ยอห์น 4
4
เหย่ซู่ เร๊อ สะมาเรีย โหมะ
1ฟาริสีพู๊ เต๊เห่ หนิโฮ เร๊อ เหย่ซู่ อา โคเจ่ โอ่โหร่แถ่ เร๊อ โอ่โหร่แถ่, โท๊โต่ อา เจหนิโหร่เอ๊ เป่เล๊อ อู เทอ เร๊อ คูยอห์น. 2เก่ เฮ๊หม่าแหน่ หม่า, เหย่ซู่ เจ เป่ อู เทอ เตเพร่ว โต่, อา โคเจ่ เต๊เห่ เจ โชชื่อ เป่ อู แพ๊. 3เบ๊อะเหย่ซู่ หนิโฮ อู แด๊ ลูแหย่โย ฮู๊เออ เนอ, อา เถ่จว๊าแก เด๊อ ยูดาห์เก่. โทเรอ อา กาคยา คยาแซ๊ เด๊อ กาลิลีเก่.
4เบ๊อะอา จว๊า เบ๊อะเนอ, อา โตเบ่ จว๊าเบ๊ เร๊อ สะมาเรียเก่. 5ฮู๊เนอเร๊อ อา จว๊าโต่ เด๊อ วีสิคาร์ เด๊อ อา โอ่ เบ๊อะสะมาเรียเก่ กูเนอ. วีเออตีวีเนอ, อา โอ่ผื่อ เร๊อ เพ ยาโคบ เหล่เด๊อะแก อาพู๊คู คูโยเซฟ เห่ขุ เหล่โอ่ เนอโต๊โผะ.#เห่ขุทวาลู่ ๓๓:๑๙, โยชูวา ๒๔:๓๒ 6เพ ยาโคบ อาเทอกลื่อ โอ่ เบ๊อะเนอ เร๊อ เหย่ซู่ จว๊า ซิพร๊าแลแด๊ แกล๊ อาขว่าอาคยา, อา จว๊า โอ่แนโอ่โก๊ เบ๊อะเทอกลื่อ เนอต๊ออ่อ อาช๊า. เบ๊อะเนอเค เนอหม่า ผื่อ เหมาะโถ่ เฮ๊อ.
7เร๊อ สะมาเรีย โหมะ เตเพร แฮแด๊เทอ, เร๊อ เหย่ซู่ เฮ๊ ลู เน๊อ, “เด๊อะโอ เป่เกอ แว เทอ แต๋.” 8(เบ๊อะเนอเค หม่า อา โคเจ่ เถ่จว๊า พรีเอ่ เหล่เอ่ เด๊อวีกู.)
9สะมาเรีย โหมะ เฮ๊ฉื่อ ลู เน๊อ, “เน หม่า แกแยยิวพู๊, แว หม่า สะมาเรียพู๊, เน จว๊า กุยโอ โต่ แวเทอ.” (อา เฮ๊ ฮู๊เออ เมเตเฮ๊เรอ แกแยยิวพู๊ เร๊อ สะมาเรียฮู๊เนอหม่า อา เกล ลู โต่)#4:9 เก่ หม่าโต่ หม่า ฮู๊เออ, แกแยยิวพู๊ นอเอ่ เกอ สะมาเรียพู๊ เบหล่อ เด๊อ อา นอเอ่ เกอเร๊อ เนอเต๊เห่ โต่.#เอสรา ๔:๑-๕, เนหะมีย์ ๔:๑,๒
10เหย่ซู่ เฮ๊ฉื่อ ลู เน๊อ, “เน เก่ ซิเงบย่า จอแปแหร่ อา เตเด๊อะครา เชหยู่ โทเรอ เพร เด๊อ อา กุยโอ เนเทอ เออเตเพร หม่า อูเป เนอ เน เก่ ซิเง โป่บย่า เฮ๊หม่า, เน เก่ กุยโอ แว เทอ ปา เร๊อ แว เก่ เด๊อะโอ เน เทอ เด๊อ อา เด๊อะ อู ซิปล่อเซอเพร เออเนอ ปา.”
