लूका 23
23
ईशु पिलातुस चे सामणे
(मत्ती 27:1,2,11–14; मरकुस 15:1–5; यूहन्ना 18:28–38)
1बल्ति सारी सभा उठती कर ईशु नु पिलातुस चे गोढु गेहती गेले। 2ते वे ईं केहती कर ओचे पर दोष लाऊं लाग़ले, “अम्ही ऐनू लौका नु बहकाते, ते रोम चा कैसर राजा नु कर् ङेणा मना करते, ते आपणे आप नु मसीह, राजा केहते हुले सुणले।”
3पिलातुस ने ईशु कनु पूछले, “का तु यहूदिया चा राजा छी?”
ओणे ओनु उत्तर ङिला, “तु आप ही किही पला।”
4तब पिलातुस ने प्रधान याजका ते नेरा लौका नु केहले, “मैं ऐ बन्दे मां कुई दोष कोनी ङेखला।”
5पर वे नेरे वी हिम्मत लारे किहुं लाग़ले, “हा गलील कनु लाती कर इठे तक कि सारे यहूदिया मां आपणे उपदेश ङिती-ङिती कर लौका नु भड़कावे।”
ईशु हेरोदेस चे सामणे
6ईं सुणती कर पिलातुस ने पूछले, “का ईं बन्दे गलीली छै?” 7ते ईं जाणती कर कि ओ हेरोदेस राजा ची रियासती चा छै, वानु हेरोदेस चे गोढु भेज़ती ङिले, कांकि वां ङिहां मां ओ वी यरुशलेम मां हुता।
8हेरोदेस ईशु नु ङेखती कर बङा खौश हुला, कांकि ओ ब़ोहत ङिहां कनु ओनु ङेखणा चाहवेला, ऐवास्ते कि ओचे बारे मां सुणले हुते, ते ओचा कुई चमत्कार ङेखणे ची आस राखता। 9ओ ईशु कनु घणीया बाता पूछता रेहला, पर ओणे ओनु कुई वी उत्तर ना ङिला। 10प्रधान याजक ते शास्त्री भिले रेहती तन मन लारे ओचे उपर दोष लाते रेहले। 11तब हेरोदेस ने ते सिपाहीया ने ओचा अपमान करती कर ओचा मखोल उङारु पड़ती गेले, ते भड़किली ओढ़णी घलाती कर ओनु पिलातुस चे गोढु वापिस पुचाती ङिले। 12ओह ङिओ पिलातुस ते हेरोदेस दोस्त बणती गेले। ऐकनु पेहले वे हेके ङुजे चे बैरी हुते।
ईशु चा फैंसला
(मत्ती 27:15–26; मरकुस 15:6–15; यूहन्ना 18:39—19:16)
13पिलातुस ने प्रधान याजका ते सरदारा ते लौका नु हकारती कर, 14वानु केहले, “तम्ही ऐ बन्दे नु लौका नु बहकाणे आला ठहराती कर, माये गोढु गेहती आले, ते ङेखा, मैं तम्चे सामणे ओची परख करली, पर जिसीया बाता चा तम्ही ओचे उपर दोष लावा, मैं वां बाता चे बारे मां ओचे मां कुई वी दोष कोनी ङेखला। 15ते ना हेरोदेस ने, कांकि ओणे ओनु अम्चे गोढु वापिस भेज़ती ङिले। ते ङेखा, ओचे कनु इसड़े कहीं कोनी हुले कि ओ मौत ची ङण्ड चे लायक ठहराला जाओ। 16ऐवास्ते मैं ओनु कोड़े मरवाती छोड़ती ङिये।” 17तेंहवारा चे ङिओ पिलातुस नु यहूदिया वास्ते हेक कैदीया नु छोड़ने जरुरी हुते।
18तब सब मिलती कर रौला करु लाग़ले, “ऐचे काम तमाम कर, ते अम्चे वास्ते बरअब्बा नु छोड़ती ङे।” 19बरअब्बा कुई दंगे ची वजह कनु जको शहरा मां हत्या हुली कैदखाने मां नाखला गेलता।
20पर पिलातुस ने ईशु नु छोड़ने ची इच्छा लारे लौका नु बल्ति समझाले। 21पर वाणे रौला मचाती कर केहले, “ओनु क्रूसा उपर चढ़ा, क्रूसा उपर।”
22ओणे तीजी वारी वानु केहले, “कां, ओणे किसी बुराई करली? मैं ओचे मां मौत ची सजा चे लायक कुई बात कोनी ङेखली। ऐवास्ते मैं ओनु कुटवाती कर छोड़ती ङिये।”
23पर वे जोरा-जोरा चे रौला घालती भांसु लाग़ती गेले कि ओनु क्रूसा उपर चढ़ाले जाओ, ते वांचे रौला घालणे कामयाब हुले। 24तां पिलातुस ने आज्ञा ङिली कि वांची बिनती चे अनुसार करले जाओ। 25ते ओणे ओ बन्दे नु जको दंगे ते खूना ची वजह कैदखाने नाखला गेलते, ते जाई वे मांग करी पलते, छोड़ती ङिले, ते ईशु नु वांची इच्छा चे अनुसार सोंपती ङिले।
ईशु नु क्रूसा उपर चढ़ाले जाणे
(मत्ती 27:32–44; मरकुस 15:21–32; यूहन्ना 19:17–27)
26जब वे ओनु गेहली जई पलते, तां वाणे शमौन नांवा चे हेक कुरेनी नु जको गांवा कनु आवे पलता, पकड़ती कर ओचे उपर क्रूस लङती ङिला कि ओनु ईशु चे भांसु-भांसु चली चालो। 27ते लौका ची बङी भीड़ ओचे भांसु टुरती पली, ते घणीया सारीया असतरीया वी, जको ओचे वास्ते छात्ती कोट्टी ते रोवी पीट्टी पलतीया। 28ईशु ने वांची तरफ घूमती कर केहले, “हे यरुशलेम चीया धूवा, माये वास्ते ना रोवा, पर आपणे वास्ते ते आपणे ब़ाला वास्ते रोवा। 29कांकि ङेखा, वे ङिहें आवी पली, जाये मां लौक किहे, ‘धन्न छै वा जको ओत्रक, ते ऊं ढेड्ड जको ना जमावी, ते वा थन्ज जेह्णे ङूध कोनी पिलाले।’ 30#प्र.वा 6:16ओ बेले वे पहाड़ा नु किहुं लाग़े, ‘अम्चे उपर ढिया,’ ते पहाड़ा नु किहे, ‘अम्हानु ढकती गिहा।’ 31कांकि जिसे बेले वे सावे दरख्ता लारे इसड़े करी, तां सूखे लारे का कोच्छ नी करले जई?”
32वे नेरे ङुंहु बन्दा नु जको अपराधी हुते ओचे लारे मौत ची सजा सुणावणे वास्ते गेहती टुरले। 33जब वे वा जग़हा जानु खोपड़ी किही पुज़ले, तां वाणे ओठे ओनु, ते वां ङुंहु अपराधीया नु वी, हेके नु सज़्ज़े पासु ते ङुजे नु खब़्ब़े पासु क्रूसा उपर चढ़ाले। 34तब ईशु ने केहले, “हे ब़ा, याहनु माफ कर, कांकि ये ना जाणी कि का करी पले।” ते वाणे पर्चीया नाखती कर ओची ओढ़णी बांटती गेहली।
35लौक भिले-भिले ङेखे पलते, ते यहूदी सरदार वी मखोल करती कर किही पलते, “ऐणे नेरा नु बचाले, अगर हा नरीकारा चा मसीह छी, ते ओचा चुणला आला छै, तां आपणे आप नु बचाती गिहो।”
36सिपाही वी गोढु आती कर ते सिरका ङिती कर ओचा मखोल करती कर किही पलते, 37“अगर तु यहूदिया चा राजा छी, तां आपणे आप नु बचा।”
38ते ओचे उपर हेक दोष-पत्र वी लाग़ला पलता: “हा यहूदिया चा राजा छै।”
39जको अपराधी ओठे लटकाले गेलते, वांचे महु हेक ने ओची निन्दा करती कर केहले, “का तु मसीह कोनी? तां बल्ति आपणे आप नु ते अम्हानु बचा।”
40ऐचे उपर ङुजे ने ओनु धमकाती कर केहले, “का तु नरीकारा कनु वी ना ङरी? तु वी तां ओही ङण्ड भोग़ी पला। 41ते अम्ही तां सच्चमां न्यां चे अनुसार भोग़ु पले, कांकि अम्ही आपणे कामा चा ठीक फल भोग़ु पले, पर ऐणे तां कुई कसूर कोनी करला।”
42तब ओणे केहले, “हे ईशु, जिसे बेले तु आपणे राज़ मां आवे, तां मनु याद राखीयो।”
43ईशु ने ओनु केहले, “मैं तनु सच्च किहुं पला कि आज़ ही तु माये लारे स्वर्ग़ मां हुवे।”
ईशु ची मौत
(मत्ती 27:45–56; मरकुस 15:33–41; यूहन्ना 19:28–30)
44करीबन ङुपाहरा कनु लाती कर तीजे पाहरा तक सारे देशा मां अन्धारे हुले रेहले। 45ते सूरज चे सोज़ले जते रेहले, ते मन्दरा चा पड़दा आधे मां फड़ीला गेला। 46ते ईशु ने ऊंची अवाजी मां साङ मारती कर केहले, “हे ब़ा, मैं आपणी आत्मा दुधे हाथा मां सोंपे पला।” ते ईं केहती कर जेन्द छोड़ती ङिली।
47सूबेदारा ने, जको कहीं हुले हुते ङेखती कर नरीकारा ची बढ़ाई करली, ते केहले, “पक्का ईं इन्सान धर्मी हुते।” 48ते भीड़ जको ईं ङेखणे वास्ते भेली हुली हुती, ये घटना नु ङेखती कर छात्ती कोटती हुली पुठी मुड़ती गेली।
49 #
लूक 8:2,3 पर ओचे सारे जाण पिछाण चे, ते असतरीया जको गलील कनु ओचे लारे आलीया हुतीया, दूर भिलीया रेहती कर ईं सब ङेखी पलतीया।
ईशु ची लाश नु कब्री मां मेहले
(मत्ती 27:57–61; मरकुस 15:42–47; यूहन्ना 19:38–42)
50ओठे यूसुफ नांवा चा महासभा चा हेक सदस्य हुता जको सज़्ज़ण ते धर्मी मर्द हुता। 51ते वांची योजना ते वांचे ऐ कामा कनु खौश कोनी हुता। ओ यहूदिया चे शहर अरिमतिया चा रेहणे आला ते नरीकारा चे राज़ ची बाट ङेखता रेहता। 52ओणे पिलातुस कनु जती कर ईशु ची लाश मांगली। 53ते विनु उतारती ते मलमल ची चादरी मां बलेठले, ते हेक कब्री मां मेहले, जको चट्टान मां खोदली गेलती, ते विचे मां कङी कुई कोनी मेहले गेलते। 54ओ तियारी चा ङिओ हुता, ते सब्त चा ङिओ शुरु हुवणे आला हुता।
55वां असतरीया ने जको ओचे लारे गलील कनु आलीया हुतीया, भांसु-भांसु जती कर वे कब्री नु ङेखले, ते ईं वी कि ओची लाश केस रीति लारे मेहली गेली। 56ते वाणे मुड़ती कर ईशु ची लाशी वास्ते खुश्बुदार चीजा, ते इत्र तियार करला। ते सब्त चे ङिओ वाणे आज्ञा चे अनुसार आराम करला।
Currently Selected:
लूका 23: ODR
Tõsta esile
Share
Copy
Want to have your highlights saved across all your devices? Sign up or sign in
CC BY-NC-ND 4.0