Simuluho 30
30
Kupo ya Rahele
1Rahele h'a bona kuli n'a si na bana ni Jakobo, a kala ku shwela muhulwan'a hae muna, mi a li ku Jakobo, “Ni fe bana! Hakusicwalo na shwa.”
2Jakobo a halifela Rahele, a li, “Ha ni koni ku nga sibaka sa Mulimu! Ki yena ya ku timile lupepo.”
3Rahele a li, “Mutang'a ka wa musizana Biliha ki yo. U mu nyale, kuli a ni pepele bana. Kamukwaocwalo ni ka ba ni mwana ka yena.” 4Cwale a fa munn'a hae mutang'a yo Biliha, mi a mu nyala. 5Biliha a itwala, mi a pepa mushimani. 6Rahele a li, “Mulimu u ni atulezi hande. U utwile tapelo ya ka, mi cwale u ni file mushimani.” Kih'a mu beya libizo la Dani. 7Mutang'a Rahele, yena Biliha, a itwala hape mi a pepela Jakobo mwana wa bubeli wa mushimani. 8Rahele a li, “Ni lwanile ndwa ye tata ni muhulwan'a ka, kono ni mu komile.” Kih'a mu beya libizo la Nafetali.
9Lea h'a bona kuli h'a sa pepa, a fa Jakobo mutang'a hae Zilipa kuli a mu nyale. 10Cwale Zilipa a pepa mushimani. 11Lea a li, “Litohonolo ki leo hee!” Cwale kiha sa mu biza Gadi. 12Zilipa, mutang'a Lea, a pepela Jakobo mushimani wa bubeli. 13Lea a li, “Ni tabile, mi cwale basali ba ta ni biza Ya Tabile.” Kih'a mu biza Asere.
14Ka nako ya kutulo, Rubeni a ya kwa masimu. A y'o fumana malaka, mi a tiseza Lea m'ahe. Rahele kiha s'a li ku Lea, “A ku ni fe kwa malaka a mwan'a hao.”
15Lea a mu alaba, a li, “Kana ha u itumeli ka ku ni amuha munn'a ka, nji? Hape u sa bata ku ni amuha ni ona malaka a mwan'a ka!”
Rahele a li, “Haiba u ka ni fa kwa malaka a mwan'a hao, fohe Jakobo u ka t'o lobala ku wena kacenu.”
16Manzibwana, Jakobo h'a y'o kuta kwa masimu, Lea a mu katanyeza, mi a li ku yena, “Kacenu u lukela ku t'o lobala ku na, kakuli ni ku lekile ka malaka a mwan'a ka.” Cwale a y'o kopana ni yena busihu bo.
17Mulimu a alaba tapelo ya Lea, mi a itwala, a pepa mushimani wa buketalizoho. 18Lea a li, “Mulimu u ni file mupuzo wa ka, kakuli ni lumelezi Zilipa ku kena mwa ndu ya ka.” Cwale a beya mwan'a hae libizo la Isakare. 19Lea a itwala hape, mi a pepa mushmani wa busilela. 20A li, “Mulimu u ni file mpo ye nde. Cwale munn'a ka u ta ni amuhela, kakuli ni mu pepezi bashimani ba silezi.” Kih'a mu biza Zebuloni. 21Mwamulahonyana a pepa musizana mi a mu biza Dina.
22Cwale Mulimu a hupula Rahele. A alaba tapelo ya hae, mi a mu fa lupepo. 23Kiha s'a itwala, mi a pepa mushimani. A li, “Mulimu u ni zwisize maswabi a ku sa pepa.” 24A mu beya libizo la Josefa, mi a li, “Muñ'a Bupilo kabe a ni fa mushimani yo muñwi hape!”
Tumelelano ya Jakobo ni Labani
25Josefa ha s'a pepilwe, Jakobo a li ku Labani, “U ni lukulule ni kutele haesu. 26U ni fe basali ba ka, be ni belekezi ku wena, ni bana ba ka cwalo, kuli ni funduke. Wa ziba kuli ni ku belekezi hande.”
27Labani a li ku yena, “U ni lumelele pili kuli ni ku bulelele se. Ni lemuhile ka ku nuha kuli Muñ'a Bupilo u ni fuyauzi kabakala hao. Cwalehe, u si ke wa ni siya. 28Bala tuelo ya hao, mi ni ta ku lifa.”
29Jakobo a mu alaba, a li, “Wa ziba mo ni belekezi ku wena, ni mitapi ya hao mo i atezi mwa pabalelo ya ka. 30To tunyinyani, t'o n'o na ni tona pili ni si ka taha, tu atile ni ku hula, mi Muñ'a Bupilo u ku tohonolofalize kabakala ka. Cwale, ki nako ya ka kuli ni belekele ndu ya ka.”
31Labani a buza, a li, “Cwale ni ta ku lifañihe?”
Jakobo a alaba, a li, “Ha ni bati mupuzo. Ni ta zwelapili ni nze ni babalela cwalo mitapi ya hao, haiba u ka eza se ni bulela. 32Kacenu, ni ka potela mitapi ya hao kaufela. U kete lingu ze swana, kwa lipuli ki ze tuluzana ni ze sasana. Yeo ki yona feela tifo ye ni bata. 33U ta bona kwapilinyana haiba ni sepahalile. Ha u ka t'o tatuba tuelo ya ka, haiba ni ka ba ni puli ye si ye sasana kamba ye tuluzana kapa ngu ye si ye nsu, fo u ta ziba kuli yeo i uzwizwe.”
34Labani a alaba, a li, “Ku lukile. Lu ta eza ka m'o bulelezi.” 35Kono lona lizazi leo, Labani a zwisa lipoho za lipuli ze ne li na ni mibala, ni lipuli za litole ze na ni mibala kaufela kamba ze na ni mubala o musweu. A zwisa cwalo ni lingu ze nsu. A li fa bana ba hae kuli ba li babalele. 36Cwale Labani a siya Jakobo, mi a ya ni mitapi yeo. A nga musipili wa mazazi a malalu. Haili Jakobo yena, a lisa mitapi ya Labani ye siyezi.
37Jakobo a nga mitai ye mitala ya mipulanga ni ya likota ze ñwi, mi a kwankumuna ze ñwi makwati, kuli mitai i be ni mibala-bala ye misweu. 38A toma mitai yeo fapil'a likungu, mo li nwelanga lingu mezi. A i beya hona fo, kakuli li atisa ku pahama ha li t'o nwa. 39Cwale, lipuli ha li se li ba mafuta fapil'a mitai yeo, za zwala ze sasana, ni ze tuluzana ni za mibala-bala.
40Jakobo a kauhanya lingunyana, za mibala-bala ni ze nsu kaufela ze mwa mutapi wa Labani, mi a li libisa ku wa hae. Ka ona mukwa wo a hulisa mutapi wa hae, mi h'a si ka u kopanya ni wa Labani.
41Lifolofolo ze ne li pila hande ha ne li pahamwa, Jakobo n'a beyanga mitai fapil'a zona kwa likungu ko ne li t'o nwelanga kuli li zwalele mwahal'a mitai yeo. 42Kono n'a sa beyi mitai ku ze fokola. Kabakaleo ze fokola za ba za Labani, kanti haili ze tiile hande za ba za Jakobo. 43Cwalehe, a fuma kapili. A ba ni mitapi ye miñata, ni batanga ba banna ni basali, ni likamele, ni limbongolo.
Currently Selected:
Simuluho 30: Lozi09
Tõsta esile
Share
Kopeeri
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.