Simuluho 44
44
Sinwiso sa fumaneha
1Josefa a laela sikombwa sa mwa ndu ya hae, a li, “U taze masaka a batu bao ka lico ze ba ka kona ku lwala kaufela, mi mali a yo muñwi ni yo muñwi wa bona u a kutiseze mwa saka fahalimw'a lico za hae. 2U beye sinwiso sa ka sa silivela fahalimu, mwa saka ya munyan'a bona, hamohocwalo ni mali a hae a lico.” Yo a eza mw'a n'a bulelezwi. 3Habusa, kakusasa, batu bao ba funduka ni limbongolo za bona. 4Ha ba se ba siile munzi kwahulenyana, Josefa a li ku sikombwa sa hae, “Itukise, u latelele batu bani. Ha u ta ba swala, u li ku bona. ‘Kiñi ha mu kutiselize bunde bo ne mu ezelizwe ka bumaswe cwalo? 5Kiñi ha mu uzwize sinwiso sa mulen'a ka sa silivela? Ki sona s'a nwelanga muñ'a ka, mi i sa li sona s'a itusisa h'a bata ku ziba ze taha. Mu ezize nto ye maswe hahulu.’ ”
6Sikombwa seo ha si y'o ba swala, sa bulela ona manzwi ao. 7Bona ba alaba, ba li, “Kanti u liñi, muñ'a ka, ha u bulela cwana? Ne lu si ke lwa hupula ku eza nto ye cwalo. 8Ha si u boni kuli lu ku kutiselize mali a ne lu fumani mwa masaka a luna ha lu zwa kwa Kanana? Cwale lu ka uzwa cwañi silivela kamba gauda mwa ndu ya muñ'a hao? 9Muñ'a ka, haiba u ka i fumana ku yo muñwi wa luna, yena yo a bulaiwe, mi luna kaufela lu ta ba batanga ba mulena.”
10A li, “Na lumela. Kono haiba ni ka i fumana ku yo muñwi wa mina, yena yo u ta ba mutang'a luna, mi mina kamukana mu ka ikela mu lukuluhile.” 11Kiha ba pahulula milwalo ya bona kapili, yo muñwi ni yo muñwi a tamulula saka ya hae. 12Sikombwa sa Josefa sa batisisa ka tokomelo, ku kalela ku muhulwan'a bona, mane ku t'o feleleza ku munyan'a bona, mi sinwiso sa t'o fumaneha mwa saka ya Benjamine. 13Kabakala ku swaba hahulu ba pazula liapalo za bona, ba paheka milwalo ya bona fa limbongolo, mi ba kutela ko ne ba zwa.
14Juda ni banabahabo ha ba t'o fita kwa ndu ya Josefa, ni yena n'a sa li teñi. Ba kandelela. 15Mi Josefa a li, “Mu ezizeñi? Ne mu sa zibi kuli mutu ya swana sina na, wa kona ku ziba lika ka ku laula, nji?”
16Juda a li, “Lu ka bulela sifi ku wena, muñ'a ka? Lu ka piha cwañi? Lu ka itatula ka mukwa ufi? Mulimu u patuluzi lifoso za luna! Kamukan'a luna lu se lu li batanga ba hao, muñ'a ka, isiñi yena feela ya fumanwi ni sinwiso.”
17Josefa a li, “Batili! Ha ni na ku eza cwalo. Haisi yena feela ya fumanehile ni sinwiso, ki yena ya ka ba mutang'a ka. Haili mina kaufela, mu ikele ka kozo ku ndat'a mina.”
Juda wa itapelela ka Benjamine
18Juda a sutelela ku Josefa, mi a li, “Muñ'a ka, ni lumelele ku bulela ni wena kwa mukunda. U si ke wa ni halifela, muñ'a ka, wena ya swana ni Faro kasibili. 19Muñ'a ka, u lu buzize, wa li, ‘Mu sa na ni ndat'a mina kamba munyan'a mina, nji?’ 20Lwa ku alaba kuli ndat'a luna u teñi mi s'a supezi, mi hape lu na ni munyan'a luna ya pepilwe ki ndat'a luna ha s'a cembalile. Muhulwan'a hae u shwile, mi cwale ki yena feela ya siyezi mwa mba ya m'ahe ya sa pila, mi ndat'ahe u mu lata hahulu. 21Muñ'a ka kih'a li, ‘Mu mu tise kwanu, kuli ni t'o mu bona.’ 22Mi lwa alaba, muñ'a ka, lwa li, ‘Mushimani yo h'a koni ku kauhana ni ndat'ahe. H'a ka zwa, ndat'ahe u ka shwa.’ 23Honafo, muñ'a ka wa li, ‘Ha mu sa na ku lumelelwa ku bonana ni na hape, konji munyan'a mina h'a ka taha ni mina.’
24“Ha lu se lu kutezi ku ndat'a luna, yena mutang'a hao, lu mu taluselize z'o n'o bulezi. 25Cwale a li, ‘A mu kute hape, mu y'o lu lekela liconyana.’ 26Lu mu alabile, lwa li, ‘Ha lu koni ku ya, kakuli ha lu na ku lumelelwa ku bonana ni yena, konji ha lu ka ya ni munyan'a luna. Lwa kona ku ya feela ha lu zamaya ni yena.’ 27Ndat'a luna a lu bulelela, a li, ‘Mwa ziba kuli m'ahe u pepile feela bana ba babeli. 28Yo muñwi wa bona u s'a ni siile. Ni hupula kuli u ipulaezwi ki libatana, kakuli ha ni si ka mu bona ku tuha hona foo. 29Cwale, haiba mu ni amuha yo, mi a y'o shwa, mu ta ni tiseza maswabi a ta ni bulaya mwa bucembele bwa ka.’
30“Cwalehe, muñ'a ka, haiba ni ka kutela ku ndate ni si na mwanana yo, ndate a sa bona feela kuli mushimani h'a yo, u shwile luli! Bupilo bwa hae bu iputezi mwa bupilo bwa mushimani yo. 31Luna, muñ'a ka, lu ta be lu tiselize ndat'a luna maswabi a ta mu bulaya mwa bucembele bwa hae. 32Hape, muñ'a ka, ni itamile ka bupilo bwa mwanana yo. Ni bulelezi ndate kuli, haiba ni sa kuti ni yena, ki na ya ta swanela ku nyaziwa fapil'a hae mwa bupilo bwa ka kaufela. 33Cwalehe muñ'a ka, na, ni ta ina kwanu, ni be mutang'a hao mwa sibaka sa mushimani. Yena a kute ni banabahabo. 34Ni ta kutela cwañi ku ndate haiba mushimani yo a li siyo? Ha ni koni ku bona ndate a tahelwa ki ziezi ye cwalo!”
Currently Selected:
Simuluho 44: Lozi09
Tõsta esile
Share
Kopeeri
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.