Luka 6
6
Ko te Fehili e uiga ki te Hāpati
(Mataio 12.1-8; Maleko 2.23-28)
1 #
Teu 23.25
I tētahi aho Hāpati ka koi havali atu ia Iehu kui loto o he togāhaito, ka kua tau e ona hoko nā uluhaito ma mimili i o lātou lima, oi kai ai. 2Kae kua lea atu ki ei iētahi o te kau Falehaio, “He ā te kua fai ai e koutou te mea e fakahā i te Tūlāfono ke fai i te Hāpati?”
3Oi tali atu ai ia Iehu, “E hēki faitau nei koutou ki te mea a Tavita na fai i te mauaga i te fia kaia, ko ia ma ki lātou nae fakatahi ma ia: 4#1 Ham 21.1-6#Lev 24.9i te fanoga ki loto o te fale o te Atua oi kave ma kai nā falaoa kua uma te fakapaia mo te Atua? E hē fakataga i te Tūlāfono ke kai ki ei he tino vaganā nā ohitāulaga, ma na ia fōkia foki ki nā tino nae fakatahi ma ia.”
5Oi lea atu ai ia Iehu ki a te ki lātou, “Ko te Ataliki o te Tagata, ko te pule ia o te Hāpati.”
Ko te Tamāloa e Mate tona Lima
(Mataio 12.9-14; Maleko 3.1-6)
6I tētahi Hāpati, na fano ai ia Iehu ki loto o te hūnako ma akoako atu ki tagata. Nae i loto i kinā he tamāloa nae mate tona lima taumatau. 7Nae i ei ni faiakoga o te Tūlāfono ma ni Falehaio nae hakilikili ke ki lātou mōliagia ia Iehu i hana holitūlāfono, oi nae tautuku lelei e ki lātou pe i na fakamālōlō e ia he tino i te Hāpati. 8Kae kua iloa e Iehu nā mea i o lātou māfaufau, oi vāgana atu ai ki te tamāloa, “Tū ki luga oi hau ki mua i kinei.” Oi tū ake ai te tamāloa ki luga, ma tū ai i kinā. 9Oi lea atu ai ia Iehu ki a te ki lātou, “Ko au e fehili atu: He ā te fakataga i te tātou Tūlāfono ke fai i te Hāpati? Ko te fai o he mea ke fakahao ai he ola, pe ke fakauma ai?” 10Kua fakaholo atu tana kikila ki a te ki lātou uma, oi lea atu ai ki te tamāloa, “Fakahako atu tō lima” Kua vēnā ona fai e ia, oi toe lelei ai tona lima.
11Kae kua fēkakai lele ki lātou ma kāmata oi fakataufai, pe he ā ta ki lātou ka fai ki a Iehu.
Kua Filifili e Iehu nā Apohitolo e toka Hefululua
(Mataio 10.1-4; Maleko 3.13-19)
12I nā aho lava iēnā, na fano ai ia Iehu ki luga o he mauga oi tatalo ai; na fano te pō kātoa e tatalo ki te Atua. 13Kua pa ki te taeao, oi lea ai ki nā hoko o ia ke ōmamai ki a te ia, ma na filifili ai e ia he toka hefululua o ki lātou, na ia fakaigoagia ni apohitolo; 14ko Himona (na ia fakaigoa ki a Petelu), ma tona uho ko Anitelea; ko Iakopo ma Ioane, ko Filipo ma Patolomaio, 15ko Mataio ma Toma, ko Iakopo te ataliki o Alefaio, ma Himona (nae fakaigoa ko te Lotonuku), 16ko Iuta te ataliki o Iakopo, ma Iuta te Ihikaliota, te tino na kavea ma fakalata.
Kua Akoako atu ia Iehu ma Fakamālōlō nā Tauale
(Mataio 4.23-25)
17Kua fanaifo ia Iehu mai te mauga fakatahi ma te kau apohitolo, oi tū ai i he mea laugatahi ma he vāega tokalahi o ona hoko, fakatahi ma he kaifenua e tokalahi na ōmamai mai Iutea ma Ieluhalema, ma nā kakai tū matāfaga ko Tulo ma Haitonu; 18na ōmamai oi fakalogologo ki a Iehu, ma ke fakamālōlō ki lātou mai o lātou tauale. Na ōmamai ai foki ma nā tino nae āfāina i nā agaga kino, ma na fakamālōlō ai foki ki lātou uma. 19Ko nā tino uma lele, nae taumafai ke pa atu o lātou lima ki a Iehu, ona ko te mana nae fano ki fafo mai ia te ia, na fakamālōlō uma ai ki lātou.
Ko te Fiafia ma te Fakanoanoa
(Mataio 5.1-12)
20Kua kikila atu ia Iehu ki ona hoko, oi lea atu ai vēnei ki ei,
“Amutia koutou nā tino e mātitiva;
auā e o koutou te Mālō o te Atua!
21Amutia koutou iēnā e fia kakaia nei;
auā ka fakamaliegia kātoatoa koutou!
Amutia koutou iēnā e faitatagi nei;
auā koutou ka faikakata!
22 #
1 Pet 4.14
“Amutia koutou kāfai ia tagata e feita atu ki a koutou, pe teteke, pe fakamātagā koutou, ma fakakino outou igoa, ona ko te Ataliki o te Tagata! 23#2 NT 36.16; Gāl 7.52Koutou ke olioli i te aho tēnā ma tūtaoho ki luga i te fiafia, auā e i te lagi te koutou taui lahi. Nae fai foki lava e o lātou tupuna nā mea iēnei ki nā pelofeta.
24Kae hāloa la koutou iēnā e maukoloa nei;
auā kua uma te koutou mauagia o te ōlaga fīlēmū!
25Kae hāloa la koutou iēnā e mākokona nei;
auā ka fia kakai koutou!
Kae hāloa la koutou iēnā e faikakata nei;
auā ka fakanoanoa ma faitatagi koutou!
26“Kae hāloa la koutou, kāfai koutou e taku leleia e tagata uma; auā ko te mea foki tēnā na fai e o lātou tupuna ki nā pelofeta pepelo.
Alolofa ki nā Tino e fai Koutou ma o lātou Fili
(Mataio 5.38-48; 7.12)
27“Kae ko au e lea atu ki a te koutou e fia fakalogo mai ki a te au: alolofa ki nā tino e fai koutou ma o lātou fili, ma fai lelei ki a te ki lātou e ita atu ki a te koutou, 28fakamanuia ki a te ki lātou e fetūa koutou, ma tatalo mo ki lātou e fakahāuā atu ki a te koutou. 29Kāfai tō pakōkō e po e he tino, fufuli foki ki ei tētahi pakōkō; kāfai tō peleue tatao e kave e he tino, fōki ki ei ma tō kofutino. 30Fōki ki ho he tino e gogō atu ki hau mea; ma kāfai hau mea e kave e he tino, koe nahe lea ki ei ke toe kaumai. 31#Mat 7.12Ma ko nā mea e fofou koutou ke fai e iētahi tino ki a te koutou, ke vēnā foki lava ona fai e koutou ki a te ki lātou.
32“Kāfai koutou e alolofa oioti ki nā tino e alolofa atu ki a te koutou, he ā te ka maua tauanoa ai he koutou fakamanuiaga? E pa foki lava ki nā tino agahala, e alolofa ki nā tino e alolofa ake ki a te ki lātou! 33Ma kāfai koutou e fehoahoani oioti ki nā tino e fehoahoani atu ki a te koutou, he ā te ka maua tauanoa ai he koutou fakamanuiaga? E pa foki lava ki nā tino agahala, e fai e ki lātou te mea tēnā! 34Ma kāfai e fōki oioti autou mea ki a te ki lātou e fakamoemoe koutou e ki lātou toe fakafoki atua, he ā te ka maua tauanoa ai he koutou fakamanuiaga? E pa foki lava ki nā tino agahala, e fōki a lātou tupe ki nā tino agahala, kae ke toe maua mai ai lava te tupe kātoa na fōki ki ei! 35Kae alolofa ki nā fili o koutou ma fai lelei ei; fōki autou mea e aunoa ma he koutou māfaufau, ke toe maua mai he mea. Ka maua ai e koutou he taui lahi, ma kavea ai koutou ma fānau a te Atua Hilihilikehe. Auā ko te Atua e agalelei ki nā tino kino ma hē loto fakafetai. 36Koutou la ke agalelei ki iētahi tino, e vē ko te koutou Tamana e agalelei.
