Atu 7
7
Dama ipire norĩ nho're, Estewã dama isiwasu'uzé wasu'u
1Tawamhã 'Re ihâimana u'âsi mono ma, da'ãma romhuri'wa tisiré norĩ nhipai u ipire uptabi hã te tãma tinha, Estewãhã ma, ãne:
— E tô sena aiwasu'u hã.
2-3Tawamhã Estewã ma tô tãma rob'rãzarõtõ za'ra, dahi'rata norĩ wasu'u na hã, ãne:
— Wasiré Izaraéu nhihudu norĩ, duré wamama norĩ zama hã, ĩwapari za'ra wa'aba. 'Re ihâimana u'âsi mono hã, rowa'a na 're isãmra mono hã duréihã ma tô Abra'ãhã ma sihâi'ré, wahi'rata ma. Mezopotãmia na danhipti'a nho'õmo nhisi ãma 're sãmra mono ré, ma tô itẽme wi, zahadu Harã na 'ri nho'õmo nhisi u morĩ õ ré. Ãne te tãma tinha: “Ma'ãpé airom nhiti aiwatobro, asisãnawã norĩ nhiti aimorĩ da. Airop téb u wa za asaprõ, tame 're aihâimana mono da oto.” Ãne ma tô tãma roti. 4Tahawa, tisiré Cadeza norĩ nhipti'ai hawi ma tô watobro. Ãhã wa, Harã ãma te oto 're sãmra, Abra'ã hã. Tame, imama hã ma tô tiwi dârâ. Tiwi dâ'â parip si, ma tô 'Re ihâimana u'âsi mono hã saprõ, iroptéb u, Abra'ã hã. Tahawa, te oto a norĩ wa'wa hã iwa 're aihâimana za'ra wa'aba mo, isipti'ai ãma. 5Tane nherẽ, we te te saprõni nherẽ, te te tãma sõmri uptabi õ di, ti'a hã ite da. Tahawa, te ãne hã tãma tinha: “Tô sena, ti'a, wa za aima tisõ, ate da, asihudu sidâpâsi, asihudu norĩ te da.” Ãne ma tô tãma ropisutu, Abra'ãhã ma, 'ra õ ré. 6Te duré tãma tinha, ãne: “Apto'oré hã asihudu norĩ te za dasiré 're si'ubumro, darob amoi ãma tinhipti'ai ãmai õ nherẽ, tisiré'õ norĩ siré. Tawamhã ti'a tede'wa norĩ nhimiwada'uri zarina si te za 're hâimana za'ra, te te tãma 're romhuri pese za'ra mono da taré, wa'âbâ ãna. Duré tahawa si'uihâ na si'ãma 're hâimana waihu'u za'ra mono õ di za. Da te 're ihâ za'ra mono zé hã te za duré te te 're sépata za'ra. Ãne te te 're robzépata za'ra mono ré hã, te za ãma tiwahub ahâ za'ra, 400 na. 7Tawamhã wa za te 're 'ruiwa'âbâ za'ra. Marĩ, wa za asa te 're ab'manharĩ, daza'ru tede'wa norĩ ma hã asihudu norĩ wi, 're robzei'õ za'ra mono wa. Taha parip si, asihudu norĩ hã te za wei wairé apâ. Tawamhã ãme te za ĩ'ãma 're dawata za'ra oto.” Ãne te tãma ropisutu, 'Re ihâimana u'âsi mono hã.
8— Te duré tãma roti, ãne: “Te za 're asisihâiwata nhihâri za'ra wa'aba mo, ĩzazei'wa na aipibui pese aba zéb da hã.” Ãne ma tô tãma roti. Tahawa, Izaqui hã waptã'ã wamhã, ma tô sihâiwata nhizâ, imama hã, Abra'ã hã. 8 na ãma mara wapsi, ma tô sihâiwata nhizâ. Izaqui hã ma duré ti'ra hã sihâiwata nhizâ, Zaco hã. Zaco hã isarina ma duré ti'ra hã te te 're anhihâiwata nhihâri, poto sidâpâsi, 12 na ihâiba norĩ hã. Ta norĩ hã Zacoho 'ra norĩ hã, wahi'rata na'rata uptabi.
