ᓘᑲᓯᐅᑉ ᐊᒡᓚᖏᑦ 4
4
ᔩᓱᓯᐅᑉ ᐱᔪᒥᓵᕐᑕᐅᓂᖓ
ᒫᑎᐅᓯ 4:1-11; ᒫᑯᓯ 1:12-13
1ᔩᓱᓯ ᔪᐊᕐᑕᓂᒥᑦ ᐅᑎᓕᕐᑎᓪᓗᒍ, ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᐃᓗᒻᒥᕐᑕᐅᓯᒪᓪᓗᓂ, ᐊᓂᕐᓂᐅᑉ ᐃᑦᔪᕐᓁᑦᑑᑉ ᑕᓯᐅᕐᐹ ᐃᓄᖃᖏᑦᑐᒧᑦ, 2ᐅᓪᓗᓂᒃ 40ᓂᒃ ᐃᓄᖃᖏᑦᑐᒥ ᓵᑖᓇᓯᐅᑉ ᐆᒃᑐᕐᓗᒍ ᐱᔪᒥᓵᕐᐹ. ᑖᒃᑯᓇᓂ ᐅᓪᓗᓂ ᓂᕆᓚᐅᓐᖏᓚᖅ; ᐅᓪᓗᐃᑦ ᑖᒃᑯᐊ ᓈᖕᒪᑕ, ᑳᓕᕐᐳᖅ.
3ᑕᕝᕙ ᓵᑖᓇᓯᐅᑉ ᐅᖃᐅᑎᕚ, “ᒎᑎᐅᑉ ᐃᕐᓂᕆᒃᐸᑎᑦ, ᐅᓇ ᐅᔭᕋᒃ ᓂᐊᖂᔭᓐᖑᖁᓚᐅᕈᒃ.”
4 #
ᒨᓯᓯ ᑕᓪᓕᒪᖏᑦ 8:3. ᔩᓱᓯᐅᑉ ᑭᐅᕚ, “ᐊᒡᓚᖕᓂ ᑎᑎᕋᕐᓯᒪᕗᖅ, ‘ᐃᓄᒃ ᓂᐊᖂᔭᒥᑐᐃᓐᓇᖅ ᐃᓅᑦᔪᑎᖃᓐᖏᓚᖅ.’”
5ᑕᕝᕙ ᓵᑖᓇᓯᐅᑉ ᐳᕐᑐᔪᒧᐊᕐᑎᑉᐹ, ᑕᑯᑎᓪᓗᒍ ᓯᓚᕐᔪᐊᕐᒥ ᐊᖓᔪᖅᑲᐅᕕᓕᒫᓂᒃ ᐃᔨᐅᑉ ᓯᑯᓐᖏᓪᓚᖕᓂᖓᑐᑦ ᕿᓚᒻᒥᐅᑎᒋᔪᒥᒃ, 6ᓵᑖᓇᓯᐅᑉ ᐅᖃᐅᑎᕚ, “ᐊᖓᔪᖅᑲᐅᓂᓕᒫᑦ ᑕᒪᒃᑯᐊ ᓂᕐᑐᕐᓇᕐᓂᖏᓪᓗ ᐃᓕᖕᓄᑦ ᑐᓂᓂᐊᕐᐸᒃᑲ, ᐅᕙᓐᓄᑦ ᑐᓂᔭᐅᓯᒪᔪᑦ, ᐃᓱᒪᓐᓂᒃ ᑐᓂᔪᓐᓇᕐᐸᒃᑲ ᑐᓂᓯᕕᒋᔪᒪᔭᓐᓄᑦ. 7ᑕᒪᒃᑯᐊ ᑕᒪᕐᒥᒃ ᐱᑖᕆᓂᐊᕐᐸᑎᑦ, ᑐᒃᓯᐊᕐᕕᒋᒍᕕᖓ.”
8 #
ᒨᓯᓯ ᑕᓪᓕᒪᖏᑦ 6:13. ᔩᓱᓯᐅᑉ ᑭᐅᕚ, “ᐊᒡᓚᖕᓂ ᑎᑎᕋᕐᓯᒪᕗᖅ, ‘ᐊᑕᓂᖅ ᒎᑎᒋᔧᑦ ᑐᒃᓯᐊᕐᕕᒋᔭᒃᓴᕆᕙᑦ, ᑖᓐᓇᑐᐊᕐᓗ ᐱᔨᑦᓯᕐᑕᒃᓴᕆᕙᑦ.’”
9ᓵᑖᓇᓯᐅᑉ ᔩᓱᓯ ᔨᕉᓴᓕᒻᒧᐊᕈᑎᕚ, ᑐᒃᓯᐊᕐᕕᒡᔪᐊᑉ ᐳᕐᑐᓂᕐᐹᖓᓄᐊᕐᑎᐹ, ᐅᖃᐅᑎᓪᓗᒍ, “ᒎᑎᐅᑉ ᐃᕐᓂᕆᒃᐸᑎᑦ, ᑕᒫᓐᖓᑦ ᐃᓕᖕᓂᒃ ᑲᑕᒃᑎᓚᐅᕆᑦ ᐅᓄᖓ; 10#ᐃᓐᖏᕈᑦ 91:11,12.ᐊᒡᓚᖕᓂ ᑎᑎᕋᕐᓯᒪᖕᒪᑦ, ‘ᒎᑎᐅᑉ ᐂᖏᓕᖁᑎᓂ ᑎᓕᔪᒫᕐᐰᑦ, ᓴᐳᑎᔭᐅᖁᓪᓗᑎᑦ,’ 11ᐊᒻᒪᓗ, ‘ᑎᒍᒥᐊᕐᑕᐅᓂᐊᕐᐳᑎᑦ ᐃᑎᒐᑎᑦ ᐋᓐᓂᖁᓇᒋᑦ ᐅᔭᖅᑲᓄᑦ.’”
12 #
ᒨᓯᓯ ᑕᓪᓕᒪᖏᑦ 6:16. ᔩᓱᓯᐅᑉ ᑭᐅᕚ, “ᐊᒡᓚᖕᓂ ᐅᖃᕐᓯᒪᕗᖅ, ‘ᒎᑎᖕᓂᒃ ᐊᑕᓂᕐᓂᒃ ᐱᔪᒥᓵᕆᔪᒃᓴᐅᓐᖏᓚᑎᑦ.’”
13ᓵᑖᓇᓯᐅᑉ ᐱᔪᒥᓵᕆᑦᔪᑎᓂ ᐃᓱᓕᒃᑲᒥᒋᑦ, ᔩᓱᓯᒥᑦ ᕿᒪᕉᑎᕗᖅ ᐱᕕᒃᓴᒥᓂᒃ ᐅᑕᖅᑭᓕᕆᓪᓗᓂ.
ᔩᓱᓯᐅᑉ ᐱᓇᓱᐊᓯᒋᐊᕐᓂᖓ ᒐᓕᓕᐊᒥ
ᒫᑎᐅᓯ 4:12-17; ᒫᑯᓯ 1:14-15
14ᔩᓱᓯ ᐅᑎᕐᐳᖅ ᒐᓕᓕᐊᒧᑦ ᐊᓂᕐᓂᐅᑉ ᐃᑦᔪᕐᓁᑦᑑᑉ ᐱᔪᓐᓇᕐᓂᖓᑕ ᓇᔪᕐᓗᓂᐅᒃ, ᐅᖃᐅᓯᐅᓂᖓ ᒐᓕᓕᐊᑉ ᖃᓂᒋᔭᖓᓃᑦᑐᓕᒫᓄᑦ ᑐᓴᐅᒪᔭᐅᓕᕐᐳᖅ. 15ᐊᔪᕆᕐᑐᐃᓪᓗᓂ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ, ᖁᕕᐊᒋᔭᐅᒻᒪᕆᒃᐳᖅ ᐃᓄᓕᒫᓄᑦ.
ᔩᓱᓯᐅᑉ ᓇᕐᕈᒋᔭᐅᓂᖓ ᓈᓴᕇᑎᒥ
ᒫᑎᐅᓯ 13:53-58; ᒫᑯᓯ 6:1-6
16ᑭᖑᕐᖓᒍᑦ ᔩᓱᓯ ᓈᓴᕇᑎᒧᐊᕐᐳᖅ, ᐱᕈᕐᓴᕕᒋᓚᐅᕐᑕᒥᓄᑦ; ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓄᐊᕐᐳᖅ, ᐃᓕᖅᑯᓯᕆᕙᒃᑕᒥᑐᑦ ᓴᐸᑎᐅᑎᓪᓗᒍ, ᓂᑯᕕᑉᐳᖅ ᐊᑐᐊᕐᓯᓂᐊᓕᕋᒥ ᐊᒡᓚᖕᓂᒃ; 17ᑐᓂᓯᕕᐅᒐᒥ ᓇᓚᐅᑦᑍᔪᑉ ᐂᓮᐊᓯᐅᑉ ᐊᒡᓚᖏᓐᓂᒃ. ᒪᒃᐱᕋᒥᒋᑦ ᐃᒫᒃ ᐊᒡᓚᒃᓯᒪᔪᑦ ᐅᖃᓕᒫᕐᐰᑦ,
18 #
ᐂᓮᐊᓯ 61:1,2. “ᐊᑕᓂᐅᑉ ᐊᓂᕐᓂᖓᑕ ᓇᔪᕐᐹᖓ,
ᓂᕈᐊᓚᐅᕐᐹᖓ ᐊᔪᕆᕐᑐᐃᖁᓪᓗᖓ
ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐊᒃᖢᔪᓄᑦ.
ᑎᓕᕚᖓᓗ ᐅᖃᐅᑦᔨᖁᓪᓗᖓ ᑎᒍᔭᐅᓯᒪᔪᑦ ᐊᓂᑎᑕᐅᖁᓪᓗᒋᑦ,
ᑕᐅᑐᖏᑦᑐᑦ ᑕᐅᑐᓕᕐᑎᑕᐅᖁᓪᓗᒋᑦ,
ᓵᓚᒋᔭᐅᓯᒪᔪᓪᓗ ᕿᓚᕈᑦᔮᕐᑕᐅᖁᓪᓗᒋᑦ,
19ᐅᖃᐅᑦᔨᖁᓪᓗᖓ ᐊᑕᓂᐅᑉ ᐱᐅᓕᓯᕕᒋᔪᒪᔭᓐᖓᑕ ᐊᕐᕌᒍᖓ ᓇᓪᓕᐅᑎᖕᒪᑦ.”
20ᔩᓱᓯᐅᑉ ᐅᖃᓕᒫᕐᑕᓂ ᐃᒧᒐᒥᒋᑦ, ᐅᑎᕐᑎᑉᐰᑦ ᑲᒪᔨᒧᑦ, ᐊᔪᕆᕐᑐᐃᕕᖕᒧᑦ ᐃᖏᓪᓗᓂ; ᑕᕝᕙᓃᑦᑐᓕᒫᑦ ᑕᑯᓐᓇᓕᕐᐹᑦ. 21ᐅᖃᕐᕕᒋᓕᕐᐰᑦ, “ᐅᓪᓗᒥ ᐅᑯᐊ ᐊᒡᓔᑦ ᑐᓴᕐᑕᓯ ᓇᓪᓕᐅᑎᕗᑦ.”
22ᐊᔪᖏᓐᓂᖓ ᐅᖃᐅᓯᕆᕚᑦ, ᑲᒪᓪᓗᑎᒃ ᐅᖃᕈᓐᓇᑦᓯᐊᕐᓂᖓᓂᒃ; ᐅᖃᕐᓗᑎᒃ, “ᐅᓇ ᔫᓯᐱᐅᑉ ᐃᕐᓂᕆᓐᖏᓚᐅᒃ?”
23ᔩᓱᓯᐅᑉ ᐅᖃᐅᑎᕔᑦ, “ᓇᓗᓇᓐᖏᓚᖅ ᐃᒫᒃ ᐅᖃᐅᓯᑐᖃᕐᒥᒃ ᐅᖃᐅᑎᔪᒪᓂᐊᕋᑦᓯᓐᖓ, ‘ᐋᓐᓂᐊᓯᐅᕐᑏ ᐃᓕᖕᓂᒃ ᐋᖅᑭᓚᐅᕆᑦ; ᑐᓴᕐᓯᒪᔭᑦᑎᓐᓂᒃ ᑲᐲᕐᓂᐊᒥ ᐱᓂᐊᕐᓂᕆᓚᐅᕐᑕᕐᓂᒃ, ᐅᕙᓂ ᓈᓴᕇᑎᒥ ᐱᓇᓱᐊᓚᐅᕆᑦᑕᐅᖅ.’” 24#ᔪᐊᓇᓯ 4:44.ᐃᒫᒡᓗ ᐅᖃᕆᕗᖅ, “ᓱᓕᔪᒥᒃ ᐅᖃᐅᑎᕙᑦᓯ, ᓇᓚᐅᑦᑍᔪᒥᒃ ᐃᓚᓕᐅᕐᑕᐅᔪᖃᓚᐅᕐᓯᒪᓐᖏᓚᖅ ᐱᕈᕐᓴᕕᕕᓂᕐᒥᓂ. 25#ᐊᑕᓃᑦ ᓯᕗᓪᓖᑦ 17:1.ᓱᓕᔪᒥᒃ ᐅᖃᐅᑎᕙᑦᓯ, ᐊᒥᓱᓂᒃ ᐅᐃᒡᒐᕐᓂᕐᑕᖃᓚᐅᕐᐳᖅ ᐃᓴᕆᐊᓕᒥᐅᓂ ᐃᓔᑦᔭ ᐃᓅᑎᓪᓗᒍ, ᑍᑦᓱᒪᓂ ᓯᓚᓗᓚᐅᖏᒻᒪᑦ ᐊᕐᕌᒍᓂᒃ ᐱᖓᓱᓂᒃ, ᑕᖅᑭᓂᒡᓗ ᐱᖓᓲᔪᕐᑐᓂᒃ, ᑳᖕᓇᕐᑐᕐᔪᐊᖃᓕᓚᐅᕐᐳᖅ ᓄᓇᓕᒫᒥ; 26#ᐊᑕᓃᑦ ᓯᕗᓪᓖᑦ 17:8-16.ᐃᓔᑦᔭ ᐃᓴᕆᐊᓕᒥᐅᑦ ᓇᓪᓕᐊᓐᓄᑦ ᑎᓕᔭᐅᓚᐅᓐᖏᓚᖅ ᓄᓇᓕᖕᒧᓪᓕ ᐊᑕᐅᓯᕐᒧᑦ ᑎᓕᔭᐅᓚᐅᕐᐳᖅ ᔨᕆᐹᑎᒧᑦ, ᓮᑐᓂᒦᑦᑐᒧᑦ, ᐊᕐᓇᒧᑦ ᐅᐃᒡᒐᕐᓂᕐᒧᑦ. 27#ᐊᑕᓃᑦ ᐂᑉᐸᖏᑦ 5:1-14.ᐊᒥᓱᑦ ᑲᑉᐱᐊᒋᔭᐅᔪᒥᒃ ᐸᕐᑎᓚᐅᕐᐳᑦ ᐃᓴᕆᐊᓕᒥᐅᑦ ᓄᓇᖓᓂ ᓇᓚᐅᑦᑍᔪᖅ ᐃᓔᓴ ᐃᓅᑎᓪᓗᒍ; ᓇᓪᓕᐊᓐᓂᒡᓘᓐᓃᑦ ᐋᖅᑭᒃᑕᐅᔪᖃᓚᐅᓐᖏᓚᖅ, ᓁᒪᓐᓕ ᓯᕆᐊᒥᐅᖅ ᑭᓯᒥ ᐋᖅᑭᒃᑕᐅᔪᑑᓚᐅᕐᐳᖅ.”
28ᐃᓄᐃᑦ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓃᑦᑐᑦ ᑕᒪᑐᒥᖓ ᑐᓴᕋᒥᒃ ᓂᓐᖓᒃᐳᑦ. 29ᓂᑯᕕᓐᓇᒥᒃ ᔩᓱᓯ ᑎᒍᓪᓗᒍ ᑕᓯᐅᕐᐹᑦ, ᓄᓇᓕᖕᓂᑦ ᑕᕝᕙᓐᖓᑦ ᐃᓐᓈᕈᕐᒧᐊᕈᑎᓪᓗᒍ, ᑕᕝᕙᓐᖓᑦ ᐃᔪᒃᑲᕐᑎᑦᓱᒪᓪᓗᒍ, ᐃᒡᓗᒐᓴᖃᕐᕕᐅᑉ ᐃᓐᓈᕈᖓᒍᑦ. 30ᔩᓱᓯᓕ ᐃᓄᒋᐊᒃᑐᑦ ᐊᑯᕐᖓᑦᑎᒍᑦ ᑖᒃᑯᓇᓐᖓᑦ ᐊᐅᓪᓚᕐᐳᖅ.
ᐊᖑᑦ ᐊᓂᕐᓂᕐᓗᖕᒥᒃ ᐃᑎᕐᑕᐅᓯᒪᔪᖅ
ᒫᑯᓯ 1:21-28
31ᑕᕝᕙᓐᖓᑦ ᔩᓱᓯ ᑲᐲᕐᓂᐊᒧᐊᕐᐳᖅ, ᒐᓕᓕᐊᒦᑦᑐᒧᑦ. ᓴᐸᑎᐅᓕᕐᒪᑦ ᑕᕝᕙᓂ ᐊᔪᕆᕐᑐᐃᕗᖅ. 32#ᒫᑎᐅᓯ 7:28,29.ᐊᔪᕆᕐᑐᐃᑦᔪᑎᒋᔭᖏᑦ ᐃᓄᐃᑦ ᑲᒪᓂᐊᕈᑎᒋᕔᑦ, ᐱᔪᓐᓇᕐᓂᖃᕐᑎᑕᐅᓪᓗᓂ ᐊᔪᕆᕐᑐᐃᖕᒪᑦ. 33ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓃᑦᑐᖃᕐᐳᖅ ᐊᖑᒻᒥᒃ ᐊᓂᕐᓂᕐᓗᖕᒧᑦ ᐃᑎᕐᑕᐅᓯᒪᔪᒥᒃ; ᑖᓐᓇ ᓂᓪᓕᐊᓕᕐᐳᖅ ᓂᐱᖅᑯᕐᑐᓪᓗᓂ, 34“ᐋᖅ! ᔩᓱᓯ ᓈᓴᕇᑎᒥᐅᖅ, ᖃᓄᐃᓕᐅᕆᐊᕐᑐᕐᐱᑎᒎᑦ, ᑐᖁᕋᕆᐊᕐᑐᕐᐱᑎᒎᑦ? ᑭᓇᐅᖕᒪᖔᕐᐱᑦ ᖃᐅᔨᒪᒐᒃᑭᑦ, ᒎᑎᐅᑉ ᐃᑦᔪᕐᓁᑦᑐᖁᑎᒋᖕᒪᑎᑦ.”
35ᔩᓱᓯᐅᑉ ᐊᓂᕐᓂᕐᓗᒃ ᐃᓂᕐᑎᕐᐹ, ᐅᖃᐅᑎᓪᓗᒍ, “ᓂᐸᖏᕐᓗᑎᑦ, ᐃᓄᖕᒥᑦ ᐆᒪᓐᖓᑦ ᐊᓂᒋᑦ!” ᐊᓂᕐᓂᕐᓘᑉ ᐃᓄᒃ ᐅᕐᕈᑎᑉᐹ ᐃᓄᐃᑦ ᓵᖏᓐᓂ, ᖃᓄᐃᓕᓇᒍ ᑖᑦᓱᒪᖓᑦ ᐊᓂᕗᖅ.
36ᐃᓄᓕᒫᑦ ᑲᒪᔪᐊᓘᕗᑦ ᐃᒻᒥᖕᓄᑦ ᐅᖃᓗᑎᒃ, “ᖃᓄᐃᑦᑐᒥᖑᓇ ᐅᖃᐅᓯᓕᒃ ᐊᐅᓚᑦᓯᔪᓐᓇᕐᑐᖅ ᐱᔪᓐᓇᕐᓂᖃᕐᓗᓂ ᐊᓂᕐᓂᕐᓗᖕᓂᒃ ᐊᓂᖁᔨᔪᓐᓇᕐᑐᖅ, ᓈᓚᒃᑕᐅᓪᓗᓂ ᑖᒃᑯᓇᓐᖓᑦ?” 37ᔩᓱᓯᐅᑉ ᐅᓂᒃᑲᐅᓯᐅᓂᖓ ᑐᓴᐅᒪᔭᐅᓕᕐᐳᖅ ᑲᐱᕐᓂᐊᒥᐅᑦ ᖃᓂᒋᔭᖓᓃᑦᑐᓕᒫᓄᑦ.
