Kenese 20
20
O Aperaamo ma Apimeleko
1‘Ua alu atu Aperaamo ai lea mea i le nu‘u i le itū i saute,#20.1 itū i saute: po o itū i toga. ‘ona mau ai lea o ia i le vā o Katesa ma Sura, ‘ua āumau fo‘i i Kira. 2‘Ua fai atu e Aperaamo, o lana avā o Sara, “O lona tuafafine ia.” ‘Ona ‘a‘ami atu lea e Apimeleko le tupu o Kira ‘iā Sara, ma ‘aumai ai.#Kene 12.13; 26.7 3A ‘ua afio mai le Atua ‘iā Apimeleko i le miti i le pō, ‘ua fa‘apea mai ‘iā te ia, “Fa‘auta, o le a e oti ‘ona o le fafine ‘ua e ‘aumai, auā o le nofo tane lava ia.”
4A o Apimeleko e le‘i alu ane o ia i le fafine; ‘ua fa‘apea atu fo‘i Apimeleko, “Le Ali‘i e, pe ‘e te fasiotia fo‘i le nu‘u amiotonu. 5E lē ‘ua fai mai ‘ea o ia ‘iā te a‘u, ‘O lo‘u tuafafine ia’? O ia fo‘i, ‘ua fai mai lava o ia, ‘O lo‘u tuagane ia’? O le manatu tonu o lo‘u loto ma o‘u lima mamā ‘ua ‘ou fai ai lenei mea.”
6‘Ona fetalai mai lea o le Atua ‘iā te ia i le miti, “‘Ua ‘ou iloa lava, o le manatu tonu o lou loto ‘ua e fai ai lenei mea, ‘ua ‘ou tāofia fo‘i oe ne‘i e agasala mai ‘iā te a‘u; o le mea lea ‘ua ‘ou le tu‘uina atu ai ‘iā te oe e tago atu ‘iā te ia. 7O lenei fo‘i, ‘ia toe tu‘uina atu le avā a lelā tagata, auā o le perofeta ia, e tatalo fo‘i ia mo oe, ‘e te ola ai, ‘ae ‘āfai ‘e te lē toe tu‘uina atu, ‘ia e iloa o le a e oti lava oe, ‘atoa ma i latou uma ‘ua ‘iā te oe.”#1 Samu 7.5; Iopu 42.8
8‘Ona ala tula‘i lea o Apimeleko i le taeao, ‘ua vala‘au atu i ana ‘au‘auna uma, ma ta‘u atu ‘iā te i latou nei mea uma, ‘ona matuā fefe ai lea o ia tagata. 9‘Ona ‘a‘ami atu lea e Apimeleko ‘iā Aperaamo, ‘ua fa‘apea atu ‘iā te ia, “O le a lenei mea ‘ua e faia ‘iā te i matou? Pe se a sa‘u amio leaga ‘iā te oe, ‘ua e fa‘ae‘e mai ai ‘iā te a‘u ma lo‘u mālō le agasala tele? O mea e lē tusa ‘ona faia, ‘ua e faia ‘iā te a‘u.” 10‘Ua fai atu fo‘i Apimeleko ‘iā Aperaamo, “Pe se a se mea ‘ua e iloa na e fai ai lenei mea?”
11‘Ona tali mai lea o Aperaamo, “Auā na ‘ou fa‘apea ifo, Ai lava ‘ua leai se mata‘u i le Atua i le nu‘u nei, latou te fasioti ai ‘iā te a‘u ‘ona o la‘u avā.#Kene 12.12; 26.7; 42.18 12‘Ae moni lava o lo‘u tuafafine ia, o le afafine o lo‘u tamā, ‘ae lē se tama a lo‘u tinā ‘ua fai fo‘i o ia ma a‘u avā. 13Na fa‘ata‘asēina a‘u e le Atua nai le ‘āiga o lo‘u tamā, ‘ona ‘ou fai atu lea ‘iā te ia, ‘O lenei lou alofa mai ‘iā te a‘u, o mea uma tā te ō ai ‘ia e fa‘apea atu, o lo‘u tuagane o ia.’”
14‘Ona ‘ave lea e Apimeleko o mamoe ma povi ma ‘au‘auna tane ma ‘au‘auna fafine, ma foa‘i atu ‘iā Aperaamo; ‘ua ia toe tu‘uina atu fo‘i ‘iā te ia o lana avā o Sara. 15‘Ua fai atu fo‘i Apimeleko, “Fa‘auta mai, o i ou luma lo‘u lau‘ele‘ele; faitalia lava oe pe se a se mea ‘e te fia mau ai.” 16‘Ua fai atu fo‘i o ia ‘iā Sara, “Fa‘auta, ‘ua ‘ou foa‘iina atu i lou tuagane o tupe e afe; e fai ia mou ufiufi mata, ‘iā i latou uma o ‘iā te oe, ‘atoa ma nisi uma; ‘ua fa‘apea ‘ona a‘oa‘iina o ia.”
17‘Ona tatalo lea o Aperaamo i le Atua; ‘ona fa‘amālōlō ai lea o le Atua ‘iā Apimeleko ma lana avā, ma ana ‘au‘auna fafine; ‘ona latou fānanau lea. 18Auā sa matuā fa‘apāpāina e le ALI‘I o fafine uma o le ‘āiga o Apimeleko, ‘ona o Sara le avā a Aperaamo.
Currently Selected:
Kenese 20: RSCB
Tõsta esile
Share
Kopeeri
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.