Maatiyee 10
10
Yesu tiyiyaa hiu nɛ naalɛ tɔm
(Mrk 3.13-19; Luk 6.12-16)
1Nakʋyʋ wiye Yesu kpeɣli ɛ-tɔmkpɛlɩkɩyaa hiu nɛ naalɛ nɛ ɛha-wɛ ɖoŋ se pɔɖɔɔnɩnɩ aleewaa nɛ pala nɛ ɛyáa kʋdɔmɩŋ tɩŋa nɛ pɛ-ɛjandʋ tɩŋa pɛcɛ. 2Mbá ɛlɩzaa nɛ ɛ́yáa-wɛ se e-tiyiyaa yɔ, ḿbá yɔ: kajalaɣ lɛ, Siimɔɔ weyi payaɣ ɖɔɖɔ se Pɩyɛ yɔ nɛ e-neu Andree nɛ Zebedee pɩyalaa Yakubu nɛ e-neu Yohanɛɛsɩ 3nɛ Filiipu nɛ Bartelemii nɛ Tomaa nɛ tikee mʋyʋ Maatiyee nɛ Alfee pɩyalʋ Yakubu nɛ Taadee 4nɛ Siimɔɔ weyi payaɣ se Yɔɔ Kandɩyʋ yɔ nɛ Yudaasɩ Iskarɩyɔɔtɩ weyi ekitaa ɛkpa Yesu nɛ ɛ́ɖʋzɩ koyindinaa nesi taa yɔ.
Yesu heyi e-tiyiyaa hiu nɛ naalɛ se powolo posusi laŋhɛzɩyɛ tɔm
(Mrk 6.7-13; Luk 9.1-6)
5Yesu tiyi ɛ-tɔmkpɛlɩkɩyaa hiu nɛ naalɛ ɛjaɖɛ taa. Pʋcɔ pɛɖɛɛ lɛ, ɛkam pa-ñʋŋ taa siŋŋ se: «itaawolo hɔɔlɩŋ weyi ɩ-taa mbá pɛtɛkɛ Yuda ñɩma yɔ, pɛwɛɛ yɔ. Ɩtaasʋʋ Samaarɩɩ egeetiye hɔɔlʋʋ nakʋyʋ taa ɖɔɖɔ. 6Ɛlɛ́, iwolo Izrɛɛlɩ ñɩma mbá pɛwɛ ɛzɩ heŋ kilebiŋ weyi ɩfɛyɩnɩ ninɖiɣyu yɔ pɔ-cɔlɔ. 7Ɩlɩ nʋmɔʋ taa lɛ, isusi ɛyáa se Ɛsɔ Kewiyaɣ wɩzɩ talʋʋ. 8Ɩla nɛ kʋdɔndɩnaa yɔɔ cɛ. Ifezi sɩɖaa nɛ ɩla nɛ canasɩ pɩsɩ ɛyáa mbá pamʋnaa yɔ nɛ ɩɖɔɔnɩ aleewaa ɛyáa wayɩ. Maha-mɩ ɖoŋ falaa, pʋwɛɛ se ɩha falaa ɖɔɖɔ. 9Ɩɖɛɣ lɛ, ɩtaakpaɣ liidiye naɖɩyɛ kaʋ. 10Ɩtaakpaɣ huyuu yaa toko nakʋyʋ nɛ pɩtasɩnɩ mbá pɛwɛ mɩ-yɔɔ yɔ yaa naataŋgbala, ɩtaaɖɔkɩ ɖaʋ. Toovenim lɛ, pʋwɛɛ se pɛcɛlɩ tʋmlaɖʋ mbʋ́ ɛcakɩnɩ wezuu yɔ. 11Ɩtalɩ tɛtʋ sɔsɔtʋ yaa cikpetu natʋyʋ taa lɛ, ɩñɩnɩ weyi etisiɣ nɛ ɛmʋ-mɩ yɔ. Yee ɛmʋ-mɩ lɛ, ɩcaɣ ɛ-tɛ nɛ pʋkɔɔ pɩsɩɩnɩ kɩyakʋ ŋgʋ́ ɩkʋyʋʋ yɔ. 12Yee ɩsʋ ɖɩɣa lɛ, ɩsɛɛ ka-taa ñɩma se: ‹Ɩwɛɛ laŋhɛzɩyɛ taa!