ᔩᓱᓯᐅᑉ ᐋᖅᑭᒃᓯᓂᖓ ᐃᓄᖕᓂᒃ ᐊᒥᓱᓂᒃ
ᒫᑎᐅᓯ 8:14-17; ᒫᑯᓯ 1:29-34
38ᔩᓱᓯ ᐊᓂᕗᖅ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂᑦ ᓮᒨᓂᐅᑉ ᐃᒡᓗᖓᓄᐊᕐᓗᓂ. ᓮᒧᓂᐅᓪᓕ ᓴᑭᖓ ᐊᕐᓇᖅ ᐋᓐᓂᐊᕗᖅ ᐆᑎᕐᓇᕐᓗᓂ, ᑖᓐᓇ ᐅᖃᐅᓯᕆᕚᑦ ᔩᓱᓯᒧᑦ. 39ᔩᓱᓯᐅᑉ ᐅᐸᒃᑲᒥᐅᒃ ᐃᒡᓕᖓᑕ ᓴᓂᐊᓂ ᓇᖏᕐᓗᓂ, ᐋᓐᓂᐊᖓ ᐆᑎᕐᓇᕐᑐᖅ ᐊᓂᖁᕚ, ᑕᕝᕙᓐᖓᑦ ᐊᓂᕗᖅ; ᐊᕐᓇᖅ ᑕᕝᕔᓐᓇᖅ ᒪᑭᓐᓇᒥ ᑕᕝᕙᓃᑦᑐᑦ ᐱᔨᑦᓯᕋᓕᕐᐰᑦ.
40ᐅᓐᓄᓕᕐᑎᓪᓗᒍ ᓯᕿᓂᖅ ᓂᐱᖕᒪᑦ, ᐃᓄᓕᒫᑦ ᐃᓚᖃᕐᑐᑦ ᖃᓂᒪᔪᓂᒃ ᖃᓄᑐᐃᓐᓇᖅ ᐋᓐᓂᐊᖃᕐᑐᓂᒃ ᔩᓱᓯᒧᑦ ᐋᑦᓯᕗᑦ; ᑕᒪᕐᒥᒃ ᐸᑎᒻᒥᕔᑦ ᐋᖅᑭᒡᓗᒋᑦ. 41ᐊᓂᕐᓂᕐᓗᐃᓪᓗ ᐃᓄᖕᓂᑦ ᐅᓄᕐᑐᓂᑦ ᐊᓂᕗᑦ, ᓂᓪᓕᐊᓪᓗᑎᒃ ᐃᒫᒃ, “ᒎᑎᐅᑉ ᐃᕐᓂᕆᕚᑎᑦ!”
ᐃᓂᕐᑎᕐᐰᑦ, ᐅᖃᓪᓚᖁᓇᒋᑦ, ᖃᐅᔨᒪᖕᒪᑕ ᙭ᔅᑑᓯᐅᓂᖓᓂᒃ.
ᔩᓱᓯᐅᑉ ᐊᔪᕆᕐᑐᐃᓂᖓ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ
ᒫᑯᓯ 1:35-39
42ᐅᓪᓛᓐᖑᕐᑎᓪᓗᒍ ᖃᐅᒻᒪᖕᒪᑦ ᔩᓱᓯ ᓄᓇᓕᖕᓂᑦ ᐊᐅᓪᓚᕐᐳᖅ ᐃᓄᖃᖏᑦᑐᒧᐊᕐᓗᓂ, ᐃᓄᐃᑦ ᕿᓂᓕᕐᐹᑦ, ᓇᓂᒐᒥᑦᔪᒃ ᐃᓂᕐᑎᕐᐹᑦ ᐊᐅᓪᓚᖁᓇᒍ ᓄᓇᒥᖕᓂᑦ; 43ᔩᓱᓯᐅᑉ ᐅᖃᐅᑎᕔᑦ, “ᓄᓇᓕᖕᓂ ᐊᓯᑦᓯᓐᓂᑦᑕᐅᖅ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᐅᓯᖃᕆᐊᖃᕐᐳᖓ ᒎᑎᐅᑉ ᐊᑕᓂᐅᕕᖓᓂᒃ; ᑕᒪᓐᓇ ᑎᓕᔭᐅᑦᔪᑎᒋᓯᒪᒐᒃᑯ.”
44ᑍᒤᒻᒪᑦ ᐊᔪᕆᕐᑐᐃᓚᐅᕐᐳᖅ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ ᔫᑎᐊᒦᑦᑐᓂ.
Currently Selected:
ᓘᑲᓯᐅᑉ ᐊᒡᓚᖏᑦ 4: EAIB
Tõsta esile
Share
Kopeeri
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.