9Tawamhã Estewã hã ma tô duré tinhimirob'rãzarõtõ na tãma ãma uzusi za'ra, ãne:
— Ta norĩ hã wahi'rata norĩ hã ma tô tino hã dama wede za'ra, Zuzé na isisi hã. Ihâimanazém na te te siwi 're 'ruiwapari za'ra mono wa, ma tô dama wede za'ra. Tahawa, i'uipra'wa norĩ hã ma tô siwi saprõ, Ezitu u, tame danhimiwada'uri zarina si te te dama 're romhuri mono da, pawa'âbâ ãna. Tane nherẽ, 'Re ihâimana u'âsi mono hã ma tô isiré 're hâimana u'âsi. 10Tahawa, te te irobzépata mono zéb sidâpâsi ma tô nasi pawapto, tiwi robzei'õ tõ da. Tawamhã apito Fara'oho nho're nasi hâimana wamhã, 'Re ihâimana u'âsi mono ma tô tiwaihu'u pe hã tãma tisõ, ihâimana wẽ zéb da hã. Tahawa, apito Fara'o hã ma tô wẽsã, Zuzé hã. Taha zarina ma tô tãma pisutu, Ezitu ãma roti'wa da oto, isadawa para. Isibro hã duré isõrõwa zama te te tãma 're 'madâ'â mono da zama, ma tô duré pisutu. 11Tawamhã nimahã wahum na hã dasa hã poto õ di, Ezitu ãma hã duré wahi'rada 're ihâimana za'ra mono zéb ãma hã, Cana'ã na romnhisi ãma hã. Taha zarina, ma tô oto mra hã da te 're sépata za'ra. Marĩ õ di, te te 're ihuri mono da hã, wahi'rata norĩ hã. 12Tawamhã wahi'rada Zaco hã ma tô dasai wasu'u hã wapa, Ezitu ãma buru nho wasu'u hã, tamep si da te 're isa'wari mono na hã. Tahawa, ma tô ti'ra norĩ wahi'rata norĩ hã satõrĩ za'ra, Ezitu u si'aba'ré da, mra hã te te dawi 'mai'uipra za'ra da. Tawamhã imorĩ'rata na si'aba'réi wamhã, ma tô aihutu apâ, timama u. Mra hã ma tô te te ãwisi. 13Taha pari, mrab zô hã ma tô duré tisi'aba'ré na sô sahu za'ra Ezitu u hã. Taha wamhã, Zuzé hã ma tô oto tãma siwasu'u za'ra, tidub'rata norĩ ma. Tawamhã apito Fara'o hã ma tô wapa, Zuzéhé sisãnawã norĩ wasu'u hã. Tahawa, ma tô oto waihu'u za'ra, isisãnawã za'ra na hã. 14Tahawa, ma tô Zuzé hã timama zô hâ, Zacoho zô, aihĩni pese itẽme si'aba'ré da, imro norĩ hã i'ra norĩ zama, duré uburé isiré 're idahâimana za'ra mono norĩ zama. Ãhã wamhã, ã norĩ ãne ihâiba za'ra hã, 75 na. 15-16Tawamhã Zaco norĩ hã te oto zâmo, Ezitu u, tame 're si'ubumroi mono da oto. Tame ma oto Zaco hã dârâ. Tame ma tô duré i'ra norĩ hã 're dâ'â za'ra. Tawamhã imama hã tiwi dâ'â za'ra wamhã, ihi hã ma tô siwi ti'â apâ, irob u, Siquẽ na danhipti'a nho'õmo nhisi u, tame te te siwi séme da. Ti'a hã Abra'ã hã dâ'â õ ré, Hamohõ nhihudu norĩ wi, te te sisada i'uipra siromo ãma, ma siwi sé, ihi hã. 'Re dâ'â za'ra mono sidâpâsi, ma tô wahi'rata norĩ hi zama apâ da te 're 'wasari tamomo, Zacoho 'ra norĩ hi hã, tame da te 're séme mono da, ẽtẽ zahâpâ wa, ab're 're.
17— Tawamhã 'Re ihâimana u'âsi mono hã Abra'ãhã ma, te te iropisutuzé hã te te tãma ãma i'uwaimramizéb u hã, romhuture di oto. Isihudu wahi'rata norĩ hã ma tô oto sina hâ, Ezitu ãma. Da'ahâ uptabi di oto. 18Tawamhã roti'wa aimawi hã ma tô oto ãzé, si'apito da, Ezitu ãma, Zuzéhé waihu'u'õ'wa hã. 19Tawamhã tizadawa nhipese na si ma tô wahi'rata norĩ ma 're hâimana ta hã. Ma tô te te tãma 're rob'manharĩ wasété u'âsi za'ra. Ma tô damama norĩ ma roti za'ra, rowi te te 're sa'ra za'ra mono da, ai'uté hã, 're dâ'â za'ra mono da. 20Taha ré, ma tô Mozési hã podo, ai'utépré iwẽ uptabi hã. A'amo si'ubdatõ ma tô ãma ai'utõ, imama norĩ te te i'madâ'â zahuré zém na hã, 'ri para. 21Tawamhã 'ri nhiti ma tô ina hã tihi. Tahawa, apito Fara'oho 'ra sipi'õ hã ma tô ãma ti'ra, Mozésihi ãma. Ti'ra uptabi newa, ma tô prédu. 22Tahawa, ezipsiu norĩ nhimirowaihu hã ma tô uburé dawi waihu'u, Mozési hã. Oto prédu wamhã, te te waihu'u pese wa, uburé te te rob'manharĩ wẽ di. Isimiroti hã wẽ wa, dama mreme pire di.
23Ãne te duré tãma rob'rãzarõtõ za'ra:
— Tawamhã Mozési hã 40 na ãma wahu wamhã, ma tô sima rosa'rata, tisiré norĩ hã te te waimrami mono da, Izaraéu nhihudu norĩ hã. 24Tawamhã te te ab'madâ'â mono wamhã, ma tô 'maihâiba pibu tisiré hã, ezipsiu norĩ siré hã te te 're pré'é mono ré. Tahawa, ma tô itẽme mo, ãma sisaprĩ da. Tawamhã te te 're pré'é mono 'ru te, ma tô tiwĩ, i'azâri'wa hã, tisiré hã te te 'ruiwa'âbâ da. 25Mozési hã ma tô tisiré norĩ ãma rosa'rata, ãne: “Ĩsiré norĩ hã ãté te za siwi ĩwaihu'u, 'Re ihâimana u'âsi mono te te tãma ĩpisutu za'ra zém na Ezitu hawi te dawi ubumroi mono da.” Ãne te tisiré norĩ ãma rosa'rata. Tane nherẽ, te te siwi waihu'u õ di, isiré norĩ hã. 26Tawamhã awẽm na hã ma tô duré mo, tisiré norĩ u. Morĩ wamhã, te duré isiré norĩ hã isõ'a si'wapé zahuré, maparane. Tahawa, ma timreme hã tãma 'morõwĩrĩ zahuré, ãne: “Tô'ã. Asi'wapéi wa'aba tõ. Oro asiré 're anomro aba mono za, te asi'wapéi wa'wa.”
