Apostole 7
7
O Esteban chacharelpe
1O mai baro popo puchla e Estebane dal saia chachipe so ppenena letar, 2a vou ppenda: “Ppalalen ta dadalen, asunen man: Amaro Del o blagosime kana sikadilo ande Mesopotamia amare puraneke e Abraameke mai anglal te avel ando Aram, 3ta ppenda leke: ‘Muk che ppuvia ta che familia, ta llatar kai e ppuv kai me ka sikavau chuke.’ 4Ondaka o Abraam llelotar katar e Kaldea ta llelo te zivil ando Aram. Mapalal mulo leko dad ta o Del anda e Abraame ande gaia ppuv, kate kai tumen zivin akana.#Gn 11.31—12.5. 5A ni lia ni iek chari katar gaia ppuv, ni kai te ttovel po porrno. A o Del dia le o alau ta ppenda kai ka del la leke, ta gia kana vou ka merel goia ppuv ka achel leke porodoke#Gn 12.7; 13.15; 15.18; 17.8. (a ande gua vreme e Abraame ni ios inai sea le minone). 6Ta o Del ppenda leke kai leko porodo ka zivil sargo ande averengi ppuv ande iek ppuv kai ni pinllaren, ta kai ka aven esluge, ta kai ka aven mardine star stotine burs. 7Ta i ppenda leke o Del: ‘Me ka cherau te nakken patnia o foro kai ka cherel tumen esluge; ta mapalal cho porodo ka likel kotar#Gn 15.13-14. ta ka radil mange pe gava ttan.’ 8Kana o Del dia po alau e Abraameke ppenda leke te cheren e sirkunsision.#Gn 17.10-14. Goleke kana nakkle ojto llive sar kana biandilo leko chaurro o Isaak, o Abraam cherda leke e sirkunsision. Isto gua cherda o Isaak pe chaurrea e Jakoboia, ta o Jakob cherdale pe chaurrenchar kai sea e dada katar e desudui viche katar o Israel.
9“Gala chaurre kai sea amare purane, murzisarde pe po pplal o Jose ta bichinde le te inllaren le ando Ejipto.#Gn 37.11,28. A o Del kai saia e Joseea,#Gn 39.2-3,21. 10pomozisarda le ande sa leke nuzde ta dia le bizaipe ta cherda te uzdilpe ande lete o Faraon, o charo katar o Ejipto, ta cherda le te gazdaril po Ejipto ta pe charoina e charoki.#Gn 41.37-41.
11“Ondaka saia bok ta bari burkania ande sa e forura katar o Ejipto ta ando Kanaan; ta amare purane ni saia len so te jan.#Gn 41.54-57. 12A kana o Jakob llangla kai ando Ejipto saia jape, bichalda pe chaven incha, gola chave sea amare purane. Ta goia saia e purvo drom kai llele ando Ejipto.#Gn 42.1-3. 13Kana llele pale o duito, o Jose ppenda pe ppalenge ko saia vou, ta gia o Faraon llangla katar savi vicha saia o Jose. 14Mapalal, o Jose ppenda te anen ando Ejipto leke dade ta sa leke familia kai sea eftavardes ta panch llene. 15Ta gia o Jakob llelo te zivil ando Ejipto; ta kote mulo#Gn 49.33. vou ta i amare purane. 16Ta prajosarde len ando Sikem, ta ttode len ando limori kai o Abraam chindaia katar e chave e Amoroke.#Gn 49.29-32; 50.7-13.
17“Kana avilo pase o vreme kana saia te cherdol so ppenda o Del kana dia po alau e Abraameke, o foro katar o Israel bariloia ando Ejipto ta cherdilea but llene; 18ta ondaka ando Ejipto ttoda te gazdaril iek charo kai ni pinllarela e Josee.#Ex 1.7-9. 19Gava charo kojada amare foro ta marda amare puranen; ta cherda te llantar pe zor ta te muken chudine pe minonen te meren kai iakom biandilea.#Ex 1.10-11,22. 20Ande gua vreme biandilo o Moises. Vou saia iek minono but sukar ta leke dada bariarde le ande po cher llik ka e trin chon. 21Kana saia te muken le, e chei e Faraonoki lia le ta bariarda le sargo kana saia isto lako chaurro.#Ex 2.1-10. 22Ta gia o Moises avilo sikado ando sikadipe katar e ejipsiura ta cherdilo iek lleno zuralo ande pe alava ta ande so cherela.
23“Kana sea leke saranda burs, mangla te llal kai e llene katar o Israel, kai sea katar leko foro. 24A kana o Moises dikkla kai iek ejipsio marela iekke llene katar o Israel, llelo te marelpe lea ta mundarda le te pochinel so cherda. 25Ta o Moises mislila kai leke pplal e israelitura ka acharen kai lea o Del ka mukliarel leke foro; a von ni acharde. 26Ttiarinako, o Moises malada duie llenen kai sea israelitura kai marenape, ta sar vou mangela te del murtik, ppenda lenge: ‘Tumen sen pplal; ¿soke chalaven iek avere?’ 27Ondaka gua kai chalavela ogole espidia e Moisese ta ppenda leke: ‘¿Ko ttoda tut te ave amaro gazda ta te ave krisari maskar amende? 28¿A so mange te mundare man sar mundardan arachi e ejipsio?’ 29Kana o Moises asunda gua naslo ta llelotar ando Madian. Kote zivisarda sargo iek lleno kai inai ande pi ppuv, ta ande goia ppuv avila le dui chaurre.#Ex 2.11-15; 18.3-4.
30“Nakkle saranda burs, ta ando pusto, pasa o burdo katar o Sinai, sikadilo e Moiseseke iek suecho ande iag katar iek karrne kai ppabona. 31O Moises chudisailo katar so dikkela, ta kana llelo mai pase te dikkel mai sukar, asunda o avazi e Gazdako kai ppenela: 32‘Me sem o Del che puranengo. O Del katar o Abraam, katar o Isaak ta katar o Jakob.’ O Moises izdraio daratar, ta ni tromala ni te dikkel. 33Ondaka o Gazda ppenda leke: ‘Ikan che minie soke kote kai san gua ttan si Santo. 34Dikklem sa e patnia kai nakkel mo foro, kai si ando Ejipto. Asundem len sar kukin ta fulistem te muklliarau len. Goleke, aide, soke ka bichalau tut ando Ejipto.’#Ex 3.1-10.
35“E israelitura omanglal ni kamle e Moisese, ta ppendea leke: ‘¿Ko ttoda tut te ave gazda ta krisari?’, a o Del e suechoia kai sikadilo ande karrne, cherda le te avel gazda ta cherda le o lleno kai ka mukliarel len. 36Ta mapalal ikanda amare puranen katar o Ejipto; ta o Moises cherda bare ezgode Devlikane ande goia ppuv#Ex 7.3. katar e Mora e Loli,#Ex 14.21. ta ando pusto saranda burs.#Nm 14.32-33. 37Isto gava Moises saia gua kai ppenda e llenenge katar o Israel: ‘O Del ka cherel te likel tumendar iek porauko sargo me.’ 38A o Moises saia o avazi e foroko kana dela orba e suechoia po burdo katar o Sinai#Ex 19.1—20.17; Dt 5.1-21. ta mapalal ppenela amare puranenge so ppenda o suecho; vou lia e alava zivotoke te del len amenge.
39“A amare purane ni kamle te kanden le, ta ni kamle le ta mangle te irinpe ando Ejipto.#Nm 14.3-4. 40Ta ppende e Aaronoke: ‘Cher amenge delen te inllaren amen, soke ni llana so avilape katar o Moises kai ikanda amen katar o Ejipto.’ 41Ondaka cherde iek esnaga sargo guruveki, ta cherde kurbanura ta eslavisarde ando anau gole guruveko kai isto von cherde pe vastenchar.#Ex 32.1-6. 42Goleke, o Del durilo lendar ta mukla te blagosin e cheraien katar o miloso. Soke gia pisisarde e poraukura kana ppende:
‘Israelitura,
¿Ande saranda burs ando pusto
cherden mange tumen kurbanura o dien man vareso?
43Tumen cherden sa napoda,
inllarden tumenchar iek chara te blagosin e devle o Molok,
ta inllarden e cherain katar o del Refan,
esnage delenge kai isto tumen
cherden te blagosin len.
Goleke ka chudau tumen ande aver ppuv
mai dur neko katar e Babilonia.’
44“Ando pusto amare purane saia len e chara katar o zanio e Devlea,#Ex 25.9,40. kai cherdili isto sar ppendaia o Del e Moiseseke kana dia lea orba ta ppenda leke te cherel la prema e chara kai vou dikkla. 45Amare purane lie gaia chara katar pe dada, ta gola kai avile e Josueea andela pea kana lia peke avere ppuvien, golen kai o Del tradia angle lende. Kote achilo llik kai e llivesa e Davideke.#Jos 3.14-17. 46O Del dia but veselia e Davide, ta o David mangla letar te del le iek ttan kai te zivil o porodo katar o Jakob;#2 S 7.1-16; 1 Krn 17.1-14. 47a o Salomon si gua kai cherda o cher e Devleko.#1 R 6.1-38; 2 Krn 3.1-14. 48A o Del ni zivil ande chera kai cherde e manusa pe vastenchar. Sar ppenda o porauko:
49‘O miloso si mi estolicha,
ta e ppuv si kote kai ttovau me porrne.
¿Savo cher ka cheren mange? ppenel o Gazda;
¿kai ka avel o ttan kai ka achau te lelpe mandar o chiñipe,
50kana isto me cherdem sa gala ezgode?’#Is 66.1-2.
51“A tumen —ppenda o Esteban— sa o vreme ni kandien, ta tumare kan ta tumaro lio si sargo e llene kai ni pachan ande so ppenel o Del. Sa o vreme marden tumen e Santone Duoia. Tumen sen isto sargo tumare purane. 52¿Save porauko ni marde tumare purane? Von mundarde golen kai ppendea kai ka avel gua kai si chacho, a akana kai gua lleno chacho avilo, tumen ppukaden le ta mundarden le. 53Tumen ni pachan ando zakono kai o Del bichalda tumenge pe suechonenchar.”#Gl 3.19; Ebr 2.2.
O Esteban merel
54Kana asunde gua, e llene katar e bari kris lleletar joliarike po Esteban. 55A vou, pperdo katar o Santo Duo,#Apost 6.5. dikkla o blagosipe e Devleko upre ando miloso, ta e Jesuse kai saia pe porrne pe rig e chachi e Devleki. 56Ondaka ppenda:
—Dikkau o miloso putardo ta dikkau kai o Chavo e manuseko si pe rig e chachi e Devleki.
57A von ucharde pe kan, urkisarde zurale ta prastie lete. 58Ikande le katar o foro ta chalade le e barrenchar; gola kai dosarena le kojaimaia ta mukle te arakkel lenge patave iek terno kai ikkardola Saulo.
59Kana chalavena le e barrenchar, o Esteban molilape ta ppenela: “Gazda Jesus, le mo duo.” 60Mapalal dia changa ta urkisarda zurale ta ppenda: “¡Na ttou lenge sama katar gava bilachipe!”
Ta kana ppenda gua mulo
Currently Selected:
Apostole 7: ROM07
Tõsta esile
Share
Kopeeri
Want to have your highlights saved across all your devices? Sign up or sign in
Nuevo Testamento en Romané © Sociedad Bíblica Chilena, 2007.