Lukas 5
5
Hesus ta yama su promé disipelnan
(Mateo 4:18-22; Marko 1:16-20)
1Un dia Hesus tabata pará kantu di lago di Genesarèt i e multitut tabata pusha bini riba djE pa tende palabra di Dios. 2El a mira dos boto kantu di awa; e piskadónan a sali bai limpia nan reda. 3Hesus a subi den un di e botonan, i pidi Simon, doño di e boto, pa hala e boto un poko for di kantu. El a kai sinta i tabata siña e hendenan.#Mateo 13:1-2; Marko 3:9-10; 4:1 4Ora Hesus a kaba di papia, El a bisa Simon: ‘Nabegá bai afó kaminda e awa ta hundu i tira bo reda pa bo kohe piská.’ 5Simon a kontest'É: ‘Señor, henter anochi nos a traha duru, sin kohe nada.#Huan 21:3 Ma pasobra t'Abo ta bisa asina, p'esei mi ta hasié tòg.’ 6Nan a tira nan reda i a kohe asina tantu piská#Huan 21:6 ku nan redanan a kuminsá kibra. 7Nan a hasi seña ku nan kompañeronan den e otro botonan pa duna nan un man. E kompañeronan a bini i yena tur dos boto ku asina tantu piská ku nan a hera di senk.
8Ora Simon a mira loke a pasa, el a kai na rudia dilanti di Hesus i bis'É: ‘Bai for di mi, Señor; mi ta un pekadó!’#Job 7:19-20; Salmo 39:13 9El a bisa asina pasobra e i su kompañeronan a keda asombrá di mira kuantu piská nan a kohe. 10Su sosionan, Hakobo i Huan, yu di Zebedeo, tambe a keda asombrá. Hesus a bisa Simon: ‘No spanta, for di awor ta hende lo bo piska!’ 11Nan a hiba e botonan na kantu, bandoná tur kos i sigui Hesus.
Hesus ta kura un leproso
(Mateo 8:1-4; Marko 1:40-45)
12Un bia Hesus tabata bishitá un di e siudatnan. Ei tabatin un hòmber ku kurpa tur na lepra. Ora el a mira Hesus, el a tira su kurpa abou i roga Hesus: ‘Señor, si Bo ke, Bo por sana mi.’ 13Hesus a rèk mishi kuné i bisa: ‘Mi ke, sea saná.’ Mesora e lepra a kita. 14Hesus a dun'é òrdu pa no konta niun hende i El a bis'é: ‘Bai serka saserdote, lag'é wak bo i ofresé e sakrifisio ku Moises a ordená,#Levítiko 14:1-32 pa bo purifikashon. E ora ei tur hende tin prueba ku segun lei bo ta saná.’ 15Ma e historia tokante Hesus a plama tur kaminda i multitut grandi tabata bini huntu pa tend'É i haña sanashon. 16Hesus tabata apartá su mes na lugánan solitario pa hasi orashon.
Hesus ta kura un hòmber lam
(Mateo 9:1-8; Marko 2:1-12)
17Un dia ku Hesus tabata siña e hendenan, tabatin fariseo i maestro di lei einan. Nan a bini for di tur pueblo di Galilea i Hudea i tambe for di Herusalèm. Hesus tabatin poder di Dios den djE pa kura hende.
18Algun hòmber a bini serka Hesus ku un hòmber lam, riba un dragbar. Nan tabata buska moda di pon'é paden dilanti di Hesus. 19Komo tabatin muchu hende, nan no por a hib'é paden serka Hesus. P'esei nan a subi riba dak, habri un buraku, laga e dragbar ku e hòmber lam ariba, baha meimei den e kren rònt di Hesus. 20Ora Hesus a mira nan fe den djE, El a bisa e hòmber lam: ‘Amigu, bo pikánan ta pordoná.’ 21E fariseonan i e dòktornan di lei ku tabat'ei, a kuminsá deliberá ku otro: ‘Ta ken e hòmber akí? Loke e ta bisa ta blasfemia! No ta Dios so tin poder pa pordoná piká?’ 22Hesus a sa mesora riba kiko nan tabata deliberá. El a bisa nan: ‘Pakiko boso ta pensa asina? 23Kiko ta mas fásil? Bisa: Bo pikánan ta pordoná, òf bisa: Lanta para i kana bai? 24Mi ta bai laga boso mira ku e Yu di hende tin outoridat pa pordoná piká riba mundu.’ E ora ei El a bisa e hòmber lam: ‘Ami ta bisa bo: Lanta para, kohe bo dragbar i bai kas.’ 25Mesora e hòmber lam a lanta para, den bista di tur hende, kohe e dragbar ku e tabata drumí ariba i kana sali bai kas, glorifikando Dios. 26Nan tur a keda babuká; nan a glorifiká Dios i bisa yen di miedu: ‘Awe nos a mira algu maravioso!’
Hesus ta yama Levi
(Mateo 9:9-13; Marko 2:13-17)
27Despues ku Hesus a sali bai, El a mira un kobradó di belasting, yamá Levi, sintá na e lugá di kobra belasting. El a bis'é: ‘Sigui Mi.’ 28Levi a lanta, bandoná tur kos i siguiÉ.
29Despues Levi a tene un komementu grandi pa Hesus na su kas. Hopi kobradó di belasting i otro hende tabata sintá na mesa huntu ku nan. 30E fariseonan i e dòktornan di lei di nan grupo a bai murmurá serka su disipelnan i bisa: ‘Pakiko boso ta kome i bebe huntu ku hende ku no ta kumpli ku lei i ku kobradó di belasting?’#Lukas 15:1-2 31Hesus a kontestá nan: ‘Hende bon di salú no mester di dòkter, hende malu sí. 32Mi no a bini pa yama hustu ma pa yama pekadó pa nan kombertí.’
Tempu di yuna òf tempu di fiesta?
(Mateo 9:14-17; Marko 2:18-22)
33Awor e hendenan a bisa Hesus: ‘Disipelnan di Huan ta yuna i resa hopi, i esnan di e fariseonan tambe, ma bo disipelnan ta kome i bebe so.’ 34Hesus a rospondé: ‘Akaso bo por laga amigu di brùidehòm yuna durante fiesta di kasamentu, miéntras brùidehòm ta huntu ku nan? 35Pero ta yega un tempu ku lo kita e brùidehòm for di nan, anto e ora ei nan lo yuna.’
36Hesus a sigui ku un komparashon: ‘No sa sker pida di un paña nobo pa lapi un bistí bieu. Pasobra e ora ei e paña nobo ta sker i ta resultá ku e paña bieu no ta pas ku e lapi. 37Tampoko no sa basha biña nobo den saku di biña bieu. Pasobra e biña nobo lo sker e sakunan habri i e ora ei e biña lo basha abou i e sakunan lo bai pèrdí. 38Mester basha biña nobo den saku nobo.#5:38 Tin manuskrito ku ta añadí: i tur dos ta keda konservá. 39Niun hende ku bebe biña bieu no ta haña gana di bebe biña nobo. E ta bisa: “E biña bieu akí ta dushi!” ’
Currently Selected:
Lukas 5: PBDC13
Tõsta esile
Share
Kopeeri
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013