27— Tawamhã ãma isãna'rata'wa hã ma tô Mozésihi mreme hã wẽ'õ. Tahawa, ma tô mreme sina sa'ré, ãne: “E 'wa sadawa para we aimorĩ bâ, wanhib'apito da, duré wa'ãma 're arowairébé mono da hã. 28E te asima iwẽ, ĩwĩrĩ da, ezipsiu iwĩrĩ ne, ahâmhâ.” 29Tawamhã imreme hã te te wapari wamhã, ma tô Ezitu hawi aimani Mozési hã, Midiã na romnhisi u, tame 're hâimana mono da oto. Tame ma timro. I'ra maparane oto, aibâ norĩ hã.
30— Midiã ãma 're sãmra mono ré hã, ma tô ãma tiwahu, 40 na. Tawamhã nimahã bâtâ na ma tô 'Re ihâimana u'âsi mono ma romhuri'wa hã itẽme sihâi'ré, hâiwa hawimhã. Sina'i na ẽtẽ 'rãihâ nhisi 'rata, ma tô itẽme sihâi'ré, a'ubuni u, wede zapore ro'o wa'wa. 31Tawamhã Mozési ma tô ãma titob'uzu, te te sãmri wa. Tahawa, ma tô 'râwi itẽme ai'ré, te te 'madâ'â wẽ da. Tawamhã 'Re ihâimana u'âsi mono mreme ma tô wapa. Ãne te tãma tinha: 32“Wa hã 'Re ihâimana u'âsi mono, aihi'rata norĩ nhib'apito, Abra'ãhã nhib'apito, duré Izaquihi nhib'apito, duré Zacoho nhib'apito.” Tawamhã Mozési hã imreme te te wapari wamhã, te tãma rẽrẽ, pipa te. Tãma pahi wa, te te 'madâ'â waihu'u õ di. 33Tawamhã Wanhib'apito te duré tãma tinha: “Sani na aipara'uza hã, ã iwa i'asa ti'a hã iwazéb zahi na dâ'âsina. 34Wa hã wa tô ĩnhib'a'uwẽ norĩ hã te 're 'madâ'â za'ra. Romhuri pire na te te 're rob'ma'wamarĩ mono wa, te robzei'õ u'âsi 're hâimana za'ra, Ezitu ãma hã. Tahawa, ma tô romhuri pire te, 're 'wab'ẽtẽ u'âsi za'ra. I'wab'ẽtẽ za'ra hã wa tô te 're wapari u'âsi za'ra. Tahawa, wa we oto itẽme si'ra za'ra, te sõ'reptu za'ra da, Ezitu hawi. A hã wa za oto asatõ, Ezitu u apâ aimorĩ da.”
35— Ãhã wa, te oto apâ mo, Mozési hã Ezitu u, tisiré norĩ te te sõ'reptu za'ra da. Tane nherẽ, Izaraéu nhihudu norĩ hã ma tô aré siwi watawa, ãne: “E 'wa sadawa para we aimorĩ bâ, wanhib'apito da, duré wa'ãma 're arowairébé mono da.” Tane nherẽ, 'Re ihâimana u'âsi mono hã ma tô apâ itẽme satõrĩ za'ra, Mozési hã. Tawamhã hâiwa ãma 'Re ihâimana u'âsi mono ma romhuri'wa hã, wedezapore ro'o wa'wa sô isãmra hã ma tô Mozési hã pawapto, Ezitu hawi te te danhimroi mono da apâ, danhipti'ai u. 36Tahawa, ma tô Mozési hã te te danhimro tô, Ezitu hawi. Duré Ezitu ãma zahadu 're sãmra mono ré, ma tô marĩ hã dama i'manharĩ waihu'u'õ hã te te dama 're ab'manharĩ. Â pré na â poré nhisi ãma, ma duré dama rob'manha, iwaihu'u'õ na. A'ubuni wi siwa'ru 're danomro mono ré, ma duré marĩ dama i'manharĩ waihu'u'õ hã te te dama 're ab'manharĩ, 40 na da'ãma wahub za'ra ré. 37Ta hã ma tô tisiré Izaraéu nhihudu norĩ ma rowasu'u, ãne: “'Re ihâimana u'âsi mono hã te za ni'wa hã asiré wa'wa hã we aima pisutu za'ra wa'wa, ĩsine, te te aima 're isadawa wasu'u za'ra wa'aba mono 'wa da hã.”
