Mateo 15
15
Mas Mahalaga U Utus Nu Diyos Nan Tu Utos Nu Nunu Hide
(Markos 7:1-13)
1Essa aldew te immangay ni Jesus a Pariseo hide sakay u Maisto hide nu Kautusan. Gábwat hide ti Jerusalem. 2Tinanung de ti Jesus “Bakin a labagán nu disepulus mo hide u kautusan nu nunu tam hide? Awan di ugisan u kamakamát de bagu a kuman ayun tu paraan a intoldu nu nunu tam hide.” 3Tinábbeg hide ni Jesus “Bakin hikam, nilabag moy u kautusan nu Diyos para la masunud u utus nu nunu hide? 4Halimbawa la, inyutus nu Diyos a ‘Igalang mo tama mo sakay tena mo,’ sakay inyutus na be a ‘Ni ti deya u magupos ti madukás laban nama na sakay tena na ay dapat ipabuno siya.’ 5Pero intoldu moy a ‘Awan dán kailangan a tulungan ti pilak u dáddakál ni u pilak ay iyatád dálla tu Diyos.’ 6Kanya dipo tu kautusan nu nunu ay awan nasunud u kautusan nu Diyos. 7Mapagkunware kam. Tama u hula ni propeta Isaias tungkul nikam. Kinagi nu Diyos tu pamamag-itan na tu itod pa#15:7 Basaan u Isaias 29:13. a 8‘Hide iye a tolay ay gumalang nikán tu labi di la pero tu isip de ay awan. 9U págsamba de nikán ay awan ti kabuluhan dipo pinalitan de u kautusan ko tu kautusan de.’”
Intoldu ni Jesus Ni anya Talaga U Makapangpadangát tu Tolay
(Markos 7:14-23)
10Sakay pinaadeni ni Jesus u tolay hide nikuna sakay kinagi na nide “Pakaintendiyán moy u kagiyán ku nikam. 11Bakán a tu isubu nu tolay u makapangpadangát nikuna tu Diyos nan u madukás a kagiyán na.”
12Mamayamaya ay immadene u disepulus hide ni Jesus nikuna sakay kinagi de “Nasakitan u Pariseo hide tu kinagi mo.” 13Tinábbeg hide ni Jesus “Bagután nama ko a atoy ti langet u halaman hide a awan na inmula. 14Pabayan moy hide, buhák hide a tagagiyya. Ni u buhák u maggiyya tu buhák ay pareho hide a matápduk tu ábbut.” 15Sakay nagtanung ti Pedro “Ipaliwang ped nikame u kinagi mo a awan makapangpadangát tu Diyos u kanán nu essa a tolay.” 16Timmábeg ti Jesus “Pati bál hikam ay awan moy naintendiyan u kinagi ko? 17Atanan a kanán nu essa a tolay ay angay tu tiyan na sakay iyattay na. 18Pero u madukás a upos ay gábwat tu makasalanan a puso ay itod u makapangpadangát tu tolay tu Diyos. 19Dipo u gábwat tu puso u madukás a isip tu agum, pámmuno, pángngalunya, págtakaw, págsistigo ti kakabuliyan tu agum a tolay sakay págmetmet. 20Sa itod hide u makapangpadangát tu tolay, bakán a u kuman a awan nagguges ti kamát.”
U Dakál a Pánnampalataya nu Essa a Bábbey a Taga Canaan
(Markos 7:24-30)
21Nadid hinumektat hod ti Jesus sakay immangay tu luta a adeni tu banuwan hide a Tiro sakay Sidon. 22Hod ay te immadeni nikuna a bábbey a taga Canaan a mabegsák a magpakhaw a nákkekagbi nikuna “Panginoon a Anak ni David, kagbiyanák mu ped. U anak ko a bábbey ay hinayup. Pahirapan siya a tahod nu madukás a ispirito.” 23Pero awan la siya tinábbeg ni Jesus. Sakay inumadene ni Jesus u disepulus na hide sakay kinagi de “Palakadán mo siya, mahehaw a umunonod nikitam.” 24Kanya kinagiyan na u bábbey “Inutusanák nu ama ko para la tu netawtaw a tupa a Israelita hide, bakán a tu awan Israelita.” 25Pero inumadene u bábbey sakay limmuhud tu atubang na sakay kinagi na “Tulunganák mu ped Panginoon.” 26Timmábbeg ti Jesus “Awan karapatdapat a iyatád tu aso u dapat a kanán nu anak hide.” 27“Tahod ngane Panginoon, pero maski u aso hide ay maari a kuman tu mumo a netápduk tu lamisaan nu amo de,” tábbeg be nu bábbey. 28Kanya kinagi ni Jesus tu bábbey “Dakál u pánnampalataya mo. Tábbegán ko u inyohon mo nikán” Sakay ti itod be a panahun ay nagpiyya u anak na a bábbey.
Makpal a Pinagpiyya Ti Jesus
29Káttapos ay nagsole ti Jesus tu minalno nu Galilea. Tinohbuk na u essa a buked sakay inumetnod hod. 30Sakay inumangay nikuna u makpal a tahod a tolay a te tawed a pilay, buhák, bulol, sakay iba-iba pa a tolay a te sari-sare a saket. Iyadeni de hide ni Jesus sakay pinagpiyya hide ni Jesus a atanan. 31Kanya nagtaka u tolay hide nikuna a netan de a makaupos dán u bulol, makalakad dán u pilay, sakay maketa dán u buhák. Sakay pinuri de u Diyos nu Israel dipo tu nangyare.
U Himala tu Págpakan ni Jesus tu Appat a Libu a Tolay
(Markos 8:1-10)
32Nadid dinulawan ni Jesus u disepulus na hide sakay kinagi na nide “Kakagbi u tolay hide. Tállo dán hide a aldew a kakaguman tam, awan dán hide ti makan. Awan ko gusto a palakadán ku hide a magaláp makay pumatay hide tu dilan.”
33Nagtanung u disepulus na “Anya be ipakan tamay nide? Atoy kitam tu parang, makpal pa be hide.” 34Tinanung hide ni Jesus “Sangan a tinapay u tawed moy?” “Pitto a tinapay, sakay sasangan a bábbadit a ikan,” tábbeg nu disepulus na. 35Kanya inutusan na u tolay hide a umetnod. 36Sakay inalap na u pitto a tinapay sakay u ikan hide. Káttapos na a nagpasalamat tu Diyos ay tináppeng-táppeng na u tinapay hide sakay intád na tu disepulus na hide. Intagtag be nu disepulus na hide tu katolayan. 37Kimman u atanan sakay nabássog hide. Káttapos ay inhempás nu disepulus na u pitto a balulang a subra a tinapay. 38Atanan a kimman ay áppat a libu a lállake bukod pa tu bábbey sakay anak hide. 39Sakay káttapos ay pinasole ni Jesus u tolay hide tu bilabilay de. Sakay sinumakay siya tu abang a ummangay tu lugar nu Magadan.
Currently Selected:
Mateo 15: MBJC
Tõsta esile
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.