ᓘᑲᓯᐅᑉ ᐊᒡᓚᖏᑦ 6
6
ᔩᓱᓯᐅᑉ ᓴᐸᑎᒥᒃ ᐅᖃᐅᓯᖃᕐᓂᖓ
ᒫᑎᐅᓯ 12:1-8; ᒫᑯᓯ 2:23-28
1 #
ᒨᓯᓯ ᑕᓪᓕᒪᖏᑦ 23:25. ᓴᐸᑎᐅᑎᓪᓗᒍ ᐱᕈᕐᓰᕕᖕᒥ ᓂᐊᖂᔭᒃᓴᓕᒃᑯᑦ ᔩᓱᓯ ᐱᓱᒃᑎᓪᓗᒍ, ᐃᓕᓐᓂᐊᕐᑎᖏᑦ ᓂᐊᖂᔭᒃᓮᑦ ᓄᕗᖏᓐᓂᒃ ᐲᕐᓯᕙᒃᓗᑎᒃ ᐊᒃᓴᓕᒡᓗᒋᑦ ᓂᕆᓕᕐᐳᑦ. 2ᑕᕝᕙ ᐹᕆᓯᑦ ᐃᓚᖏᑦ ᐅᖃᕐᐳᑦ, “ᓲᖅ ᓴᐸᑎᒥ ᐱᖁᔭᓄᑦ ᐱᖁᔭᐅᖏᑦᑐᒥᒃ ᐱᕕᓰ?”
3ᔩᓱᓯᐅᑉ ᑭᐅᕔᑦ, “ᐅᖃᓕᒫᓚᐅᕐᓯᒪᓐᖏᓚᓰ ᑍᕕᑎ ᑳᓕᕋᒥ ᐃᓚᒋᔭᖏᓪᓗ ᐱᓇᓱᐊᓚᐅᕐᓂᖏᓐᓂᒃ? 4#ᒨᓯᓯ ᐱᖓᔪᖏᑦ 24:9.#ᓴᒧᐃᓕ ᓯᕗᓪᓖᑦ 21:1-6.ᒎᑎᐅᑉ ᐃᒡᓗᖓᓄᑦ ᐃᑎᓚᐅᕐᐳᖅ; ᓂᐊᖂᔭᑦ ᒎᑎᒧᑦ ᑐᓂᔭᐅᓯᒪᔪᑦ ᓂᕆᓚᐅᕐᐰᑦ ᐃᓚᒋᔭᓂ ᓂᕆᖃᑎᒋᓪᓗᒋᑦ, ᑍᒫᒃ ᐱᖁᔭᑦ ᐱᖁᔨᓯᒪᓐᖏᑎᓪᓗᒋᑦ ᑐᓂᕐᕈᓯᕐᑎᑦᓯᔩᑦ ᓂᐊᖂᔭᓂᒃ ᒎᑎᒧᑦ ᑐᓂᔭᐅᓯᒪᔪᓂᒃ ᓂᕆᖁᔭᐅᔪᑑᖕᒪᑕ.”
5ᔩᓱᓯᐅᑉ ᐅᖃᐅᑎᕔᑦ, “ᐃᓅᑉ ᐃᕐᓂᖓ ᐊᑕᓂᐅᖕᒪᑦ ᓴᐸᑎᒧᑦ.”
