ዮሃንሳ ምሽራቹዋ 1
1
ደኡዋ ቃላ
1ቃላይ ኮይሮ ደኤ፤ ቃላይካ ጾሳና እትፐ ደኤ፤ ቃላይካ ጾሳ። 2እ ኮይሮፐካ ጾሳና ደኤ። 3ኡባባይ ቃላ ባጋና መቴዳ። መቴዳባን ኡባባን እ ባይናን እትባይነ መትቤና። 4አን ደኡ ደኤ፤ ደኡ አሳዉ ፖኡዋ። 5ፖኡ ማን ፖኤ፤ ማይ ፖኡዋ ጾንቤና።
6ጾሳፐ ኪተት ዬዳ አ ሱንይ ዮሃንሳ ጌተትያ እት ብታኒ ደኤ።#ማቶሳ 3:1፤ ማር. 1:4፤ ሉቃሳ 3:1-2 7አሳይ ኡባይ አ ባጋና አማናና ማላ፥ ፖኡዋባ ማርካታናዉ ዬዳ። 8ፖኡዋባ ማርካታናዉ ዬዳፐ አትን፥ እ ባረ ሁጰዉ ፖኡዋ ግደና። 9እካ ቱሙ ፖኡዋ ግዴዳዌ አሳዉ ፖእሳናዉ ሀ ሳኣ ይያዋ።
10ቃላይ አላምያን ደኤ፤ ጾሳይ ቃላን አላምያ መዳ፤ ሽን አላሚ አ ኤርቤና። 11እ ባረ ባጋቱዋኮ ዬዳ፤ ሽን ኡንቱንቱ አ ሺሽ አክበይክኖ። 12ግዶፐ አትን እ ባረና ሺሽ አኬዳ ኡባቶ፥ ባረ ሱንን አማኔዳዋንቶ፥ ጾሳ ናና ግዳና ማላ፥ ማታ እሜዳ። 13ኡንቱንቱ ጾሳፐ የለቴድኖፐ አትን፥ አሳይ የልያ ማራን ዎይ አሹዋ ሸንያን ዎይ አቱማ አሳ ሸንያ ጻላላን የለትበይክኖ።
14ቃላይ አሳ ግዲደ፥ አ ኬካተንነ ቱማተን ኩሚደ ኑ ግዱዋን ደኤዳ። ኑን፥ እ ባረ አቦ እት ናኣ ግዲደ አኬዳ አዉ ደእያ ባረ አዉዋ ቦንቹዋ በኤዶ።
15ዮሃንስ አባ ባረ ኮሻ ቁ ኦደ፥ “ታን፥ ‘ታፐ ካላ ይያዌ ታፐ ቦላ፤ አያዉ ጎፐ፥ ታ የለታናፐ ካሰና እ ደእያዋ’ ጋደ ህንተንቶ ኦዶዌ ሀዋ” ያግ ማርካቴዳ።
16ኑን ኡባይ አ ኩመን አ ኬካተን ፓላሄዳ አንጁዋ አኬዶ። 17ጾሳይ ህግያ ሙሴ ባጋና እሜዳ፤ ሽን አ ኬካተይነ ቱማተይ የሱስ ክርስቶሳ ባጋና ዬዳ። 18ጾሳ በኤዳ አሳይ ኦንነ ባዋ፤ ባረ አዉዋ ማታን ደእያ ባረ ሁጰዉ ጾሳ ግዴዳዌ እት ናኣ ጻላላይ አባ ማርካቴዳ።
ጻማቅያ ዮሃንሳ ማርካተ
(ማቶሳ 3:1-12፤ ማር. 1:1-8፤ ሉቃሳ 3:1-18)
19የሩሳላመን ደእያ አይሁዳቱዋ አይስያዋንቱ ቄሳቱዋነ ሌዋቱዋ ዮሃንሳኮ፥ “ኔን ኦኔ?” ጊደ አ ኦቻና ማላ ኪትና፥ ዮሃንስ ኡንቱንቶ ማርካቴዳ ማርካተይ ሀዋ።
20ዮሃንስ፥ “ታን ክርስቶሳ ግድከ” ያጊደ ጌሽ ማርካቴዳዋፐ አትን፥ ማርካቱሳ እጽቤና።
21ኡንቱንቱ፥ “ያትና፥ ኔን ኦኔ? ኔን ኤላሴ?” ያጊደ ኦቼድኖ።
ዮሃንስ፥ “አ ግድከ” ያጌዳ።
ቃይካ ኡንቱንቱ፥ “ኔን ናቤ?” ያጊደ ኦቼድኖ።
ዮሃንስ፥ “ግድከ” ያግ ዛሬዳ።#ዛረ. 18:15፣ 18፤ ሚልክ. 4:5
22ኡንቱንቱ፥ “ያትና ኔን ኦኔ? ኑን ኑና ኪቴዳዋንቶ ኦዳና ማላ፥ ኔን ኔና ኦና ጋይ?” ያጌድኖ።
23ዮሃንስ ዛሪደ፥ “ናብያ እሳያሰ ጌዳዋዳን፥ ዎራን ባረ ቃላ ቁ ኦደ፥
“ ‘ጎዳ ኦግያ ስት ኦተ!’
ግያ ኮሻይ ታዋ”
ያጌዳ።#ኢሳ. 40:3
24ቃይ ፓርሳዋቱ ኪቴዳ አሳቱ 25ዮሃንሳ፥ “ኔን ክርስቶሳ ዎይ፥ ኤላሳ ዎይ ናብያ ግዳና ዮፐ፥ ያትና አያዉ ጻማቃይ?” ያጊደ ኦቼድኖ።
26ዮሃንስ፥ “ታን ሃን ጻማቃይ፤ ሽን ህንተንቱ ኤረናዌ እቱ ሀዋን ህንተንቱ ግዱዋን ደኤ። 27እ ታፐ ካላ ዬ። ታን አ ጫማ ቃሹዋ ብላናዉካ በስከ” ያግ ዛሬዳ።
28ሀዌ ኡባይ ዮርዳኖሳ ሻፋፐ ሄፍን ባጋ ዮሃንስ ጻማቅያሳ ቢታንያን ሀኔዳ።
ጾሳ ኦርገ ዶርሳ
29ዮሃንስ ዎንተ ጋላስ የሱስ ባረኮ ይያዋ በኢደ፥ “ጾሳ ኦርገ ዶርሳ፥#1:29 ጾሳ ኦርገ ዶርሳ፦ ፓስጋ (ከሱዋ)፥ አይሁደ አሳቱዋ ፓይዱዋን ኒሳን ጌተትያ አገና ግዲደ ቶጵያ አሳ ፓይዱዋን ላፑንያነ ሆስፑንያ አገናቱዋ። አይሁደ አሳን ፓስጋ ጌተቶዌ፥ ጾሳይ እስራኤልያ አሳቱዋ ግብጼፐ ዎልቃማ ማላታን ከሴዳ ዎድያ ግድያ ድራሳ። ዎጋ 23:5-8 ጼልተ። ጾሳ ኦርገ ዶርሳ፥ ኦራ ጫቁዋን ክርስቶሳን ጼሴቶ ጋሱ፥ እ ሀ አላምያ አሳ ሀይቆ ባረና አ እሚደ መና ሙራፐ ከስ አኮ ድራሳ። 1 ቆር. 5:7፤ 1 ጰጽ. 1:18-19 ጼልተ። አላምያ አሳ ናጋራ ይስያዌ፥ ሀዌሽ! 30ታን፥ ‘ታፐ ካላ እቱ ያናዋ፤ እ ታፐ ቦላ፤ አያዉ ጎፐ፥ ታ የለታናፐ ካሰና እ ደእያዋ’ ጋደ ኦዴዳዌ ሀዋ። 31እ ኦነንቶ ታን ኤርከ፤ ሽን እስራኤልያ አሳዉ አ ቆንጭሳናዉ ሃን ጻማቃደ ያድ” ያጌዳ።
32ዮሃንስ ማርካቲደ፥ “ጌሻ አያናይ ሳሉዋፐ ሀራጵያዳን ዎሺናነ አ ቦላን ኡትሽን፥ ታን በኣድ። 33ታን አ ኤርከ፤ ሽን ሃን ጻማቃና ማላ ታና ኪቴዳ ጾሳይ፥ ‘ጌሻ አያናይ ዎደ፥ እት አሳ ቦላ ሸምፕሽን፥ ኔን በአና፤ እካ ጌሻ አያናን ጻማቄ’ ያጊደ ታዉ ኦዴዳ። 34ታን ሄዋ በኣድ፤ እ ጾሳ ናኣ ግድያዋካ ማርካታይ” ያጌዳ።
የሱስ ኮይሮ ባረና ካልያዋንታ ዶሬዳ
35ዎንተ ጋላስ ዮሃንስ ሽረቲደካ ባረና ካልያዋንቱፐ ላአቱዋና እትፐ ኤቄዳ፤ 36እ የሱስ አሽን በኢደ፥ “ጾሳ ዶርሳይ ሀዌሽ!” ያጌዳ።
37ዮሃንሳ ካልያ ላአቱ ዮሃንስ ግያዋ ስሲደ፥ የሱሳ ካሌድኖ። 38የሱስ ባረና ካልያዋንታ ጉየ ስም በኢደ፥ “አያ ኮዪቴ?” ያግ ኦቼዳ።
ኡንቱንቱ ዛሪደ፥ “ረቢ፥ ኔን ሀቃን ደአይ?” ያጌድኖ። “ረቢ” ጉሳይ “ታማርስያዎ” ግያዋ።
39የሱስ ኡንቱንታ፥ “ሃ ዪደ በእተ” ያጌዳ። ኡንቱንቱ ቢደ፥ እ ደኢያሳ በኤድኖ፤ ሄ ጋላስ ሳአይ ታሙ ሳተ ሄራ ግድያ ድራዉ፥ ኡንቱንቱ አናና ፔሼድኖ።
40ዮሃንስ ጌዳዋ ስሲደ፥ የሱሳ ካሌዳ ላኡ አሳቱዋፐ እቱ፥ ስሞና ጰጽሮሳ እሻ እንድራሳ። 41እንድራሰ ኮይሮ ባረ እሻ ስሞና ደሚደ፥ “ኑን ጾሳይ ኪቴዳዋና ጋከቴዶ” ያጌዳ። ሄዋ ጉሳይ “ክርስቶሳ” ግያዋ። 42እንድራሰ ስሞና የሱሳኮ አሄዳ።
የሱስ ስሞና በኢደ፥ “ኔን ዮሃንሳ ናኣ ስሞና፤ ነ ሱንይ ኬፋ ጌተታናዋ” ያጌዳ። “ኬፋ” ግያዋ ብለይ “ጰጽሮሳ” ዎይ “ዛላ” ግያዋ።
የሱስ ፕልጶሳነ ናትናኤላ ጼጌዳ
43ዎንተ ጋላስ የሱስ ጋሊላ ባናዉ ቆፋ ቃቼዳ፤ እ ፕልጶሳና ጋከቲደ፥ “ታና ካላ!” ያጌዳ። 44ፕልጶስ፥ እንድራስነ ጰጽሮሰ ደኤዳ ቤተሳይዳ ጌተትያ ካታማፐ ዬዳ አሳ።
45ፕልጶስ ናትናኤላና ጋከቲደ፥ “ሙሴ ማጻፋቱዋንነ ናባቱዋ ማጻፋቱዋን#1:45 ሙሴ ማጻፋቱዋንነ ናባቱዋ ማጻፋቱዋን፦ አይሁዳቱዋ ማጻፋ፥ ኤጫ ጫቁዋ። አባይ ጻፈቴዳዋዳን፥ ዮሴፎ ናኣ የሱስ ናዝሬተ ካታማን ደእያዋና ኑን ጋከቴዶ” ያግ ኦዴዳ።
46ናትናኤል ዛሪደ፥ “ናዝሬተ ካታማፐ ሎኦባይ ከሳናዉ ዳንዳዪ?” ያጌዳ።
ፕልጶስ፥ “ያደ በአ” ያጌዳ።
47ናትናኤል ባረኮ ይያዋ የሱስ በኢደ፥ “ማካላይ ባይና ቱሙ እስራኤልያ አሳይ ሀዋ!” ያጌዳ።
48ናትናኤል የሱሳ፥ “ኔን ታና ሀቃን ኤራይ?” ያግ ኦቼዳ።
የሱስ ዛሪደ፥ “ፕልጶስ ኔና ጼሳናፐ ካሰ፥ ኔን ባላስያ ጌተትያ ምፐ ህርክና ደእሽን፥ ታን ኔና በኣድ” ያጌዳ።
49ናትናኤል ዛሪደ፥ “ታማርስያዎ፥ ኔን ጾሳ ናኣ! ኔን እስራኤልያ ካትያ!” ያጌዳ።
50የሱስ፥ “ታን ኔና ባላስያ ጌተትያ ምፐ ህርክና በኣድ ጌዳ ድራዉ አማናይ? ኔን ሀዋፐ አያዋ በአና!” ያጌዳ። 51ቃይካ የሱስ፥ “ታን ህንተንቶ ቱሙዋ ኦዳይ፤ ሳሉ ዶየትና፥ ጾሳ ኪታንቻቱ ታ ቦላ፥ አሳ ናኣ ቦላ፥ ፑደ ከስሺናነ ዱገ ዎሺን፥ ህንተንቱ በአና” ያጌዳ።#ዶመ 28:12
Currently Selected:
ዮሃንሳ ምሽራቹዋ 1: DFBE
Tõsta esile
Share
Copy
Want to have your highlights saved across all your devices? Sign up or sign in
The Word for the World Ethiopia