Muuduko 11
11
Gooti tool a'mwo tooravuro yogalo puru'mono ajajupo tovi kaiyako sugoloka tovinokwono
1Muudu'nodo toga yiuwi'nokai a'mwo kwako akavi mwalodupudo tooro avaiyogaljo tov yiuno puru'mono ajajuporogano. 2Toro tooro kwako muuduko pumuu mwallo'moneyokwe kuujo tool sulopiyamoka tomuuda'ai wuugollu'mo'mno sumaveyokwe aboporogano. Toro bino sumaveyokwe kwako wora'maluko puwai abomwaloporogano. Kwako su toru'no yovo tov Bebelooniyavorukono. 3Toro towai bomwalno sumaveyokwe ajunoporogano. “Nevu aro yano. Kunaikwako pun luvaguro'mwojowa'ji duko kilanokwono. Toro kilowa'ji simen to'busuko sumo'nupi tonyu avalo puru mollu'bworosanokwono. Aki gwomalo jurogudo pugai'aro amollu'bworosano. Gwomalo su togai simen to'busuko tonyu luvomuugutovamodanokwono.” Ajunoporogano. 4Toro junyuno sumaveyokwe toga aki aro ajunoporogano. “Nevu yiuwi'nokai kwako akavi gomno gomno nyomuudeyapino'jokweyo'mo tov yovokwe neya imo'nano. Toro toonol wagwolago bwotonyo puruv modowa'ji aki agumi'ago purukwe'aro modumelowanokwono. Agumi'ago su tov sulugumdo tovi ilubogai'nyo'mo modumelowanokwono.” Toro ajunoporogano.
5Toro junyuno sumaveyokwe kwako akavida'ai a'mwo su tooro wagwolago bwotonyo tokwe agumi'ago tokwe tovallu nomodumovla'mdopure toga Gooti Yawel abwoloonokaikono. 6Gooti Yawel toro bwoloonyuno sumaiyokwe aro adokaikono. “Oo me'no kwonomakono. A'mwo akaro avaiyogaljo toorogano. Toro tooro noonyumwonyu womdo pun kevnokweravuro kuudo tovida'ai yakwollo'mo kwinpi tov kuvinono ipinorogano.” Adokaikono. 7Toro juno sumaiyokwe aro sajunokaikono. “A'mwo su tooro kemi avaiyogaljo dodupudo tov kevnokwero nuu'nupiyokweyo'mo nevu wolowa'ji kemoro avaiyogaljo tovi kaiyako wolomolloujulowapiyano.” Sajunokaikono. 8Toro yajunyuno sumaiyokwe Gooti Yawel kuvinono abwolomolloujulowapiyokaikono. Toro abwolomolloujulowapiyoka togada'ai a'mwo tooro kemoro wagwolago amojajupo womdo tovi sumwogapiyoporogano. Toro imwogapino sumaveyokwe gomno gomno plavo'mno kwako akavi aiyowomno sounopiyoporogano. 9Toro te wagwolago su toru'no Bebeloru sowaroporukono. Toro sowaropo tov aro tovinokwono. Gooti Yawel yiuwi'nokai a'mwo abolo kwako akavi mwalodupudo tooravuro avaiyogaljo tovi kaiyako abwolomolloujulowapiyoka togada'ai kwako akavi aiyowomno sounopiyoporogano. Toro tovino tov yovo su tov sowaroporukono.
Semolluro kwikweyago kwolaiyo toorainokwono
10Kuuguudo akav Semolluro kwikweyago kwolaiyo toorainokwono. Semol buuru'allako tov me'no abawoka toga kworomo pullal mwalno sumaiyokwe 100 kworomokwe tool kwolaiyo pwol sawosunokaikono. Kwolaiyo su toolluno yovo tov Apakisatolo sowarokaikono. 11Toro te Semol Apakisatollu yawosunyuno sumaiyokwe toga 500 kworomo pubuuke'aro amwalokaikono. Toro tool kwolaiyo taiyo pugai'aro sawosunokaikono.
12Toruda'ai aki Apakisatol mwalno mwalno sumaiyokwe 35 kworomokwe tool kwolaiyo pwol sawosunokaikono. Kwolaiyo su toolluno yovo tov Sela'wol sowarokaikono. 13Toro te Apakisatol Sela'wollu yawosunyuno sumaiyokwe toga 403 kworomo pubuuke'aro amwalokaikono. Toro tool kwolaiyo taiyo pugai'aro sawosunokaikono.
14Toruda'ai aki Sela'wol mwalno mwalno sumaiyokwe 30 kworomokwe tool kwolaiyo pwol sawosunokaikono. Kwolaiyo su toolluno yovo tov Eberolekono. 15Toro te Sela'wol Eberollu yawosunyuno sumaiyokwe toga 403 kworomo pubuuke'aro amwalokaikono. Toro tool kwolaiyo taiyo pugai'aro sawosunokaikono.
16Toruda'ai aki Eberol mwalno mwalno sumaiyokwe 34 kworomokwe tool kwolaiyo pwol sawosunokaikono. Kwolaiyo su toolluno yovo tov Pelekolo sowarokaikono. 17Toro te Eberol Pelekollu yawosunyuno sumaiyokwe toga 430 kworomo pubuuke'aro amwalokaikono. Toro tool kwolaiyo taiyo pugai'aro sawosunokaikono.
18Toruda'ai aki Pelekol mwalno mwalno sumaiyokwe 30 kworomokwe tool kwolaiyo pwol sawosunokaikono. Kwolaiyo su toolluno yovo tov Reyuu'wolekono. 19Toro te Pelekol Reyuu'wollu yawosunyuno sumaiyokwe toga 209 kworomo pubuuke'aro amwalokaikono. Toro tool kwolaiyo taiyo pugai'aro sawosunokaikono.
20Toruda'ai aki Reyuu'wol mwalno mwalno sumaiyokwe toga 32 kworomokwe tool kwolaiyo pwol sawosunokaikono. Kwolaiyo su toolluno yovo tov Seruukolo sowarokaikono. 21Toro te Reyuu'wol Seruukollu yawosunyuno sumaiyokwe toga 207 kworomo pubuuke'aro amwalokaikono. Toro tool kwolaiyo taiyo pugai'aro sawosunokaikono.
22Toruda'ai aki Seruukol mwalno mwalno sumaiyokwe toga 30 kworomokwe tool kwolaiyo pwol sawosunokaikono. Kwolaiyo su toolluno yovo tov Nahoorolo sowarokaikono. 23Toro te Seruukol Nahoorollu yawosunyuno sumaiyokwe toga 200 kworomo pubuuke'aro amwalokaikono. Toro tool kwolaiyo taiyo pugai'aro sawosunokaikono.
24Toruda'ai aki Nahoorol mwalno mwalno sumaiyokwe toga 29 kworomokwe tool kwolaiyo pwol sawosunokaikono. Kwolaiyo su toolluno yovo tov Tera'wolo sowarokaikono. 25Toro te Nahoorol Tera'wollu yawosunyuno sumaiyokwe 119 kworomo pubuuke'aro amwalokaikono. Toro tool kwolaiyo taiyo pugai'aro sawosunokaikono.
26Toruda'ai aki Tera'wol mwalno mwalno sumaiyokwe toga 70 kworomokwe tool kwolaiyo pworapwol sawosunokaikono. Kwolaiyo su tooraino yovo tov Eburamol Nahoorol Haranol toorogano.
27Kuuguudo akav Tera'wolluro kwikweyago kwolaiyo toorainokwono. Tera'wol kwolaiyo pworapwol sawosunokaikono. Eburamol kuuno Nahoorol kuuno Haranol kuuno toorogano. Toro te Haranol kwolaiyo pwol yawosunyuno sumaiyokwe Lootolo sowarokaikono. 28Haranol gami ganumiyago Tera'wol yere maboloduke toga abolokaikono. Toro tool Bebelooniyada'ai wagwolago Uur towaida'ai somaroka tool gavuge avalo tonyuro kwako su toru abolokaikono. 29Aki Eburameke Nahooroleke todoral abolo amarolorakono. Nahoorol abolo mallo'moneyokwe gagwai'yago Haranolluro taiyo puruval tovalluda'ai puruv amarokaikono. Taiyo su tovalluno yovo tov puruv Milkav puruv Isukav. Toro tovalluda'ai Nahoorol Milkavi amarokaikono. Aki Eburamolluro abolo amaroka tovino yovo tov Saraiyovokwono. 30Toro te Saraiyov abolo kwollukokwono. Kwoloraiyo ku'nono mimo'nonokwono.
31To'no'gwowi Tera'wol Bebelooniyada'ai wagwolago Uur toru wuugollu'meyo'moneyokwe gami muugunyo kwolabolo Eburameke Saraiyokwe teyauke'aro gami muugunyo Haranolluro kwolaiyo Looteke'aro tonumdoto wuugollu'mo'mno sumaveyokwe Kenan'no avlavoponumdotogano. Toro tonumdoto plaino sumaveyokwe kwako Kenan toru yere mai'movapogano. Toro kun kuruv kwako puwai ki'mo'mno sumaveyokwe amwaloponumdotogano. Kwako su towai'no yovo tov Haran dodupudorukono. 32Kwako Haran su towai mwalno sumaveyokwe Tera'wol 205 kworomo tobuul me'no kuuwolo'nyungiko tool abolokaikono.
Currently Selected:
Muuduko 11: SMB
Tõsta esile
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida