Simuluho 31
31
Jakobo u tobela Labani
1Jakobo a utwa kuli bana ba Labani ne ba bulela cwana, ba li, “Jakobo u ngile lika kamukana ze ne li za ndat'a luna. U fumisizwe ki lika ze ne li za ndat'a luna.” 2A bona hape kuli ni yena Labani kasibili n'a sa swani ni mw'a n'a inezi pili. 3Cwale Muñ'a Bupilo a li ku yena, “Kutela kwa naha ya bo ndat'aho ni kwa banabahenu. Ni ta ku babalela.”
4Jakobo kiha s'a zibisa Rahele ni Lea kuli ba y'o kopana ni yena mwa simu mo ne ku inzi mitapi ya hae. 5A li ku bona, “Ni se ni lemuhile kuli ndat'a mina h'a sa ni tabela sina pili. Kono Mulimu wa bo ndate u ni babalezi. 6Mwa bubeli bwa mina mwa ziba hande kuli ni belekezi ndat'a mina ka maata a ka kaufela. 7Kono nihakulicwalo u ni pumile, mi u fukulize mupuzo wa ka halishumi. Kono Mulimu h'a si ka mu lumelela ku ni holofaza. 8Labani ha n'a bulezi kuli, ‘Lipuli ze sasana li ta ba mupuzo wa hao,’ mitapi kaufela ya zwala manamani a masasana. Ha n'a ize, ‘Lipuli ze tuluzana li ka ba tuelo ya hao,’ mitapi kamukana ya zwala butuluzana. 9Mulimu u ngile mitapi kaufela ku ndat'a mina mi u ni file yona.
10“Ka nako ya zona ya ku pahama, na lola, mi na bona lipoho za lipuli ze ne pahama kuli n'e li ze sasa, ni ze tululi, mi ze paswa. 11Lingeloi la Mulimu la ni bulelela kwa buloko, la li, ‘Jakobo.’ Na alaba, na li, ‘Shangwe.’ 12La zwelapili, la li, ‘Wa bona kuli lipoho ze pahamwa kaufela ki ze sasa, ni ze tululi, ni ze paswa. Ni eza cwalo kakuli ni boni s'a eza kaufela ku wena, yena Labani. 13#Sim 28.18-22 Ki na Mulimu ya iponahalize ku wena kwa Betele, f'o ni sumekezi licwe la kupuzo ka ku li sela mafula, ni f'o itamezi ka maci. Cwalehe, itukise, u zwe mwa naha ye, mi u kutele kwa naha ya henu.’ ”
14Bo Rahele ni Lea ba alaba Jakobo, ba li, “Luna, ha lu na lifa le li lu siyalezi le lu ka yola ku ndat'a luna. 15H'a lu talimi sina bazwahule, nji? U lu lekisize, mi cwale mali a n'a fumani ka luna kamukana u a sinyize. 16Bufumu kaufela bw'a ngile Mulimu ku ndat'a luna, i s'e li bwa luna ni bana ba luna. Eza feela s'a ku bulelezi Mulimu.”
17Cwale Jakobo a paheka bana ni basali ba hae fa likamele. 18A itukiseza ku kutela ku ndat'ahe mwa naha ya Kanana, a soteza mitapi ya hae kamukana, mi a nga ni z'a n'a ipumanezi kwa Mesopotamia. 19Labani n'a il'o kuta lingu za hae, mi ka yona nako yeo ha n'a li siyo, Rahele a uzwa milimu ya maswaniso ya ndat'ahe ye ne li mwa ndu. 20Jakobo a puma Labani wa Muarami ka ku sa mu bulelela kuli s'a funduka. 21A nga liluwo la hae kamukana, mi a toba. A zamaya, a sila Nuka ya Yuferati, mi a liba kwa Lilundu la Giliadi.
Labani u latelela Jakobo
22Mwamulaho a mazazi a malalu, Labani kihona a bulelelwa kuli Jakobo u tobile. 23Kiha s'a nga batu ba hae, mi a latelela Jakobo ka mazazi a supile, mane a y'o mu swalela kwa Lilundu la Giliadi. 24Kono bona busihu bo, Mulimu a taha ku Labani wa Muarami kwa buloko, mi a li ku yena, “Tokomela, u si ke wa bemba Jakobo ka mukwa ufi kamba ufi.” 25Labani a t'o fumana Jakobo ya n'a tibelezi fa malundu a mañwi. Yena a tibelela fa Lilundu la Giliadi.
26Labani a li ku Jakobo, “Kikabakalañi ha u ni pumile, mane ni ku ikungela bana ba ka inge basali ba ba hapilwe mwa ndwa? 27U ni pumeziñi mane u pundumuka feela u si ka ni zibisa, kiñi? Kambe n'o ni bulelezi, kambe ni ku funduzi ka tabo mwa musipili wa hao, ku nze ku opelwa, ku lizwa milupa ni lihalepa. 28Mane ha u si ka ni fa sibaka sa ku tubeta baikulyange ni bana ba ka. U ezize kezo ya bukuba luli! 29Ni na ni maata a ku ku eza maswe, kono busihu bo bu felile bo, Mulimu wa ndat'aho u ni bulelezi, a li, ‘Tokomela, u si ke wa bemba Jakobo ka mukwa ufi kamba ufi.’ 30Na ziba kuli u fundukile kakuli u tukufalezwi ku kutela kwa hae, kono kikabakalañi ha u uzwize milimu ya ka?”