38— Izaraéu nhihudu norĩ hã a'ubuni wi 're nomro mono ré, ma tô Mozési hã dasiré 're mo, wahi'rata norĩ siré. Nimahã bâtâ na siré si'rã'õtõ wamhã, ma tô hâiwa ãma 'Re ihâimana u'âsi mono ma romhuri'wa hã tãma rowasu'u, Mozésihi ma, Sina'i na ẽtẽ 'rãihâ nhisi ãma. 'Re ihâimana u'âsi mono nhimipisutu zarina, robzei u'âsi i'rata 're idanomro u'âsi mono zé wasu'u hã ma tô tãma tisõ, Mozésihi ma, ta hã te te wama 're anhomri mono da, isipai u. 39Tazahã wahi'rata norĩ hã te te wapari ze za'ra õ di, Mozésihi mreme hã. Ezitu u apâ isi'aba'ré da si, ma tô tinhimirosa'rata na sisaze za'ra. 40Tahawa, te Arãhã ma nharĩ za'ra, ãne: “Ma'ãpé, marĩ hã romhâiba hã wama 'ma'manharĩ za'ra na, 'Re ihâimana u'âsi mono ne iwaihu'upe hã, te te iwanhimroi mono da hã.” Ãne ma tô tiwi waptẽrẽ za'ra, romhâiba hã te te 'manharĩ za'ra da. Te duré ãne tãma nharĩ za'ra: “Mozési hã ma wawi aimani za'ra, Ezitu hawi we iwanhimroi mono 'wa hã. Wa te sa'rese za'ra õ di oto.” Ãne te wahi'rata norĩ hã tãma nharĩ za'ra, Arãhã ma. 41Tahawa, tame ma tô powawẽ zapu hâiba ne hã tãma 'manharĩ za'ra, ãma 're iwata za'ra mono zéb da hã, 'Re ihâimana u'âsi mono upana. Ãhã wamhã, ma te tinhimizama hã duré oto siwi simro, tinhimirob'manharĩ ãma wata za'ra da. Aimawi te te sima rob'manharĩ za'ra wẽ te, ma tô duré dasa hã siwi 'manha. 42Tahawa, 'Re ihâimana u'âsi mono, ma tô tiwi aipi'ra za'ra, aimawi na si si'uihâ na za 're wata za'ra mono da, i'upana. Bâtâ ãma i'upana 're wata za'ra mono da, ma tô duré tiwi aipi'ra za'ra, duré a'amoi ãma, duré wasi ãma zama. Taha na ma tô 'Re ihâimana u'âsi mono zadawa 'mahârâ 'rata 'wa hã ãma rob'ui'éré, duréihã imreme na, ãne:
“Izaraéu nhihudu norĩ, e ĩ'ãma si 're aiwata za'ra wa'aba mono da, ma tô ĩnhimipodo hã asiwi 're isimroi wa'aba mo, a'ubuni wi 're anomro aba mono ré hã. Mare di. Ĩ'upana aimawi ãma si 're aiwata za'ra wa'aba mono da, ma tô ãne hã 're i'manharĩ za'ra wa'aba mo. Ãne 're anomro aba mono ré, ma tô 40 na ai'ãma tiwahub za'ra wa'wa.
43Ĩ'upana ãma 're aiwata za'ra wa'aba mono da, ma tô romhâiba hã asima i'manharĩ za'ra wa'wa, waihu'u pese newa, Moroti ihâiba'õ na romhâiba 'manharĩ nhisi ãma. Duré Rẽpã na wasi nhisi ãma ma tô 're aiwata za'ra wa'aba mo, waihu'u pese newa ihâiba'õ ãma hã. Ta hã ma tô asiwi 're imrami aba mo, ãma 're aiwata za'ra wa'aba mono da, a'ubuni wi. Tahawa, wa za oto airom nhiti asatõrĩ za'ra wa'wa, Babilonia nhipai u ai'aba'réi wa'aba da.”
