Muuduko 9
9
Gooti tool Noowallu subuu'yamju aduuwiyoka tovinokwono
1 #
Mdk. 1:28
To'no'gwowi Gooti tool Noowaike gami muugunyo toorogai'aro toorai sugudo tov uubweyo'moneyokwe aro adubweyokaikono. “Kevumdotekul kwolaiyo taiyo bwotonyago yawosunopi kwako akavi aiyowomno domjomwekwilo. 2Aki yiuwi'nokai ibesa'aiyo dokato tooro kemino luko kinaikullupinorogano. Kwako te mworogu'nomollodupudo kworogai'aro domwoga toorogai'aro yiuwi'nokai noonyumwonyu su tooro kemiyo'mo aikubwemono. 3Toro te ibesa'aiyo aiyo mwallokwe su tooro kemi nonyo'mo aikullamorogano. Aiyoga muudu'nodo toga kemi nonyo'mo sulo ki'nodopudo aikubweyo tonbusuko kubalno aga yiuwi'nokai ibesa'aiyo allu kuulolo dokato kun kuruv kemi nonyo'moneyokwe aikubwemono. 4Toro aikubwemo kuvi kuruv kevu muja'nokai toorai manupinokwono. Toro tov aro tovinokwono. Aiyo mujomwekovlaiyo'moneyokwe tov mujako tovi kwoso. 5Toro te a'mwo pwol romiyaikubweyowo'ji kemoro mujako abwolawo'ji tov a'mwo su tool mi neya nubiyonekono. Aki ibesa'aiyo pworo a'mwo toorai aromiyosupi tov nuu toro aromiyoso'ji toollu mido ma'monyugono. Toro tool neya bolonekono. Aki a'mwo pwol a'mwo pwollu aromiyoso'ji tov nuu toro aromiyoso'ji toollu mido ma'monyugono. Toro tool neya bolonekono. 6#Moll. 20:13; Mdk. 1:26Aro tovinokwono. Nuu Gooti toonyu a'mwo toorai nuvubusuko sokwollosorogano. Toro tovino tov a'mwo pwol a'mwo pwollu romiyosowo'ji gamoro mujako abwolawo'ji tov a'mwo toro so'ji su tool a'mwo gabovo pworavuro ato tovi'aro neya bolonekono.”
7 #
Mdk. 1:28
Gooti tool toro wuudo'no aki aro kuudokaikono. “Kevumdotekul kwolaiyo taiyo bwotonyago yawosunopi kwako akavi aiyowomno mujomwekuupinokwono. Aki kwolaiyo taiyo bwotonyago yowosunuguupinokwono.” Kuudokaikono.
8Toruda'ai Gooti tool Noowaike'aro gamoro muugunyo toorogai'aro tonumdotai aro amadokaikono. 9“Aga moro subuu'yamju nodaikullumo akav yiuno keminodo'mo'maiyo. Lukomgu kemoro tellukweyago kwolaiyo sumo'nupi kworaida'aiyo'mokwono. 10Aki yiuwi'nokai aiyokwe mwalodupudo dokato kworogai'aro ibesa'aiyo kworogai'aro yiuwi'nokai kevuge sip toolluda'ai abolokwopo togaikullo'mo aro adaikullumono. 11Nuu yiuwi'nokai aiyokwe mwalodupudo tonyu buuru'allako tokwe aki aiko te maromiyebuuropimonyugono. Aki kwako akavi buuru'allako tokwe aki aiko te kaiyako mamollounapimonyugono. Nuu subuu'yamju toro adaikullumono.” Kuudokaikono.
12-13Toro wuujuno sumaiyokwe Gooti tool kuudokaikono. “Moro subuu'yamju adaikullumo tovino duuwallo'moneyokwe tov sulu'wo tovi numoro daboomuulo tov kwosumono. Kevu yiuwi'nokai kwako akavi aiyo mwalodupudo togaikullu nuu subuu'yamju adaikullumo tovino ikuduuwallo'mokwono. Kevumdotekike'aro kemi kellukweyago lukomgu sumo'nupi kworogai'aro yiuwi'nokai aiyokwe mwalodupudo toorogai'aro togaikullu ikuduuwollumovla'mwalonokwono.” Kuudokaikono. 14Toro wuujuno sumaiyokwe kuudokaikono. “Puga sulu'wo ton bomollu'bworoso'mi daboomuulo kurukwe'aro kwosumi tovi noonpinokwono. 15Toro te puga daboomuulo tov nero'mdowo'jure tovi wono'mi kuudo yau'monyugono. Yiuwi'nokai aiyo mwalodupudo tonyu wonyo allako tokwe aki aiko te maromiyebuuropimonyugono. Subuu'yamju toro adaikullumo tovino kuudo you'movla'monyugono. 16Aki nuu Gooti toonyu yiuwi'nokai kwako akavida'ai aiyo mwalodupudo togaikullu subuu'yamju adaikullumo tov yiunokuudo mujo'movla'mwalonokwono. Toro te daboomuulo tov sulu'wo tovi'aro kiro'mdowo'jure tovi wono'mi subuu'yamju me'no adaikullumo tovino kuudo you'movla'mwalmonyugono.” Kuudokaikono.
