Pe eya 7
7
Nuhu wat fak ga̰l zi
1Bage ɗiŋnedin jan Nuhu go: «Ndé fak ga̰l zi, aŋ ne mo yàl pet. Ago, ne aŋ doŋ pe mbe no go, mbi kwa go, a mo ɗu kikit, mo ndu ge dosol ne mbi ndwara se ne. 2Abe kavaar ge harcal ma mbwambwak ɓyalar, ge be harcal to ma mbwak me, ndwara go son ne na gwale mo ta zi. 3Abe njoole ma mbwambwak ɓyalar me, ndwara go son ne na gwale, ne da pe nama hir ma ga suwar pal me. 4Ago, gá dam ma ɓyalar, mbi ba e mam swarra suwar pal, dam wara anda ɗaal ne gyala. Mbi mbo burmi kaŋ ma ge mbi ne dó nama ne suwar pal uzi pet.»
5Nuhu ke kaŋ ma pet, ne Bage ɗiŋnedin ne ho̰ na wak go tem me.
Mam yḛreya
6Nuhu ká da del kikis myanaŋgal, swaga ge mam yḛreya ne ame suwar go. 7Nuhu ma ne na gwale, ne na vya ma, ne na tisi ma ndé fak ga̰l zi ne, ne da pe bama ɓu uzi ne mam yḛreya go#Mat 24:38-39, Luk 17:27.. 8Poseya ne kavaar ge harcal ma, ne ge be harcal to ma, ne njoole ma, ne kavaar ge ne sar ko ge ne kḛ ne suwar zi pet, 9a ka mbo ya mbwambwak, son ne na gwale ndé fak ga̰l ge Nuhu ne zi, dimma ne Dok ne ho̰ Nuhu na wak go. 10Swaga ge dam ɓyalar ne mbya go, mam yḛreya tḭ suwar pala pet.
11Swaga ge Nuhu ne ke del kikis myanaŋgal go ɗe, saba ge azi na dam wol para ɓyalar go, mam ka fut ne suwar se ya digi, ndwala ge digi digi ya ma a hage ta uzi me. 12Mam swar suwar pal dam wara-anda ɗaal ne gyala. 13Dam mbe go, Nuhu ma ne na gwale ne na vya ma: Sem, Cham ne Jafet, poseya ne na tisi ma a ndé fak ga̰l zi, 14poseya ne kavaar ga̰l ma ne bama hir ma go, ne kavaar ge jabso ma ne bama hir ma go, ne kavaar ge ne sar ma ne ge ne kḛ ma ne bama hir ma go, ne njoole ma ne bama hir ma go, ne wagal ma ne bama hir ma go me. 15A ka mbo ya mbwambwak ndé Nuhu ta fak ga̰l zi. 16A ka ndé fak ga̰l zi mbwambwak son ne gwale, dimma ne Dok ne ho̰ Nuhu na wak go. Bage ɗiŋnedin dibi fak ga̰l wak digi nama pal.
17Mam yḛreya ke dam wara anda suwar pal. Swaga ge mam ne eme digi, fak ga̰l ga sorra digi. 18Mam eme digi hondoloŋ ge be to suwar pal, fak ga̰l ga sorra mam pal. 19Mam ka eme digi, ɗiŋ tḭ njal ge ne waɗe ne haal ge ne suwar pal ma se pet. 20Mam emeya tḭ njal ma pala se. Na ɗugul ne njal pal mbo digi ŋgay tok-pyaso wol para anuwa̰y. 21Kaŋ ge daage pet ge ne ndwara, ge ne an ne suwar pal ma pet pur uzi: Kavaar ga̰l ma, ne ge jabso ma, ne kaŋ ge ne sar ma, ne ge ne kḛ ma, ne njoole ma, ne wagal ma, ne naa dasana ma pet. 22Kaŋ ge ne suwar pal ge ne o̰y ma pet a sú uzi. 23Dok burmi kaŋ ge ne o̰y ma pet ne suwar pal uzi: Naa dasana ma, ne kavaar ga̰l ma, ne ge jabso ma, ne njoole ma pet. Nama pe pur uzi. A Nuhu ma ne nama ge ne wá fak ga̰l zi poseya ne na ma gá ne ɗeŋgo. 24Mam kat ne na emeya mbe go no suwar pal ɗiŋ dam kis para wara anuwa̰y.
Currently Selected:
Pe eya 7: FGN2013
Tõsta esile
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.