Лука 24
24
Иисусонь вельмамац
(Матф. 28:1-10; Марк 16:1-8; Иоанн 20:1-18)
1Недляшиня, варьхмодемшовор, аватне сявозь аноклаф вадендемаснон и састь калмоти, синь мархтост састь лиятневок. 2Синь няезь, кевсь калмоть эзда веляфтфоль. 3Потму сувамста синь ашезь му Иисус Азорть ловажанц. 4Мзярс синь абонкшнесть, апак учт инголест эвондасть пиндолды щамса кафта алят. 5Эводемать эзда аватне нолдазь сельмоснон алу, но алятне тейст азозь: «Мес вешендьсасть шистоть кулофнень ёткста? 6Сон аш тяса. Сон вельмась кулофста. Лятфтасть, мезе Сон корхтась тейнть Галилеяса улемстонза: 7"Улема тянди: Ломанень Цёрась максови пежу ломаттнень кядьс, ули эськотьф крёзти, и колмоце шиня вельмай"». 8Эста аватне лятфтазь Иисусонь валонзон.
9Калмолангста мрдамстост синь азондозь семботь тянь кефкие апостолхненди и сембе лиятненди. 10Ня аватне, конат азондсть апостолхненди тянь колга, ульсть Магдалань Мария, Иоанна, Мария – Иаковонь тядяц и лиятне, конат синь мархтостольхть. 11Синь валсна марявсть апостолхненди шавокс, сяс ашесть кема тейст. 12Но Пётр ласькозь тусь калмоти. Тоса сон комась, варжакстсь потму и няезень аньцек иляназонь котфнень. Сон мрдась меки, и пяк дивандась сянди, мезе лиссь.
Иисус эвондай тонафниензонды Эммаусу вяти ки лангса
(Марк 16:12,13)
13Сяка шиня Иисусонь кафта тонафниенза мольсть Эммаус вели, кона Иерусалимть эзда кефкиешка вайгяльбе вастсоль. 14Синь корхнесть эсь ётковаст сембе ся тефнень колга, конат лиссть. 15Мзярда синь корхнесть и арьсесть тянь колга, Сонць Иисус маладсь тейст и тусь мархтост. 16Но синь ашезь сода Сонь, сяс мес сельмосна ульсть бта вельхтяфт.
17Иисус пшкядсь тейст: «Мезень колга тинь молембачк корхтатада и мес тинь шаманте тяшкава пичефксуфт?» 18Эздост фкясь, конань лемоцоль Клеопа, каршезонза мярьгсь: «Кали Тон ськамот Иерусалиму сафнень эзда аф содасак, мезе лиссь тоса ня шитнень?» 19Иисус кизефтезень: «Мезе ина?» Синь азозь Тейнза: «Ся, мезе лиссь Назаретонь Иисусть мархта, кона ульсь прорококс, вииель тевса и валса Шкайть и сембе ломаттнень инголе; 20и кода озксвятиень оцюнятне и Израилень оцюняньке максозь Сонь куломас, и эськодезь крёзти. 21Ина минь надиякшнеме, Сон вчёк Ся, кона идесы Израильть. Аньцек тя нинге аф сембе. Вов ни колмоце шись тусь, кода тя лиссь, 22а тяса кона-кона миньцень ёткстонк аватне пяк дивандафтомазь: синь ульсть сенем валдоняста калмоса 23и ашезь му тоста Сонь ловажанц. Мрдамста азондозь, кода тейст эвондасть ангелхт, конат корхтасть: Иисус шиса. 24Ёткстонк мзярошкась тусть калмоти и музь семботь стане, кода корхтасть аватне; но Сонцень ашезь няе». 25Эста Иисус мярьгсь тейст: «Вай, кодань тинь аф шарьхкодихтяда и конашкава стакаста кематада семботи сянди, мезень колга корхнесть пророкне! 26Кали аф тяфта вчёк эрявсь кирдемс сталмот Христости и сувамс Эсь иневалдозонза?» 27И Сон ёфнезень тейст сембе васттнень Сёрматфксста, коса корхтави Сонь колганза, сявомок Моисейста и сембе пророкнень эзда.
28Синь маладсть ся велети, ков мольсть. Иисус тись пря сяда тов моликс. 29Но синь ушедсть кирнемонза: «Илятт мархтонк, шись илядьбяли, шопотькшни». Сон сувась куду и илядсь мархтост. 30И мзярда мархтост ащесь шрать ваксса, Сон сявозе кшить, бславазе, синдезе и максозе тейст. 31Эста тонафнихнень сельмосна панжевсть и синь содазь Иисусонь. Но Сон арась тейст аф няевикс. 32Синь фкя-фкянди мярьгсть: «Кали ашесть пала минь седиеньке, мзярда Сон корхтась тейнек ки лангса и мзярда панжезе тейнек Сёрматфксть смузенц?»
33Тонафнихне эстокиге стясть и тусть меки Иерусалиму. Тоса синь музь кефкие апостолхнень и лия тонафнихнень, конат пуромфтольхть марса. 34Пуромфне азондозь тейст: «Азорсь афкукс вельмась кулофста и Сон эвондась Симононди». 35Синьге азондозь, мезе лиссь ки лангса, и кода синь содазь Иисусонь кшинь синдемста.
Иисус няфти пря тонафнихненди
(Матф. 28:16-18; Марк 16:9-14; Иоанн 20:19,20; Апост. т. 1:3)
36Мзярда синь корхтасть тянь колга, Сонць Иисус арась кучказост и мярьгсь тейст: «Сетьмоши тейнть!» 37Синь абондсть и эводембачк арьсесть – няихть шопача. 38Но Иисус мярьгсь тейст: «Мес тинь эводеде и мес тинь седиентень фатязе абонкссь? 39Варжакстода кяднень и пильгонень лангс; тя – Мон Монць. Токамасть Монь и ваномасть; шопачать аш пукшенза и пакаренза, а Монь улихть». 40Тянь азомста Сон няфтезень тейст Эсь кядензон и пильгонзон. 41Мзярда синь кенярдемать эзда нинге ашесть кема и дивандакшнесть, Сон мярьгсь тейст: «Тинь ули тяса мезентевок ярхцамс?» 42Синь макссть Тейнза рястаф кал пакш и медь кяряз. 43Сон сявозе и ярхцась инголест.
Иисус максы тонафнихненди оцюдонга оцю тев и надияфты кучемс тейст Иняру Ваймопожфть
(Матф. 28:19,20; Марк 16:15-18; Иоанн 20:21-23; Апост. т. 1:4-8)
44Иисус мярьгсь тейст: «Вага кодама смузьсна ся валхнень, конатнень Мон азондыне тейнть нинге мархтонт улемста. Пяшкодевома семботи, мезе тяштьф колган Моисеень койса, пророкнень книгасост и Псалтирьса». 45Тяда меле Иисус панжезе синь ёньцнон Сёрматфксть шарьхкодеманцты. 46Сон мярьгсь тейст: «Тяфта сёрматф: Христости эрявсь маятамс и колмоце шиня вельмамс кулофнень эзда. 47И Сонь лемсонза эряви тердемс сембе ломаньтналхнень шарфтомс Шкайти пежеснон нолдафтоманкса. Ушедода Иерусалимста. 48Тинь тянь няфтиенза-азондыенза. 49Мон кучса тейнть сянь, мезе надияфнесь Алязе; но илядода Иерусалимса вярдень вийса пяшкодевомазонт».
Иисусонь кеподемац менели
(Марк 16:19,20; Апост. т. 1:9-11)
50Иисус лихтезень синь ошста Вифанияти самс. Сон кеподезень кядензон и бславазень синь. 51Бславамбачк Иисус кармась аердома эздост и ульсь кепотьф менели. 52Синь сюконясть Тейнза и оцю кенярдема мархта мрдасть Иерусалиму. 53Шкаень шназь, синь сембе пингть ульсть Шкаень кудса. Аминь.
Currently Selected:
Лука 24: ОС16
Tõsta esile
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016