Simuluho 43
43
Bahulwani ba Josefa ba kutela kwa Egepita ni Benjamine
1Tala ya hula hahulu mwa Kanana. 2Lubasi lwa Jakobo ne lu se lu felize lico ze ne ba il'o leka kwa Egepita. Jakobo kiha sa li kwa bana ba hae. “A mu kute, mu y'o lu lekela liconyana.”
3Juda a li ku yena, “Mutu yani u lu latulezi hande-nde kuli ha lu na ku lumelelwa ku bonana ni yena, konji ha lu ka ya ni munyan'a luna. 4Haiba u lumela kuli lu ye ni munyan'a luna, fo, lu ka ya, lu y'o ku lekela lico. 5Haiba wa hana, ha lu na ku ya, kakuli mutu yo u ize, ‘Ha mu na ku lumelelwa ku bonana ni na, konji ha mu ka taha ni munyan'a mina.’ ”
6Jakobo a li, “Kiñi ha mu ni tatafalelize lika cwalo ka ku bulelela mutu yo kuli mu na ni munyan'a mina yo muñwi?”
7Ba alaba, ba li, “Mutu yo n'a tundamezi ku lu buza, mane ni ka mba ya luna, a li, ‘Kikuli ndat'a mina u sa pila, nji? Mu na ni yo muñwi munyan'a mina kamba cwañi?’ Ne lu swanezi ku alaba lipuzo za hae. Ne lu sa zibi kuli u ta li, ‘Mu y'o tisa munyan'a mina.’ ”
8Juda a li ku ndat'ahe Isilaele, “Lumela mushimani a zamaye ni na, mi lu itukiseze ku funduka. Cwale kaufel'a luna, wena, bana ba luna, ni luna ha lu na ku shwa tala. 9Ni ta toboha bupilo bwa ka kabakala hae. Ni ta ba ni buikalabelo fahalimw'a hae. Haiba ni sa mu kutisezi ku wena a iketile, a pila hande, ni ta ba ni mulatu ku wena mwa bupilo bwa ka kamukana. 10Kambe lu si ka liyeha, kambe se lu kutile misipili ye mibeli nako ye.”
11Ndat'a bona, Jakobo, a li ku bona, “Haiba ki ona mo ku lukela ku ezezwa, mu eze cwanahe. Mu lwale limpo za butokwa ze mwa naha ya luna, mi mu y'o li fa mutu yo, ze cwaleka: mafulanyana ni linosinyana, miinko ni tulyani-lyani, tundongo ni ze ñwi cwalo. 12Hape mu ekeze ni kwa mali a mina habeli, kakuli mu swanezi ku y'o lifa mali ani a n'a kutiselizwe mwa masaka a mina. Mwendi n'a kutiselizwe mwateñi ka foso. 13Mu itukiseze ku kutela ku mutu yo, mi mu nge munyan'a mina. 14Mulimu ya Maata Kaufela a mi fumanise sishemo ku mutu yo, kuli a y'o mi lukululela mwanahabo mina ni Benjamine cwalo. Haili ka na, haiba ni swanezi ku shwelwa ki bana ba ka, ni shwezwi ku felile.”
15Batu bao kiha ba nga limpo ni mali a ekelizwe habeli. Ba nga ni yena Benjamine cwalo. Ba itukisa, mi ba ya kwa Egepita ko ba il'o ipiha ku Josefa. 16Josefa h'a bona Benjamine mwahal'a bona, a bulelela mutanga ya n'a bababela ndu ya hae, a li, “Isa batu bao mwa ndu. U bulaye folofolo, u i apehe, kakuli ba ka t'o ca ni na musihali.” 17Sikombwa seo sa eza mw'a n'a bulelezi Josefa, mi s'a ba tisa mwa ndu.
18Batu bao ba saba ha ba isiwa mwa ndu ya hae, mi ba hupula, ba li, “Lu tisizwe mo kabakala mali a n'a kutiselizwe mwa masaka a luna. Ba ta lu lwanisa, ba lu hape, ba nge ni limbongolo za luna.” 19Kiha ba se ba taha ku sikombwa sa Josefa mi ba li ku yena ha ba li fa munyako wa ndu, 20“Muñ'a ka, ha si ne lu tile fa pili ku t'o leka lico! 21Cwale ha lu y'o fita fo ne lu tibelezi, lwa tamulula masaka a luna, mi yo muñwi ni yo muñwi wa luna a fumana mali a hae fa mulomo wa saka. Lu fumani mali a luna kaufela a likani hande-nde, mane lu kutile ni ona. 22Hape lu tile ni mali a mañata a ku t'o leka lico ze ñata. Ha lu zibi ya n'a kutiselize mali mwa masaka a luna.”
23Sikombwa seo sa li, “Mu si ke mwa bilaela! Mu si ke mwa saba! Mulimu wa mina, Mulimu wa ndat'a mina, ki yena ya kutiselize liluwo leo mwa masaka a mina. Haili mali a mina a pili, ne ni a amuhezi hande.” Cwale a tisa Simioni ku bona.
24Mutanga yo a ba isa mwa ndu ya Josefa. A ba fa mezi a ku tapa kwa mahutu, mi a y'o fa limbongolo za bona lico. 25Ba lukisa limpo za bona za ku t'o fa Josefa h'a ka taha musihali. Ne ba se ba utwile kuli ba ka ca hona koo. 26Josefa h'a fita kwa hae, ba tisa limpo ku yena mwa ndu, mi ba inama fapil'a hae. 27A ba buza mo ba zuhela, mi hape a li, “Ndat'a mina wa mucembele, ye ne mu bulezi kuli u teñi, u zuha cwañi? Kana u sa pila ni ku iketa hande, nji?”
28Ba alaba, ba li, “Ndat'a luna, mutang'a hao, u sa pila mi wa zuha hande.” Kiha se ba kubama ni ku inama fapil'a hae.
29Josefa h'a bona Benjamine, munyan'a hae luli, a li, “Yo ki yena ñomba ye ne mu ni bulelezi, nji? Mulimu a ku fuyaule, mwan'a ka.” 30Josefa kih'a zwa kapili, kakuli n'a shwela munyan'a hae makeke. N'a s'a bata ku lila, cwale a ya kwa musiyo wa hae, a y'o lilela kwateñi. 31Ha s'a tapile kwa pata, a zwa, a itiisa, mi a laela kuli ba tise lico. 32Josefa a fiwa a li nosi, mi bahulwani ba hae ba felwa fa tafule i sili. Haili Maegepita ba ba ne ba ca ni yena ba felwa ku ye ñwi tafule ba li nosi, kakuli ne ba hupula kuli kwa swabisa ku ca ni Maheberu. 33Banabahabo Josefa ne ba inzi fa tafule ye talimani ni ya hae, ba ina ka ku tatamana kwa bona, ku kala ka yo muhulu mane ku t'o fita ku yo munyinyani. Ha ba bona mo ne ba inezi, ba talimana ba komokile. 34Lico ne li abelwa fa tafule ya Josefa, mi Benjamine a fiwa haketalizoho ku fita ba bañwi. Cwale ba nwa ni yena, mi ba taba hamoho.
Currently Selected:
Simuluho 43: Lozi09
Tõsta esile
Share
Kopeeri
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.