यूहन्ना 16
16
1“ये बाता मैं तम्हानु ऐवास्ते केहलीया कि तम्ही ठोकर ना खावा। 2वे तम्हानु प्राथनाघरा महु काढ़ती छोड़े, ओ समय आवे पला कि जको कुई तम्हानु मारती नाखी ओह समझी कि ‘मैं नरीकारा ची सेवा करे पला।’ 3ते ईं वे ऐवास्ते करे कि वाणे ना ब़ा नु जाणले ते ना ही मनु जाणी।
पवित्र आत्मा चे काम
4“पर ये बाता मैं ऐवास्ते तम्हानु केहलीया, कि जिसे बेले वांचा समय आवी तां तम्हानु याद आवी कि मैं तम्हानु पेहले ही केहती ङिले। मैं शुरु कनु तम्हानु ये बाता ऐवास्ते कोनी केहलीया कांकि मैं तम्चे लारे हुता, 5पर हमा मैं आपणे भेज़णे आले चे गोढु जाये पला। तम्चे महु कुई वी माये कनु ना पूछी, ‘तु किठे जई पला?’ 6पर जको ये बाता मैं तम्हानु केहलीया ऐवास्ते तम्चे मन ङुखा लारे भरीती गेले। 7तां वी मैं तम्हानु सच्च किहे कि, माये जाणे तम्चे वास्ते आच्छे छै। कांकि अगर मैं ना जई तां, ओह सहायक तम्चे गोढु कोनी आवे। पर अगर मैं जई तां, ओनु तम्चे गोढु भेज़ी। 8ओह आती संसारा नु पाप ते धार्मिकता ते न्यां चे बारे मां लाजवाब करी। 9पाप चे बारे मां, कांकि वे माये उपर विश्वास ना करी, 10धार्मिकता चे बारे मां, कांकि मैं ब़ा चे गोढु जाये पला, ते तम्ही मनु बल्ति नी ङेखा, 11न्यां चे बारे मां बावड़ी, कांकि संसारा चे सरदार शैताना नु दोषी ठहराले गेले।
12“मैं तम्हानु घणी सारीया बाता केहणीया, पर हमा तम्ही वानु सेह ना सग़ा। 13पर जब ओ यानिकि सच्चाई चा आत्मा आवी, तां तम्हानु सारा सच्चाई चा मार्ग़ बावड़ी, कांकि ओ आपणे तरफु नी किही पर जको कोच्छ सुणी ऊंही किही, ते आणे आलीया बाता तम्हानु बावड़ी। 14ओह माई महिमा करी, कांकि ओह माया बाता महु गेहती कर तम्हानु बावड़ी। 15जको कोच्छ ब़ा चा छै, ऊं सब माये छै। ऐवास्ते मैं केहले, कि ओ माया बाता महु गेहती कर तम्हानु बावड़ी।
ङोख सुखा मां बदलती जई
16“थोड़ी देरी मां तम्ही मनु कोनी ङेखा, ते बल्ति थोड़ी देर बाद मनु ङेखा।”
17बल्ति ओचे कोच्छ चैला ने आपस मां केहले, “ईं का छै जको ओह अम्हानु किहे, ‘थोड़ी देरी मां तम्ही मनु नी ङेखा ते बल्ति थोड़ी देर बाद मनु ङेखा?’ ते ईं ‘ऐवास्ते कि मैं ब़ा चे गोढु जाये पला’?” 18बल्ति वाणे केहले, “हा ‘थोड़ी देर’ जको ओह किहे वा का बात छै? अम्ही ना जाणु कि ओह का किहे।”
19ईशु ने हा जाणती कर कि, “वे माये कनु पूछणे चाहवी।” ऐवास्ते वानु केहले, “का तम्ही आपस मां माई ये बाते चे बारे मां पूछताछ करा, ‘थोड़ी देरी मां तम्ही मनु नी ङेखा, ते बल्ति थोड़ी देर मां तम्ही मनु ङेखा’? 20मैं तम्हानु सच्च-सच्च किहे कि, तम्ही रोवा ते ढढावा पर संसार खुशी मनावी। तम्हानु ङोख हुवी, पर तम्चा गम खुशी मां बदलती जई। 21ब़ाल पैदा करते बेले असतरी नु दर्द हुवे कांकि विची ङोख ची घड़ी आती पुज़ली। पर जिसे बेले विचे ब़ाल हुती जाये, तां खुशी लारे कि संसारा मां हेक बन्दे पैदा हुले ओह दर्द नु याद ना करी। 22यूंही, तम्हानु वी ङोख हुवी, पर मैं तम्हानु बल्ति मिली तम्चे मन खुशी लारे भरीती जई, तम्ची खुशी कुई वी तम्हा कनु खौश ना सग़ी।
23“ओ ङिओ तम्ही माये कनु कोच्छ नी पूछा। मैं तम्हानु सच्च-सच्च किहे पला, अगर जको कोच्छ ब़ा नरीकारा कनु मांगा, तां ओ माये नांवा लारे तम्हानु ङिही। 24हमा तक तम्ही माये नांवा लारे कहीं कोनी मांगले। मांगा, तां तम्हानु ङिले जई कि तम्ची खुशी पुरी हुती जाओ।
संसारा उपर जीत
25“मैं ये बाता तम्हानु मिसाल मां केहलीया, पर ओह समय आवे पला कि मैं तम्हानु बल्ति मिसाल मां नी किही पर खुलती कर तम्हानु ब़ा चे बारे मां बावड़ी। 26ओह ङिओ तम्ही माये नांवा लारे ब़ा कनु मांगा। तां मनु जरुरी कोनी कि मैं तम्चे वास्ते ब़ा कनु मांगे। 27माया ब़ा तां आप ही तम्चे लारे प्रेम करे कांकि तम्ही माये लारे प्रेम करला ते हा वी विश्वास करला कि मैं नरीकारा ची तरफु आला। 28मैं ब़ा ची तरफु संसारा मां आला, मैं बल्ति संसारा नु छोड़ती कर ब़ा चे गोढु जाये पला।”
29ओचे चैला ने केहले, “ङेख, हमा तां तु खुलती कर किही ते कुई मिसाल ना किही। 30हमा अम्हानु पता लाग़ती गेला कि तु सब कोच्छ जाणी ऐची जरुरत कोनी कि कुई दुधे कनु पूछो। ऐचे कनु अम्ही विश्वास करु कि तु नरीकारा ची तरफु आला।” 31ईं सुणती कर ईशु ने वानु केहले, “का हमा तम्ही विश्वास करा?। 32ङेखा, ओह घड़ी आवे पली यानि आती गेली कि तम्ही सारे आपस मां इंगे-ऊंगे हुती कर, आपणा मार्ग़ गिहा। ते मनु हेकला छोड़ती ङिया। तां वी मैं हेकला कोनी, कांकि ब़ा माये लारे छै।
33“मैं ये बाता तम्हानु ऐवास्ते केहलीया कि, तम्हानु माये मां शान्ति मिलो। संसारा मां तम्हानु क्लेश हुवे। पर हिम्मत राखा! मैं संसारा नु जीतती गेले।”
Currently Selected:
यूहन्ना 16: ODR
Tõsta esile
Share
Copy
Want to have your highlights saved across all your devices? Sign up or sign in
CC BY-NC-ND 4.0