यूहन्ना 4
4
ईशु ते सामरी असतरी
1ईशु नु मालुम हुले कि फरीसिया ने सुणती गेले कि ईशु यूहन्ना कनु घणे चैले बणावे ते वानु बपतिस्मा ङिये। 2ईशु खौद्द ना बल्कि ओचे चैले बपतिस्मा ङिते। 3ऐवास्ते ईशु यहूदिया नु छोड़ती कर बल्ति गलील इलाके नु चाह्ला गेला। 4ते ओनु सामरिया इलाके महु हुती कर जाणे जरुरी हुते।
5ऐवास्ते ओ सुखार नांवा चे हेक शहरा तक आला जको सामरिया मां छै, वे जग़हा चे गोढु जिठे याकूब ने आपणे पूता यूसुफ नु ङिली हुती। 6ते याकूब चा खुऊ वी उठी हुता, ईशु मार्ग़ चा थाकला आला, ओह खुआ उपर आती ब़ेहला। ते हा ङुपाहरा ची बात हुती।
7इतने मां हेक सामरी असतरी पाणी भरने वास्ते आली, ईशु ने विनु केहले, “मनु पाणी पीला।” 8कांकि ओचे चैले तां शहरा महु भोज़न मोल गिहुं गेले हुते।
9वे सामरी असतरी ने ओनु केहले, “तु यहूदी हुती कर सामरी असतरी कनु पाणी कां मांगी?”, विणे ऐवास्ते केहले कांकि वां ङिहां मां यहूदी सामरिया लारे कुई वी बर्ताव ना राखते।
10ईशु ने विनु केहले, “अगर तु नरीकारा चे वरदाना नु जाणीया तां ईं वी जाणीया कि ऊं कूण छै जको तनु किहे ‘मनु पाणी पीला,’ तां तु ओकनु मांगीहा ते ओ तनु जीवन चे पाणी ङिया।”
11असतरी ने ओनु केहले, “हे गुरु जी, दुधे कनु पाणी भरने वास्ते कहीं छै वी कोनी खुऊ घणा झिका छै। तां बल्ति ऊं जीवन चे पाणी दुधे कनु किवें हो सग़े? 12का तु अम्चे पुरखा याकूब कनु बङा छी जेह्णे अम्हानु हा खुऊ ङिला ते ओणे आप ही आपणे कुणम्बे ते ढौरा समेत ऐचे महु पिले हुते?”
13ईशु ने विनु केहले, “जको कुई ईं पाणी पिही ऊं बल्ति तरसेले रिही, 14पर जको कुई ओ पाणीया महु पिही जको मैं ओनु ङिही ओह बल्ति कङी तरसेला नी रिही। पर जको पाणी मैं ओनु ङिही ओचे महु हेक स्रोत बणती जई जको अनन्त जीवन तक उमड़ता रिही।”
15असतरी ने ईशु नु केहले, “हे गुरु जी, ऊं पाणी मनु ङे बल्ति मैं तरसेली ना रिहे ते ना पाणी भरने वास्ते इतनी दूर आवे।”
16ईशु ने विनु केहले, “जा, आपणे मुणसा नु इठे हकारती आ।”
17असतरी ने उत्तर ङिला, “मैं बिना मुणसा ची छै।”
ईशु ने विनु केहले, “तु सही किही पली कि तु बिना मुणसा ची छी। 18कांकि तु पाँच मोणस बणाती चुकली, ते जाये गोढु तु हमा छी ओ वी दुधा मोणस कोनी। तु सच्च किही पली।”
19असतरी ने ओनु केहले, “हे गुरु जी, मनु लाग़े कि तु भविष्यवक्ता छी। 20अम्चे पुरखा ने ऐह पहाड़ा उपर अराधना करली, ते तम्ही यहूदी किहा कि वा जग़हा जिठे अराधना करनी चाही छै यरुशलेम मां छै।”
21ईशु ने विनु केहले, “हे असतरी, माई बाते चा विश्वास कर, कि ओ समय आवे पला कि तम्ही ना ऐ पहाड़ा उपर ब़ा नरीकारा ची अराधना करा ना यरुशलेम मां। 22तम्ही सामरी बन्दी ओनु ना जाणा जाई अराधना करा। पर अम्ही यहूदी ओनु जाणु जाई अराधना करु, कांकि उद्धार यहूदिया महु ही छै। 23पर ओ समय आवे पला बल्कि हमा वी छै, जाये मां सच्ची अराधना करने आले ब़ा ची अराधना आत्मा ते सच्चाई लारे करी, कांकि नरीकार आपणे वास्ते इसड़े ही अराधना करने आला नु सोधे। 24नरीकार आत्मा छै, ते जरुरी छै कि ओची अराधना करने आले आत्मा ते सच्चाई लारे अराधना करो।”
25असतरी ने ईशु नु केहले, “मैं जाणे कि मसीह जको नरीकारा चा चुणला आला छै ओ आणे आला छै। जिसे बेले ओ आवी, तां अम्हानु सारीया बाता बावड़ती ङिही।”
26ईशु ने विनु केहले, “मैं जको दुधे लारे बाता करे पला, ओही छै।”
27इतने मां ओचे चैले आती गेले ते अचम्भा करु लाग़ले कि ओ असतरी लारे बाता करे पला। तां वी ओकनु किह्णी ना पूछले, “तु का चाहवी?” जा तु “ये असतरी लारे बाता कां करी पला?”
28बल्ति वा असतरी आपणा घड़ा छोड़ती कर, शहरा मां चाह्ली गेली ते लौका नु किहुं लाग़ली, 29“आवा, हेक इन्साना नु ङेखा, जेह्णे सब कोच्छ जको मैं करले मनु बावड़ती ङिले। किठी हाओ तां मसीह कोनी?” 30तां वे बन्दी शहरा महु निकलती कर ओचे गोढु जऊं लाग़ले।
31ऐचे बीच ओचे चैला ने ईशु कनु हा बिनती करली, “हे गुरु, कोच्छ खाती गे।”
32पर ईशु ने चैला नु केहले, “माये कनु खाणे वास्ते इसड़ा भोज़न छै, जानु तम्ही ना जाणा।”
33बल्ति चैला ने आपस मां केहले, “का कुई ओचे खाणे वास्ते कहीं गेहली आले?”
34ईशु ने वानु केहले, “माया भोज़न हा छै, कि आपणे भेज़णे आले ची इच्छा चे अनुसार टुरे ते ओचे काम पुरे करे। 35का तम्ही ना किहा वी, ‘कि रहड़ बढणे नु हालि चार मेहने पले ले?’ ङेखा, मैं तम्हानु किहे पला, आपणी आंखीया चती खेता मां नजर मारा, कि वा फसल पकती चुकली। 36बाढणे आला मजदूरी गिहे, ते अनन्त जीवन चे वास्ते फल भेले करता रिहे, कि राहवणे आला ते बाढणे आला ङोनी मिलती कर खुशी मनाओ। 37कांकि इठे हा कहावत ठीक ब़ेसे, ‘राहवणे आला नेरा छै, ते बाढणे आला नेरा।’ 38मैं तम्हानु ओ खेत बाढणे वास्ते भेज़ले जाये मां तम्ही मेहनत कोनी करली। ङुजा ने मेहनत करली, ते तम्ही वांची मेहनती चे फल मां भईवाल हुले।”
सामरिया चे विश्वास करने
39ओ शहरा चे ब़ोहत से सामरिया ने वे असतरी चे केहणे लारे ईशु उपर विश्वास करला, कांकि विणे ग़वाही ङिली हुती, “ओणे सब कोच्छ जको मैं करले, मनु बावड़ती ङिले।” 40ऐवास्ते जिसे बेले ये सामरी ईशु चे गोढु आले, तां ओकनु बिनती करु लाग़ले कि, “अम्चे इठे रेह,” तां ओ ओठे ङोन ङिहां तक रेहला।
41ईशु चे वचना ची वजह कनु नेरे वी ब़ोहत सारे लौका ने विश्वास करला। 42ते वां लौका ने असतरी नु केहले, “हमा अम्ही दुधे केहणे लारे ही विश्वास ना करु, कांकि अम्ही आप ही सुणती गेले, ते जाणु कि हाओ ही सच्चमां संसारा चा उद्धारकर्ता छै।”
43बल्ति ङोन ङिहां चे बाद ईशु उठु निकलती कर गलील मां गेला। 44#मत्ती 13:57; मरकु 6:4; लूक 4:24कांकि ईशु ने आप ही ग़वाही ङिली कि भविष्यवक्ता आपणे देशा मां आदर ना पा सग़ी।
45 #
यूह 2:23
जिसे बेले ओ गलील प्रदेस मां आला, तां गलीली खुशी लारे ओनु मिड़ले। कांकि जितने काम ओणे यरुशलेम मां फसह चे तेंहवारा चे समय उपर करले हुते वाणे वां सारा नु ङेखले हुते, कांकि वे वी तेंहवारा मां गेले हुते।
राज़कर्मचारी चे पूता नु ठीक करने
46 #
यूह 2:1–11
ओ बल्ति गलील चे काना शहरा मां आला, जिठे ओणे पाणीया नु दाखरस बणाले हुते। ओठे राजे चा हेक कर्मचारी हुता जाया पूत कफरनहूम मां बिमार हुता। 47ओ ईं सुणती कर कि ईशु यहूदिया कनु गलील मां आती गेला, ओचे गोढु गेला ते ओचे कनु बिनती करु लाग़ला कि चालती कर माये पूता नु ठीक करती ङे, कांकि ऊं मरणे आले हुते। 48ईशु ने ओनु केहले, “जब तक तम्ही चैन्ह ते अदभोत काम नी ङेखा तब तक कङी वी विश्वास नी करा।”
49राजे चे कर्मचारीया ने ओनु केहले, “हे गुरु जी, माये पूता ची मौत हुवणे कनु पेहले चाल।”
50ईशु ने ओनु केहले, “जा, दुधा पूत जीता छै।” ओ बन्दे ने ईशु ची केहली आली बाते चा विश्वास करला ते चाह्ला गेला। 51ओ मार्ग़ा मां ही हुता, कि ओचे नौकर आती मिड़ले ते किहुं लाग़ले, “दुधे छोर जीते छै।”
52ओणे वाकनु पूछले, “किसे बेले ऊं ठीक हुं लाग़ले?” वाणे ओनु केहले, “काल ङुपाहरा चे बाद, करीबन हेके बजे ओचे बुखार उतरती गेलते।” 53बल्ति ओनु पता लाग़ती गेला कि ईं ओह बेले हुले जिसे बेले ईशु ने ओनु केहले हुते, “दुधा पूत जीता छै।” ऐवास्ते ओणे ते ओचे सारे घराणे ने विश्वास करला।
54ईं ङुजे अचम्भे चे काम हुते, जको ईशु ने यहूदिया कनु गलील मां आती कर ङिखाणले।
Currently Selected:
यूहन्ना 4: ODR
Tõsta esile
Share
Copy
Want to have your highlights saved across all your devices? Sign up or sign in
CC BY-NC-ND 4.0