31Jakobo a mu alaba, a li, “Ne ni saba, kuli mwendi u ka ni amuha bana ba hao. 32Kono haiba u ka fumana kuli ku na ni ya ngile milimu ya hao, ku bona batu ba ka ba, yo u ta bulaiwa. Taha, u t'o bata, u nge s'e li sa hao kamukana, mi batu ba luna ba ta ba lipaki.” Jakobo n'a sa zibi kuli milimu n'e uzwizwe ki Rahele.
33Labani a kena mwa tende ya Jakobo mi a bata. Kih'a y'o kena mwa tende ya Lea, ni mwa tende ya basali ba babeli ba batanga, kono h'a si ka fumana milimu ya hae. Cwale a ya mwa tende ya Rahele. 34Rahele n'a ngile milimu yeo, a i beya mwa mukotana wa sale ya kamele, mi n'a inzi fahalimw'a yona. Labani a batisisa mwa tende kaufela, kono h'a si ka i fumana. 35Rahele a li ku ndat'ahe, “U si ke wa ni nyemela, muñ'a ka, ha ni palelwa ku yema fapil'a hao. Libaka kikuli ha ni yo kwa miseme.” Labani a batisisa hape kono a i tokwa.
36Cwale, Jakobo a nyema, mi a bulela ka buhali ku Labani, a li, “Kanti luli mulatu o ni ezize ki ufi, mulao o ni tuzi ki ufi, o ku fa tukelo ya ku ni zuma cwalo? 37Cwalehe, ha u s'o batile cwalo mwa lika za ka kamukana, sa hao s'o fumani mwa ndu ya ka si kai? Si beye fafasi fa, kuli batu ba hao ni ba ka ba si bone, mi ba bulele ya foselizwe mwahal'a luna. 38Ni se ni pilile ni wena lilimo ze mashumi a mabeli. Lingu ni lipuli za hao ha li si ka palelwa ku zwala, mi ha ni si ka ca nihaili poho i liñwi mwa mutapi wa hao. 39Kamita ngu ha ne i bulailwe ki sibatana, ne ni sa i tisi ku wena ku t'o ku bonisa kuli ne si mulatu wa ka, kono ki na ya n'a lwezi lisinyehelo zeo. N'o bulezi kuli ni life se si uzwizwe musihali kamba busihu. 40Ki hañata ni ciswa ki lizazi musihali ni ku bulaiwa ki silami busihu. Ne ni sa koni ku lobala. 41Ne ku li cwalo lilimo kaufela ze mashumi a mabeli ha ne ni inzi ni wena. Ni ku belekezi lilimo ze lishumi ka ze ne ku feza lionda za bana ba hao, ni lilimo ze silezi ni nze ni lisa mitapi ya hao. Nihakulicwalo u picaukisize mupuzo wa ka halishumi. 42Kambe Mulimu wa ndate, Mulimu wa Abrahama, Mulimu ya n'a lapelwa ki Isaka, n'a si ka ni tusa, kambe u ni lelekile ni si na se siñwi. Kono Mulimu u boni manyando a ka ni musebezi o ni ezize, mi busihu bo bu felile bo, u file katulo ya hae.”
Tumelelano mwahal'a Jakobo ni Labani
43Labani a alaba Jakobo, a li, “Basizana ba ki bana ba ka, baikulu ba ki ba ka, ni mitapi ye ki ya ka. Z'o bona kamukana ki za ka. Kono cwale se ni ka ezeza bana ba ka ni baikulyange kiñi? 44Ku lukile! A lu eze tumelelano, mi libunda la macwe li ta lu tusa ku lu hupulisa yona.”
45Jakobo kih'a yemisa licwe la kupuzo. 46A bulelela batu ba hae ku tuta macwe a ba til'o kubukanya. Cwale ba cela lico kwatukw'a lona libunda leo la macwe. 47Labani a li biza Sahaduta, mi Jakobo, yena, a li biza Galedi. 48Labani a li, “Libunda le la macwe, li ta ba kupuzo ku wena ni ku na.” Ka libaka leo sibaka se sa bizwa Galedi. 49Labani a ekeza, a li, “Muñ'a Bupilo a be paki ya luna ha lu se lu kauhani.” Cwale sibaka seo sa bizwa Mizipa. 50Labani a zwelapili, a li, “Haiba u ka nyandisa bana ba ka, kamba u nyala basali ba bañwi, niha ni sa zibi se siñwi, u hupule kuli Mulimu u lu talimezi.” 51Cwale Labani a li ku Jakobo, “Ki a macwe a ni kubukanyize mwahal'a luna, ni licwe la kupuzo ki le. 52Zeo mwa bubeli bwa zona, libunda la macwe ni lona licwe la kupuzo ki za ku lu hupulisa. Ha ni na ku fitelela libunda le la macwe ku t'o ku lwanisa, mi ni wena ha u na ku fitelela libunda le ni licwe la kupuzo ku t'o ni lwanisa. 53Mulimu wa Abrahama ni Mulimu wa Nakori u ta lu atula.” Cwale Jakobo a itama ka libizo la Mulimu y'a n'a lapelwa ki Isaka ndat'ahe. 54A bulaya folofolo, mi a i eza sitabelo fa lilundu. Kih'a memela batu ba hae kwa lico. Ha ba se ba cile, ba ina fa lilundu busihu bo. 55Habusa i sa li kakusasa, Labani a tubeta baikulyaye, a laeza bana ba hae, mi a kutela kwa hae.
Currently Selected:
Simuluho 31: Lozi09
Tõsta esile
Share
Kopeeri
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.