ᐃᓅᑉ ᐊᒡᒐᖏᑦ ᓄᑭᖃᖏᑦᑐᑦ
ᒫᑎᐅᓯ 12:9-14; ᒫᑯᓯ 3:1-6
6ᓴᐸᑎᐅᑦᑕᐅᖅ ᑖᑦᓱᒪ ᐊᓯᐊᒍᑦ, ᔩᓱᓯ ᐃᑎᕆᕗᖅ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓄᑦ, ᑕᕝᕙᓂ ᐊᔪᕆᕐᑐᐃᓕᕐᓗᓂ, ᑕᕝᕙᓂ ᐊᖑᑎᑕᖃᕐᐳᖅ ᐊᒡᒐᖏᑦ ᑕᓕᕐᐱᖏᑦ ᓄᑭᖃᖏᑦᑐᒥᒃ. 7ᐱᖁᔭᓂᒃ ᐃᓕᓮᔩᑦ, ᐹᕆᓯᓪᓗ ᖃᐅᔨᓴᕐᐹᑦ ᐸᑦᓯᑎᒃᓴᖃᕈᒪᓪᓗᑎᒃ, ᓴᐸᑎᒥ ᐋᖅᑭᒃᓯᓂᐊᕐᒪᖔᑦ. 8ᔩᓱᓯᐅᑉ ᐃᓱᒪᖏᑦ ᖃᐅᔨᒪᒐᒥᒋᑦ, ᐊᖑᒻᒧᑦ ᐊᒡᒐᖏᑦ ᓄᑭᖃᖏᑦᑐᒧᑦ ᐅᖃᕐᐳᖅ, “ᓂᑯᕕᓪᓗᑎᑦ ᒪᐅᖓ ᕾᒋᑦ.” ᑖᓐᓇ ᓂᑯᕕᓐᓇᒥ ᔩᓱᓯ ᐅᐸᒃᐹ. 9ᔩᓱᓯ ᐃᓄᖕᓄᑦ ᐅᖃᕐᐳᖅ, “ᐊᐱᕆᕙᑦᓯ ᐱᖁᔭᑦ ᓴᐸᑎᒥ ᐱᐅᔪᒥᒃ ᐱᖁᔨᕚᑦ, ᐱᐅᖏᑦᑐᒥᒡᓘᓐᓃᑦ? ᐃᓄᖕᒥᒃ ᐃᓅᓕᒃᓯᖁᔨᕚᑦ, ᑐᖁᑦᓯᖁᔨᕙᓪᓘᓐᓃᑦ?” 10ᑕᕝᕙᓃᑦᑐᓕᒫᑦ ᔩᓱᓯᐅᑉ ᑕᑯᓴᕐᐰᑦ, ᐊᖑᒻᒧᑦ ᐊᒡᒐᖏᑦ ᓄᑭᖃᖏᑦᑐᒧᑦ ᐅᖃᕐᐳᖅ, “ᐊᒡᒐᑎᑦ ᐃᓴᒃᑭᑦ.” ᑕᕝᕙ ᐃᓴᒃᐰᑦ, ᐊᒡᒐᖏᑦ ᖃᓄᐃᑦᓱᓐᓃᕐᐳᑦ ᓄᑭᖃᓕᕐᓗᑎᒃ.
11ᔫᑎᑦ ᓂᓐᖓᒃᐳᑦ ᐅᖃᖃᑎᒌᓕᕐᓗᑎᒃ ᖃᓄᖅ ᔩᓱᓯ ᐱᓂᐊᕐᒪᖔᕐᒥᑦᔪᒃ.
ᔩᓱᓯᐅᑉ 12ᓂᒃ ᐋᐴᓯᑕᓕᖕᓂᒃ ᓂᕈᐊᕐᓂᖓ
ᒫᑎᐅᓯ 10:1-4; ᒫᑯᓯ 3:13-19
12ᐅᓪᓗᓂ ᑖᒃᑯᓇᓂ ᔩᓱᓯ ᖃᖅᑲᒧᑦ ᒪᔪᐊᕐᐳᖅ ᑐᒃᓯᐊᕆᐊᕐᑐᕐᓗᓂ; ᐅᓐᓄᐊᖅ ᓈᓪᓗᒍ ᑕᕝᕙᓂ ᑐᒃᓯᐊᕐᐳᖅ ᒎᑎᒧᑦ. 13ᐅᓪᓗᓐᖑᕐᑎᓪᓗᒍ ᐃᓕᓐᓂᐊᕐᑎᓂ ᕾᖁᕔᑦ, ᓂᕈᐊᕐᓗᓂ ᑖᒃᑯᓇᓐᖓᑦ 12ᓂᒃ, ᑖᒃᑯᐊ ᐊᑦᑎᕐᐰᑦ ᐋᐴᓯᑕᓕᖕᓂᒃ; 14ᓮᒨᓂ, ᐲᑦᑐᕉᓯᒥᒃ ᐊᑎᕐᑖᕐᑎᑉᐹ, ᐋᓐᑐᕉᓗ ᑖᑦᓱᒪ ᖃᑕᓐᖑᑖ; ᔪᐊᓇᓯᓗ ᔧᒥᓯᓗ, ᐱᓕᑉᐴᓯᓗ, ᐸᑎᐅᓗᒥᐅᓗ, 15ᒫᑎᐅᓯᓗ, ᑑᒪᓯᓗ, ᔧᒥᓯᓗ ᐊᐅᓪᐱᐊᓯᐅᑉ ᐃᕐᓂᖓ, ᓮᒨᓂᓗ ᐰᑦᑐᕆᐊᒻᒥᒃ ᑍᔭᐅᔪᖅ, 16ᔫᑕᓯᓗ ᔧᒥᓯᐅᑉ ᐃᕐᓂᖓ, ᔫᑕᓯᓗ ᐃᔅᑲᕆᐊᑦ, ᑖᓐᓇ ᔩᓱᓯᒥᒃ ᐱᔭᐅᑎᑦᓯᓚᐅᕐᑐᖅ.
ᔩᓱᓯᐅᑉ ᐊᔪᕆᕐᑐᐃᓂᖓ ᐋᖅᑭᒃᓯᓂᖓᓗ
ᒫᑎᐅᓯ 4:23-25
17ᔩᓱᓯ ᖃᖅᑲᒥᑦ ᐊᒻᒧᐊᒃᑲᒥ ᐋᐴᓯᑕᓖᑦ ᐃᓚᒋᓪᓗᒋᑦ ᓇᑎᕐᓇᒨᕋᒥ ᓇᖏᓕᕐᐳᖅ, ᐃᓕᓐᓂᐊᕐᑎᓂ ᐃᓄᒋᐊᒃᑐᕐᔪᐊᓪᓗ ᐃᓚᒋᓪᓗᒋᑦ ᐊᓯᖏᓪᓗ ᑐᓵᔭᕐᑐᕐᓯᒪᔪᑦ ᔫᑎᐊᒥᑦ, ᔨᕉᓴᓕᒻᒥᓪᓗ, ᑕᕆᐅᓪᓗ ᓯᓈᓂᑦ ᑍᕆᒥᑦ ᓮᑐᓂᒥᓪᓗ ᐱᓯᒪᔪᑦ ᑖᒃᑯᐊ ᑕᒪᐅᓐᖓᕐᓯᒪᕗᑦ ᔩᓱᓯᒥᒃ ᑐᓵᔪᒪᓪᓗᑎᒃ ᐋᖅᑭᒃᑕᐅᔪᒪᓪᓗᑎᒡᓗ ᖃᓂᒻᒪᓯᒥᖕᓂᑦ. 18ᐊᓂᕐᓂᕐᓗᖕᓄᑦ ᐃᓗᒻᒥᕐᑕᐅᓯᒪᔪᑦ ᑕᕝᕗᓐᖓᓚᐅᕆᕗᑦ ᐋᖅᑭᒃᑕᐅᓪᓗᑎᒃ. 19ᐃᓄᒋᐊᒃᑐᑦ ᔩᓱᓯᒥᒃ ᐊᒃᑐᐃᓇᓱᐊᕐᐳᑦ, ᐱᔪᓐᓇᕐᓂᖅ ᑖᑦᓱᒪᖓᑦ ᐊᓂᖕᒪᑦ ᐋᓐᓂᐊᔪᓕᒫᑦ ᐋᖅᑭᒃᐰᑦ.
ᔩᓱᓯᐅᑉ ᐊᔪᕆᕐᑐᐃᓂᖓ ᖁᕕᐊᓱᖕᓂᕐᒥᒃ ᕿᒃᓵᖕᓂᕐᒥᒡᓗ
ᒫᑎᐅᓯ 5:1-12
20ᔩᓱᓯᐅᑉ ᐃᓕᓐᓂᐊᕐᑎᓂ ᑕᑯᓴᕐᓗᒋᑦ ᐅᖃᐅᑎᕔᑦ:
“ᓮᒪᕐᑎᑕᐅᓇᕐᑐᒦᑉᐳᓯ ᐊᔪᕐᓴᕐᑐᓯ; ᒎᑎᐅᑉ ᐊᑕᓂᐅᕕᖓ ᐱᒋᓕᕋᑦᓯᐅᒃ.
21ᓮᒪᕐᑎᑕᐅᓇᕐᑐᒦᑉᐳᓯ ᒫᓐᓇ ᑳᒃᑐᓯ, ᓈᒻᒪᒃᓯᓗᓯ ᓂᕆᑎᑕᐅᔪᒫᕋᑦᓯ.
ᓮᒪᕐᑎᑕᐅᓇᕐᑐᒦᑉᐳᓯ ᒫᓐᓇ ᕿᐊᔪᓯ; ᐃᒡᓚᕈᒫᕋᑦᓯ.
22 #
1 ᐲᑦᑐᕉᓯ 4:14. “ᓮᒪᕐᑎᑕᐅᓇᕐᑐᒦᑉᐳᓯ ᐃᓄᐃᑦ ᐆᒥᒋᒃᐸᓯ, ᓇᕐᕈᒋᒃᐸᓯᓗ ᐅᖃᕐᓂᕐᓘᑎᒋᒃᐸᓯᓗ, ᐱᐅᖏᑦᑐᐊᓘᓂᕋᕐᐸᓯᓗ, ᐃᓅᑉ ᐃᕐᓂᖓ ᐱᑦᔪᑎᒋᓪᓗᒍ! 23#ᑯᕉᓂᑲ ᐂᑉᐸᖏᑦ 36:16; ᐋᐴᓯᑕᓖᑦ 7:52.ᑍᒤᑕᐅᓕᕈᑦᓯ ᖁᕕᐊᓱᒋᑦᓯ, ᕿᒡᒋᕐᑕᕐᓗᓯ ᑖᓂᓯᕐᓗᓯᓗ ᖁᕕᐊᓱᖕᓂᕐᒧᑦ, ᐊᖏᔪᒥᒃ ᐊᑭᓕᕐᑕᐅᔪᒫᕋᑦᓯ ᕿᓚᖕᒥ; ᓯᕗᓕᕕᓂᖏᑦᑕᐅᖅ ᑍᒤᓕᐅᕆᓚᐅᕐᒥᖕᒪᑕ ᓇᓚᐅᑦᑍᔪᓂᒃ.
24ᑲᑉᐱᐊᓇᕐᑐᒦᑉᐳᓯᓕ ᒫᓐᓇ ᐊᔪᕐᓴᖏᑦᑐᓯ, ᐱᔭᕆᐊᑭᑦᑐᒥᒃ ᐃᓅᓯᖃᕇᕋᑦᓯ.
25ᑲᑉᐱᐊᓇᕐᑐᒦᑉᐳᓯ ᒫᓐᓇ ᐊᕿᐊᑦᑐᓱᒃᑐᓯ; ᑳᓕᕈᒫᕋᑦᓯ.
ᑲᑉᐱᐊᓇᕐᑐᒦᑉᐳᓯ ᒫᓐᓇ ᐃᒡᓚᕐᑐᓯ, ᐅᒡᒍᐊᕐᓗᓯ ᕿᐊᔪᒫᕋᑦᓯ.
26“ᑲᑉᐱᐊᓇᕐᑐᒦᑉᐳᓯ ᐃᓄᖕᓂᑦ ᐱᐅᒋᔭᐅᓪᓗᓯ ᐅᖃᐅᓯᐅᑦᓯᐊᖃᑦᑕᕐᑐᓯ, ᓯᕗᓪᓕᖏᑦᑕᐅᖅ ᑍᒤᓕᐅᓚᐅᕐᒥᖕᒪᑕ ᓇᓚᐅᑦᑍᔪᓂᕋᕐᑐᓂᒃ ᓱᓕᖏᑦᑐᓂᒃ.”
