Zaŋ 3
3
Yezu ta Nikodem
1Arka azlakwa tok na, ndaw ana daha da walaŋ ma Fariziyeŋ hay, a zəlamar Nikodem, ndaw ma fada ma Zuif hay. 2Ma sawa ma ndzafa Yezu ma dəvaɗ, ma ləvar: «Rabi, la səradama kah na Miter na ma sawa da mey ma Bay ma Bəla ana, hərway ndaw ma slafa me key zeheɗ eɗek me key ana na dakay, haɗaw Bay ma Bəla ŋga ta ŋga kakay na.» 3Yezu ma mbəɗar kava: «Dakay na sey a yadəməkawa dey mekelehe zləna, kwa ndaw ma da slafa ma nəkada Slala ma Bay'ərlam na dakay.» 4Nikodem ma ləvar: «Ndaw tsoy maraw aha na, a da yadəmərawa mekelehe na teŋgey seŋgey? Tsukuɗu a slafa me fuləkwey a hwoɗ ma maya dey me tsetsew ana, ma da yadəmərawa sa ɗaw?.» 5Yezu ma mbəɗar kava: «Dərka dərka na i ləvaka: haɗaw ndaw ana ka yadəmərawa da yam ta Mesəfrey kakay na, a slafa me fuləkwey a Slala ma Bay'ərlam kakay. 6Na ma yaha da slaw vaw na, slaw vaw aha. Na ma yaha da Mesəfrey na, mesəfrey aha. 7Ka da rəzlaka zlay, kendzey andza i ma ləvaka: ‹a dafa na ma yawa da ’ərlam na›. 8Memeɗ a fey na, a slam aŋga me wuɗey ana, ka tsənada me bebətsey ŋga na, amana ka sərada a sawa da may kakay; kwa a daw na a may kakay. Kəɗey na kwa way way ma yaha da Mesəfrey na, andza ha tok.» 9Nikodem ma ləvar: «Ɗagay tek ana a da slafa me key andza ha na, teŋgey?» 10Yezu ma mbəɗar kava: «Kah na miter aha da səkway ma Israyel tok na, ka sərada tek a neney hay kakay! 11Dərka dərka na i ləvaka: la tsam na ka tek na la ma səradama na, la kam seydewe na, ma tek na la ma nəkadəmərawa na, amana ka təɓama seydewe la na ma kam ana kakay. 12haɗaw i tsakwar ka tek ma dala hay dzay na, ka pəmaya 'ar kakay tok na, haɗaw i ɓakwar ka tek ma 'ərlam hay na, ka da pəmaya 'ar na teŋgey? 13Hərway kwa ndaw me tsəley a 'ərlam na dakay dzadzak na, ndaw ana ma harɗawa da 'ərlam ana, Bəzey ma Ndaw. 14Andza ma Moyiz ma tsakafada govaŋ da palah na, hayna ka tsakafadama Bəzey ma Ndaw andza ha tey, 15ma aza kwa way way me pey 'ar na, ka ndzefey mendzey me ndəvey kakay ana da ŋga. 16Bay ma Bəla akwa na, ka wuɗa bəla ba haɗa, ha ŋga ma vəlawa Bəzey ŋga Malay ana, ma kwa way way me pey 'ar ka ŋga na, ka da zəɗey zlay, amana, ka da ndzefey mendzey me ndəvey kakay ana. 17Hərway Bay ma Bəla a sləradərawa Bəzey ŋga ka bəla na, ma da kafa sariya ka bəla kakay. Ama a sləradərawa na, ma aza ka da buwa bəla ta har aŋga. 18Ndaw me pey 'ar ka ŋga na, a da kafama ha sariya kakay; ama ndaw me pey 'ar kakay tey na, sariya ŋga na ma ka ha tsoy, hərway ma mey na, ka pey 'ar ka mezəley ma Bəzey Malay ana ma Bay ma Bəla kakay. 19Sariya na na, ŋga kəɗey: waw me nəkey dey ka sawa ba ka bəla, ama ndaw hay a da hiyam ɗoh na ləvaŋ ta waw me nəkey dey na, hərway tek ata na ma kam ana hay na, haya hiya kakay. 20Akwa na, kwa way way me key tek hayakakay ana hay na, a rəsa waw me nəkey dey, a sawa ka dey waw kakay, ka vəday a mey na, a wesey tek aŋga me key haya kakay ana hay a da nəkam ba. 21Ndaw me key mber da dərka na, a sawa ka dey ma waw, ma aza tek aŋga hay ka nəkam, na ma ndasləmawa ta Bay ma Bəla na.»
