Matius 2
2
Is ap hwesagal enil woluk wegesa wene
1At Yesus ano, o propinsi Yudea o Betlehem dagaga. Dagaga eria hegit e, o eba ʼgain onuk logo aʼge, ap onuk Herodes ai welaga. Oruakma re, is ap enede ʼgagalak welat hwesagal pobi togu legesa aʼge ebano mo edit wago eba hegit en o Yerusalem wegesa. 2Wegesarik is en e, disogo egesa,
“Ap Yahudi aʼge onue ʼgain onuk logo aʼge dagagarik oruak ano, o ʼgeba dagagarik oruak o? Nis o mo edip wago eba hegit en eba oruakma, ap ʼgain ano dagaga oluk, hwesagal mesik enam agama re, ap ebe erliktuogoluk hwesagal ai nenil en woluk hin wau wege o,” oluk egesa.
3Egesema re, at ʼgain Herodes ano esaʼgo hwelegeitik e, at emin, aphwami o Yerusalem aʼge ebano emin, enede erlak aga. 4Enede erlak agarik e, at ʼgain Herodes ano en e, is ap Allah eiye onuelak ʼgain ʼgain ebano emin, Allah iak pelal wogo eiye aʼge emin, mesikmu odoksogo enebesirik e,
“At Kristus ai, o ʼgeba dagema oluk opogu legep?”, oluk hin wesi. 5Hin wesimu, is en e,
“O Betlehem propinsi Yudea ebayat o. Eba dagema, oluk, is ap Allah wene moʼgulontogu legesa aʼge ebano en ogulat e,
6His ap Yudea o Betlehem welegep aʼge yu logwe! o seli pema yema onuk oruakhweat de, o Betlehem yu nak e, onuk erlak, abel pam ʼgelaʼge, oluk u re, erlak o. An neiyagai Israel aʼge ap ʼgain aʼge eragam welema aʼge ano, o seli his oruakma yema heneʼgerlakma en dagema o, (Mikha 5:2)
oluk pelal wokho pegesema oruak o,” oluk egesa. 7Oluk egesema re, at Herodes ano en, is ap hwesagal pobirak poluk enil en woluk wegesa aʼge ebano worlentesirik hisakho moʼgulentasulat e,
“Metnerlige hwesagal ai enam aga? Dokhumsogoat moʼgulnemis o,” oluk pobuk hin enebam wesi.
8Wesimu is en,
“Disogo yo,” oluk moʼgulegisema re, at en e,
“Holuk e, yogodak ya his en o Betlehem eba lit o. Laguptik e, malik dagagarik oruak ai opsogo heratip o. Arat hwiaroguptik e, ebe an erliktik en moʼgulnosu manup o,” oluk moʼgulentesi. 9Moʼgulentesimu enesaʼgo hweligisarik e, mo edip wago eba hegit en hwesagal enam agama enil hegesa aʼge ano naduk lagaihwe re, eʼberlik enil en woluk legesa. Enil en woluk legesa legesa, hwesagal ano malik dagagarik welaga hegitsogo lagarik e, eriano duk egei. 10Asogo duk egeimu is ebano hwesagal ano enil holuk, onogola enagai aʼbik hegesa. 11Onogola enagai aʼbik hegesarik e, olema ʼgwi legesa. ʼGwi legesarik malik ano ia Maria ogo pam oruakma enil holuk, ondogorlu pam hweriogo welat erliktigisa. Erliktugulat e, di aʼge yu aʼge op aʼge emas emin, kemenyan ʼgami eʼben aʼge ʼgelaʼge ano emin, e mur aʼbosu emin, hebilogo wogegisa. 12Wogegisarik nogogumu at Allah en e,
“His pobuk wegep oʼgwe Herodes eʼbek lagup o,” oluk hweseʼbi ʼgelaʼge enabi pam moʼgulentesimu, ebela muʼgwe toluk onowi pam legesa.
