Yawhana 1
1
Ndǝr Ni kǝ Ndzai Ndɛ
1Akwa baditsǝni Ndǝrɛ adai, ba Ndǝr ni vwam kaka Hyal, ba Ndǝr ni ani Hyal. 2Akwa baditsǝni dzǝ vwam kaka Hyal.
3Atarni tǝ Hyal tara mǝrti sanga su; su adai nam tara mǝrtǝdzi kura dzǝ akwa wɛ. 4Akwa dza mpikɛ adai, ba mpikɛ nda ani paraku ala ndzi. 5Paraku ni mbǝli alǝkwa kuthlɛ, ama kuthlɛ ni ta sǝmkǝr ata kǝrari wɛ.
6 #
Mat 3:1; Mar 1:4; Luk 3:1,2 Ndɛ laka adai nam tǝ Hyal tara hyanǝba, thlǝmari Yawhana. 7Dzǝ si apa sakǝida ka dzǝ nkǝrba su ata kǝra paraku nda, ani ka atarni sanga ndzi ka dar mbǝrsa. 8Dzǝ tǝ kǝrni adi ani parakǝ ni wɛ; dzǝ si apa sakǝida ala paraku ni ɗiɗi. 9Parakǝ nam dzǝri nam ada hamnta paraku ala kǝlara ndǝ nam ada lǝkwa dunya ni.
10Dza adai akwa dunya ni, ani tǝ Hyal mǝrti dunya ni atarni, dunya ni ta zǝndi tǝni wɛ. 11Dzǝ si akwa diyirni, ama ndzǝrni ta dlu tǝni wɛ. 12Ama sanga ndzǝ nam tara dlutsi tǝni, ala ndzǝ nam tara mbǝrsa akwa thlǝmari, dzǝ la dar wada ka dar ndzai madar Hyal— 13Dar ta ndzai madar Hyal atar kum aka masi wɛ, wala atar ɗǝngar ndɛ ba ngukur dzɛ wɛ, ama Hyal tǝ kǝrni ani tara mǝrti tǝ dar madarni.
14Ndǝr ni kǝ ndzai ndɛ, dzǝ ka mǝrti vui ndziyirni akwa ntsa muri. Muri kǝ wula nggakurni, nggakur nǝr Zǝr duku ba Ɗiɗi, dzǝ nam tara hyati adzǝ Tada, ghǝi-ghǝi aka ɗakur ba dzǝri.
15Yawhana kǝ 'ya sakǝida ata kǝrari. Dzǝ haɓǝti kuɗahari, ka nkǝrɛ, “Əni ani dza ndǝ nam tǝ Yi gha, ‘Dzǝ ata si aghǝlawai nam ɓwalta yɛ, kadǝbar dzǝ adai kǝmata yɛ.’ ” 16Atar ghǝighǝikur nǝr ɗakurni muri sang dlutsi barka duku ata kǝra damwa. 17Akuya Hyal hamnta mabari atar Musa; ɗakur ba dzǝrkur si atar Yɛsu Kǝrsti. 18Ndɛ adai tara saga wula Hyal wɛ, ama Hyal Duku ba Ɗiɗi, dzǝ nam ata ngwama Tada ni, kǝ mǝrti tǝni tǝ ndǝ zǝndi.
Sakǝidar Yawhana Ndǝr 'Ya Bamtizǝma
(Mat 3:1-12; Mar 1:1-8; Luk 3:1-18)
19Əni ani sakǝidar Yawhana sakatǝ ndzǝr Yahudi nam akwa Ursalima tara hyanti fǝrist yarɛ ba ndzǝr Lawi#1:19 Ndzǝr mbana fǝrist yarɛ akwa fǝr Hyal. adzǝ Yawhana, ka dar yu tǝni apǝri dzǝ wa. 20Dzǝ ta ngǝla nkǝrba wɛ ama dzǝ nkǝrba ata babal, “Adi Yi dza Kǝrsti ni wɛ.”
21 #
Mal 4:5;
Mab 18:15,18 Dar ka yu tǝni, “Antǝ, gǝ wa? Gɛ Iliya ya?”
Dzǝ gha “A'a wɛ.”
Antǝ dar ka yu tǝni, “Gǝ nabi ya?”
Dzǝ ka sǝnau, “A'a wɛ.”
22Ata dǝnta dar nkǝrɛ, “Gǝ wa dza? sǝnau ala yar ka yar mwari akǝri ala ndzǝ nam tara hya tǝ yar. Mǝ tǝ gǝ ada gha ata kǝra kǝrngɛ?”
23 #
Isa 40:3
Yawhana ka sǝnau ala dar aka ndǝr nam akwa kakadǝr nabi Isaya apǝri, “Yi ani kuɗaha ndɛ ada kǝga akwa ntakǝr i'ya, ‘Mǝrtamɛ whal ni daɗu ala Thlaku ni.’ ”
24Kulini laka ndzǝr Farisi yarɛ nam tǝ ndǝ hyanǝba tǝ dar ni 25yu tǝni apǝri, “Kami tǝ gǝ ada 'ya bamtizǝma ma gǝ adi Kǝrsti wɛ, wala Iliya, wala nabi ni wɛ?”
26Yawhana sǝnau apǝri, “Yi ada 'ya bamtizǝma aka yimi, ama ndǝ laka adai ada hyati akwa ntsa gǝri nam kura gǝri ta zǝndi. 27Dza ani ndǝ nam ata si aghǝlawai, nam tǝ wala sǝwur ɓǝɓaiyirni ma Yi ta mǝzi ka Yi mpǝli wɛ.”
28Əni sang 'ya akwa Baitanya ata hǝiya Kyaghar Urdun, vui nam tǝ Yawhana ada 'ya bamtizǝma.
Yɛsu ani Zǝr Agamǝr Hyal
29Sǝbar arpɛ, sakatǝ Yawhana tara wula Yɛsu ada si adzǝni dzǝ nkǝrɛ, “Wuti, Zǝr Agamǝr Hyal, ndǝ nam ata siya kǝlnta bikǝr dunya! 30Dza ani ndǝ nam tǝ Yi tara ndǝrɛ ata kǝri ni, sakatǝ Yi nkǝrɛ apǝri, ‘Ndɛ laka adai nam ata si aghǝlawai, nam tara kwatsǝni tǝra aka nggakur, kadǝbar dzǝ adai kǝmata yɛ.’ 31Yi tǝ kǝrna ma Yi ta zǝndi tǝni wɛ. Ama nana Yi si akuya ka 'ya bamtizǝma aka yimi, akuya tsanǝba tǝni ala ndzǝr Izǝraila.”
32Antǝ Yawhana ka hamnta sakǝida ǝni: “Yi kǝ wula Mambǝl ni ada sǝghǝl atahyal, apa adlakukyala ka pwɛ ata dza. 33Yi ta zǝndi apǝri ani dza wɛ, ama Hyal nam tara hyanǝba tǝra ka Yi 'ya bamtizǝma aka yimi, gha alai, ‘Ndǝ nam tǝ gǝ tara wula tǝ Mambǝl ni tara sǝgǝl atahyal ka pwɛ ata dza ni, ani dza ndǝ nam ata 'ya bamtizǝma aka Mambǝl Kartǝ.’ 34Yi kǝ wula ba Yi sakǝidatsǝni apǝri ǝni ani Zǝr Hyal ni.”
Yɛsu Tsarba Ndzǝr Nuwurni nam Tangkǝma
35Sǝbar arpɛ Yawhana ada hyati ata ngwama kyaghar Urdun kaka ndzǝr nuwurni sǝɗɛ adzǝni. 36Sakatǝ dzǝ ka wula Yɛsu ada kwatsǝni, dzǝ ka nkǝrɛ apǝri, “Wulɛ, Zǝr Agamǝr Hyal!”
37Sakatǝ ndzǝr nuwurni sǝɗǝ ni tara ngati tǝni tǝ dzǝ gha ǝni, dar ka nuti Yɛsu. 38Sakatǝ Yɛsu tara mbalti kǝrni, ka wula tǝ dar ada nu tǝni, dzǝ ka yu tǝ dar, “Mǝ tǝ gǝri ada bara?”
Dar ka nkǝrɛ, “Rabbi” (nam ada nkǝrɛ Malǝm), “gǝ ada ndzai amarɛ?”
39Dzǝ ka sǝnau, “Azǝramɛ ka gǝr lǝka wula.”
Kudzǝghɛ aka saka fwaɗǝr tǝhaku, dar ka mwari kaka dza ka lǝka wula vui ndziyirni, tǝ dar ka ɓuktsi adzǝni vǝr nda.
40Pathlu akwa ntsa ndzǝ sǝɗɛ nam tara nuti Yɛsu aghǝla tǝ dzǝ tara ngati ndǝrǝr Yawhana ni ani Andǝrawusu, zǝr angǝra Simaun Bitrusu. 41Sǝ nam tangkǝma tǝ Andǝrawusu tara 'ya ani dzǝ ka mwara lǝka bara zǝrangǝri Simaun Bitrusu, ka gha lari apǝri, “Yar kǝ ɓui Masiha” (ani Kǝrsti). 42Ba dzǝ ka si aka dza adzǝ Yɛsu.
Yɛsu ka wul tǝni ka nkǝrɛ, “Thlǝma gɛ Simaun Zǝr Yawhana. Ndɛ ata kǝga tǝngɛ Kyafas” (nam sakatǝ ndǝ pali ani Bitrusu karabwari ani Paya).
Yɛsu Kǝgati Filibusu ba Nathlaniyal
43Sǝbar arpɛ Yɛsu ada bara mwari lǝkwa diyir Galili. Dzǝ ka wula Filibusu, dzǝ ka nkǝrɛ alari, “Nu tǝra.”
44Filibusu dzǝ ndǝr Bathsaida, mǝlmǝr Andǝrawusu aka Bitrusu. 45Filibusu ka ɓui Nathlaniyal ka gha alari, “Yar kǝ ɓui ndǝ nam tǝ Musa tara rǝbwa ata kǝrari akwa kakadǝr Mabari ni, ba ndǝ nam tǝ nabi yarɛ tara rǝbwa ata kǝrari—Yɛsu nǝr Nazarat, zǝr Yusufu.”
46Nathlaniyal ka yuwɛ, “Sǝ nam ɗaku awa mǝzi ka sǝba akwa Nazarat ya?”
Filibusu ka nkǝrɛ, “Azǝrɛ ka gǝ wula.”
47Sakatǝ Yɛsu tara wula Nathlaniyal ada si adzǝni, dzǝ ka ndǝr ata kǝrari, “Wulamɛ, ndǝr Izǝraila nam dzǝri, nam kura aka hawi akwa ɗǝfari!”
48Nathlaniyal ka yuwɛ. “Mǝmi tǝ gǝ zǝndi tǝra?”
Yɛsu ka sǝnau, “Yi kǝ wula tǝngɛ sakatǝ gǝ akur fur kanda nda, kabutu Filibusu ta kǝga tǝngɛ.”
49Antǝ Nathlaniyal gha alari, “Malǝm, gǝ ani Zǝr Hyal; gǝ dza Kuhyir ndzǝr Izǝraila ni.”
50Yɛsu ka nkǝrɛ, “Gǝ mbǝrsa kadǝbar tǝ Yi gha ala gɛ Yi wula tǝngɛ akur fur kanda nda. Gɛ ata wula sǝ nam ngga ta ǝnda.” 51#Bad 28:12Dzǝ ɓakta nkǝrɛ, “Yi gha ala gǝ dzǝri, gǝ ata wula atahyal ata mburntadzi, ba ndzǝr hyantǝr Hyal ada lǝti ba ada sǝghǝl ata kǝra Zǝr Ndɛ.”
Currently Selected:
Yawhana 1: CKL
Tõsta esile
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association