44-45— 'Re ihâimana u'âsi mono hã ma tô tãma pisutu, Mozésihi ma, wahi'rata norĩ hã te te siwi i'ri mono zéb da hã, a'ubuni wi. Tawamhã Mozésihi ma, te te ipisutuzéb zarina ma tô da te dasiwi simizusi romhâ 'manharĩ na 'ri hã, dasiré iwa simasisi mono da, 'Re ihâimana u'âsi mono hã. Tahawa, ma tô 'rizé hã te te siwi 'wapé siré, danhimizahâri mono sidâpâsi te te siwi simizusi mono da. Tawamhã ta norĩ uirĩ na si ma tô wahi'rata norĩ hã siwi ãwisi, tirop téb u sihutu wamhã, Zozuéhé siré. Sihutu wamhã, 'Re ihâimana u'âsi mono hã ma tô wahi'rata norĩ hã pawaptob za'ra, dasi'wapé na. Ma tô duré te te tãma dazate za'ra, tame 're idahâimana za'ra mono norĩ hã. Tawamhã wahi'rata norĩ hã ma tô asisi oto, tirop téb u hã. Sisisi wamhã, ma tô siwi tisã 'ri hã, 'Re ihâimana u'âsi mono iwa 're isãmra mono zéb da hã. Tame te oto tawamhã 're sab u'âsi, Dawi za ipotozéb u. 46-47Tawamhã Dawi hã ma tô tiprédu. Prédu wamhã, 'Re ihâimana u'âsi mono hã ma tô wẽsã. Tahawa, Dawi hã ma tô tiwi waptẽ, 'ri ité hã te te tãma sãrĩ da, iwa 're isãmra mono zéb da hã. Ãne te tiwi waptẽ: “E te za ĩma i'ru, 'ri ité, te aima sãrĩ da hã. A hã 'Re ihâimana u'âsi mono, Zacoho nhib'apito. Tahawa, wa ĩsima wẽ, 'ri hã te aima sãrĩ da.” Ãne ma tô tiwi waptẽ, 'Re ihâimana u'âsi mono wi. Tane nherẽ, Dawi hã te te tãma 'ri õ di. I'ra si, ma tô tãma 'ri, Saloma hã tipoto'wa uirĩ na si.
48— E tawamhã 'ri hã da te dasiwi isãrĩ 'rep si te 're sãmra u'âsi, 'Re ihâimana u'âsi mono hã. Mare di. 'Ri 'rep si 're sãmra mono õ di. Ãne ma tô duréihã ãma rob'ui'éré, isadawa 'mahârâ'wa hã:
“Wanhib'apito, ma tô ãne ĩma siwaihu'u: 49-50Wa hã hâiwa nhipai ãma, Apito. Ti'ai ãma zama, Apito. Ĩwaihu'u pese wa, wa hã uburé Apito. Ĩwétési uburé marĩ hã te 'manharĩ waihu'u pese di. E niha te za tawamhã ĩnhorõwa hã ĩma i'ri za'ra wa'wa, iwa 're ĩnhamra u'âsi mono zéb da hã. Mare di. 'Re ĩnhamra u'âsi mono zéb da hã ĩma 'ri za'ra wa'aba õ di za.”
