Ioane 4
4
Ko Iehu ma te Fafine Hāmālia
1Kua lagona e te kau Falehaio kua tokalahi atu nā tino e mulimuli ki a Iehu ma ia papatihoa, i lo Ioane. ( 2Ko te meamoni lava, e hēki papatihoa e Iehu he tino; ko nā hoko o ia te na ki lātou papatihoa.) 3I te lagonaga la e Iehu o te fakamatalaga tēnei, oi fano kehe ai ma Iutea, kua toe foki ki Kalilaia. 4I te auala o ia na malaga ai, na kui atu i loto o Hāmālia.
5 #
Ken 33.19; Ioh 24.32 Kua taunuku atu ia Iehu ki Hāmālia, ki te kakai e igoa ki a Haikā, e hē mamao ma te fenua na fōki e Iakopo ki tona ataliki ko Iohefa. 6E i kinā te vaikeli o Iakopo, oi na nofo ifo ai ia Iehu ki lalo i tafa o te vaikeli, kua vāivai i te malaga. I te taimi tēnā, pe kua ta te hefululua i te aoauli.
7Oi hau ai he fafine Hāmālia oi ahu vai, ma na vāgana atu ai ki ei ia Iehu, kua vē atu, “Fakainu mai ko au?” ( 8Ko nā hoko o ia kua olo ki te kakai, oi fakatau mai he lātou mea ke kai.)
9 #
Ehe 4.1-5; Nem 4.1-2 Kua tali mai te fafine, “Ko koe ko he Iutaia, ka ko au ko he Hāmālia — e vēhea la oi lea mai koe ki a te au ke fakainu atu koe?” (E hē mafai e nā tino Iutaia ke fakaaogā e ki lātou ni ipuinu ma ni pēhini na fakaaogā e ni tino Hāmālia.)#4.9 E hē mafai e nā tino Iutaia ke fakaaogā e ki lātou ni ipuinu ma ni pēhini na fakaaogā e ni tino Hāmālia; pe E hē faifai mea fakatahi nā tino Iutaia ma nā tino Hāmālia.
10Kua tali atu ia Iehu ki ei, “Ka na he mea na kē iloa te meaalofa a te Atua, ma pe ko ai foki te tino e lea atu ki a te koe mo he vai inu, anei ake kua lea koe ki ei, ma kua ia fōkiatua ki a te koe, te vai o te ola.”
11Kua lea mai te fafine, “Te aliki, ko tēnā e hēai hau mea ahuvai, ma ko te vaikeli foki e loloto. Ko fea la te kaumai ai e koe te vai tēnā o te ola? 12Ko te vaikeli tēnei na tuku mai ki a te ki mātou e to mātou tupuna ko Iakopo. Nae inu ai foki ia Iakopo ma tana fānau, vēnā ma ana lafu manu. Ko tona uiga ko koe e lea mai, e hili atu koe ia Iakopo?”
13Kua tali atu ia Iehu, “Ko nā tino e inu ki te vai tēnei, e toe fia inua, 14ka ko nā tino e inu ki te vai e kō fōkia ki ei, e hē toe fia inua lele. Ko te vai e kō fōkia ki a te ki lātou, e kavea ma vaipuna i loto o ki lātou, e puna ake ai pea te vai o te ola mo ki lātou, ma maua ai e ki lātou te ola e fakavavau.”
15Kua lea mai te fafine ki a Iehu, “Te aliki, kaumai ki a te au te vai tēnā, kae ke hē toe fia inua lele ai au, ma hē toe hau ai au oi ahu vai.”
16Oi lea atu ai ia Iehu ki ei, “Fano la oi kaumai tau āvaga.”
17“E hēai haku āvaga,” kua tali mai te fafine.
Oi lea atu ai ia Iehu ki ei, “E hako tau lea mai e hēai hau āvaga. 18Kua toka lima ia tamāloa e āvaga koe ki ei, ma ko te tamāloa e nonofo nei koulua, e hē ko he āvaga moni e a koe. Kua taku mai e koe te meamoni.”
19Kua lea atu te fafine, “Te aliki, ko taku kikila atu, ko koe ko he pelofeta. 20Ko nā tupuna o ki mātou, nae tāpuaki ki te Atua i luga o te mauga tēnei;#4.20 mauga tēnei; Mauga ko Kelihima, e pili ki te kakai ko Hēteme. kae lea mai koutou tagata Iutaia, ko Ieluhalema te mea e tatau ke tāpuaki ai ki mātou ki te Atua.”
21Kua lea atu ia Iehu, “Te māfine, e talitonu mai koe, e hau te taimi e hē toe tāpuaki ai ia tagata ki te Tamana i luga o te mauga tēnei, pe i Ieluhalema. 22Ko koutou tagata Hāmālia, e hē koutou iloa pe ko ai te tāpuaki koutou ki ei; ka ko ki mātou tagata Iutaia, e ki mātou iloa te tino e tāpuaki ki mātou ki ei, auā ko te fakaolataga e auala mai i tagata Iutaia. 23Kae e hau te taimi, ma kua i kinei i te taimi nei, ka tāpuaki atu ai ki te Tamana ia tagata, i te mālohi o te Agaga o te Atua, ma kavatu ki a te ia te tāpuakiga e moni ma fofou ia ki ei. 24Ko te Atua ko te Agaga, ma ko te mālohi oioti o te Agaga e mafai ai ia tagata ke tāpuaki atu ki a te ia, i te tāpuakiga e moni.”
25Kua lea mai te fafine, “E iloa e au ko te Mehia e hau. E fakaigoa e ki mātou ko Keliho. Kāfai e hau, ka ia fakailoa maia ki a te ki tātou nā mea uma lele.”
26Oi tali atu ai ia Iehu, “Ko au tēnei e tautala atu ki a te koe, ko ia tēnā.”
27I te taimi lava tēnā, na taunuku mai ai nā hoko o Iehu, ma na fakatekigia lele ki lātou, ona ko Iehu e faitala ki he fafine. Kae e hēki i ei he tino o ki lātou na lea ki te fafine, “Ko he ā te fofou koe ki ei?” pe fehili foki ki a Iehu, “He ā te tautala ai koe ki te fafine?”
28Oi tuku ai e te fafine tana fagu utuvai, kae toe liliu ki te kakai oi lea vē atu ki nā tino, 29“Ōmamai oi kikila ki te tamāloa na ia taku maia ki a te au, nā mea uma lele a āku na fai. E hē ko ia nei te Mehia?” 30Oi tukua ai loa e ki lātou te kakai, kae kua olo ki a Iehu.
31I te taimi tēnā, ko Iehu e tauanau e ona hoko, e lea vē ki ei, “Te Faiakoga, kai ko hau mea!”
32Kae kua tali mai ia Iehu, “E i ei nā meakai a āku e hē koutou iloa he mea e fokotahi e uiga ki ei.”
33Oi fakataufai ai te kau hoko, ma fehili vē tētahi ki tētahi, “Na kave nei ki ei hana meakai e he tino?”
34Kua lea atu ia Iehu ki a te ki lātou, “Ko taku meakai, ko te uhitaki ki te mea e fofou ki ei te Atua, ma te fakataunukuga o te gāluega na ia tuku maia ki a te au ke fai. 35E i ei te koutou fakakupuga e vē, ‘Toe fa lava ia māhina oi pa ki te helehelega.’ Kae ko au e lea atu ki a te koutou, kikila lelei atu o koutou mata ki nā fatoaga; kua mātutua te fuata ma kua tatau ke helehele! 36Ko te tino e ia helehelea, e maua tona totogi, ma e ia fakaputu maia na fua o te fatoaga mo te ola e fakavavau; ma ka fiafia fakatahi ai te tino e ia totōa, ma te tino e ia helehelea. 37Auā e hako lava te fakakupuga, ‘E totō e tētahi tino, kae helehele e hētahi.’ 38Kua kō uga atua koutou, ke helehele te fuata i te fatoaga e hēki gālulue ai koutou; nae gālulue ai iētahi tino, ma kua manuia koutou ona ko a lātou gāluega.”
39E tokalahi ia tagata Hāmālia i te kakai tēnā na talitonu ki a Iehu, ona ko te fafine na lea vē, “Na ia taku maia ki a te au, nā mea uma lele a āku na fai.” 40I te ōmamaiga la o tagata Hāmālia ki a Iehu, na ki lātou tauanaua ai ke nonofo ki lātou, oi na nofo ai ia Iehu i kinā, i ni aho e lua.
41E tokalahi atu foki iētahi tino kua talitonu ona ko tana kupu, 42ma kua lea vē atu ki lātou ki te fafine, “E hē ona ko nā mea na lea mai ai koe te kua talitonu ai ki mātou, kae ona na ki mātou lagona lelei lava nā mea nae tautala ai ia Iehu, ma kua ki mātou mautinoa ai, ko ia lava ko te Fakaola o te lalolagi.”
Kua Fakamālōlō e Iehu te Ataliki o he tino Ofiha o te Mālō
43Kua kātoa nā aho e lua o Iehu i kinā, oi fano ai ki Kalilaia. 44#Mat 13.57; Mlk 6.4; Luk 4.24Auā ko Iehu lava te na lea, “E hē mamalu he pelofeta i tona lava nuku.” 45#Ioa 2.23I te pa atuga o Iehu ki Kalilaia, na talia ma te fiafia e tagata, ona nae i Ieluhalema foki ki lātou mo te Kaiga Fakamanatu o te Pāheka, ma na ki lātou kiteagia nā mea uma lele nae fai e Iehu i kinā.
46 #
Ioa 2.1-11
Oi toe fano ai ia Iehu ki Kana i Kalilaia, ki te mea na ia fakaliu uaina ai nā vai. Nae i Kapenaumi he tino ofiha o te mālō, ko tona ataliki nae tauale. 47I te ia lagonaga ko Iehu kua fanaifo mai Iutea ki Kalilaia, oi fano ai kua talohaga ki ei, ke fanake ki Kapenaumi oi fakamālōlō tona ataliki e tauale, kua tāli oti. 48Oi vāgana atu ai ki ei ia Iehu, “E hēai lele he tino o koutou e mafai ke talitonu, heiloga kua kikila muamua ki ni fakailoga ma ni mea ofoofogia.”
49Ka kua tali mai te tino ofiha, “Te aliki, hau ko ta olo ka ko hēki oti toku ataliki.”
50Oi lea atu ai ki ei ia Iehu, “Fano; ko tō ataliki e hē oti.”
Na talitonu te tamāloa ki te kupu tēnei a Iehu, oi fano ai loa. 51Ka koi fanatu ia i te auala ki tona fale, kae fakafetaui mai ki ei ana kaukauna, oi lea vē atu ai nā kaukauna ki ei, “Ko tō ataliki kua mālohi.”
52Kua fehili atu te tino ofiha ki a te ki lātou pe ko he ā te taimi tonu na kāmata ai oi mālohi tona ataliki, ma na tali mai nā kaukauna, vē mai, “Ko te itūlā e tahi i te afiafi ananafi na teka ai tona fiva.” 53Oi manatua ai e te tamana, ko te taimi tonu foki lava tēnā na lea vē ake ai ia Iehu ki a te ia, “Ko tō ataliki e hē oti.” Oi na talitonu ai loa te tino ofiha ki a Iehu, fakatahi ma tona kau kāiga uma.
54Ko te lua tēnei o fakailoga na fai e Iehu, i te fanaifoga mai Iutea ki Kalilaia.
Currently Selected:
Ioane 4: TNT
Tõsta esile
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.