መተ 19
19
ሶዶመነ ጋሞራ ዩዋ
1ናምኡ ኪታንቾት ኦማርስሽን ሶዶመ ካታማ ጋክዶሶና። ሄ ዎደ ሎፀይ ሄ ካታማ ፐንገን ኡትስ። ሎፀይ ኤንታ በእድ ሞካናዉ ደንድድ ኤንታኮ ብስ። ባ ሶምኡዋ ሳአ ጋድ ኤንታዉ ዝግስ። 2እ ኤንታኮ፥ “ታ ጎዳቶ፥ ህንተ አይልያ ሶ ገለርከት፥ ህንተ ቶሁዋ ሜጨትድ ቃማ ሀይሳን አቅተ፤ ዎንታ ጉራ ህንተ ብያ በሲ ቢተ” ያግስ።
ኤንቲ፥ “አካይ፥ ኑኒ ሀ ካታማ ዳባባን አቃና” ያግድ ዛርዶሶና።
3ሽን እ ኤንታ ምን ዎስዳ ግሾ ብድ እያ ሶ ገልዶሶና። እ ኤንታዉ ኡይ ኡክድ አን ምዶሶና። 4ኤንቲ ዝንአና ሀንሽን ሶዶመ ካታማ አደ አሳ ኡባይ ናአተነ ዶን እሶይካ አቶና ይድ ኬ ዩይ አዶሶና። 5ኤንቲ ሎፀ ፄግድ፥ “ሀች ኦማርስ ነ ሶ ገልዳ አደ አሳት አዉን ደኦና? ኑኒ ኤንታራ ጋሄታና መላ ኤንታ ኑኮ ካረ ከሳ” ያግዶሶና። 6ያትን ሎፀይ ኤንታራ ኦደታናዉ ካረ ከይሸ ፐንግያ ጉየራ ጎርድድ፥ 7ኤንታኮ፥ “ታ ዳቦቶ፥ ሀያና ሀ ኢታ ኦሱዋ ኦፍተ። 8ታዉ አደ ኤሮና ናምኡ ጌላኦት ደኦሶና። ታኒ ኤንታ ህንተዉ ካረ ከስኮ ህንተ ኮይዳባ ኦተ። ሽን ሀይሳቲ ታ እማ ግድያ ግሾ ታ ካራፐ ጋርሳን ደኦሶና፤ ሀ አሳታ ቦላ አይብባካ ኦፍተ” ያግስ።
9አሳት፥ “ኑ ስንፈ ገደ ክቻ” ያግዶሶና። ቃስ፥ “ሀ አደይ ባዉ በተ አስ ሽን፥ ኑ ቦላ ፕርዳናዉ ኮዬስ? ኑኒ ኤንታ ቦላ ኦናዉ ኮይዳ ኢታፐ አድ ነ ቦላ ኦና” ያግዶሶና። ኤንቲ ሎፀ ጉየ ሱግ የግድ ፐንግያ መንናዉ ሺቅዶሶና። 10ሽን ናምኡ አሳት ባንታ ኩሽያ ካረ የድድ ሎፀ ሶ ጎች ገልስድ ፐንግያ ጎርድዶሶና። 11ሄሳፈ ጉየ፥ ኤንቲ ኬ ፐንገይ ደእያሱዋ ደሞና መላ ጉፈ ግታ ጋካናዉ ቆቅስዶሶና።
12ሄ ናምኡ አሳት ሎፀኮ፥ “ነዉ ሀይሳን አደ ናእ ዎይኮ ማጫ ናእ፥ ነ ማጫ ናይታ ኦይችዳይ ዎይኮ ሀራ ዳቦይ ሀ ካታማን ደኢ? ደእኮ ኤንታና ሀይሳፈ ከሳ። 13አይስ ጊኮ፥ ኑ ሀ ካታማ ይሳናዉ ሀኖስ። ኤንታ ቦላ ዋስያ ዋሶይ ጎዳ ስንን ግታ ግድያ ግሾ ሀ ካታማ ይሳና መላ ጎዳይ ኑና ኪትስ” ያግዶሶና።
14ያትን ሎፀይ ባ ማጫ ናይታ ኦይችዳይሳታኮ ብድ፥ “ጎዳይ፥ ሀ ካታማ ይሳና ሀንያ ግሾ ኤለስድ ሀ በሳፈ ከይተ” ያግስ። ሽን እያ ማጫ ናይታ ኦይችዳይሳት እ ቀልቅሴስ ግድ ቆፕዶሶና።
15ሳእ ዎንታናዉ ጎንተይ ዞእያ ዎደ ሄ ኪታንቾት ሎፀኮ፥ “ደንዳ፥ ነ ማችዉነ ሀይሳን ደእያ ነ ናምኡ ናይታ ኤካዳ ኤለሳዳ ከያ። አካይ ጊኮ፥ ሀ ካታማይ ፕርደትያ ዎደ ነካ ያሳ” ያግ ድርግስዶሶና። 16ሽን ሎፀይ ከያናዉ ጋምእን፥ ጎዳይ እያዉ ቃትዳ ግሾ፥ ሄ ኪታንቾት እያ ኩሽያ፥ እያ ማቸ ኩሽያነ ናምኡ ናይታ ኩሽያ ኦይክድ ሄ ካታማፐ ከስዶሶና። 17ኪታንቾት ኤንታ ከስዳ መላ ሄ ኪታንቾታፐ እሶይ፥ “ህንተ ሸምፑዋ ኤክድ ባቃትተ! ጉየ ፄሎፍተ! ሀ ሄራን አዉንካ ኤቆፍተ! ህንተ ዮና መላ ዙማኮ ባቃትተ” ያግስ።
