi kali mu Falisi, umwi kali shimutelo. 11Mu Falisi wakazhima wakomba ati, ‘Ndakulumba Leza nkaambo ume nshili ukoya bantu boonse bamwi, batashomeki, bashibutongo, bashimamambe, na ukoya wezu shimutelo. 12Ndaliimya kulya shiindi shobile munsunda yomwi, ulimwi ndapa cekumi kuli shesho shoonse nshinjana.’ 13Pele shimutelo wakazhima ansansa, katalozha ukusansula menso kwizeulu, wakalikwata acamba waamba ati, ‘Leza mfwila luse ume, ndishishibi.’” 14#Mat 23:12; Lk 14:11Jeso wakabaambila ati, “Ndamushimwina ati shimutelo wakabweela kwakwe ulilulamicilwe, pele mu Falisi wiina nakalulamikwa. Nkaambo kufwumbwa muntu uulisumpula ulakafwiinshiwa, pele wezo muntu uulifwiinsha ulakasumpulwa.”
Jeso Watulonjezha Twana
(Matayo 19:13-15; Maako 10:13-16)
15Bantu bamwi bakaleta twana kwa Jeso kwaamba atukwate. Inzho ba shiciiya bakabalemanina babo bakaleta twana. 16Pele Jeso wakabeta bana babo, waamba ati, “Amubaleke bana beze kwangu mutabakasha, nkaambo Bwami bwaka Leza mbubwabo bantu bali ukoya bana. 17Cini cini ndamushimwina kwaamba oonse muntu utatambuli Bwami bwa Leza ukoya mwana takabunjili pe.”
Muntu Muhubi
(Matayo 19:16-30; Maako 10:17-31)
18Mweendelezhi waba Juda umwi wakamubuzha Jeso ati, “Mwiiyi mubotu, no nciteenzhi kwaamba njane bumi buteeli?” 19Jeso wakamubuzha ati, “No wentilaanzhi ati mubotu? Kwiina mubotu cita Leza ice bulyo. 20#Kul 20:14; Ciz 5:18; Kul 20:13; Ciz 5:17; Kul 20:15; Ciz 5:19; Kul 20:16; Ciz 5:20; Kul 20:12; Ciz 5:16Uliizhi milawo yaamba ati, ‘Utabi shimamambe, utabi nuuyaya, utebi, utalenjelela umwi kaambo, lemeka uso u banoko.’”
21Muntu wezo waingula ati, “Milawo yezhi yoonse ndeecilila kuhwa kubwana bwangu.”
22Jeso nakateelela bobo, wakamwaambila ati, “Kuli comwi bulyo cisheele ncuuyelele kucita. Ukauzhe lubono lwako loonse, wamana mali ukaape bapushi, ulakayana lubono kwizeulu, wamana uzhize uncilile.” 23Wezo muntu naakateelela bobo wakalyeetezha, kaambo kahubile cini cini.
24Jeso wakamulanjilila waamba ati, “Ncizumu cini cini ku bantu bahubi kunjila mu Bwami bwaka Leza! 25Ncuubauba kwaamba inkamela injile mukapulo kansonde kubaala muntu muhubi kunjila mu Bwami bwaka Leza.”
26Bantu bakateelela ceci, bakamubuzha Jeso ati, “No nguni ukonzha kufwutulwa?”
27Jeso wakaingula ati, “Sheshi shintu shibakakila bantu, Leza tashimukakili.”
28Pita wakaamba ati, “Langa! Uswe twakashiya maanda esu tulikucilile.”
29Jeso wakabaambila ati, “Cini cini ndamushimwina ati kufwumbwa muntu ukaashiya iŋanda yakwe, na mwinakwe u banina, nibaba bamuzhala, na banakwe ukaambo ka Bwami bwaka Leza, 30ulakatambula shinji shinji muciindi ceno, muciindi ciza ulakatambula bumi buteeli.”
Jeso Waamba sha Lufwu Lwakwe Ciindi Catatu
(Matayo 20:17-19; Maako 10:32-34)
31Inzho Jeso wakaambula ba shiciiya bakwe bali ikumi ubatwesha bobile wabaambila ati, “Amubone! Tulaya ku Jelusalemu, koko shoonse nshibakalemba bashinshimi sha Mwanaa Muntu nkushikaazuzucizhiwa. 32Mwanaa Muntu ulakaabwa mu matashi abamashi, balakamusaalizha, bakamutuke ukumufwila mate. 33Balakamukwipaula u kumuyaya, pele kubuzuba bwatatu ulakabuka.”
34Inzho ba shiciiya kwiina niciba comwi ncibakateelela ku shintu sheshi. Bayina kucizhiba ncakaakwaamba Jeso.
Jeso Waponya Moofwu
(Matayo 20:29-34; Maako 10:46-52)
35Inzho Jeso nakashika afwaafwi u Jeliko, wakayana umwi muntu moofwu ulishite kumbali kunzhila ulakumbila. 36Moofwu nakateelela bantu banji banji balaita, wakabuzha ati, “Ncinzhi cacitika?”
37Bantu bakamwaambila ati, “Jeso waku Nanzaleta nguuyita.”
38Ngoonaawo moofwu wakapozomoka ati, “Jeso! Mwanakwe Devidi! Mfwila luse!”
39Bantu bakaakusolwele bakamulemanina ati, “Liinze uwe!” Walo wakabaazha ukupozomoka ati, “Akaka Mwanakwe Devidi mfwila luse!”
40Inzho Jeso wakazhima, wabaambila bantu kwaamba bamulete moofwu kwakwe. Naakashika afwaafwi, Jeso wakamubuzha ati, 41“No ulazanda ati nkucitileenzhi?” Moofwu wakaingula ati, “Mwami, ndazanda kubona ulimwi.”
42Jeso wakamwaambila ati, “Bona! Lushomo lwako lwakuponya.” 43Ngoonaawo wakacikonzha kubona, wacilila Jeso, ukutembaula Leza. Abo bantu nibakabona ceci bakamutembaula Leza.
Currently Selected:
Luka 18: ILL
Tõsta esile
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.