11เพรเหมาะ เนอเตเพร เฮ๊ฉื่อ ลู เน๊อ, “ซ๊าร๋า เน จว๊า แด๊แถ่ แจ่ เทอ เด๊อ อา เด๊อะ อู ซิปล่อเซอเพร เออเนอ เบ๊อะปา? เน เทอเหล่ดื่อ เร๊อ อา โอ่ โต่โต่, เทอกลื่อ เออต๊ออ่อเนอ อา แย แหน่เจ๊อเรอ. 12เปเพ เพ ยาโคบ เด๊อ งย๊าเค เด๊อะแก เป เทอกลื่อเออ. เพ ยาโคบ เร๊อ อาพู๊อาเลอ เร๊อ อา เตมีเตดอ เต๊เห่ แด๊โอ เทอเออ หม่า เน ดุเล๊อแหน่ เร๊อ เปเพ เพ ยาโคบ แอ?”
13เหย่ซู่ เฮ๊ฉื่อ ลู เน๊อ, “แกแย เด๊อ อา โอเทอ เออเต๊เห่เนอ, อา เกล๊ ซิโอ คยาแซ๊ ปา, 14หม่าแน๊เรอ แกแย เด๊อ อา เก่ โอเทอ เด๊อ แว เด๊อะโอ อา ปา เออเนอ, อา ซิโอ ปา เทอ โตโพ๋ โต่. เทอ เด๊อ แว เก่ เด๊อะโอ อา ปา เออเนอ, อา เก่ ทวาแถ่ เทอเถ่ขุ เด๊อ ลูกู ปา. เร๊อ อา เก่ เด๊อะ ลู ซิปล่อเซอเพร ตูจูเพร ตาแลเคร๊ ปา.”
15เพรเหมาะ เออเตเพร เฮ๊ฉื่อ ลู เน๊อ, “ซ๊าร๋า, แซ่ฮู๊ แว เก่ ซิโอ ปา เทอ โตโพ๋ โต่, โทเรอ แซ่ฮู๊ แว เก่ แฮ แด๊โอน๊อ ปา แต่ เทอ เบ๊อะเออ แต่เหม่เนอ. เด๊อะมอ แว เทอ เด๊อ เน เฮ๊ เออเนอ.”
16เหย่ซู่ เฮ๊ฉื่อ ลู เน๊อ, “กา เอ๊แฮ เนเว เบ๊อะเออ.”
17เร๊อ อา เฮ๊ฉื่อ เหย่ซู่ เน๊อ, “แวเว โอ่โต่.”
เหย่ซู่ เฮ๊ฉื่อ ลู เน๊อ, “เน เฮ๊ เร๊อ เนเว โอ่โต่ เนอหม่า อาโต แพ๊. 18เนเว โอ่โทเฮ๊อ ซิแงเฮ๊อ เร๊อ เพรคู เด๊อ เนโอ่ เกอเร๊อ กู๊แหน่เออ เตเพร เนอหม่า เนเว หม่าโต่. เน เฮ๊โฉ่จ๊อ เฮ๊โฉ่เต เป่ เจ๊อ แว เฮ๊อ.”
19เพรเหมาะเออ เฮ๊ ลู เน๊อ, “ซ๊าร๋า, แว แม๊เถอะ ซิเง ตาเตเฮ๊อ เร๊อ เน หม่า เพรโพร เตเพร. 20เป กลุยแล สะมาเรียพู๊ เด๋อ, หนู่เค เต๊เห่เนอ, อา จ๊อเบแถ่ จอแปแหร่ เบ๊อะโฉ่ เออเนอเตเม อา ลู. หม่าแน๊เรอ ซี แกแยยิวพู๊ เต๊เห่เนอ ซี เฮ๊ เร๊อ อู โตเบ่ จ๊อเบแถ่ จอแปแหร่ เด๊อ วีเยรูซาเล็ม อากู เนอ.”
21เหย่ซู่ เฮ๊ฉื่อ ลู เน๊อ, “เพรหม๋อ, หยื่อเอ่ แวเนอ, เบ๊อะเก่ แฮโต่เฮ๊อ เด๊อ ซี เก่ จ๊อเบแถ่ เพ จอแปแหร่ ปา. หม่าแน๊เรอ เบ๊อะโฉ่ เออเตเม อาลู เนอ เบ่เบ่, เด๊อ วีเยรูซาเล็ม อากู เออเนอ เบ่เบ่, อู โหล่แฮจ๊อเบ ปา เบ๊อะเนอ โต่เฮ๊อ. 22ซี สะมาเรียพู๊ เต๊เห่เนอ, ซี จ๊อเบแถ่ อูเป เนอ ซี ซิเง ตาเต เกอเร๊อ โต่. หม่าแน๊เรอ เป แกแยยิวพู๊ เต๊เห่เนอ, เป จ๊อเบแถ่ อูเปเนอ เป ซิเง เกอเร๊อ, เมเตเฮ๊เรอ เตเมแลเปล๊แก เนอ อา โอ่แถ่ เด๊อ เป แกแยยิวพู๊ อาเกล เฮ๊อ. 23หม่าแน๊เรอ แกแย เด๊อ อา จ๊อเบ ชาเผร่แหน่ เจ๊อ เพ จอแปแหร่ เต๊เห่เนอ, ม๊อเนอม๊อเซ เด๊อ เหย่ซี เก่ จ๊อเบ เด๊อ แหย่โยตากยา เร๊อ เตอาจ๊ออาเต เนอ, อา เก่ แฮโต่ ปา. อา แฮโต่ เจ๊อ เฮ๊อ กู๊แหน่ เฮ๊อ. เมเตเฮ๊เรอ เพ จอแปแหร่ แม๊ปู แกแย เด๊อ อา จ๊อเบแถ่ ลู ฮู๊เนอ เต๊เห่ เฮ๊อ. 24จอแปแหร่ หม่า หม่าแหย่โยบูโพ๊ แบ่เจ่, เร๊อ แกแย เด๊อ อา จ๊อเบแถ่ อา เต๊เห่เนอ, อา โตเบ่ จ๊อเบแถ่ อา เด๊อ ซิปล่อกี่กู เร๊อ เตหมะเตจ๊อ อากู.”
25อา เฮ๊ฉื่อ เหย่ซู่ เน๊อ, “แว ซิเง เร๊อ เมสิยาห์ หม่า เฮ๊อ (เพรเมแลเปล๊กา) เออเนอ เก่ แฮ ปา, เร๊อ เบ๊อะอา แฮโต่ ปา เบ๊อะเนอ, อา เก่ แฮแด๊โฉ่ เป่ เป เตล๋อ ปลี ปา อา เฮ๊ ฮู๊เนอ.”
26เหย่ซู่ เฮ๊ฉื่อ อา เน๊อ, “แกแย เด๊อ อา เฮ๊เบ่ เร๊อ เน กู๊แหน่เออ เตเพร เนอหม่า หม่า เนอเตเพร เฮ๊อ.”
27เบ๊อะเนออาเค, เหย่ซู่ อา โคเจ่ เต๊เห่ กาโต่ เร๊อ อา อาคย๊าอายื๊อ แหน่เจ๊อ เด๊อ อา แม๊เถอะ เหย่ซู่ เฮ๊เบ่ เร๊อ เพรเหมาะ เนอเตเพร. “เพรเหมาะ เนอเตเพร ซิหยื่อ อิเต?” เนอ, เหย่ซี แด๊เฮอ ลู เตเพร่ว โต่, โท๊โต่ “แบ่เจ่ เหย่ซู่ จว๊าเฮ๊เบ่ โต่ เร๊อ เพรเหมาะ เนอเตเพร เมเต?” เนอ, เหย่ซี แด๊เฮอ ลู เตเพร่ว โต่โต่.
28โทเรอ เพรเหมาะ เออเตเพร แด่แก อาเทอโอ เร๊อ อา กาแด๊โฉ่ โร๊ลอ อู เด๊อ วีกูเนอ เนอ, 29“แฮ แม๊เกอ แลแค มอ แว แกแย เตเพร เล๊! อา เฮ๊โพร ลอปลี เจ๊อ ล๊อ แว เมกาโทเฮ๊อ เนอเต๊เห่ เจ๊อ. อา หม่า ครี๊ เจ๊อ แอ?” 30ฮู๊เนอ อาขว่าอาคยา, เหย่ซี โอ่ เบ๊อะวีกู เนอ เร๊อ อา แฮ แลแค เด๊อ เหย่ซู่ อา โอ่.
31เบ๊อะเนออาเค, อา โคเจ่ เต๊เห่ กุยซิยอ เหย่ซู่ เน๊อ, “รับบี๋, เอ่มอ เหล่เอ่ เอ๋อ.”
32หม่าแน๊เรอ อา เฮ๊ฉื่อ เหย่ซี เน๊อ, “แว เหล่เอ่ เด๊อ ซี ซิเง โต่เกอ แว โต่ เนอ อา อาโอ่ ดื่อ เฮ๊อ.”
33ฮู๊เนอ อาขว่าอาคยา, อา โคเจ่ เต๊เห่ แด๊เฮอ เกอเร๊อ ลู เตเพร โท เตเพร เน๊อ, “หม่า อู แฮ เด๊อะเอ่ โท เฮ๊อ ลู เหล่เอ่ เตเพร เพร แอ?”
34เหย่ซู่ เฮ๊ เหย่ซี เน๊อ, “แว เมโต เพร เด๊อ อา นอแฮ แว เออเตเพร อา เตซิหยื่อ เร๊อ แว เมโทแก เตเม เด๊อ อา เด๊อ แว เออเนอหมา หม่าเฮ๊อ แวเหล่เอ่ เฮ๊อ. 35ซี เหล่โกล เฮ๊ เกอเร๊อ แลแค เน๊อ, ‘อา บาเฮ๊อ ลุยเล ปา หม่า เบ๊อะโต เก๊เฮ๊อ โบ๊ ปา.’ ตื๊อดื่อเร๊อ แว เฮ๊ ซี, แม๊ตาเต แลแค แกแย โอ่โร๊ลู เด๊อ อาแซ่เน๊อ แหล่ เออเต๊เห่เนอ, เหย่ซี หม่า อาแซ่เน๊อ โบ๊ มีบู โตเก๊ ลอปลี เฮ๊อ เร๊อ เบ๊อะเบ่เฮ๊อ เด๊อ โต เก๊ เจ๊อ เฮ๊อ กู๊แหน่เฮ๊อ. 36กู๊แหน่เออ เจ๊อ เบ่เบ่, เพรเก๊โบ๊ เตเพรเนอ อา พย๊าหนิ อาคว๊าอาเก่ เร๊อ อา แด่โอ่ปล๊อ เตเส่เตโพ เต๊เห่ เด๊อ อา หม่าเฮ๊อ ซิปล่อเซอเพร ตูจูเพร อาเง เออเนอ เฮ๊อ. ฮู๊เนอเร๊อ เพรช๊อโบ๊ เออ เร๊อ เพรเก๊โบ๊ เออ ซิเนอลอ เก่ ซิครือ โหร่ลอ ลู ปา. 37เมฮู๊เนอเรอ โหง่โด่แน เฮ๊ เน๊อ, ‘เตเพร เร๊อ ช๊อ, เตเพร เร๊อ เก๊’ เนอหม่า อาโต แพ๊. 38แว นอจว๊า เก๊เฮ๊อ ซี โบ๊ เด๊อ แหล่ขุ เด๊อ ซี เมน๊อ เร๊อ ซีเหน่ โตโพ๋ โต่ เออเต๊เหล่ เฮ๊อ. แกแย เด๊อ อาโร เต๊เห่ เมโทเฮ๊อ เบ๊อะเนอ เร๊อ เด๊อ เหย่ซี เมโทเหร่อ เฮ๊อ อาขว่าอาคยา, ซี จว๊า พย๊าหนิ เกอ เฮ๊อ เตบุ๊ยเตเตอเรอ เบ๊อะเนอเฮ๊อ.”
39เด๊อ วีเออ ตีวี อากูเนอ สะมาเรียพู๊หยื่อเอ่แหน่ กา โร๊ลู เหย่ซู่, เมเตเฮ๊เรอ หม่า เด๊อ เพรเหมาะ เนอเตเพร ข่าเฮ๊โล เร๊อ อา เฮ๊ เน๊อ, “อา เฮ๊โพร ล๊อปลี เต เด๊อ แว เมโทเฮ๊อ เต๊เห่เนอ,” อาขว่าอาคยา, เหย่ซี หยื่อเอ่แหน่ กาโร๊ลู. 40ฮู๊เนอ อาขว่าอาคยา, เบ๊อะสะมาเรียพู๊ เต๊เห่ แฮโต่ เด๊อ เหย่ซู่ โอ่ อาเค, อา กุยซิยอ ลู เร๊อ อา เก่ กาโอ่เกอ เร๊อ เหย่ซี เด๊อ อาวีกู เร๊อ เหย่ซู่ กาโอ่เกอ เร๊อ เหย่ซี เบ๊อะเนอ เนอเนอ. 41อู แฮ หนิดา โร๊ลู อา เตโด่แน เต๊เห่ เร๊อ อู หยื่อเอ่แหน่ โหร่ลา.
42เหย่ซี เฮ๊ เพรเหมาะ เนอเตเพร เน๊อ, “เป หยื่อเอ่ เหย่ซู่ กู๊แหน่เออ เนอหม่า หม่าเด๊อ เน แด๊โฉ่ เป่ เป อาขว่าอาคยา เนอ หม่าโต่. เด๊อ เป หนิโฮ อา เตแด๊โฉ่โด่แน เร๊อ เปเหน่ โทเรอ เป ซิเง เร๊อ อา หม่า ครี๊ เด๊อ อา เมแลเปล๊กา เห่ขุพู๊ เออเนอ เตเพร หม่าแหน่ เฮ๊อ, อาขว่าอาคยา เนอแพ๊.”
เหย่ซู่ แหย่โอ่เหม่ คุ๊ย อาหลู่เล๊ เตเพร อาพู๊คู
(มัทธิว ๘:๕-๑๓, ลูกา ๗:๑-๑๐)
43เหย่ซู่ โอ่ เบ๊อะเนอ เนอเนอ โทเร๊อ อา เถ่จว๊า เด๊อ กาลิลีเก่. 44เหย่ซู่ เฮ๊โท ดื่อ เฮ๊อ เน๊อ, “เพรโพร เนอ อาดอกูพู๊ เร๊อดื่อ แด่หยื่อแด่แหน่ หนิเกอเร๊อ ลู โต่.”#มัทธิว ๑๓:๕๗, มาระโก ๖:๔, ลูกา ๔:๒๔ 45เบ๊อะอา จว๊าโต่ เด๊อ กาลิลีเก่ เบ๊อะเนอ, แกแยกาลิลีพู๊ เบ๊อะเนอ เต๊เห่ เอ๊โมฉื่อ ลู, เมเตเฮ๊เรอ เหย่ซี จว๊าน๊อเกอ เตจว๊าตาลว๊าป่วย เด๊อ วีเยรูซาเล็ม อากู เร๊อ อา แม๊เถอะน๊อ ลอ โทเฮ๊อ แบ่เจ่ เหย่ซู่ เม อาโค๊ตีกลี๊ เตล๋อ ปลี เบ๊อะป่วยเค เนอเฮ๊อ.#ยอห์น ๒:๒๓
46โทเรอ, แบ่เจ่ เหย่ซู่ กาคยา คยาแซ๊ เด๊อ วีคานา เด๊อ กาลิลีเก่กู เบ๊อะอาเหล่ เมทวาแถ่ เทอ เร๊อ แท๊ทือเส่เทอแย เนอ เบ๊อะวีคาเปอรนาอูม อากู เนอ, แกแย ทวา คุ๊ย อาหลู่เล๊ กู่กล๊อ โอ่เตเพร เร๊อ อา พู๊เพรคู อาชุ๊ย.#ยอห์น ๒:๑-๑๑ 47เบ๊อะอา หนิโฮ เฮ๊อ เร๊อ เหย่ซู่ โอ่ เด๊อ ยูดาห์เก่ เร๊อ อา แฮ เด๊อ กาลิลีเก่ เบ๊อะเนอ, อา จว๊า เด๊อ ลูโอ่ เร๊อ อา กุยซิยอ เหย่ซู่ เน๊อ อา เก่ ครวากาเกอ ลู เด๊อ วีคาเปอรนาอูม เร๊อ กา แหย่โอ่เหม่ เป่ ลู พู๊คู เด๊อ อา เตเร เซอตีลี๊ ลาเฮ๊อ เออเตเพรเนอ.
48เหย่ซู่ เฮ๊ อา เน๊อ, “ซี ดาแม๊เถอะ เป่ปา เตโค๊ตีกลี๊คยา เร๊อ อาคย๊าอายื๊อ เต๊เห่ โต่ เฮ๊เรอ, ซี หยื่อเอ่ เจ๊อ ตีกี๋ โต่.”
49โทเรอ แกแย ทวา กู่กล๊อดุ เออเตเพรเนอ อา เฮ๊ฉื่อ ลู เน๊อ, “แบ่เจ๋ กา เกอเร๊อ แว กู๊แหน่ เบ๊อะแวพู๊ อาเซอ แต่ล๋ายโต่ เบ๊อะเนออาเคเออ,” อา เฮ๊ ลู ฮู๊เนอ.
50แบ่เจ่ เหย่ซู่ เฮ๊ฉื่อ ลู เน๊อ, “กาคยา คยาแซ๊ มอ. เน พู๊เพรคู เก่ โอ่โม กาคยา ดื่อ ปา.”
เร๊อ แกแย ทวา ดุ เออเตเพร หยื่อเอ่ เหย่ซู่ อา เตเฮ๊เบ่ เร๊อ อา กาคยา คยาแซ๊ เด๊อ อาหี่. 51เบ๊อะอา กา เด๊อ แกล๊ลู เบ๊อะเนอ, อาหลู่ เต๊เห่ แฮ ลือฉื่อ อา เร๊อ อา แด๊โฉ่ ลู เน๊อ, “เน พู๊เพรคู โอ่โม กาคยา เฮ๊อ.” 52อา แด๊เฮอ อาหลู่ เออเต๊เห่ เร๊อ อาพู๊คู โอ่โม กาคยา คยาแซ๊ เบ๊อะเกเต? เร๊อ เหย่ซี เฮ๊ฉื่อ ลู เน๊อ, “อา อาเหน่กู่ ตา เบ๊อะป่าเฮ๊หนื่อ เหมาะกุ่ย ตือมือ เบ๊อะเนอ.”
53อาเพ เตเนแถ่ โต่เบ่คยา อาพู๊ อาเหน่กู่ ตา เบ๊อะเนอหม่า, อา โตตื๊อ เบ๊อะแบ่เจ่ เหย่ซู่ เฮ๊ ลู เน๊อ, “เน พู๊คู เก่ โอ่โม กาคยา ดื่อ ปา เบ๊อะเนอ.” เด๊อ เออ อาขว่าอาคยา, อา เร๊อ อา ตี๊หี่แตแพ เต๊เห่ หยื่อเอ่แหน่ ลอปลี แบ่เจ่ เหย่ซู่.
54เออเนอหมา แบ่เจ่ เหย่ซู่ โอ่ เด๊อ ยูดาห์เก่ เร๊อ เถ่จว๊า คยาแซ๊ เด๊อ กาลิลีเก่ เร๊อ อา เด๊อะโล อาเตเม โคตีกลี๊ เนอโพ๊โตโพ๊ เออเนอ เฮ๊อ.
Currently Selected:
ยอห์น 4: EKTNTGEN
Tõsta esile
Share
Copy
Want to have your highlights saved across all your devices? Sign up or sign in
Wycliffe USA