Zaŋ 11
11
Yezu na bay ma mesəfrey
1Ndaw ana daha vaw a tsafa, a zəlamar Lazar, ŋga da Betani, wuraw mandza Mariya ta malam aŋga Marta. 2Mariya ana na, Mariya ana ŋga na, ma mbəɗafa mal ta wurdey aha ka Bay’ərlam Yezu, ma takaɗadara sek aŋga hay ta mbez 'ar aŋga na. Vaw a tsey na ka malam aŋga Lazar. 3Malam aŋga diŋgwas ana hay ma sləram ndaw ka Yezu ka ləvamar: «Bay’ərlam, ndaw ana kah ma wuɗa na na, vaw a tsafa.» 4Andza ŋga ma tsənada ba tsana, Yezu me ləvey: «Dzedzey ŋga neney na, a da mətsada ha kakay, ama a da nefey na ma da ɓada maram ma Bay ma Bəla, Bəzey ma Bay ma Bəla ada ndzefey maram na ta ŋga.» 5Akwa na Yezu ana na, a wuɗata Marta ta malam aŋga Mariya ta Lazar. 6Amana, kwa andza ka sərafa tsoy, Lazar ŋga gwa kakay tekeɗe na, ŋga me ney ba dəvaɗ tsew ka slam aŋga na hana na sa təŋga. 7Arka a dəba ŋga na tok na, ŋga ma ləvatar a gawla ŋga hay: «Makwa a Zudey.» 8Gawla ŋga hay ma ləvamar: «Rabi, da bəse ekəɗey na, zuif hay a səpəmaka ha ma kwuytsəmaka ba vagay aha tok na, re ka wuɗey ma mey a huɗa sa təŋga ɗaw?» 9Yezu ma mbəɗey kava: «Rəpas na, da huɗa na ndzemdey kurow kava tsew kakay ɗaw? Haɗaw ndaw a heley ta rəpas na metsembeɗ a ndzar kakay zləna, kavəday a nəkada ha waw ma bəla neney seŋgey. 10Ama haɗaw ndaw me heley ta dəvaɗ na, metsembeɗ a ndzar, zləna kavəday waw me nəkey dey da ŋga dakay.» 11A dəba ma guma ŋga neney hay na, ŋga me ləvey: «Dzam a lakwa Lazar ka nerey ba, i daway i da pərkadərawa.» 12Gawla ŋga hay ma ləvamar: «Bay’ərlam, kendzey ka nerey ba na a da buwama seŋgey.» 13Azlakwa Yezu a tsatar na ka me mətsey ma Lazar, ka taya na, waya a tsatar na ka me nerey dada tsa. 14Arka Yezu ma ɓadatara ndar ndar: «Lazar ka mətsey ba, 15a daya ’ar bəza kakay, ma kuray ma kam ka slam ana dakay ana na, ma aza kuray ka da pam 'ar. Amana, nakwa ka slam aŋga!» 16Arka Tomas, na ma zəlamar Didim ana, ma ləvatar a sa ma gawla ma Yezu ana hay: «Nakwa tiyatsa, lakwa ka mətsakwama andza ŋga.» 17Me husey ŋga na, Yezu a da ndzafa Lazar ŋga da tsəvay, ka key tsoy da huɗa dəvaɗ faɗ. 18Andza mabaŋ ma ndza Zeruzalem ta Betani a key kilometre makar na, 19zuif hay haɗadzidzay ma səmawa a 'ay mandza Marta ta Mariya ma da tsəmatəraɓa guma, hərway ma malam ata. 20Andza Marta ma tsənada Yezu a sawa ha na, ŋga ma daway ma da tsam 'ar, Mariya tey na ma ndza ha da mbaw. 21Marta ma ləvar a Yezu: «Bay’ərlam a ɗaw, kendzey kah ka key daha ka sləna na, akwatay malam a ɗaw a mətsey kakay seŋgey. 22Ama ekəɗey təŋga dzay na, i sərada, tek eɗek me tsəhey ka Bay ma Bəla tabiyaha na, Bay ma Bəla a da vəladaka.» 23Yezu ma ləvar: «Malam eɗek a da mbəlawa.» 24Ŋga ma mbəɗar kava: «I sərada ha a da mbəlawa ta pas madakwaydok ana.» 25Yezu ma ləvar: «Yah na, ndaw me mbəley ndaw, yah na mesəfrey, ndaw me pey 'ar ka yah na, kwa andza ka mətsey ba tekeɗe na, a da səfrey. 26Kwa way way da mendzey ŋga a pey 'ar ka yah na, ɗaɗa a da mətsey aha tikay. Ka pey 'ar kava ɗaw?» 27Ŋga me mbəɗey kava: «Ayaw Bay’ərlam ɗaw, i pey 'ar, kah na Kriste, Bəzey ma Bay ma Bəla, Ndaw na ma da sawa ka bəla na.» 28A dəba na na, ŋga ma daway ma da zələrawa malam aŋga Mariya, ma ləvar ta mesesəkwey aha: «Miter ka sawa ba, a zəlaka ha.» 29Andza ma tsənada ba tsana, Mariya me lətsey huram, ma daway 'ar ka tsakay ŋga. 30Akwa Yezu ana na ka fuləkwey a wuraw ana tsaray kakay, ŋga re ka slam ana hana, Marta ma zlam ’ar kava na. 31Zuif hay na taya da mbaw andza Mariya, a səpam ma bədama. Andza taya ma nəkadama ma lətsawa ŋga huram tsana, taya ma səpəmərawa bəzay, ka taya na waya a daway ka ɗay tsəvay ma da tuway. 32Andza ma Mariya me husey ba ka slam ma Yezu ŋga kava na na, andza ma nəkada ba tsana, ŋga me kəley ka slam sek aŋga ma ləvar: «Bay’ərlam a ɗaw, hana kah ka key ka sləna daha na, akwatay malam a ɗaw a mətsey kakay seŋgey.» 33Andza Yezu ma nəkadata Mariya a tuwam aha andza zuif hay, na ma kəsadəməraɓa na hay na, a kar tossa da mevel, ma gagəra. 34Ŋga me ləvey: «Ɗagay ka zləlama na ka waray?» Taya ma mbəɗam kava: «Bay’ərlam a ɗaw, sawa da nəkafərawa kwa.» 35Arka na Yezu ma tuway. 36Arka Zuif hay ma ləvam: «Nəkafama, a wuɗa bəzakakay!» 37Ama ndaw hay da walaŋ ata ma ləvam: «Ŋga ndaw ma wuradara dey ma ndaw wulaf ana ŋga na tok na, a slafa ma təkafa memətsey ka Lazar sakay tok ɗaw?» 38Arka ma kar tossa a Yezu da mevel sa na, ŋga ma daway ka ɗay tsəvay, ma zləla ha da ŋgwa gasah aha, beleler ma wuɗa ha ka miya. 39Yezu me ləvey tok: «Wurama beleler ana ba.» Marta malam ma vagay ana ma ləvar: «Bay’ərlam a ɗaw, ka key tsoy dəvaɗ faɗ, akwa na a da zey ka dəba.» 40Ama Yezu ma mbəɗar kava: «I ka ləvaka kakay ɗaw, kendzey ka pey 'ar na, ka da nəkada maram ma Bay ma Bəla.» 41Ma badəŋgwalama beleler ana hana tok. Arka Yezu ma tsakafada dey me ləvey: «Baba, i madaka sise, hərway ka mbəɗafiyawa ha kava. 42Dərka na, i sərada ha, ka mbəɗafiyawa ha ka pas ka pas, amana, i tsa na, kavəday ma ndaw a neney ma kusa hiya ma ɗawaləmaya na, ma taya ka pam 'ar ma sləradiyawa na kah.» 43A dəba ma guma ŋga neney na, ŋga me wudey ta magala ha: «Lazar, bawa!» 44Arka ndaw ana hana ma mətsa na ma bawa, sek ta har ahiya ma tuɗa hiya ta petekeɗ yam aha, mey dey ma mbəza ha ta petekeɗ. Yezu ma ləvatar a ndaw hay: «Pasəkama, mbəkadama ka daw təŋga.»
45Ndaw hay haɗadzidzay da walaŋ ma zuif hay ma səmawa ka tsakay ma Mariya ana, ma nəkadama tek ma Yezu a neney me key ana na, ma pam 'ar ka ŋga. 46Ama sa na hay na, ma dawam ka tsakay ma Fariziyeŋ hay, ma təkaradəmatara tek ma Yezu me key ana. 47Baba ɗuhwa na me key kuley ana hay ta Fariziyeŋ hay ma tsəham 'ar ma da ŋgəley mawa ma ləvam: «I ka kakwama na teŋgey? Ndaw a neney a key zeheɗ hay haɗadzidzay, 48haɗaw lakwa ka mbəkadakwa ba re ka key andza ha na, ndaw hay tabiyaha a da pam 'ar ka ŋga. Romeŋ hay a da mbəɗafəmandakwar ’ar, a da dufama ’Ay me kuley kokwoɗ ana ba, ta ndaw ma dala lakwa hay adzay.» 49Ndaw asləta da walaŋ ata a zəlamar Kayif, ka lam ana ŋga na na, ŋga bay ma baba ɗuhwa na me key kuley ana hay, me ləvey: «Kuray na ka səradama kakay, 50Akwa na ka səradama tikay ɗaw, ka da nafakwar na ŋgama ndaw asləta ka mətsey hərway ma səkway, ma ndaw ma dala hay tabiya ha ka da bazlam zlay» 51A tsərawa guma neney na, ma bay 'ar ma vaw ŋga na kakay, amana, ŋga baba ɗuhwa na me key kuley ana ka lam ana ŋga na na, ŋga me tsey guma neney andza ma ndaw sek: a dafa Yezu ka mətsey hərway ma ndaw ma dala hay, 52ma səkway dada tsa kakay, amana, ma tsəhadatara 'ar, da me dzəmey ma bəzey ma Bay ma Bəla ma pa mey ahiya na. 53A dzalama ma zəɗada ba, ta pas ana ŋga na na tok. 54Yezu tey na ma gərada ma daway ma sawa ndar ndar da walaŋ ma zuif hay, ŋga me wurzley vaw ŋga a slam ana daha bəse ta palah, a wuraw ana daha a zəlamar Efrayim, ŋga ma ndzam da huɗa ta gawla ŋga hay.
Bay me key kuley hay ma dzalam ma da zəɗada Yezu
(Mt 26.6-13; Mk 14.3-9; Lk 7.36-38)
55Andza magurlam ma Pak ma zuif hay a slawa ha bəse na, andza magurlam ma Pak ma medew ana na, ndaw hay haɗadzidzay ma tsələmawa da wuraw ata hay a Zeruzalem, ma da bazləmaɓa vaw. 56Taya ma səpama Yezu, arka da 'Ay me key Kuley taya da huɗa na na, taya ma ləvam ka ’ar vaw ta na: «Ka dzalafama na teŋgey? Ɗaɗa a da sawa ha a magurlam kakay!» 57Baba ɗuhwa na me key kuley ana hay ta Fariziyeŋ hay ma vəlam slam har, kwa way way ma sərada slam aŋga na na, ŋga ka ɓada, ma da zəga.
Currently Selected:
Zaŋ 11: MOF
Tõsta esile
Share
Kopeeri
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun