प्रेरितां चे काम 2
2
पिन्तेकुस्त चे ङिओ पवित्र आत्मा चे उतरने
1जिसे बेले पिन्तेकुस्त तेंहवार चा ङिओ आला, वे सारे हेकी जग़हा भेले हुले। 2हेकदम आसमाना महु अन्धारी जिसड़ी सनसनाहट ची अवाज आली, जिसे घरा मां वे ब़ेहले हुते ओठे सारे घर गूंजती गेले। 3वानु जाखते जिसड़ीया लपटा ङिसलीया, ते वांचे महु हर हेक चे उपर आती कर रुकती गेलीया। 4वे सारे पवित्र आत्मा लारे भरीती गेले, जिंवे आत्मा ने वानु ब़ोलणे ची सामर्थ ङिली, वे अलग़-अलग़ भाषा ब़ोलु लाग़ले।
5ते सब देशा महु आले यहूदी भग़त यरुशलेम मां आती कर रेहते। 6जिसे बेले हा अवाज हुली तां भीड़ लाग़ती गेली ते बन्दी हैरान हुती गेली, कांकि हर हेक नु सुणीजे पलते, कि ये माई ही भाषा मां ब़ोली पले।
7तां वे सारे हैरान ते अचम्भा हुती कर किहुं लाग़ले, “ङेखा, ये जको ब़ोली पले का ये सारे गलीली कोनी? 8तां बल्ति कां अम्हा महु हर हेक आपणी-आपणी जनम भूमि ची भाषा सुणु पले? 9अम्ही जको पारथी, ते मेदी, ते एलामी लौक, ते मेसोपोटामिया, ते यहूदिया, ते कप्पदूकिया, ते पुन्तुस, ते आसीया। 10ते फ्रूगिया, ते पंफूलिया, ते मिस्र, ते लिबिया देश जको कुरेने चे आस-पास छै, इठे सारे देशा चे रेहणे आले ते रोमी प्रदेसी, 11का यहूदी का यहूदी मत्त धारण करने आले, क्रेती ते अरबी वी छी, पर आपणी-आपणी भाषा मां वाकनु नरीकारा चे बङे-बङे कामा ची चर्चा सुणु पले।” 12ते वे सारे चकराती गेले, घब़राती कर हेके ङुजे नु किहुं लाग़ले कि, “ईं का हुवे पले?” 13पर नेरा ने ठठा करती कर केहले, “वे तां नवें शराबा चे नशे मां छी।”
पतरस चा भाषण
14पतरस वां गियारा प्रेरितां चे लारे खड़ा हुला ते ऊंची अवाजी मां किहुं लाग़ला, “हे यहूदी, ते हे यरुशलेम मां सारे रेहणे आले, ईं जाणती गिहा ते कान लातीकर माया बाता सुणा। 15जिसड़े तम्ही समझा पले, ये लौक नशे मां कोनी, कांकि हालि तां पाहर ङिओ चा हुला। 16पर हा वा बात छै, जको योएल भविष्यवक्ता चे जरिये केहली गेली,
17“ ‘नरीकारा ने केहले कि आखरी ङिहां मां इसड़े हुवी कि
मैं आपणी आत्मा सारे इन्साना उपर उतारती ङिही।
बल्ति तम्चे पूत ते तम्चीया छुवेरीया भविष्यवाणी करे,
ते तम्चे जवान दर्शन ङेखे ते तम्चे बुजर्ग खाब ङेखे।
18मैं आपणे दास ते दासीया उपर
वा ङिओ मां आपणी आत्मा उतारी
ते वे भविष्यवाणी करे।
19मैं आसमाना चे उपर अदभोत काम
ते धरती उपर चैन्ह
यानिकि लुहीं ते जाखते ते धूंऐ चा बदल ङिखाणी।
20प्रभु चे महान ते महिमामय ङिओ आणे कनु पेहले
सूरज अन्धा ते चाँद लुहींया जिसड़ा लाल हुती जई।
21जको कुई प्रभु चे नाम गिही,
ओ उद्धार पावी।’
22“हे इस्राएली लौक, यां वचना नु सुणा, ईशु नासरी हेक इसड़े बन्दे हुता, जाये नरीकारा ची ओर कनु हुवणे चा सबूत वा सामर्थ ची कामे ते अचम्भे ची कामे ते नेरे चैन्ह लारे प्रकट छै, जको नरीकारा ने तम्चे बीच ओचे जरिये करती ङिखाणले जानु तम्ही आप ही जाणा। 23#मत्ती 27:35; मरकु 15:24; लूक 23:33; यूह 19:18ओही ईशु नु, नरीकारा ची ठहराली हुली योजना ते सारे ज्ञान चे अनुसार पकड़ीला गेला, ते तम्ही अधर्मीया चे हाथा लारे ओनु क्रूसा उपर चढ़वाती कर मारती नाखले। 24#मत्ती 28:5,6; मरकु 16:6; लूक 24:5पर नरीकारा ने ओनु मौत चे दर्दा कनु छुड़ाती कर मरला आला महु जीते करती ङिले। कांकि ईं हो ना सग़ेले कि मौत ओनु आपणे वशा मां राखती गिहा। 25कांकि अम्चा पुरखा दाऊद, ओचे बारे मां किहे,
“ ‘मैं प्रभु नु सदा आपणे सामणे ङेखता रेहला,
कांकि ओ माये सज़्ज़े पासु छै,
ताकि मैं ढे ना सग़े।
26ऐह वजह कनु माये मन खौश हुले,
ते माई आत्मा मगन हुती गेली,
ऐचे अलावा माये शरीर वी आस मां बणले रिही,
27कांकि तु माये प्राणा नु अधोलोक मां नी छोड़े।
ते ना ही आपणे पवित्र जणा नु सड़ु ङिये।
28तु मनु जीवन चा मार्ग़ बावड़ला।
तु मनु आपणे दर्शन चे जरिये खुशी लारे भरती नाखे।’
29“हे भऊ, पुरखे दाऊद चे बारे मां ईं बेलकोल सच्च छै कि ओची मौत हुली ते ओचे शरीरा नु कब्री मां वी मेहले गेले, वा कब्र आज़ वी ओठे छै। 30पर ओ भविष्यवक्ता हुता, ओ जाणता कि नरीकारा ने ओचे लारे कसम खाली, ‘मैं दुधे वंश महु हेक बन्दे नु दुधे सिंहासन उपर ब़िसाणी।’ 31ओणे हुवणे आली बाते नु पेहले कनु ही ङेखती कर मसीह चे जीते हुवणे चे बारे मां भविष्यवाणी करली,
“ ‘कि ना तां ओचे प्राणा नु अधोलोक मां छोड़ले गेले,
ते ना ही ओचे शरीर सड़ सग़ले।’
32“ऐह ईशु नु नरीकारा ने मरला आला महु जीते करले, जाये अम्ही सारे ग़वाह छिऊं। 33यूं करती नरीकारा चे सज़्ज़े हाथा कनु ऊंची पद्दवी गेहती कर, ते ब़ा कनु वा पवित्र आत्मा गेहती कर जाया वायदा करला गेलता, ओणे हा उण्डेलती ङिला जको तम्ही ङेखा ते सुणा वी। 34कांकि दाऊद तां स्वर्ग़ा उपर कोनी चढ़ला, पर ओ आप खौद्द ही किहे,
“ ‘प्रभु ने माये प्रभु नु केहले,
“माये सज़्ज़े पासु ब़ेस,
35जब तक कि मैं दुधे बैरीया नु,
दुधे पग़्ग़ा तले ची चौकी ना बणाती ङिये।” ’
36“ऐवास्ते हमा इस्राएल चे सारे घराणे पक्के जाणती गिहो कि नरीकारा ने ओनु ही, ईशु नु जेह्णे तम्ही क्रूसा उपर चढ़ाले, प्रभु वी ठहराले ते मसीह वी।”
37बल्ति सुणने आला चे मना नु ठेस लाग़ली, ते वे पतरस ते नेरा प्रेरितां कनु पूछु लाग़ले कि, “हे भऊ, अम्ही का करु?”
38पतरस ने वानु केहले, “मन फिरावा, ते तम्चे महु हर हेक आपणे आपणे पापा कनु माफी चे वास्ते ईशु मसीह चे नांवा लारे बपतिस्मा गिहो, ते तम्ही पवित्र आत्मा चा दान पावा। 39कांकि हा वायदा तम्चे वास्ते, ते तम्ची ऊलाद्धी वास्ते, ते वा लौका वास्ते जको दूर-दूर रिही पले, जानु प्रभु अम्चा नरीकार आपणे गोढु हकारी।”
40पतरस ने घणीया सारीया नेरीया बाता लारे वी ग़वाही ङिती-ङिती कर समझाले कि, “आपणे आप नु ऐ अधर्मी पीढ़ी कनु बचाली राखा।” 41ऐवास्ते जेह्णे पतरस चे वचना नु स्वीकार करले ते बपतिस्मा गेहला, ते ओही ङिओ लगभग तीन हजार बन्दी वांचे मां शामिल हुती गेली।
नवें विश्वासी बन्दा ची एकता
42ते वे प्रेरितां कनु शिक्षा गेहणे, ते संगति राखणे मां, ते बच्चड़ रोटी खाणे मां, ते प्राथना करने मां लवलीन रेहले। 43प्रेरितां चे जरिये करली गेली अचम्भे ची कामे ते अचम्भे चे चैन्ह ङेखती कर वे बन्दी हैरान हुती गेली। 44#प्रेरि 4:32–35ते वे सारे विश्वास करने आले भेले रेहते, ते वांचीया सारीया चीजा उपर सारा चा हेक ही जिसड़ा अधिकार हुता। 45वे आपणी-आपणी सम्पत्ति ते समान बेचती-बेचती कर जिसड़ी जाई जरुरत हुती बांटती ङिते। 46ते वे रोजाना हेक मन हुती कर मन्दरा मां भेले हुते, ते घरा-घरा मां जती कर बच्चड़ रोटी खाणे ते खुशी लारे मना ची सिधाई लारे रलती-मिलती कर खाणे खाते, 47ते नरीकारा ची स्तुति करते, ते सारे लौक वांचे लारे खौश हुते, ते जको नवें लौक उद्धार पाते, वानु प्रभु रोजाना विश्वासीया मां मिलाती ङिता।
Currently Selected:
प्रेरितां चे काम 2: ODR
Tõsta esile
Share
Kopeeri
Want to have your highlights saved across all your devices? Sign up or sign in
CC BY-NC-ND 4.0