Yesus dogo woluk hweiye o Mesir legesa wene
13Is ap hwesagal enil woluk wegesa aʼge ebano arat legesema re, hubaʼgo nogogumu malaikat Allah en aʼge ʼbogorl pam en wagarik e, Yusuf abi pam moʼguleselat e,
“Yusuf. Hat e, malik dogo ai ia eʼbirek wogonoboluk, o Mesir eba hweiye lak o. Laguntik e, ebayat wolomup o. Oruakma, an en worlhentasu holuk en de, manup o. At ʼgain Herodes ano en malik dogo ai werigoluk oso ai o,” oluk moʼgulosoma abi hesi. 14Abi holuk elaluk agarik e, hubaʼgo emalik ʼget dogo ano ia eʼbirek wogonoboluk o Mesir laga. 15Lagarik ebayat modok oruakma ʼgain Herodes ano ebe waragama en de, togolik waga. Ai tegei ai re, is ap Allah iak moʼgulontogu legesa aʼge mesik en e,
“An nomlogo o Mesir eba en wemagoluk worlhegi o,” (Hosea 11:1)
oluk Allah en egeimu pelal wokho pesi ano hegitsogoat emagoluk tegei ai o.
O Betlehem malik ʼget dogo aʼge warenebegisa wene
16At ʼgain Herodes ano en, is ap ebano enemin wene ʼbaligisa aʼge ano,
“Wema ya? Erlak a,” oluk, yerentarok welaga welaga re, enebe erlak en e, at en,
“Lalnebegisema hegi o,” oluk olot het aʼbik aga. Olot het aʼbik agarik e,
“Malik ʼget dogo aʼge o Betlehem eba aʼge emin, o eragam oʼgwe aʼge emin, hwerli ap hwesagal enil en woluk wegesa aʼge,
Ai hwerli pam hege o, oluk dokhumsogo moʼgulnegisa hwerli en, umur 2 tahun aʼge emin, pobuk dagegesa aʼge emin, ap holuk ʼberlegat warenebip o,” oluk, osi peragenebesi.
17Asogo tigisa ai re, at Yeremia Allah iak moʼgulentasu laga aʼge ano en eselat e,
18“O Rama en loʼgu marugumu nenesaʼgo holugulat, eniak ngai-wai aʼbik ogumu nenesaʼgo holugulat, tige o.
Hwe Rahel ano emalik enebe erlak en enebaget nge aʼbik tagalat,
Nede sebelu puk ai nebit e. Nge tago modok weleik o,” (Yeremia 31:15)
oluk egeimu pelal wokho pesi aʼge ai hegitsogoat emagoluk tigisa ai o.
Yesus dogo woluk o Nazaret waga wene
19At ʼgain Herodes ano arat waragama re, malaikat Allah en aʼge ʼbogorl pam en perakpou wagama wagarik e, Yusuf o Mesir eba welat nogosoma hubaʼgo abi pam, disogo moʼgulesi,
20“Yusuf. Helaluk emen o. Inoroguntik e, malik dogo ai ia eʼbirek wogonoboluk o ap Israel aʼge oruakma lak o. Malik dogo ai woruogoluk ogu legesa aʼge ano re, ebe arat waraga o,” oluk moʼgulesi. 21Moʼgulesimu re, Yusuf en malik dogo ano ia eʼbirek wogonoboluk ap Israel aʼge oruakma togolik waga. 22Wagama re, is aphwami en e,
“O propinsi Yudea ebano pobuk ʼgain e, ap onuk Arkhelaus ai aik Herodes ebalema ʼgain onuk logo aʼge edikpegesema oruak o,” oluk egesema, Yusuf esaʼgo hwelegeitik e, o eba lo ogorlok agarik oruakma, at Allah en,
“O Yudea eba lagun o,” oluk, abi pam hweseʼbi moʼgulesimu, o Galilea ebayat waga. 23Wagarik e, o seli onuk Nazaret ai ʼgu egesarik e, ebayat mo egesa. Asogo tegei ai re, is ap Allah iak moʼgulontogu legesa aʼge en ogulat e,
“At ap ano owi Nazaret aʼge ua o,”
oluk egesa hegitsogoat aga ai o.
Currently Selected:
Matius 2: WUL
Tõsta esile
Share
Copy
Want to have your highlights saved across all your devices? Sign up or sign in