› 13Yee pamʋ-mɩ lɛ, mɩ-laŋhɛzɩyɛ wɛɛ pɔ-cɔlɔ. Yee patamʋ-mɩ lɛ, ɖɩpɩsɩ mɩ-cɔlɔ. 14Yee iwobi ɖɩɣa nakɛyɛ taa yaa tɛtʋ natʋyʋ taa nɛ nɔɔyʋ kizi se ɛɛmʋʋ-mɩ nɛ ewelesi mɩ-tɔm lɛ, ɩlɩɩ ɖɩɣa ŋ́gá ka-taa yaa tɛtʋ ńdʋ́ tɩ-taa nɛ ikpizi mɩ-naŋgbanzɩ yɔɔ mʋzʋʋ nɛ ɩɖɛɛ nɛ pɩwɩlɩ se ɩkɔɔlɩ-wɛ nɛ iyebi-wɛ nɛ pa-sʋʋtʋ. 15Toovenim lɛ, meheyiɣ-mɩ se kɩyakʋ ŋgʋ́ Ɛsɔ hʋʋnɩ ɛyáa yɔ, Sodom nɛ Gomɔɔrɩ ñɩma mbá Ɛsɔ kʋ-wɛ nɛ miŋ pa-kɩwɛɛkɩm yɔɔ yɔ, pa-kʋñɔŋ ɛɛtalɩɣ tɛtʋ ńdʋ́ tɩ-taa ñɩma ñɩŋgʋ.»
Mbʋ́ pɩkaɣ talʋʋ Yesu tiyiyaa yɔ
(Mrk 13.9-13; Luk 21.12-17)
16Yesu tasɩ-wɛ heyuu se: «Ɩnɩɩ camɩyɛ se mentiyuu-mɩ yɔ, ɩwɛ ɛzɩ heŋ wɛɣʋ kpemtɔɔyɩsɩ hɛkʋ taa yɔ. Pʋ-yɔɔ lɛ, pʋwɛɛ se ɩwɛɛ lɔŋ ɛzɩ ɖʋmaa yɔ nɛ ɩmʋna ɛzɩ halikukunaa yɔ. 17Ɩkpa mɩ-tɩ nɛ ɛyáa, mbʋ́ pʋyɔɔ yɔ, pɔkɔŋ-mɩ wonaʋ tɔm ɖɩhʋyɛ nɛ polu-mɩ agbazɛɛ pɛ-Ɛsɔ ɖɩsɛyɛ ndɩ ndɩ taa. 18Pɔkɔŋ-mɩ yaʋ ajɛya ñʋndɩnaa nɛ awiya sɔsɔna pɛ-tɛ mɔ-yɔɔ se ɩkɛ aseɣɖe tɩnaa pa nɛ mbá pɛtɛkɛ Yuda ñɩma yɔ pɔ-cɔlɔ. 19Yee pakpa-mɩ powoni tɔm ɖɩhʋyɛ lɛ, ɩtaanɩɣzɩ tɔm ndʋ́ ɩɩyɔɔdɩ yɔ yaa ɛzɩma mbʋ́ ɩɩyɔɔdɩ yɔ pʋ-yɔɔ. Yee pɩtalaa lɛ, ɩyɔɔdɩ ndʋ́ Ɛsɔ ɖʋʋ mɩ-nɔsɩ taa yɔ. 20Mbʋ́ pʋyɔɔ yɔ, pɩtɛkɛ mɩ-cɔlɔ pɩlɩɣna, ɛlɛ́, mɩ-Caa Ɛsɔ Fezuu Kiɖeɖeu ɖʋʋnɩ-tʋ mɩ-taa.»
21Yesu tasɩ-wɛ heyuu se: «Alɩwaatʋ ńdʋ́ lɛ, ɛyáa kʋyʋʋ nɛ pawɩlɩ pa-ɖalaa yaa pe-newaa maɣmaɣ se pakʋ-wɛ. Caanaa ñalakɩ pe-piya ḿbʋ́ ɖɔɖɔ. Piya ńzɩ́, sɩsɩ kʋyɩ sɩ-ñɩma yɔɔ ɖɔɖɔ nɛ sɩla nɛ pakʋ-wɛ.
