Mateo 4
4
Pinayagen nu Diyos a Purbaán a Toksuwan ni Satanas ti Jesus
(Markos 1:12-13; Lukas 4:1-13)
1Káttapos ay inyangay nu Ispiritu nu Diyos ti Jesus hod tu kaparangan para purbaan a toksuwán ni Satanas.#4:1 U upos a Satanas ay gábwat tu upos a Hebreo a u kahulugan na ay “kalaban.” U upos a Diyablo ay gábwat tu upos a Greigo a u kahulugan na ay “tagabintang.” 2Hod ay nagkulasyon ti Jesus ti áppat a pulo a aldew ay ti gibi. Sakay nagaláp siya. 3Sakay immangay nikuna ti Satanas sakay kinagi na “Ni tatahoden a hiko u Anak nu Diyos ay ipeta mo. Gimitán mo a makan i bitowe hide.” 4Pero timmábbeg ti Jesus “Umádko, dipo nesulat tu Upos nu Diyos a ‘Bakán la a tu makan a mabiyag i tolayay pero kailangan na pa u atanan a upos nu Diyos#4:4 Basaan tu Deuteronomio 8:3..’ ” 5Káttapos ay inyangay siya ni Satanas tu atáp nu Templo ti Jerusalem. 6Sakay kinagi ni Satanas ni Jesus “Ni hiko u Anak nu Diyos ay tumápduk ka dipo nesulat tu Upos nu Diyos a ‘Utusan nu Diyos u anghel na hide a mangbantay niko. Kanya sangbután di ka tánni awan ka maánya#4:6 Basaan tu Awit 91:11-12.’ ” 7Pero timmábbeg ti Jesus “Nesulat be a ‘Dyan ka maggimet ti essa a bagay para la purbaan mo ni talaga a gimitán nu Panginoon a Diyos u panantu na hide#4:7 Basaan tu Deuteronomio 6:16.’ ” 8Káttapos ay inyangay dámman siya ni Satanas tu toktok nu essa a malangkaw a buked sakay impeta na nikuna u atanan a babansa ti munduway sakay u kayamanan de. 9Sakay kinagi ni Satanas ni Jesus “Iyatád ku niko iye a atanan ni lumuhud ka sakay sumamba nikán.” 10Pero inutusan ni Jesus ti Satanas “Umadeyo ka nikán Satanas. Dipo nakasulat be a ‘Sambaán mo u Panginoon a Diyos sakay siya la u sunudán mo awan dán ti agum#4:10 Basaan tu Deuteronomio 6:13..’” 11Kanya nilakaden siya ni Satanas. Sakay dimmemát u anghel hide sakay sinerbiyan di siya.
Sinapulan ni Jesus u Tarabaho Na ti Galilea
(Markos 1:14-15; Lukas 4:14-15)
12Nadid essa a aldew ay nabaheta ni Jesus a nepireso ti Juan#4:12 Basaan tu Mateo 14:3-12. kanya nagsoli ti Jesus ti Galilea. 13Sakay awan dán siya nágyan ti Nazaret, inumagton siya ti Capernaum#4:13 Te 32 a kilometro u kaadeyo nu Capernaum sakay Nazaret.. Iye a banuwan ay adeni tu minalno a hod tu pag-itan nu págyanan nu lahi hide ni Zabulon sakay Neftali. 14Nangyari iye para matupad u kinagi ni Propeta Isaias tu itod pa a 15“Hikam a mágyan ti Zabulon sakay Neftali a sakup ni Galilea a kadibilew ni Jordan a págyanan nu makpal a tolay a awan maniwala tu Diyos. 16Hikam a mágyan tu kadiklámman nu kasalanan ay maketa ti dakál a demlag. U demlag u mángpeta tu dilan nu kaligtasan tu mágyan hide tu lugar nu kamatayan#4:16 Basaán tu Isaias 9:1-2..” 17Hod ti Capernaum ay nagsapul ti Jesus a magtoldu. Kinagi na “Adággen moy u kasalanan moy dipo adeni dán a maghare u Diyos nikitam.”
Inakit ni Jesus u Appat a Mángngikan a Magin Disepulus Na
(Markos 1:16-20; Lukas 5:5-11)
18Nadid tu páglakad ni Jesus tu digdig nu minalno nu Galilea, ay netan na u duwwa a lállake a magsabud dipo mángngikan hide. Matkaka u duwwa, u ngahan nu essa ay ti Simon, u palayaw na ay Pedro sakay u essa ay ti Andres. 19Sakay kinagi na nide “Kumuyog kam nikán dipo tolduwan takam ni kodya a magakit ti tolay para sumunud hide nikán.” 20Págdaka de a inwahak u gilagila de sakay kimmuyog dán hide ni Jesus.
21Tulos hide a naglakad tu digdig nu minalno sakay netan di Jesus u matkaka a lállake a di Santiago sakay ti Juan a anak ni Zebedeo. Hod hide sakay tu ama de tu abang de a magayuma tu gila de. Inakit be hide ni Jesus a magin disepulus na. 22Págdaka di be a linakaden u ama de sakay u abang de sakay kimmuyog hide ni Jesus.
Nagtoldu ti Jesus Tungkul tu Pághare nu Diyos sakay Nagpapiyya Siya tu Te Saket Hide.
(Lukas 6:17-19)
23Nadid immangay ti Jesus tu atanan a banuwan ti Galilea sakay nagtoldu tu sinagoga#4:23 U Sinagoga ay essa a bilay a págsambaan nu Judio hide. de hide. Intáttoldu na u Maganda a Baheta tungkol tu pághare nu Diyos. Sakay pinagpiyya na be u atanan a sakisaket nu tolay hide. 24Kanya nasaneg nu totolay hide tu buo a lugar a Siria#4:24 U Siria ay essa be a dakál a banuwan a adeni ti Galilea. u ginimet ni Jesus a makataka-taka hide. Inyangay de nikuna atanan nu te saket hide, u hinayup hide, u mágpatay hide sakay u awan dán hide makaahikad. Pinagpiyya hide a atanan ni Jesus. 25Sakay immunonod nikuna u makpal a tahod a tolay a taga Galilea, taga Decapolis, taga Jerusalem, taga iba-iba a banuwan ni Judea sakay u mágyan hide tu banuwan a dibilew nu Jordan.
Currently Selected:
Mateo 4: MBJC
Tõsta esile
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.