ᔩᓱᓯᐅᑉ ᐊᔪᕆᕐᑐᐃᓂᖓ ᐊᑭᕋᕐᑐᕐᑎᑦᑎᓐᓂᒃ ᓇᒡᓕᒍᓱᖁᔨᓪᓗᓂ
ᒫᑎᐅᓯ 5:38-48; 7:12a
27“ᑐᓵᔪᓯ ᐅᖃᐅᑎᕙᑦᓯ, ᐊᑭᕋᕐᑐᕐᑎᓯ ᓇᒡᓕᒋᓯᐅᒃ, ᐱᑦᓯᐊᕐᐸᒡᓗᒋᓪᓗ ᐃᓕᑦᓯᓐᓂᒃ ᐆᒥᓱᒃᑐᑦ, 28ᐃᓕᑦᓯᓐᓂᒃ ᐅᖃᕐᓂᕐᓘᑎᖃᕐᑐᑦ ᓮᒻᒪᕐᑎᑕᐅᖁᓯᐅᒃ, ᐃᓕᑦᓯᓐᓂᒃ ᐱᑦᓯᐊᖏᑦᑐᑦ ᑐᒃᓯᐅᑎᓯᒋᒃ. 29ᐅᓗᐊᒃᑯᑦ ᐸᑎᒃᑕᐅᒍᕕᑦ, ᐃᒡᓗᐊᑦᑕᐅᖅ ᒪᓂᓕᕈᒃ; ᐊᓐᓄᕌᑦ ᓯᓚᓪᓕᖅ ᐱᔭᐅᒃᐸᑦ, ᐃᓗᓪᓕᕐᑕᐅᖅ ᐊᓐᓄᕌᑦ ᑐᓂᓚᐅᕈᒃ. 30ᐃᓕᖕᓂᑦ ᓱᓇᒥᒃ ᐱᔪᒪᔪᑦ ᑕᒪᕐᒥᒃ ᑐᓂᓯᕕᒋᓯᐅᒃ; ᐱᒋᔭᕐᓂᒃ ᐱᔪᖃᕐᐸᑦ ᐅᑎᕐᑎᖁᓗᒍ ᐅᖃᐅᑎᓂᐊᕐᓇᒍ. 31#ᒫᑎᐅᓯ 7:12.ᐃᓅᖃᑎᖕᓂᑦ ᖃᓄᖅ ᐱᓂᐊᕐᕕᐅᔪᒪᒍᕕᑦ, ᑍᒫᒃᑕᐅᖅ ᑖᒃᑯᓇᓐᖓ ᐱᓂᐊᕐᕕᐅᒐᔭᓐᖑᐊᕐᓗᑎᑦ ᐱᓂᐊᕐᕕᒋᒃᑭᑦ.
32“ᓇᒡᓕᒋᔨᑎᑦ ᓇᒡᓕᒋᔭᑐᐊᕆᒍᕕᒋᑦ, ᓱᓇᒥᒃ ᐊᑭᓕᕐᑕᐅᑦᔪᑎᒃᓴᖃᕐᐲᑦ? ᐱᐅᖏᑦᑐᓕᔪᑦ ᐊᒡᓛᑦ ᓇᒡᓕᒋᔨᒥᖕᓂᒃ ᓇᒡᓕᒍᓱᒃᐸᒃᑭᕗᑦ. 33ᐱᑦᓯᐊᕐᑎᖕᓄᓪᓗ ᑭᓯᐊᓂ ᐱᑦᓯᐊᖃᑦᑕᕈᕕᑦ, ᓱᓇᒥᒃ ᐊᑭᓕᕐᑕᐅᑦᔪᑎᒃᓴᖃᕐᐲᑦ? ᐱᐅᖏᑦᑐᓕᔪᑦ ᐊᒡᓛᑦ ᑍᒤᑉᐸᒃᑭᕗᑦ ᐱᑦᓯᐊᕐᑎᒥᖕᓄᑦ. 34ᐊᑐᕐᑎᑦᓯᕙᒃᑯᕕᑦ ᑖᒃᑯᓄᖓ ᐅᑎᕐᑎᑦᓯᕕᐅᓂᐊᕋᓱᒋᓗᑎᑦ, ᓱᓇᒥᒃ ᐊᑭᓕᕐᑕᐅᑦᔪᑎᒃᓴᖃᕐᐲᑦ? ᐱᐅᖏᑦᑐᓕᔪᑦ ᐊᒡᓛᑦ ᐊᑐᕐᑎᑦᓯᕙᒃᐳᑦ ᐱᐅᖏᑦᑐᓕᔪᓄᑦ ᑍᒤᓪᓗᐊᕐᑐᓂᒃ ᐅᑎᕐᑎᑦᓯᕕᐅᔪᒪᓪᓗᑎᒃ. 35ᐊᑭᕋᕐᑐᕐᑎᓯ ᓇᒡᓕᒋᓯᐅᒃ, ᐱᑦᓯᐊᕐᕕᒋᓗᒋᓪᓗ, ᐊᑐᕐᑎᑉᐸᒡᓗᒋᓪᓗ ᐅᑎᕐᑎᑦᓯᕕᐅᓂᐊᕆᐊᒃᓴᖅ ᐃᓱᒪᖏᓪᓗᓯ; ᑕᕝᕙ ᐊᑭᓕᕐᑕᐅᓂᒃᓴᓯ ᐊᖏᔪᐊᓘᔪᒫᕐᐳᖅ, ᖁᑦᓯᖕᓂᕐᐹᖑᔫᑉ ᐃᕐᓂᕆᓂᐊᕐᐹᓯ; ᑖᓐᓇ ᐱᑦᓯᐊᕐᒪᑦ ᖁᔭᓕᖏᑦᑐᓄᑦ ᐱᐅᖏᑦᑐᓕᔪᓄᓪᓗ. 36ᓂᑲᒍᓱᒋᑦᓯ, ᐊᑖᑕᓯᑕᐅᖅ ᓂᑲᒍᓱᖕᒪᑦ.”
ᐊᓯᑦᑎᓐᓂᒃ ᐃᖅᑲᕐᑐᐃᓂᖅ
ᒫᑎᐅᓯ 7:1-5
37“ᐃᖅᑲᕐᑐᐃᓂᐊᕋᓯ, ᐃᖅᑲᕐᑐᕐᑕᐅᖁᓇᓯ; ᐸᓯᔭᒃᓴᓐᖑᕐᑎᑦᓯᓂᐊᕋᓯ, ᐸᓯᔭᒃᓴᓐᖑᕐᑎᑕᐅᖁᓇᓯ; ᐃᓱᒪᒋᔪᓁᕐᓯᖃᑦᑕᕆᑦᓯ, ᑕᕝᕙ ᐃᓱᒪᒋᔪᓁᕐᕕᐅᓂᐊᕆᕗᓯ. 38ᑐᓂᓯᒋᑦᓯ, ᑕᕝᕙ ᑐᓂᓯᕕᐅᓛᕆᕗᓯ; ᐆᒃᑑᒻᒧᑦ ᑕᑕᑦᑐᒥᒃ, ᓯᑎᓴᕐᓯᒪᔪᒥᒃ, ᐊᐅᓚᑎᓪᓗᒍ ᑕᑕᑎᕐᓯᒪᔪᒥᒃ, ᐊᒥᒐᓐᖏᓗᐊᕐᑐᒥᒃ ᑕᕝᕙ ᑐᓂᓯᕕᐅᒐᔭᕐᐳᓯ. ᐊᓯᑦᓯᓐᓄᑦ ᐱᓂᐊᓂᕆᖃᑦᑕᕐᑕᓯ ᒪᓕᒃᓗᒋᑦ ᐱᓂᐊᕐᕕᐅᔪᒫᕆᕗᓯ.”
39 #
ᒫᑎᐅᓯ 15:14. ᐊᑦᔨᐅᔪᒥᒃ ᐅᖃᐅᑎᕔᑦ: “ᑕᐅᑐᖏᑦᑐᖅ ᐊᓯᒥᓂᒃ ᑕᐅᑐᖏᑦᑐᒥᒃ ᑕᓯᐅᕐᓯᔪᓐᓇᕐᐹ? ᑕᒪᕐᒥᒃ ᐃᑎᕐᓴᒧᑦ ᑲᑕᒐᔭᓐᖏᓛᒃ? 40#ᒫᑎᐅᓯ 10:24,25; ᔪᐊᓇᓯ 13:16; 15:20.ᐃᓕᓐᓂᐊᕐᑎ ᖃᐅᔨᒪᓂᕐᓴᐅᓐᖏᓚᖅ ᐃᓕᓮᔨᒥᓂᑦ, ᐃᓕᓐᓂᐊᕇᕈᓂᓕ ᐃᓕᓮᔨᒥᑐᑦ ᖃᐅᔨᒪᑎᒋᓕᕐᓂᐊᕐᐳᖅ.
41“ᓱᖕᒪᑦ, ᐃᓅᖃᑎᕕᑦ ᐃᑦᔨᓯᒪᐅᑎᖓ ᒥᑭᔪᖅ ᑕᑯᓐᓇᕐᐱᐅᒃ ᐅᕝᕙ ᓇᖕᒥᓂᖅ ᐃᑦᔨᓯᒪᐅᑏᑦ ᕿᔪᐊᓗᒃ ᑲᒪᒋᓇᒍ? 42ᓱᖕᒪᓪᓗ ᐃᓅᖃᑎᖕᓄᑦ ᐅᖃᕈᓐᓇᕐᐲᑦ ‘ᐃᓅᖃᑏᒃ, ᐃᑦᔨᓯᒪᐅᑎᑦ ᐃᔨᖕᓃᑦᑐᖅ ᐲᓚᐅᕐᓚᒍ,’ ᐅᕝᕙ ᓇᖕᒥᓂᖅ ᐃᔨᖕᓃᑦᑐᖅ ᐃᑦᔨᓯᒪᐅᑏᑦ ᕿᔪᐊᓗᒃ ᑲᒪᒋᓇᒍ? ᑕᒃᑯᕐᒨᕐᑐᑎᑦ, ᐃᑦᔨᓯᒪᐅᑏᑦ ᓇᖕᒥᓂᖅ ᐃᔨᖕᓂᑦ ᐲᖅᑳᕈᒃ, ᑕᐅᑐᑦᓯᐊᕐᓗᑎᑦ ᐃᓅᖃᑎᕕᑦ ᐃᑦᔨᓯᒪᐅᑎᖓᓂᒃ ᒥᑭᔪᒥᒃ ᐲᕐᓯᔪᓐᓇᕐᓂᐊᕋᕕᑦ.”
ᔩᓱᓯᐅᑉ ᐅᖃᐅᓯᖃᕐᓂᖓ ᓇᐹᕐᑐᒥᒃ ᐸᐅᕐᖓᖏᓐᓂᒡᓗ
ᒫᑎᐅᓯ 7:16-20; 12:33-35
43“ᓇᐹᕐᑐᖅ ᖃᓄᐃᖏᑦᓯᐊᕐᑐᖅ ᐱᐅᖏᑦᑐᓂᒃ ᐸᐅᕐᖓᖃᕈᓐᓇᓐᖏᓚᖅ, ᓇᐹᕐᑐᖅ ᐱᐅᖏᑦᑐᖅ ᐱᐅᔪᓂᒃ ᐸᐅᕐᖓᖃᕈᓐᓇᖏᓐᓂᕗᖅ; 44#ᒫᑎᐅᓯ 12:33.ᓇᐹᕐᑐᑦ ᑕᒪᕐᒥᒃ ᖃᐅᔨᒪᔭᐅᕗᑦ ᐸᐅᕐᖓᖏᑎᒍᑦ, ᐸᐅᕐᒊᑦ ᐱᒋᓕᖕᓂᒃ ᑲᑭᓪᓚᐅᑎᓕᖕᓂᑦ ᐱᔭᐅᕙᓐᖏᓚᑦ, ᐸᐅᕐᖎᓪᓗ ᐅᐂᓂᒃᓮᑦ ᐅᕐᐱᖕᓂᑦ ᑲᑭᓪᓚᐅᑎᓕᖕᓂᑦ ᐱᔭᐅᕙᖏᓐᓂᕗᑦ. 45#ᒫᑎᐅᓯ 12:34.ᐃᓄᑦᓯᐊᕙᒃ ᐱᐅᔪᓂᒃ ᓴᖅᑭᑎᑦᓯᕙᒃᐳᖅ ᐃᓗᒥᓂ ᐱᒋᔭᒥᓂᒃ. ᐱᐅᖏᑦᑐᓕᔪᕐᓗ ᐱᐅᖏᑦᑐᓂᒃ ᓴᖅᑭᑎᑦᓯᕙᒃᐳᖅ ᐃᓗᒥᓂ ᐱᒋᔭᒥᓂᒃ ᐱᐅᖏᑦᑐᓂᒃ; ᐃᓄᒃ ᐃᓗᖓᑕ ᑕᑕᑦᔪᑎᖏᓐᓂᒃ ᖃᓂᖓ ᐅᖃᓲᖑᖕᒪᑦ.”
ᐃᒡᓗᓕᐅᕐᑏᒃ ᒪᕐᕉᒃ
ᒫᑎᐅᓯ 7:24-27
46“ᖃᓄᐃᒻᒪᑦ ᐊᑕᓃᕆᓂᕋᖃᑕᕐᐱᓯᓐᖓ ᐅᖃᓪᓗᓯ, ‘ᐊᑕᓃᖅ, ᐊᑕᓃᖅ,’ ᐊᑐᖁᔭᓐᓂᒡᓗ ᒪᓕᒐᓯ? 47ᐅᕙᓐᓄᑦ ᕾᔪᓕᒫᑦ ᐅᖃᐅᓯᓐᓂ ᑐᓴᕐᑐᑦ ᒪᓕᒡᓗᒋᓪᓗ, ᑖᒃᑯᐊ ᐊᑦᔨᒋᔭᖓᓂᒃ ᐅᖃᐅᑎᓂᐊᕐᐸᑦᓯ. 48ᐃᒫᒃ ᐊᑦᔨᖃᕐᐳᑦ; ᐃᓄᒃ ᐃᒡᓗᓕᐅᕐᑐᖅ; ᓄᓇ ᐃᓗᑐᔪᒥᒃ ᐃᑎᕐᓴᓕᐅᕐᓗᒍ, ᕾᕐᑐᖅ ᑎᑭᓐᓇᒥᐅᒃ ᑐᓐᖓᕕᓕᐊᕆᕚ ᐃᒡᓗᓕᐊᒥᓄᑦ; ᑰᒑᓗᒃ ᖄᒥᓕᕐᒪᑦ, ᐃᒡᓗᒧᓪᓗ ᑰᓕᕐᒪᑦ, ᐃᒡᓗ ᐊᐅᓚᑦᔭᒍᓐᓇᓐᖏᓚᖅ ᑐᖓᕕᖃᑦᓯᐊᕐᒪᑦ, 49ᐅᖃᐅᓯᓐᓂᒡᓕ ᑐᓴᕐᑐᑦ ᒪᓕᒡᓇᒋᓪᓗ ᐊᑦᔨᖃᕐᐳᑦ ᐊᖑᒻᒥᒃ ᐃᒡᓗᓕᐅᕐᑐᒥᒃ ᑐᓐᖓᕕᓕᐅᑦᓯᐊᕐᓯᒪᖏᑦᑐᒥᒃ; ᑰᖕᒧᑦ ᖄᒥᑦᑐᒧᑦ ᑎᑭᑕᐅᒐᒥ, ᐃᒡᓗ ᑕᕝᕔᓐᓇᖅ ᐅᕐᕈᕗᖅ, ᐊᓯᕈᕐᑕᐅᒻᒪᕆᒡᓗᓂ.”
Currently Selected:
ᓘᑲᓯᐅᑉ ᐊᒡᓚᖏᑦ 6: EAIB
Tõsta esile
Share
Kopeeri
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.