22«Ɛyáa tɩŋa kɔŋ-mɩ paɖʋʋ mɔ-yɔɔ. Ɛlɛ́, weyi ɛɖɔkʋʋ ɛ-tɩ camɩyɛ nɛ pʋkɔɔ pɩtalɩ kɛtɛzaɣ kɩyakʋ wiye yɔ, Ɛsɔ yakɩ ɛ-ñʋʋ. 23Yee pɛwɛ mɩ-wayɩ kaŋ kaŋ tɛtʋ natʋyʋ taa lɛ, ise nɛ iwolo lɛɛtʋ taa. Toovenim lɛ, meheyiɣ-mɩ se ɩɩtɛŋ cɔʋ Izrɛɛlɩ tɛtʋ tɩŋa payɩ nɛ pʋcɔ Ɛyʋ Pɩyalʋ kɔɔ.
24«Tɔmkpɛlɩkɩyʋ nɔɔyʋ ɛɛkɩlɩɣ ɛ-wɩlɩyʋ, ɖɔɖɔ lɛ tʋmlaɖʋ nɔɔyʋ ñaakɩlɩɣ ɛ́lɛ́ caa. 25Ɛlɛ́, yee tɔmkpɛlɩkɩyʋ ɛñɩtaa ɛtalɩ ɛ-wɩlɩyʋ nɛ tʋmlaɖʋ ñatalɩ ɛ́lɛ́ caa yɔ, pɩmaɣaɣ. Petekizi weyi ma mɛnkɛ mɩ-caa yɔ yaʋ se Belzeebuuli nɛ pɩcandɩnɩ mbá mɩ ɩkɛ men-piya yɔ?»
Ɛsɔ yɔɔ lidaʋ wɛnaʋ
(Luk 12.2-7)
26Yesu tasɩ-wɛ heyuu se: «Pʋ-yɔɔ lɛ, sɔɔndʋ ɛɛtaakpa-mɩ nɛ ɛyáa. Mbʋ́ pʋyɔɔ yɔ, mbʋ́ pɩtɩŋa payɩ pʋwɛ mɛsaɣ tɛɛ yɔ, pɔkɔŋ pʋ-yɔɔ kuluu nɛ paa weyi ɛna. 27Tɔm ndʋ́ meheyiɣ-mɩ mɛsaɣ tɛɛ yɔ, isusi-tʋ ɛyáa tɩŋa nɛ ndʋ́ mɛwɛɛtɩɣ-mɩ yɔ, isusi tʋtʋ paa le nɛ paa weyi ɛnɩɩ. 28Ɩtaasɔɔndɩ mbá pakʋʋ tomnaɣ nɛ paapɩzɩɣ pakʋ kalɩzaɣ yɔ. Ɛlɛ́, ɩsɔɔndɩ Ɛsɔ, mbʋ́ pʋyɔɔ yɔ, ɛpɩzɩɣ ɛkʋ ɛyʋ nɛ ɛtɛ ɛɖʋ e-tomnaɣ nɛ ɛ-kalɩzaɣ ɖenɖe kʋñɔŋ maatɛŋ wɛɛ yɔ. 29Paapɛdɩɣ sumasɩ cɩʋcɩʋwaa naalɛ koba yaa we? Paa ḿbʋ́ yɔ, sɩ-taa nakɛyɛ ɛɛsɩkɩ yem nɛ pɩtalɩɩnɩ mɩ-Caa Ɛsɔ cɔlɔ. 30Halɩ mɩ-ñʋŋ taa ñɔsɩ wɛʋ yɔ, Ɛsɔ kalɩ sɩtɩŋa payɩ. 31Pʋ-yɔɔ lɛ, ɩtaasɔɔndɩ. Ɩkɩlɩ sumasɩ cɩʋcɩʋwaa sakɩyɛ wazaɣ.»
32Đɔɖɔ lɛ, Yesu yɔɔdaa se: «Yee nɔɔyʋ ɛkaɖɩ ɛyáa taa se mantɩnɩ-ɩ yɔ, mankaɖɩɣ man-Caa weyi ɛwɛ ɛsɔdaa yɔ ɛ-ɛsɩndaa ɖɔɖɔ se mantɩnɩ-ɩ. 33Ɛlɛ́, weyi ɛkpɛzɩɣ ɛyáa ɛsɩndaa se pɩtɛkɛ mantɩnɩ-ɩ yɔ, mɛnkpɛzɩɣ man-Caa weyi ɛwɛ ɛsɔdaa yɔ ɛ-ɛsɩndaa ɖɔɖɔ se pɩtɛkɛ mantɩnɩ-ɩ.»