18ሽን ሎፀይ ኤንታኮ፥ “ሀይ ታ ጎዳቶ፥ ያጎፕተ። 19ታኒ ህንተ አይለይ ህንተ ስንን ሳባ ደምዳ ግሾ ታና አሻናዉ ታዉ ዳሮ ቃትደታ። ሽን ታኒ ዙማኮ ባቃታናዉ ዳንዳእከ፤ ሀ ዮይ ጋክድ ታና ይሳና። 20ሄኮ፥ ሀይሳን እስ ካታም ደኤስ፤ ያ ዎፅድ ባናዉ ማታነ ጉ ካታማ። ታ ሸምፑዋ አሻናዉ ታ ያ ባቃቶ? እ ዳሮ ጉ ካታማ ግደኔ?” ያግስ።
21ኪታንቾይ፥ “ሎኦ! ታኒ ነ ዎሳ ኤካስ፤ ሄ ነ ኦድዳ ካታማ ይስከ። 22ሄ ካታማኮ ኤለሳዳ ባቃታ፤ ነ ያ ጋካናዉ ታ አይብባካ ኦከ” ያግስ። ሄሳ ግሾ፥ ሄ ካታማ ሱንይ ዞኣረ#19:22 ዞኣረ፦ ጉሳይ “ጉ” ጉሱ። ጌተትስ።
23ሎፀይ ዞኣረ ጋክያ ዎደ ቡሮ ፃልቀይ ጫረስ። 24ጎዳይ ሄ ዎደ ሳሎፐ ታማነ ፁግያ ዲነ ሶዶመ ቦላነ ጋሞራ ቦላ ቡክስስ። 25ሄሳዳ ኦድ ጎዳይ ሄ ካታማታ፥ ሄራ ኡባ፥ ካታማታን ደእያባ ኡባ ሄ ቢታን ደእያ ምነ ማታ ይስስ። 26ሽን ሎፀ ማችያ ጉየ ስማ ፄላዳ ማፅነ ሹቹ ግዳሱ።
27ዎንተ ጋላስ ዎንታ ጉራ አብራሃመይ ደንድድ ካሰ እ ጎዳ ስንን ኤቅዳ በሳ ብስ። 28እ ሶዶመነ ጋሞራ፥ ሄ ሄራን ደእያ ቢታ ኡባ ዱገ ፄልያ ዎደ ፁሳ ታማዳ ጩያይ ቢታፈ ደንደይሳ በእስ።
29ፆሳይ ሄ ሄራን ደእያ ካታማታ ይስያ ዎደ አብራሃመ ቆፕድ፥ ሎፀይ ደእያ ካታማታ ይስድ፥ ሎፀ ዮፐ አሽስ።
ሎፀነ እያ ማጫ ናይታ
30ሎፀይ ዞኣረን ዳናዉ ያሸትዳ ግሾ፥ ያፐ ደንድድ ባ ማጫ ናይታ ናምአታራ ዙማ ቦላ ከይስ። ያን ጎንጎሎ ግዶን ባ ናምኡ ማጫ ናይታራ ደእስ። 31እስ ጋላስ ባይራ ናእያ ባ ካሎ ምቸኮ፥ “ኑ አዋይ ጭምስ፥ ቢታ ኡባን ደእያ ዎጋ ኑራ አቃናዉ እስ አደይ ሀይሳን ባዋ። 32ያንያ ግሾ፥ ሃያ! ኑ አዋ ኡሹ ኡሽድ፥ እያራ አቅድ፥ ኑ አዋፐ ኑስ ኮቸ አሾስ” ያጋሱ።
33ሄ ዎደ ቃማ ባንታ አዋ ኡሹ ኡሽዶሶና። ባይራ ናእያ ገላዳ እያራ አቃሱ። እያ እያራ አቅያ ዎደነ ደንድያ ዎደ እ ኤርቤና።
34ዎንተ ዎደ ባይርያ ካልዉ፥ “ዝነ ቃማ ታኒ ታ አዋራ አቃስ፤ ሀች ቃማካ እያ ኡሹ ኡሽኮ፥ ነካ ገላዳ እያራ አቃ። ያትድ ኑኒ ኑ አዋፐ ኮቸ አሾስ” ያጋሱ። 35ሄ ዎደ ቃማ ባንታ አዋ ኡሹ ኡሽዶሶና። ካሎ ናእያ ገላዳ እያራ አቃሱ። ሀእካ እያ እያራ አቅያ ዎደነ ደንድያ ዎደ እ ኤርቤና።
36ያትድ ሎፀ ማጫ ናይት ናምአይ ባንታ አዋፐ ቃንትዶሶና። 37ባይርያ አደ ናአ የላሱ፤ እያ ሱን ሞአበ#19:37 ሞአበ፦ እብራወ ዶናን ሀ ሱን ብርሸይ “ታ አዋፐ” ጉሱ። ጋዳ ሱንሱ። እ ሀች ጋካናዉ ሞአበታ ማይዛ። 38ካልያካ አደ ናአ የላሱ፤ እያ ሱን በንኣማ#19:38 በንኣማ፦ ሀ ሱንይ “ታ አሳታ ዎይኮ ታ ዳቦታ ናኣ” ጉሱ። ጋዳ ሱንሱ። እ ሀች ጋካናዉ አሞነታ ማይዛ።
Currently Selected:
መተ 19: GFBEVF
Tõsta esile
Share
Kopeeri
Want to have your highlights saved across all your devices? Sign up or sign in
The Word for the World International and The Word for the World Ethiopia