Ko te Fakamahino atu ki Iētahi Tino
(Mataio 7.1-5)
37“Nahe koutou fakamahino atu ki iētahi tino, oi hē fakamahinoa ai foki koutou e te Atua; nahe koutou fakahalagia iētahi tino, oi hē fakahalagia ai foki koutou e te Atua; fakamāgalo iētahi tino, oi fakamāgalo ai foki koutou e te Atua. 38Fōki ki iētahi tino, oi fōki atu ai ki a te koutou e te Atua. Ka maua kātoatoa e koutou, he vāega lahi lele e liligi atu ki nā lima o koutou — ki te mea e gata ai te mafai e koutou oi ōpoipoi i outou lima. Auā ko te fua e fakaaogā e koutou, ko te fua foki ia ka fakaaogā e te Atua ki a koutou.”
39 #
Mat 15.14
Oi fai ai e Iehu te talafakatuha tēnei ki a te ki lātou: “E hē mafai ke takitaki e he tāuaho hētahi tāuaho, auā ka pakukū uma ai ki lāua ki loto o he utu. 40#Mat 10.24-25; Ioa 13.16; 15.20E hēai he tamaiti akoga e hili atu i lo tona faiakoga, kae ko tamaiti akoga tau tokatahi uma, kāfai e uma lelei ana akoakoga, ka vē lava ko tona faiakoga.
41“He ā te kitea ai e koe te mea otaota i loto o te mata o tō uho, kae e hē kē kitea te kogālakau i loto o tō mata? 42E lea vēhea koe ki tō uho, ‘Te uho, tuku mai tō mata ke keu kehe e au te mea otaota i loto,’ kae ko tēnā e hē kē kitea te kogālakau i loto o tō mata? Ko koe ko he tino āmio pepelo! Kave kehe muamua te kogālakau i loto o tō mata, oi kitea lelei ai e koe ke kave kehe te mea otaota i loto o te mata o tō uho.
Ko te Lākau ma ona Fua
(Mataio 7.16-20; 12.33-35)
43“Ko te lākau e ola lelei, e hē fua mai ai ni fua kino, e hē fua mai foki i he lākau e ola kino ni fua e lelei. 44#Mat 12.33Ko nā lākau takitahi uma e iloa i o lātou fua; e hē kē taua ni mati pe ni vine mai ni lākau tālatala. 45#Mat 12.34Ko te tino lelei, e fakaputu i tona loto nā mea lelei e vē ni koloa tāua, ma e tautala i nā kupu lelei mai te lahi o te lelei i tona loto; ko te tino kino e fakaputu i tona loto nā mea kino e vē ni koloa kino, e tautala i nā kupu kino mai te lahi o te kino i tona loto. Auā e tautala lava te gutu i nā mea e tumu ai te loto.
Ko nā Tino Faufale e Toka Lua.
(Mataio 7.24-27)
46“He ā te lea mai ai koutou ki a te au, ‘Te Aliki, Te Aliki,’ kae e hē koutou faia nā mea e lea atu ai au? 47Ho he tino e hau ki a te au ma fakalogo ki aku kupu, ma uhitaki ki ei — ka taku atu e au ki a te koutou te mea e fakatuha ki ei te tino tēnā. 48Ka vēia ia ko he tino e fau tona fale; e keli e ia fakaloloto te tulagā fale, oi fau ai te fakavae ki luga o te papa. Kua pā te vaitafe, oi tafe mai ai te lolovai ki te fale, kae e hēki māluelue lele auā na lelei te fauga. 49Kae ko te tino e lagona e ia āku kupu kae hē uhitaki ki ei, e vēia ia ko he tino e fau tona fale, kae e hēki kelia he fakavae; kua tafe mai te lolovai ki te fale oi pakū ai ki lalo, kua matuā fakahēaogā lava!”
Currently Selected:
Luka 6: TNT
Tõsta esile
Share
Kopeeri
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.