17Toro wuujuno sumaiyokwe Gooti tool Noowallu kuudokaikono. “Yiuwi'nokai kwako akavida'ai aiyo mwalodupudo togaikullu moro subuu'yamju adaikullumo tovino duuwallo'mo tov daboomuulo kwosumo tov kurukwono.” Kuudokaikono.
Noowal gami kwolaiyo Hamollu yogalo kuudoka tovinokwono
18To'no'gwowi Noowalluro muugunyo pworapwol tooro sip toolluda'ai abolokwopo tooraino yovo tov Semol Hamol Jafetol toorogano. Toro tooraida'ai Hamol Kenanollu ganumiyagekono. 19Toro te Noowalluro kwolaiyo pworapwol su tooro yiuwi'nokai a'mwo abolo kwako akavi amwakopo tonyu kuunumiyagorogano.
20To'no'gwowi Noowal wain ikulsulo womdo tonyu kuujo'mo tov kwolda'ai amollubworosokakwono. 21Toro tool puga wain ikulsulo ai'noka tonyu muudoma'no sumaiyokwe wain ikulsulo tovida'ai wonyo jurogudo puruv yakwollo'no anokaikono. Toro tool nyuno sumaiyokwe toga amomo yo'no muukanyulmaiyo tool gami sel ago tovi aularokaikono. 22Toro kuula'duke toga Kenanollu ganumiyago Hamol sel ago te kuulno sumaiyokwe auloonoka tov ganumiyago tool muukanyulmaiyo tekwo wo'duke toollu auloonokaikono. Toro kuuloonyogalno sumaiyokwe bolokwo'no gami gadai'yago toorallu abiluudokaikono. 23Toro te Jafeteke Semeke todoral wuu'nyuno sumaleyokwe toga kemi kuunumiyago toollu bwososo'mo nobwaiyo puul kemi yagwo tovallu'aro mobwa'nyuno sumaleyokwe sel ago teno duu'mgado aulalorakono. Toro kuulno sumaleyokwe kemi kuunumiyago muukanyulmaiyo tekwoji mwonyo'mo tooral kemoro sumdomago tov pumgu'aro ya'no sumaleyokwe nobwaiyo toul kemi kuunumiyago toollu aulobwosubweyolorakono. 24Toruda'ai Noowal wain wonyo anoka tovida'ai wolluno wolluno sumaiyokwe amomo maiyo tool adukavokaikono. Toro tool gami kwolaiyo wuullako toolluro soka tovino wuu'no'no aro kuudo saurokaikono. Oo kwolaiyo su tool kaiya'no anyumokaldeyo. Kuudo saurokaikono. 25Toro yau'no sumaiyokwe toga Noowal aro adokaikono. “Moro kwolaiyo wuullako toolluro muugunyo Kenanollu tabunyu kaiya'nodo tov aro uubwemekono. Gami gadai'yago toorai dolago tomuu kaiya'no yomjomwekovlavowo'ji ki'nato womdo wimwalono'moneyokwe uubwemekwogano. 26Toro kuvi kuruv Semolluno'gwowi sugudo tov aro uubwemekono. Moro Gooti Yawel Semollu ilaiyo nokwo mollonekono. Toro te Kenanol Semollu ki'nato womdo wimovla'mwalonekwogano. 27Aki Gooti tool Jafetollu sugudo tov aro neya uubweyono. Kwoloraiyo bwotonyago yawosunowo'ji kwako bwotonyo toru mwalpinogano. Toro ton Semolluro togai'aro avalo toru mwalpinogano. Toro mwalodopure tonyu Kenanolluro tobuurono'gwowi ki'nato womdo wimwalpinobuurogano.” Noowal toro adokaikono. 28To'no'gwowi buuru'allako tov me'no bawo'no Noowal mwalno mwalno sumaiyokwe 350 kworomo pubuuke'aro amwalokaikono. 29Toro te Noowalluro yiuwi'nokai kworomo tov 950 kworomo tobuul uuwolo'no'no abolokaikono.
Currently Selected:
Muuduko 9: SMB
Tõsta esile
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida