མ་ཏི། 17
17
ཡི་ཤུ་ག་སྐུ་གཟུགས་ སོར་པ༌ལ།
1ནོང་ཁུང་ག་ཚི་ངེ་ ཡི་ཤུ་གི་ པ་ཏྲུས་དང་ རོག་བོ་ཉིང་ཉིག་ཙིང་ ཡ་ཀུབ་དང་ ཡུ་ཧན་ན་རིག་བུ་ཉི་ ཐོ་ལ་ཕུ་ཐུང་ཀ་ བྱོན་མ༌ལ། 2ཉི་རོག་ཏེ་སམ་གི་གོད་ཅ་ཨ་ཉི་ ཡི་ཤུ་ སོར་པེ་གོ་ཙུག་པ༌ལ། རོ་ཀ་ཞལ་གེ་ ངམ་ད་བུ་རང་ འོད་ཆར་བ༌ལ། ཉི་རོ་ཀ་ནམ་བཟའ་ཁེ་པ་ གནམ་མེད་ས་མེད་ བ་ལིང་མིན་རི་ཝ༌ལ། 3ཉི་སློ་མ་སམ་གི་ མོ་ས་དང་ཨེ་ལི་ཡ་བྱོན་ཐཱན་ ཡི་ཤུ་ཀབ་ཉི་ གསུང་གྲོས་མཛད་པ་ཨ་ཝ་ མཇལ་བ༌ལ།
4པ་ཏྲུས་གི་ཞུ་ཝ་ལ་ གཙོ་བོ་ ཨའི་སམ་ཐ་ག་ཆོ་ཝ་གི་ གནམ་མེད་ས་མེད་ལེག་པུ་དི་ཝ༌ལ། ན་ག་ཐུགས་ཆོ་ནེ་ལ་ ཇི་གི་ཀབ་སམ་ཅོད༌པེ། ཐུར་ཤོ་ ན་ག་དེན་གེ་གི༌ལ། ཉི་ཨོམ་ཐུར་ཉིག་ཙིང་ཤོ་ མོ་ས་དང་ ཨེ་ལི་ཡ་ག་དེན་གེ་གི་ལ་ཨ༌ཉི།
5རོ་ཀི་ཞུ་ལེ་གང་ཀ་ མུག་པ་ཟེང་ཟེང་ཨ་ཝ་བུག་ཐཱན་ མུག་པ་ནང་ཀེ་གསུངས་མ་ལ་ རོག་ཤོ་ ཇི་གི་ཕང་ཁཱན་ ཇ་ག་ཟ་གི༌ལ། ཉི་ཇང་ རོག་ཀབ་ཉི་ གནམ་མེད་ས་མེད་ ངལ་རངས་པ༌ཅ། ཉི་རོ་ཀི་ཡེག་པ་ཀབ་ཉི་ ཉཱན་ཅོ་ན་དག༌ཉི། 6སློ་མ་སམ་གི་ ཨོ་ཐ་གསུང་སྐད་ ན་ཐ་ལ་ཀབ་ཉི་ རོག་ཏེ་བ་ གནམ་མེད་ས་མེད་ ཡོང་ཁེ་ཉི་ ཕྱག་འཚལ་བ༌ལ།
7ཉི་ཡི་ཤུ་བྱོན་ཐཱན་ རོག་ཏེ་སམ་ག་ཐོབ་ཉི་གནང་མ༌ལ། ཉི་རོ་ཀི་གསུངས་མ་ལ་ ན་ཧ་བ་ ག་ཐིང་ཤོ་ ཡོང་ཁེ་ལེ་མ་ཁེ་ལ་དག༌ཉི། 8རོག་ཏེ་སམ་གི་ གོད་པ་ཀབ་ཉི་ བཱརའ་ཨི་བི་རང་མ་ཝ་ ཡི་ཤུ་ཐུར་ཤ་ མཇལ་བ༌ལ།
9རོག་ཏེ་བ་ ཕུ་གེ་དོང་བྱོན་ཅ་ཨ་ཉི་ ཡི་ཤུ་གི་ རོག་ཏེ་སམ་ག་ གསུངས་མ་ལ་ སོ་ངོ་ག་ཟ་ ཤི་ཝ་གེ་ལོག་ཉི་ མ་ཝུ་ཝ་སག་པུ་ ན་ཤི་ཐོང་ཁཱན་ག་ཀོར་གེ་ ཨི་བི་ག་རང་ མ་ཡེག་ཅོ་ན་དག༌ཉི།
10ཉི་སློ་མ་སམ་གི་ ཇི་མ་ལ་ བཀའ་ཁྲིམས་ག་ སློབ་དཔོན་བ་ཀི་ ཧང་ཨ་ཉི་ ཨེ་ལི་ཡ་ གོ་མ་ཨོ་ཕེ་ཁེ་ལེ་ཨ་ཉི་ ཡེག་ཅ་ཡ་དག༌ཉི།
11ཡི་ཤུ་གི་ རོག་ཏེ་བ་ཀ་ལན་གནང་ཉི་ གི་ལ་དེན༌མེ། ཧང་རང་ཕྲིག་ཀིན་ཨ་ཉི་ ཅམ་པེ་དེན་གེ་ ཨེ་ལི་ཡ་ཤོ་ གོ་མ་ཨོ་ཕེ་ཁེ༌ལེ། 12དག་པ་ཀབ་ཉི་ ཇི་གི་ ན་ཧ་ཡེག་ཅ་ ཨེ་ལི་ཡ་ཤོ་ གི་ཚེ་གེ་ཤ་ཨོ་ཕ། དག་པ་ཀབ་ཉི་ རོག་ཏེ་བ་ཀི་ རོག་གུམ་མ་ཡེན་ཤི། ཉི་རོག་ཏེ་བ་ཀི་ རོ་ཀ་ཏཱན་ ཧང་ཨ་ལེ་ལ་མ་ཐུར་ ཨ་ཉི་བི་ཝ། ཨུ་ཉུ་པུརུས་ཀིན་ཨ་ཉི་རང་ རོག་ཏེ་བ་ཀི་ སོ་ངོ་ག་ཟ་བུ་ ནང་དོག་པེ་བི་ལེ་དག་ཉི་ གསུངས་མ༌ལ། 13ཡི་ཤུ་གི་ ཁྲུས་གསོར་པ་ ཡུ་ཧན་ན་ག་ཀོར་གེ་ གསུངས་ཅ་གི་ཝ་ལ་དག་ཉི་ ཉི་ཤ་ སློ་མ་བ་ཀི་ ཧ་གོ་ཝ༌ལ༎
དོན་གི་ནོད་ཁཱན་ཟ་དྲག་པ༌ལ།
14རོག་ཏེ་བ་ ཕུ་ར་ཅི་ག་ཕེབས་ཅ་ཨ་ཉི་ སོ་ངོ་མང་པུ་ཐུར་ རོག་ཏེ་བ་ཀ་དེན་གེ་ ནོང་ཉི་ཆོ་ཝ་ཅ་གི་ཝ༌ལ། སོ་ངོ་ཐུར་ཨུན་ཐཱན་ ཡི་ཤུ་ག་ཞབས་ར་ག་ ཕྱག་འཚལ་ཉི་ ཞུ་ཝ་ལ་ 15གཙོ་བོ་ ཇ་ག་ཟ་ག་ཐུང་ཀ་ སྙིང་རྗེ་ཨ་ཉི་གནང༌ཤོ། ཇ་ག་ཟ་ཤི་ཉི་དི་ཝ་ག་ ན་ཚ་ཁེ་ཉི་ གནམ་མེད་ས་མེད་ དཀའ་ཝ་ཅཱད་པ༌ཅ། ཉི་རོག་ཤི་ཉི་དི་ལེ་གང་ཀ་ ཤེབ་མང་པུ་ཐུར་ མི་དང་རི་ནང་ཀ་ རོ་ཁེ་ཇོང་མ། 16ཇི་གི་རོག་ ན་ག་སློ་མ་བ་ཀ་བཱརང་ཀ་ ཕ་ཝ་ཆོ་ཝ། དག་པ་ཀབ་ཉི་ རོག་ཏེ་བ་ཀི་ རོག་དྲག་པེ་མར་ཤི་དག༌ཉི།
17ཡི་ཤུ་གི་ རོག་ཏེ་བ་ཀ་ ཇུར་ཇང་གནང་ཉི་ ན་ཧ་བ་ཤོ་ དད་པ་མ་ཁཱན་དང་ ལོག་ཅི་ཨ་ཁཱན་ སོ་ངོ་བ་གི་ཝ༌ལ། ཇང་ན་ཧ་བ་ཀབ་ཉི་ ཧབ་ཏུར་ཤ་ཐེས་པེ་ཡ། ཉི་ཇང་ ན་ཧ་བ་ཀབ་ཉི་ ཧབ་ཏུར་ཤ་ཆོ་ལེ་ཡ། ཨོ་ཉ་ཟ་ ཇ་ག་བཱརང་ཀ་ཕའི་དག་ཉི་ གསུངས་མ༌ལ། 18ཉི་ཡི་ཤུ་གི་ ཨོ་ཉ་ཟ་ག་ནང་ཀ་ཆོ་ཁཱན་ དོན་ག་བཀའ་གནང་ཉི་ རོ་ཀ་ནང་ཀེ་ཁོན་མ༌ལ། ཉི་ཨོ་ཉ་ཟ་ ཨོ་ཉ་ཐྲེ་ཀེ་རང་དྲག་པ༌ལ།
19ཉི་སློ་མ་བ་ཙང་ཀེན་ཨ་ཉི་ ཡི་ཤུ་ག་སྐུན་མདུན་ག་བཅག་ཐཱན་ ཞུ་ཝ་ལ་ ཨ་ཤི་ཧང་ཨ་ཉི་ དོན་ཁོན་མེ་མར་ཤི་ཡ་དག༌ཉི།
20-21ཧང་ཡ་དག་ནེ་ལ་ ན་ཧ་དད་པ་ ཟེ་མ་ཨ་དེན་གེ་གི༌ལ། ཇི་གི་ ན་ཧ་ཐྲང་ཉི་ཡེག་ཅ་ ན་ཧ་དད་པ་ མེམ་བ་ལི་ད་བུ་ཆོ་ནེ་ཆང་ ན་ཤི་ཨོ་ཐ་ཕུ་ག་ཏཱན་ ཨོ་ཐ་གེ་སིག་ཉི་ ལེང་ཇོང་ཤོ་དག་ཉི་ ཡེག་ནེ་ལ་ ཕུ་སིག་ཉི་དི༌ལེ། ན་ཤི་ཨ་ལེ་མར་བ་ ཧང་རང་མང་ཕ་དག༌ཉི༎
ཡི་ཤུ་གི་ ཨོམ་ཆང་རང་ རོག་གཤགས་པེ་དག་ཉི་ གསུངས་མ༌ལ།
22རོག་ཏེ་བ་ ག་ལིལ་ག་ཛོམ་དེན་གེ་ ཡི་ཤུ་གི་གསུངས་མ་ལ་ སོ་ངོ་ག་ཟ་ག་ མགུ་སྐོར་ཕི་ཉི་ སོ་ངོ་བ་ཀ་ག་དང་ག་སྤྲོད་པེ་རེན་པ། 23རོག་ཏེ་བ་ཀི་ རོག་ཤེ༌ལེ། དག་པ་ཀབ་ཉི་ ནོང་སམ་ག་ནོང་ཀ་ རོག་ཤི་ཝ་གེ་ལོག་ཉི་ཝུ་ལེ་དག༌ཉི། ཨུ་ཐུ་ད་བུ་ ན་ཐཱན་ཅ་ཨ་ཉི་ རོག་ཏེ་བ་ གནམ་མེད་ས་མེད་ སེམས་ཤི་ཝ༌ལ༎
མཆོད་ཁང་ག་ཁྲལ།
24རོག་ཏེ་བ་ ཀ་ཕར་ན་ཧུམ་ག་ ཕེབས་པ་ཀབ་ཉི་ མཆོད་ཁང་ག་ཁྲལ་དུས་ཁཱན་བ་ ཨུན་ཐཱན་ པ་ཏྲུས་ག་ཇི་མ་ལ་ ཉིང་དྲང་རང་ཏ་པེ་ཁེ་ཁཱན་ མཆོད་ཁང་ག་ཁྲལ་ ན་ཧ་སློབ་དཔོན་གི་ ཏ་པུ་མཱན་ཅ་སྨོ་དག༌ཉི།#17:24 ཤོན་དི་ཝ་ག་དཔེ་ཆ་ 30:13
25པ་ཏྲུས་གི་ཡེག་པ་ལ་ ཧང་ཨ་ཉི་མ་ཏ་པེ་ཡ། རོ་ཀི་མཆོད་ཁང་ག་ ཁྲལ་ཏབ་ཅ་དག༌ཉི། ཉི་ཨོ་ཐ་ཀོར་གེ་ ཡི་ཤུ་ག་ཞུ་ལེ་དེན་གེ་ རོག་ཕའི་ནང་ཀ་དི་ཝ༌ལ། རོ་ཀི་མ་ཞུ་ལེ་གོ་མ་ ཡི་ཤུ་གི་ རོ་ཀ་གསུངས་མ་ལ་ སི་མོན་ ནཱན་གི་ ཧང་མིན་ཅ་ཡ། འཛམ་གླིང་ག་དཔོན་བ་ཀི་ ཁྲལ་ཨི་བི་གེ་དུས་ཅ་ཡ། རོག་ཏེ་བ་ཀ་ ཝག་ཙ་བ་ཀེ་སྨོ་ བཱརའ་སོ་ངོ་བ་ཀེ་ཡ་དག༌ཉི།
26བཱརའ་སོ་ངོ་བ་ཀེ་ཨ་ཉི་ པ་ཏྲུས་གི་ ཞུ་ཝ༌ལ།
ཉི་ལ་ ཝག་ཙ་བ་ཀི་ ཁྲལ་ཏ་པེ་མ་ཁེ་ལ་དག་ཉི་ ཡི་ཤུ་གི་ རོ་ཀ་གསུངས་མ༌ལ། 27ཨོ་ཉེ་རང་གི་ནེ་བུ་ རོག་ཏེ་བ་ དབུགས་འགམ་པེ་མ་བི་ལེ་དེན་གེ་ མཚོ་ག་དིན་ཐཱན་ ཞིང་ཟུང་ཐུབ་ཅོ། ཉི་གོ་ཙུང་ཁཱན་ང་བུན་ཐཱན ནོ་ཝང་ཆོག་ཉི་གོད་ཅོ། རོ་ཀ་ནོ་ཝང་ནང་ཀ་ དངུལ་ག་ཏི་རུ་ཨོ་ཕེ། ཨོ་ཉ་ཏི་རུ་བུན་ཐཱན་ ཇང་དང་ན་ག་དེན་གེ་ མཆོད་ཁང་ག་ཁྲལ་ཏབ་ཅོ་དག༌ཉི༎
Currently Selected:
མ་ཏི། 17: TNTB
Tõsta esile
Share
Kopeeri
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