Estewãhã dâ'âzé wasu'u
51Tawamhã Estewã hã te duré tãma nharĩ za'ra, dama ipire za'ra norĩ ma, ãne:
— A norĩ wa'wa hã aipo're za'ra wa'aba õ di. Aipẽ'ẽ tete za'ra wa'aba di. 'Re ihâimana u'âsi mono zadawa wasu'u hã aipo'reptõ newa, 're wapari za'ra wa'aba mono õ di. Aihi'rata norĩ wa'wa hã 're ihâimana za'ra mono zém ne, te 're aihâimana za'ra wa'aba mo. 'Re ihâimana u'âsi mono pẽ'ẽzani hã te asiwi 're iwẽ'õ za'ra wa'aba mo, aihi'rata norĩ wa'aba ne hã. 52Aihi'rata norĩ wa'wa hã ma tô sada 're sib'ru za'ra, 'Re ihâimana u'âsi mono zadawa 'mahârâ 'rata 'wa norĩ zada. 'Re imorĩ wẽ uptabi hã za we iwisi wana, ma tô aré te te dama 're wasu'u za'ra, isadawa wasu'u'wa norĩ hã. Tane nherẽ, ma tô aihi'rata norĩ wa'wa hã te te 're simro, ta norĩ hã. Aihi'rata norĩ wa'wa hã ãne te te 're i'manharĩ za'ra mono ne, ma tô duré a norĩ wa'aba zama dama isa'ré za'ra wa'wa, 're imorĩ wẽ uptabi hã da te dasiwi wĩrĩ da. 53'Re ihâimana u'âsi mono ma, hâiwa ãma romhuri'wa norĩ, isimiroti hã te te aima 're sõmri za'ra wa'aba mono nherẽ, isimiroti na 're wapari za'ra wa'aba mono õ di.
54Tawamhã zudeu norĩ ma roti'wa norĩ hã Estewãhã mreme te te wapari za'ra wamhã, ma tô sadawa 'ru za'ra. Tahawa, te 'wasitete za'ra, Estewãhã ãma. 55Tane nherẽ, 'Re ihâimana u'âsi mono pẽ'ẽzani na ma tô aptete, Estewã hã. Tahawa, hâimo ma tô 'mazawẽ. Tawamhã 'Re ihâimana u'âsi mono hâiba na rowa'a za'ẽne hã ma tô 'madâ. Zezusi hã ma duré 'madâ. 'Re ihâimana u'âsi mono nhimire niwĩ te za. 56Tawamhã Estewã te dama 'mahâ, ãne:
— Ma'ãpé 'madâ'â za'ra wa'aba. Õhõta hâiwa, ma we 'ridawa. Ti'ai ãma dasiré ipodo hã wa tô 'madâ. 'Re ihâimana u'âsi mono nhimire niwĩ te za.
57Tahawa, tinhib'rata na ma tô tiwi sipo're nhidâ za'ra, dama roti'wa norĩ hã. Asa tãma 're sipari za'ra mono sina, ma tô sô sisãmra, te te siwi âri da. 58Sa'ẽtẽ te siwi 'mapra, 'ri nho'õmo babarãi u, ẽtẽ na te te siwi wĩrĩ da. Tawamhã ti'uza isisiwimhã, ma tô sada sani za'ra, Estewãhã 'ruiwapari'wa norĩ hã te te nasi siwi ahâri pibui pese da. Saulu na aibâ ipréduptém nhisi 'rata, ma tô ti'uza hã sada sa'ra za'ra, ta hã te te sa 'madâ'â za'ra da. 59Tawamhã ẽtẽ na te te nasi siwi ahâri ré, ma tô Estewã hã mre, Zezusihi ma. Ãne ma tô sina 'mahâ:
— Wanhib'apito Zezusi, ĩpẽ'ẽzani te za ĩwi i'â, ãma atẽme ĩmorĩ da.
60Tawamhã hi'rãtitõ ma tô nhamra, Estewã hã. Mreme 'rãihâ na ma tô duré tãma mre, ãne:
— Wanhib'apito, tiwasédé te te ĩ'ãma 'manharĩ za'ra nherẽ, tãma pisutu za'ra õ di za, rowasédé hã.
Tawamhã ãne na mreme pari, ma tô oto dârâ, Estewã hã.
Currently Selected:
Atu 7: xavBP
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.