Zaŋ ta Yezu
22A dəba na na, Yezu ma daway a dala ma Zudey, ta gawla ŋga hay; ŋga ma ndzəmawa dzaya, a dzuhəɓey ndaw hay. 23Zaŋ ta tsakay ŋga tey na a dzuhəɓey aha ndaw hay da Ayinoŋ, dəreŋ ta Salim kakay. Da huɗa na yam bəzakakay; ndaw hay a səmawa ka tsakay ŋga, a dzuhəɓadata. 24Akwa da na ŋga na na, ka kəladama Zaŋ a daŋgay tsaray kakay. 25Arka pas asləta na, waway ma satərawa a walaŋ ma gawla ma Zaŋ hay ta ndaw Zuif ana daha, ka guma ma me bəzləmey vaw. 26Taya ma səmawa ma ndzafama Zaŋ, ma ləvamar: «Rabi, ndaw aŋga na kuray tsetsuwe da diya ma wayaŋ Zurdeŋ, kah ma kar seydewe na na, ekəɗey na ŋga ka təɗafa ba a dzuhəɓey aha ndaw hay tiyatsa, ndaw hay tabiyaha a dawam ka tsakay ŋga.» 27Zaŋ ma mbəɗatar kava: «Ndaw a slafa me key tek ma gədaŋ ma vaw ŋga, pərazl na ma vəladəmərawa da 'ərlam ana kakay. 28Kuray ana na, kuray ndaw seydewe ma guma ɗaw ana hay i ma tsawa na seŋgey: ‹Yah na Kriste kakay, ama yah na ndaw ma sləradəmərawa ka mey ŋga na.› 29Kokwa ma vəla ha na ma zel ma kokwa na təŋga. Dzam ma zel ma kokwa na, ma ndza ha, a pey sləmay ka vəɗe ma ɗay, arka na vəɗe ma ɗay ma zel ma kokwa na na, a rəhada ta wuiya. Wuiya ɗaw ma ka ha na andza ha, wuiya ɗaw ana na kərem haya ha. 30Haya ŋga na ka gəley ka mey, yah tey na, i ka mey ta dəba.
Ndaw ma sawa da 'ərlam ana
31Ndaw ma sawa da 'ərlam na, ŋga na ka 'ar ma tek hay tabiyaha. Ndaw ma yaha ka dala na, na ŋga na na, ndaw ma dala, a tsey guma na ta ndaraw ma dala. Ndaw ma sawa da 'ərlam ana na, 32a key seydewe na, ma tek aŋga ma nəkadərawa na, ta na ma tsənadərawa na, arka na, ndaw ma təɓa seydewe ŋga na na dakay. 33Ndaw ma təɓa seydewe ŋga na na, a ɓada Bay ma Bəla na a tsey dərka. 34Akwa na, Ndaw na Bay ma Bəla ma sləradərawa na na, a tsey na guma ma Bay ma Bəla, a vəlar Mesəfrey na, halay ŋga na dakay. 35Baba na a wuɗa Bəzey, ka vəladara tek hay ba tabiyaha a har aŋga. 36Ndaw me pey 'ar ka Bəzey ana na, a da ndzefey mendzey me ndəvey kakay ana. Ndaw me wuɗey me pey 'ar ka bəzey ana kakay na, a da nəkada ha mendzey kakay, ama mevel ma Bay ma Bəla ma tsar ana na, a da ndzey ka 'ar aŋga.»
Currently Selected:
Zaŋ 3: MOF
Tõsta esile
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun