Zaŋ 1
1
Mingiɓi ngi li minjahha, yo ngi siifa
1Angi zlivirzi ngi gwatay gar na, Mingiɓi naŋ da zlezle si. Mingiɓi, naŋ ati Buymisemuŋ, Mingiɓi i Buymisemuŋ.
2Mingiɓi naŋ da ati Buymisemuŋ zle angi zlivirzi naŋ.
3Buymisemuŋ miga gwatay gar na, ti naŋ. Gwat migi manja naŋ na, ko anta loŋ ta.
4Siifa a bo ti vaŋ, yo siifa i li minjahha ngi mizli.
5Li minjahha ara pusluɗ angi luvuŋ.
Yo luvuŋ a sla wala nah ta.
6Buymisemuŋ a slino mbur ada, a zilaka Zaŋ.
7Naŋ a so i migi sedewo, ɓa a ɓa ɓi ngi li minjahha vuna, ɓa mizli gar a tiɓam ti seˀeŋ.
8Naŋ i li minjahha vuna ta ɓula, amma i migi sedewo vur li minjahha vuna.
9Mingiɓi i li minjahha migisiŋ gisiŋ. A so a ruwuyo, ɓa a ga li njahha da mbur gar.
10Mingiɓi, naŋ da zleˀe angi duniya,
Buymisemuŋ miga duniya na, ti naŋ,
amma mizli ngi ruwuyoy a sinakaŋ ta.
11A so ar hirwuy nga naŋ,
amma mizli nga naŋhay a tiɓaka so naŋ ta.
12Amma mizli mitiɓaka so naŋ, yo mitiɓakaŋ a mevel taŋ gar na, a vula taŋ gidaŋ, ɓa a tiram ziri ngi Buymisemuŋhoy. 13A ya ka taŋ i ziri ngi Buymisemuŋhoy na, anta kaɓa kpak ngi mizli titrahay#1.13 Mizli titrahay a mbiɗeˀvra: mizli. a ruwuy misenna ta, anta vur a ya ka taŋ i ziri ngi mbur zil kine ta ma, amma i Buymisemuŋ muwuɗu.
14Yo Mingiɓi tuwa a tiri mbur titra le. A cifi a wuzla ndra ti gimezle ati ɓi ɓi mikaslsla haɗa. I puraka dudok naŋ le. I dudok ngi Mangal kirmalay mulumo di avu Cine.
15Zaŋ a ga sedewo naŋ, a til mi, a ɓi: «Puraka, mbur ya miɓa ɓi naŋ zleˀe tuwa: ‹Mbur ara sawa a dirba ɗu, amma naŋ madiɗa fineˀ ya, asi zle ti taŋ miyikiy t'aruŋ na, naŋ da zlezle si.›»
16Asi mike na, ndra gar i lumam mi ngi ndra le ar gimezle naŋ mihaɗi na, a ɗuwula ndra mi nga mbuŋ nga mbuŋ.
17Buymisemuŋ a vulo ɓimujuwa tisi haŋ ngi Moyis. Amma gimezle ati ɓi mikaslsla na, i lumaka tisi haŋ ngi Yesu Kristu.
18Ko mbur mupura Buymisemuŋ ɗaˀ anta wãˀ. Amma Mangal naŋ kirmalay mujom ati Cine na, a biga ndra di le.
Zaŋ mici mizli ar yam migi sedewo
(Yo pura Mat 3.1-12; Mark 1.1-8; Luk 3.1-18)
19Mizli madiɗa ngi Yude ngi Zeruzalemey a slinoko masayay ati levihey ɓa a cufuɗaka Zaŋ: «Ka ki waka?»
20Zaŋ a mbiɗa taŋ di njah: «Yi Messi ta.»
21A cufuɗakaŋ: «Na, ki wa ska? Ki Eli kwa?» Zaŋ a mbiɗa: «Ĩˀĩ, yi Eli ta.» A cufuɗakaŋ ma: «Na, ki Mijiviɗ kwa?» A mbuɗa taŋ di: «Ĩˀĩ, yi naŋ ta.» 22Dar a ɓakaŋ: «Na, ki wa ska? Anja ɓa i ra mbiɗaka ɓi nah da mizli mislinoko ndra na. Ka ki ɓi mbri a hirnga ɗik vuna ka?»
23Zaŋ a slufa taŋ mingiɓi ngi mijiviɗ Ezayi miɓa zleˀe: «Yi ‹Mbur matil mi a wuzlaɓuh: Ɗiyaka jiviɗ da Bumbulvuŋ cir cir kuy kuy!›» 24Dambalaka a wuzla mizli muslunoko taŋ ng'avi Zaŋ vuna, Farisahay ada. 25A ra cufuɗakaŋ ava na si: «Da ki Kristu ta, ki Eli ta, ki Mijiviɗ ta ma na, ki ci mizli ar yama si mbrike?» 26Zaŋ a mbiɗa taŋ di: «Yi ci mizli ar yam tewle si, amma mbur ada a wuzla kumo, ki si na ka ta 27A ra sawa a dirba ɗu, amma yi ndila ter ngi puska zeweɗ ngi tarak naŋ ta.»
28Gwat tayna gar a gam ar walahay Betani, ti dubazaw Zurdeŋ, ar li Zaŋ maci mizli ar yam.
Yesu i tumuŋ ngi Buymisemuŋ
29Li naŋ muwun na, Zaŋ a pura Yesu ara sawa ng'avaŋ, dar a ɓi: «Puraka, tumuŋ ngi Buymisemuŋ mazuɓa mungra ngi duniya. 30Naŋ i mbur ya miɓa ɓi naŋ zleˀe: ‹Mbur ada sawa a dirba ɗu, naŋ madiɗa fineˀ ya, asi naŋ da zle dumbuŋ angi ya› tuwa. 31Ya vuna, i sinaŋ zleˀe ta, amma yi so ci mizli ar yam tewle ɓa Israyeley a sinaka, i naŋ.» 32Zaŋ a ga sedewo naŋ, a ɓi: «Yi pura ˀUf ngi Buymisemuŋ mapo sar kaɓa gonok paɗ a muŋ, a so cifi a hirnga naŋ. 33Yi sinaŋ zleˀe t'aruŋ, amma Buymisemuŋ mislino ya ngi ci mizli ar yama, i naŋ miɓiy: ‹Mbur ka masa pura ˀUf Mipal masa po sar, a so cifi a hirnga naŋ na, maci mizli ar ˀUf Mipal vuna, i naŋ.› 34Ya Zaŋ, i pura le, i ɓa le njah gisiŋ, Mangal ngi Buymisemuŋ, i naŋ.»
Yesu mizla zila mizli ngi seˀehey
35Li naŋ muwun na, Zaŋ naŋ da deŋ angi li tuwa ma ati mizli ngi seˀehey cuw. 36A ɗuva hiri taˀ angi Yesu macuh na, a ɓi: «Puraka, tumuŋ ngi Buymisemuŋ ani!»
37Mizli mucuw ngi si Zaŋhay tuwa, a cinaka naŋ miɓi na le, a sipaka Yesu. 38Yesu a mbiɗi, a pura taŋ ara sipakaŋ, a ɓa taŋ: «Ki sipam mike?» A ɓakaŋ: «Rabbi, ki ra cifi amaka?» Rabbi mbiɗeˀvra Kumani.
39Yesu a ɓa taŋ: «Soko, kisa puraka.» Dar a ram so, a puraka li naŋ micifi anga, naɓa a gi ng'avi pastaˀ wãˀ. A zikam bummoˀ ngi pas nah.
40Mbur pal a wuzla mizli mucuw tayna micinam mingiɓi ngi Zaŋ, misipaka Yesu na, i Andre sukum ngi Simoŋ Piyer. 41Andre ara luuma Simoŋ, sukum naŋ migisiŋ gisiŋ dumbuŋ kwaɗay, a ɓaŋ: «I lumaka Mesi le.» Mesi, mbiɗeˀvra: ‹Kristu.› 42Andre tuwa aru ti Simoŋ ng'avi Yesu. Yesu a ɗuva hiri taˀ angaŋ, a ɓi: «Ki Simoŋ, mangal ngi Zaŋ. A sa zulukuw Kefas.» A mbiɗivra: «mandazlay muwã.»
43Li naŋ muwun na, Yesu a wuɗ aru nga Galile. A ji hirnga ti Filip, a ɓaŋ: «Sipiy.» 44Dambalaka Filip i mbur ngi Betsayda, hirwuy ngi ti Andre ati Piyer. 45Filipe kwana, ara luuma Natanayele ya, a ɓaŋ: «Mbur mutohoko ɓi naŋ ar ɓimujuwa ngi Moyis ati ngi mijiviɗey zleˀe tuwa, i lumaka le#1.45 Pura Sluf c 18.18; Eza 9.5-6; Eze 34.23. . I Yesu ngi Nazaret, mangal ngi Zozef.»
46Natanayel a ɓaŋ: «Gwat mupuɗaw a bo baɗ ti Nazaret kwa?» Filip a ɓaŋ: «So pura.» 47Yesu mupura Natanayel maso ng'ava na, a ɓi vurˀeŋ: «Mbur Israyel migisiŋ gisiŋ ani. Anta gi gilaw da mbur ta wãˀ.»
48Natanayel a ɓaŋ: «Ki siniy amaka?» Yesu a mbiɗaŋ di: «Ti ka misi asi ˀuruf na, yi puruw le zle ti Filip muziluw t'aruŋ.»
49Dar Natanayel a ɓaŋ: «Kumani, ki Mangal ngi Buymisemuŋ, ki buy madiɗa ngi Israyel.»
50Yesu a ɓaŋ: «Ki tiɓiy vur ya muɓuw yi puruw le asi ˀuruf tewle na kwa? Ki sa pur gwat madiɗahay mifineˀ hana vuna ma!»
51A ɓaŋ ma: «Gisiŋ gisiŋ yi ɓukum na: kisa puraka muŋ a sa wucuh wucah, modro ngi Buymisemuŋhoy ara jiɗam, ara poko sar nga hirnga Mangal ngi mburo.»
Currently Selected:
Zaŋ 1: BEGDC
Tõsta esile
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.