یوحنا 5
5
عیسی شفایه دِدَتَ مِرُوَگه گو دَسته وی هِشک بویی بو
1پاشه مدَتَگه، عَیدَگه یهودیا هَبو و عیسی چو شَهره اورشلیمه. 2اورشلیمه دا، رَخ ’دَروازا پَزی‘ حَوضَگ هَیَ گو اَزمانه عبرانیان دا گاز وی دِگَن «بِیت‌حِسْدا» و پِنج اِیوان هَنَ. 3ناو واندا گَلَک مِرُوِت نَساخ خو دِرِژ دِگِرِن، آنی مِرُوِت گُورَ، مِرُوِت شِل و مِرُوِت فلج. اَو هِویا چِلقاندِنا آوه بون، 4چون گو اَوان گُمان دِگِرِن مدَته جارَگه، میلیاکَتَگ ژه آلیه خاده ژُردا تِت و آوه دِچِلقینیت؛ یِکِمین مِرُوه گو پاشه چِلقاندِنا آوه دِچو ناو حَوضه دا، ژه هر جورَ نَساخیا گو هَبا شفا پَیدا دِگِر. 5مِرُوَگ وِدَره بو گو سی و هَشت سال بو نَساخ بو. 6وقته عیسی اَو وِدَره دِرِژگِری دیت و زانی گو کِمِژوَیَ وه حالیدایَ، ژه وی پیسیار گِر: «تِ دِخازی شفایه پَیدا گَی؟» 7اَوه نَساخ جیواب دا عیسی: «آغایه مِن، مِن چه کَس چِنینَ گو وقته آو دِچِلقیت، مِن بِگَتَ ناو حَوضه دا، حَتا اَز خو دِگَهَشینِمَ وِدَره، پِش مِدا یگَ دیتِر چویَ ناودا.» 8عیسی گُتَ وی: «رابَ، جیه خو راگَ و ره هَرَ.» 9اَوه مِرُوی هَ وه دَمه شفا پَیدا گِر و جیه خو راگِر و ره چو.
اَو رُژ، رُژا شَنبیا مُقدسَ یهودیان بو. 10بَجا مَزِنِت یهودیا گُتنَ اَو مِرُوه گو شفا پَیدا گِره بو: «ایرو رُژا شَنبیه یَ و گورَیَگی شِریعَته تِ نابی جیه خو راگَی دوو خودا بِبَی.» 11بله اَوی مِرُوی جیوابا واندا گُت: «اَوه گو شفا دا مِن، گُتَ مِن، ”جیه خو راگَ و ره هَرَ“.» 12ژه وی پیسیار گِرِن: «اَوه گو گُتَ تَ ”جیه خو راگَ و ره هَرَ“، کِیَ؟» 13بله مِرُوه شفا گِرتی نَدِزانی اَو کِیَ، چون گو گَلَک مِرُو وِدَره بون و عیسی خو ناو واندا بِزِر گِره بو.
14پاشه مدَتَگه، عیسی اَو ناو معبدا خدادا پَیدا گِر و گُتَ وی: «بَرخوده، تِ باش بویی! ایدی گُنَهه نَگَ گو دِشدَگه خِرابتِر سَره تَدا نَیِت.» 15اَو مِرُو چو و گُتَ یهودیا گو اَوه گو شفا دابو وی عیسی بو.
16بَر خاطره هِنده گو عیسی اَو شُلَنَ رُژا شَنبیه دا دِگِر، یهودیا اَذیَتا عیسی دِگِرِن. 17بله عیسی جیوابا واندا گُت: «بابه مِن حَتا نَهَ شُل دِگَت، اَز ژی شُل دِگَم.» 18ژه بَر خاطره وه هِنده، یهودی زِدَتِر ژه پِشتا دوو گُشتِنا ویدا بون. عیسی نه تِنه رُژا شَنبیه خُدان نَدِگِر، بَلگو حتا دِگُت گو خدا بابه ویَ و وِسا خو گَل خدادا یگ دِگِرت.
قُدرَت و اقتدارا گوره خدا
19عیسی گُتَ یهودیان: «بَراستی، بَراستی، اَز بُ وَ دِبِژِم گو گور بَخودا چه شُله نِگاریت بِگَت خِنجی وه شُله گو دِبینیت بابو دِگَت؛ هَچی شُلا بابو دِگَت، گور ژی دِگَت. 20چون گو بابو، هَژَ گور دِگَت و تواوی شُله گو دِگَت نیشا وی دِدَت و شُلِت وِنَ مَزِنتِر ژی دیه نیشا وی بِدَت گو اون صِفَت گِرتی بِن. 21چون هَ وِسا گو بابو مِریا بِلند دِگَت و ژیانه دِدَتَ وان، گور ژی بُ اَونه گو اَو بِخازیت، ژیانه دِدَت. 22و بابو سَر چه کَسه قضاوته ناگَت، بَلگو تواوی شُلا قضاوته سِپاردیَ گوری. 23گو همو کَس حُرمَتا گوری خُدان گَن، هَ وِسا گو حُرمَتا بابو خُدان دِگَن. هَچی کَسه حُرمَتا گوری خُدان نَگَت، حُرمَتا بابه گو اَو رِگِریَ ژی خُدان ناگَت. 24بَراستی، بَراستی، اَز بُ وَ دِبِژِم، هَچی کَسه قِسه مِن بِبیهیسیت و ایمانه بینیتَ اَوه گو اَز رِگِرِمَ، ژیانا اَبَدی هَیَ. اَو نایِت قضاوت گِرِن، چون گو اَو ژه مِرِنه چویَ بُ ژیانه. 25بَراستی، بَراستی، اَز بُ وَ دِبِژِم، زَمانَگ دیه بِگَهَشیت، و هَ نَهَ گَهَشتیَ ژی گو مِری دیه دَنگا گوره خدا بِبیهیسِن و اَونه گو دِبیهیسِن، دیه ساخ بِن. 26چون هَ وِسا گو بابو ناو خودا ژیان هَیَ، ایجا بُ گوری ژی پِشکِش گِریَ گو ناو خودا ژیان هَبیت، 27و اقتدار دایَ وی گو قضاوته بِگَت، چون گو اَو گوره انسانَ. 28ژه وان قِسانَ صِفَت گِرتی نَبِن، چون گو زَمانَگ دیه بِگَهَشیت گو تواوی اَونه گو ناو مَزارادانَ، دیه دَنگا وی بِبیهیسِن 29و دیه بِنَ دَروَ. اَونه گو باشیتی گِره بِن، دیه ساخ بِن و حَتا اَبَده دیه بژین و اَونه گو پیسیتی گِره بِن، دیه ساخ بِن گو قضاوتا وان بِتَ گِرِن. 30اَز بَخودا چه شُله نِگارِم بِگَم، بَلگو اَز گورَیَگی وه دِشدا دِبیهیسِم قضاوته دِگَم و قضاوتا مِن راستَ، چون گو اَز دوو داخازیا خودا نینِم، بَلگو دوو داخازیا اَوه گو اَز رِگِرِم دامَ.
شَهادَتِت عیسی
31«هَگو اَز تِنه بوخو سَر خو شَهادَته بِدَم، شَهادَتا مِن به هِتبارَ. 32بله یگَ دیتِر هَیَ گو سَر مِن شَهادَته دِدَت و اَز دِزانِم شَهادَتا وی راستا مِدا هِتبار هَیَ. 33وَ هِندَ مِرُو رِگِرِنَ لاره یحیا و اَوی سَر راستیه شَهادَت دا. 34وِسا نینَ گو اَز هَوجَیی شَهادَتا گو انسان دِدَت بِم، بَلگو وان قِسانَ دِبِژِم گو اون نجاته پَیدا گَن. 35یحیایه گو غُسلا تعمیده دِدَت چِرایَگ بو گو دِشَوِتی و دِبِرِسقی، و وَ دِخاست بُ مدَتَگه ناو نورا ویدا کَیف خوش بِن. 36بله اَو شَهادَتا گو مِن هَیَ ژه شَهادَتا یحیا مَزِنتِرَ. چون شُلِت گو بابو سِپاردیَ مِن گو کامِل گَم، آنی وان شُله گو اَز دِگَم، بوخو سَر مِن شَهادَته دِدَن گو بابو اَز رِگِرِمَ. 37و اَو بابه گو اَز رِگِرِم، بوخو سَر مِن شَهادَته دِدَت. دَنگا وی وَ چه جارا نَبیهیستیَ و صومَته وی وَ چه جارا نَدیتیَ، 38و کلاما وی ناو وَدا جی نَگِرتیَ، چون گو اون ایمانه ناینَ اَو کَسه گو اَوی رِگِریَ. 39اون نِویسارِت مُقدس سَر و بِن دِگَن چون اون وَ فِکِر دِگَن گو وَ ناو واندا ژیانا اَبَدی هَیَ، حال اَو حالَ اَونَ اَو کِتِبِن گو سَر مِن شَهادَته دِدَن. 40بله دیسا ژی اون ناخازِن بِنَ لاره مِن گو وَ ژیان هَبیت.
41«اَز مَحتا انسانا قَبول ناگَم، 42بله اَز وَ باش ناس دِگَم گو وَ مُحبّتا خدا ناو دله خودا چِنینَ. 43اَز بِ ناوه بابه خو هاتِمَ و اون مِن قَبول ناگَن. بله هَگو یگَ دیتِر بِ ناوه خو بِت، اونه اَوی قَبول گَن. 44اون چاون دِگارِن ایمانه بینِن، وه حالیدا گو مَحته ژه یِگودو قَبول دِگَن و دوو مَحتا گو ژه آلیه خدایه یکتادا تِت، نینِن؟ 45وَ فِکِر نَگَن گو اَزه حُضورا بابودا وَ محکوم گَم؛ اَوه گو وَ محکوم دِگَت موسی پِیغَمبَرَ، هَمَن اَوه گو وَ اُمیدا خو دایَ وی. 46چون هَگو وَ ایمان موسی پِیغَمبَر هَبا، وَیه ایمان مِن ژی هَبا، چون گو اَوی راستا مِدا نِویسیَ. 47بله هَگو وَ باواری نِویساره وی چِنینَ، اونه چاون قِسِت مِن باوار گَن؟»
Currently Selected:
یوحنا 5: SKB
Tõsta esile
Share
Copy
Want to have your highlights saved across all your devices? Sign up or sign in
@ 2024 Korpu Company