Yesu tɔkɔnɩ laŋhɛzɩyɛ, ɛlɛ́ you ɛkɔnaa
(Luk 12.51-53; 14.26-27)
34Ɛtasɩ-wɛ heyuu se: «Ɩtaamaɣzɩ se laŋhɛzɩyɛ mɔnkɔnɩ kedeŋa yɔɔ cɩnɛ. Ɛlɛ́, you mɔnkɔnaa. 35Mɔnkɔm se moyozi caja nɛ ɛ-pɩyalʋ, nɛ pɛlɛ nɛ e-ɖoo, nɛ wolu nɛ ɛ-waŋ, 36nɛ ɛyʋ hɔʋ taa ñɩma maɣmaɣ pɩsɩ e-koyindinaa.
Pʋwɛɛ se Yesu tiyiyaa etisi nɛ pasɩ ɛzɩ ɛnʋ yɔ
37«Weyi ɛsɔɔlʋʋ e-ɖoo yaa ɛ-caa nɛ pɩkɩlɩ-m yɔ, ɛtamʋna se ɛkɛ mɔn-tɔmkpɛlɩkɩyʋ. Weyi ɛ́lɛ́ sɔɔlʋʋ ɛ-pɩyalʋ yaa ɛ-pɛlɛ nɛ pɩkɩlɩ-m yɔ, ɛtamʋna se ɛkɛ mɔn-tɔmkpɛlɩkɩyʋ. 38Weyi etetisi nɛ ɛtɔɔ kʋñɔŋ siŋŋ#10.38 Etisi nɛ ɛtɔɔ kʋñɔŋ siŋŋ: ye pɛɖɛzɩɣ tɔm ndʋ piye piye yɔ, pɛɖɛzɩɣ-tʋ se: ɛkpaɣ ɛ-kaamaŋkaɣ. ɛzɩ ma yɔ yɔ, ɛtamʋna se ɛkɛ mɔn-tɔmkpɛlɩkɩyʋ. 39Weyi ɛñɩnɩɣ se ɛcaɣ wezuu tam yɔ, ɛtɛŋnɩ-kʋ lesuu. Weyi ɛ́lɛ́ sɩkɩ mɔ-yɔɔ yɔ, ɛcakɩ wezuu tam.»
Weyi ɛmʋʋ Yesu tiyiyaa yɔ, Yesu maɣmaɣ ɛmʋwa
(Mrk 9.41)
40Yesu tasɩ-wɛ heyuu se: «Weyi ɛmʋʋ-mɩ yɔ, ɛmʋʋ-m. Weyi ɛ́lɛ́ mʋ́ʋ-m yɔ, ɛmʋʋ ɖɔɖɔ weyi etiyi-m yɔ. 41Weyi ɛmʋʋ náyʋ mbʋ́ pʋyɔɔ yɔ ɛkɛ náyʋ yɔ, Ɛsɔ kɔŋ pʋdʋ hɛyʋʋ ɛzɩ náyaa yɔ. Đɔɖɔ lɛ, weyi ɛmʋʋ kʋtʋʋzʋ se ɛlakɩ mbʋ́ pʋtʋʋzɩ Ɛsɔ ɛsɩndaa yɔ, Ɛsɔ kɔŋ-ɩ hɛyʋʋ ɛzɩ weyi ɛlakɩ mbʋ́ pʋtʋʋzaa yɔ. 42Mɩ mɔn-tɔmkpɛlɩkɩyaa lɛ, patakpaɣ-mɩ payaa pʋyʋ. Ɛlɛ́, meheyiɣ-mɩ se yee nɔɔyʋ ɛha mɩ-taa nɔɔyʋ lɩkpadaɣ maɣmaɣ mɔ-yɔɔ yɔ, paa pɩɩla ɛzɩma, Ɛsɔ kɔŋ pʋdʋ hɛyʋʋ.»
Currently Selected:
Maatiyee 10: KABI
Tõsta esile
Share
Copy
Want to have your highlights saved across all your devices? Sign up or sign in