Maleko 15
15
Kua Tukulima atu ia Iehu ki a Pilato ke Fakamahino
(Mataio 27.1-2, 11-14; Luka 23.1-5; Ioane 18.28-38)
1I te taeaopō o te aho na hohoko ai na fono fakavave ai nā ohitāulaga hili ma nā toeaina, nā faiakoga o te Tūlāfono, ma te Taupulega kātoa, ma na fai ai te lātou tonu. Kua fakatonu e ki lātou ke noanoa ia Iehu ma takitaki kehe mai kinā, ma tukulima atu ki a Pilato ke fakamahino e ia. 2Kua fehili atu ia Pilato ki a Iehu, “Ko koe moni ko te tupu o tagata Iutaia?”
Kua tali mai ia Iehu, “Ko koe tēnā e lea ai.”
3E lahi nā mea na mōlia ai ia Iehu e te kau ohitāulaga hili, 4ko te mea ia na toe fehili ai ia Pilato ki a Iehu, “E hēai lele hau tali e fai mai? Fakalogo atu ake ki te lahi o nā mea kua mōlia ai koe e ki lātou!”
5Kae kua hē fofou ia Iehu ke toe tali ki ei, ma na kavea tēnā ma mea na ofo lele ai ia Pilato.
Kua Fakahala ia Iehu i te Oti
(Mataio 27.15-26; Luka 23.13-25; Ioane 18.39—19.16)
6E i ei te faiga nae māhani ai lava ia Pilato i te taimi o te Kaiga Fakamanatu o te Pāheka, e tatala e ia ho he pagotā e fokotahi, e fofou ia tagata ke ia fakahaolotoa. 7I te taimi tēnā e i te falepuipui ai ni tino o he vāega na ki lātou tāmatea ni tino i te fouga e ki lātou o te mālō. Ko tētahi o ki lātou iēnei, ko he tino e igoa ki a Palapa. 8Kua potopoto ia tagata ma kāmata oi fakatālohaga atu ki a Pilato ki te pagotā e fofou ki lātou ke fakahaoloto, 9oi fehili atu ai ia Pilato ki a te ki lātou, “E fofou koutou ke tatala atu e au ki a te koutou te tupu o tagata Iutaia?” 10Auā kua ia iloa lelei lava ko te lotokino o te kau ohitāulaga hili, na ki lātou kavakea ai ia Iehu ki a te ia.
11Kae kua fakaoho e te kau ohitāulaga hili te kaifenua, ke lea ki a Pilato ke tatala ake ia Palapa ki a te ki lātou. 12Kua toe lea atu ia Pilato ki te kaifenua, “He ā la te fofou koutou ke kō faia ki te tino e lea koutou ko te tupu o tagata Iutaia?”
13Oi taukalalaga mai ai ki lātou, “Fakahātaulo te tino tēnā!”
14Kae kua fehili atu ia Pilato, “Aiheā, ko he holitūlāfono ā ta ia kua fai?”
Ka kua fakaatili ai te taukalalaga leo lahi o ki lātou, “Fakahātaulo te tino tēnā!”
15Ko Pilato na fofou ke fakafiafia te kaifenua, oi tatala ai e ia ia Palapa ki a te ki lātou. Kae kua fakatonu e ia ke kini ia Iehu ma tuku atu ai loa ke fakahātaulo.
Kua Fakatauemu nā Fitafita ki a Iehu
(Mataio 27.27-31; Ioane 19.2-3)
16Kua kave ia Iehu e nā fitafita ki loto o te lōtoā o te fale o te kōvana, oi fakapotopoto mai ai e ki lātou iētahi fitafita uma o te lātou vāega. 17Oi fakakofu ai e ki lātou ia Iehu i he kofu tatao lanu violē ma fai he pale i nā lālā o he lākau tālatala, oi fakapale ai tona ulu. 18Oi kāmata ai oi fai a lātou kupu fakatafafai ki a Iehu, kua lea vē atu ki ei, “Ke manuia te Tupu o tagata Iutaia!” 19Kua kini e ki lātou ia Iehu ki tona ulu i he mealākau, kua tūfeanu ki a te ia, ma tōtutuli kae ifo ki ei. 20Kua uma te fai o a lātou mea fakatauemu ki a Iehu, oi toe ui kehe ai e ki lātou te kofu tatao lanu violē na ki lātou fakakofua ai, kae toe fakakofu lava i ona kofu. Oi takitaki ai e ki lātou ki fafo ke fakahātaulo.
Kua Fakahātaulo ia Iehu
(Mataio 27.32-44; Luka 23.26-43; Ioane 19.17-27)
21 #
Lom 16.13
Kua tau atu ki lātou ki he tamāloa e igoa ki a Himona, nae agai mai ki te kakai mai nā nuku i tua, oi fakamālohia ai e nā fitafita ia Himona ke amo e ia te hātaulo o Iehu. (Ko Himona e hau mai Kulene, ko te tamana ia o Alehana ma Lufo.) 22Kua kave e ki lātou ia Iehu ki te koga e takua ko Kolokota, ko te uiga o te igoa tēnei ko te, “Ulupoko.” 23I kinā na taumafai ai ki lātou ke fōki ki a Iehu he uaina kua palu ki ei te vai mai te lākau e igoa ko te mulo, kae e hēki inu ki ei. 24#Hal 22.18Oi fakahātaulo ai e ki lātou ia Iehu ma fai te lātou vili ke iloa ai te mea kofu o Iehu e maua e te tino, oi tufatufa ai vēnā e ki lātou nā kofu o Iehu. 25Ko te iva i te taeao na ki lātou fakahātauloa ai ia Iehu. 26Ko te fakakupuga i te tuhi na tūhia ai nā mōliga o ia, e vēnei, “Ko te Tupu o Tagata Iutaia.” 27-28#Iha 53.12Na ki lātou fakahātauloa foki ni tino kaihohoa e toka lua fakatahi ma Iehu, ko tētahi i tona itū taumatau ma tētahi i tona itū tauagavale.#15.27-28 Ko iētahi tuhituhiga e fakaopoopo ki ei te fakakupuga: Kua taunuku ai te tuhi e lea mai, “Kua fakahala fakatahi ia ma tagata holi tūlāfono” (kikila ki te Luk 22.37).
29 #
Hal 22.7; 109.25; Mlk 14.58; Ioa 2.19 Ko nā tino na kui ake i kinā, kua lūlū o lātou ulu ma vēnei a lātou kupu fakatauemu ki a Iehu, “Ko koe tēnā na lea e kē talepea ki lalo te Mālumalu oi toe fakatū ai i nā aho e tolu! 30Fanaifo la ki lalo mai te hātaulo ma fakaola lava koe e koe!”
31Kua vēnā foki oi fai kupu fakatauemu nā ohitāulaga hili ma nā faiakoga o te Tūlāfono ki a Iehu. Kua vē atu tētahi ki tētahi, “Na fakaola e ia iētahi tino, ka ko tēia e hē ia mafaia oi fakaola ia ia lava! 32Tātou kikila la ki te Keliho, te tupu o Ihalaelu, ke fanaifo ki lalo o te hātaulo i te taimi nei, kae ke talitonu ai ki tātou ki a te ia!”
Kua vēnā foki oi fakatauemu ki a Iehu te toka lua na fakahātaulo fakatahi ma ia.
Ko te Mate o Iehu
(Mataio 27.45-56; Luka 23.44-49; Ioane 19.28-30)
33Kua ta te itūlā e hefululua i te aoauli, oi pōulitia uma ai te lau fenua kātoa ke pa ki te tolu i te afiafi. 34#Hal 22.1I te tolu i te afiafi, na kalaga leo lahi ai ia Iehu, “Eloi, Eloi, lama hapatani?” ko tona uiga, “Toku Atua, toku Atua, he ā te kua kē tuku tiakia ai au?”
35Ko iētahi tino nae i kinā, na ki lātou lagona atu ana kupu na kalaga ai ma kua lea vē, “Fakalogo atu ake, e taukalaga ki a Elia!” 36#Hal 69.21Oi vili atu ai hētahi o ki lātou ma he oma kua uma te lolō ki he uaina taugōfie; kua tuku e ia ki te pito o he mealākau, ma hiki ake ke fakainu ai ia Iehu ma vē atu tana kupu, “Fakatali! Tātou kikila pe i na hau ia Elia oi tuku ifo ia ki lalo mai te hātaulo!”
37Oi kalaga leo lahi ai ia Iehu, ma to ai loa tana mānava.
38 #
Eho 26.31-33
Oi haelua ai te kie pupuni i loto o te Mālumalu, mai luga ke pa ki lalo. 39Ko te takitakikau o te toka helau nae tū i mua o te hātaulo, ma na ia te kitea te otiga o Iehu,#15.39 otiga o Iehu: ko iētahi tuhituhiga e lea mai te kalagaga o Iehu ma i te otiga. oi lea vē ai, “E hako lava, ko te tagata tēnei ko te Ataliki o te Atua!”
40 #
Luk 8.2-3
Nae i ei nā fafine i kinā nae taukikila mamao atu. Nae i ei ai ia Malia te Makatala, ko Malia te mātua o Iakopo tamaiti ma Iohefa, ma Halome. 41Ko ki lātou iēnei nae mulimuli ki a Iehu ka koi i Kalilaia ai, ma nae fehoahoani ki ei. E tokalahi iētahi fafine nae i kinā, na ōmamai fakatahi ma Iehu ki Ieluhalema.
Ko te Tanuga o Iehu
(Mataio 27.57-61; Luka 23.50-56; Ioane 19.38-42)
42-43Ko te afiafipō na taunuku ifo ai ia Iohefa, he tino e hau mai Alimatea. He tino o te Taupulega e fakaaloalogia lele e tagata, ma ko he tino foki nae fakatalitali ma tona amanaki ki te taimi e fakataunuku ai te pule a te Atua. I te aho tēnei o Tāpenapenaga (te aho e hohoko ki ei te Hāpati), na fano ai ia Iohefa ma te lototele ki a Pilato, ke tuku ake te tino o Iehu ke kave e ia. 44Na teki ia Pilato i te ia lagona atuga ko Iehu kua oti, oi fekau ai e ia te takitakikau o te toka helau ma fehili ai ki ei pe ko Iehu kua oti. 45I te ia iloaga ko Iehu kua oti, oi na fakataga ai e ia ke kave te tino o Iehu e Iohefa. 46Kua fakatau mai e Iohefa he kie vavae, oi tuku ifo ai e ia te tino o Iehu ki lalo mai te hātaulo, kua āfīfī i he kie vavae, oi tuku ai ki loto o he tugamau na keli ki loto o he itū-mauga papa. Oi fuli ai e ia he fatupae lahi, kua pupuni ai te gutu o te tugamau. 47Ko Malia te Makatala ma Malia te mātua o Iohefa, nae kikila atu ki ei, oi na ki lā kiteagia te mea na teu ai te tino o Iehu.
Currently Selected:
Maleko 15: TNT
Tõsta esile
Share
Kopeeri
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.