Ioane 1
1
Ko te Kupu o te Ola
1Nae i te kāmataga te Kupu, ma nae i ei fakatahi ma te Atua, ma ko te Kupu ko te Atua. 2Nae i ei ia i te kāmataga ma te Atua, 3ma na fai e te Atua nā mea uma e ala i te Kupu; e hēai foki he mea e fokotahi i te lagi ma te lalolagi na fai, kae hē i ei te Kupu. 4Ko te Kupu ko te puna o te ola,#1.4 Ko te Kupu ko te puna o te ola; pe Ko te mea na gaohia na i ei te ola i te māfutaga ma te Kupu. ma ko te ola tēnei na kaumaia te mālamalama ki tagata. 5Ko te mālamalama e huhulu i loto te pōuliuli, ma e hēki mafai lele e te pōuliuli oi tāmate.
6 #
Mat 3.1; Mlk 1.4; Luk 3.1-2 Na uga mai e te Atua tana kavefekau, ko Ioane tona igoa, 7na hau ke fai ma molimau, ma fakailoa atu ki tagata e uiga ki te mālamalama, kae ke talitonu uma ai ki lātou ona ko ia. 8E hē ko ia te mālamalama; kae na hau ke molimau e uiga ki te mālamalama. 9Ko te mālamalama moni tēnei — ko te mālamalama e hau ki te lalolagi ma huhulu atu ki tagata uma, kae ke ki lātou kitea ai te meamoni.
10Ko te Kupu nae i te lalolagi, ma ko te lalolagi na gaohia e ala ia te ia, kae e hēki iloa ia e te lalolagi. 11Na hau ki tona nuku, kae e hēki talia ia e ona tagata. 12Kae ko ki lātou uma na taliagia ia ma talitonu ki ei; na ia tuku atua ki ei te haolotoga, ke kavea ai ki lātou ma fānau a te Atua. 13E hēki kavea ki lātou ma fānau a te Atua, e vē ko te tūlaga māhani fakatetagata, e fānanau mai ni fānau e a he tamana; kae ko te Atua lava ia, ko to lātou Tamana.
14Na liu tino tagata te Kupu ma nae mau fakatahi ma ki mātou, ma tumu i te alofa tūnoa ma te fakamāoni. Na kikila ki mātou ki tona mamalu, te mamalu o te Ataliki e tokatahi o te Tamana.
15Na molimau ia Ioane e uiga ki a te ia, ma nae taukalaga vēia, “Ko tēnei te tino na lea atu ai au, i toku lea atuga vē, ‘E hau mulimuli ia ia te au, kae e hili atu tona mamalu i lo au, auā nae i ei ia ka ko hēki fānau mai au.’ ”
16Ona ko te lahi o tona alofa tūnoa, kua fakamanuia ai ki tātou uma e ia, ma maua ai e ki tātou nā fakamanuiaga hautualahi. 17Ko nā Tūlāfono, na tuku mai e te Atua kui mai ia Mohe; kae ko te alofa tūnoa ma te meamoni, na kui mai ia Iehu Keliho. 18E hēai he tino na kua ia kitea te Atua. Ka ko te Ataliki e tokatahi e nofo i tafa o te Tamana, ko ia te kua ia fakailoa maia te Atua.
Ko te Molimau a Ioane te Papatiho
(Mataio 3.1-12; Maleko 1.1-8; Luka 3.1-18)
19Ko tēnei te molimau a Ioane, i te uga atuga e nā takitaki o Iutaia i Ieluhalema ni ohitāulaga ma ni ha-Levī ke fehili vē ki ei, “Ko ai koe?”
20E hēki fakafiti ia Ioane oi tali ki ei, kae kua ia fakamaninoa lelei lava ki a te ki lātou, i te leaga vē ki ei, “E hē ko au te Mehia.”
21 #
Teu 8.15, 18; Mal 4.5 “Ko ai la koe?” kua fehili vē mai ki lātou. “Ko koe nei ko Elia?”
“Hēai, e hē ko au,” kua tali atu ia Ioane.
“Ko koe nei la ko te Pelofeta?”#1.21 te pelofeta: E tokalahi nā tino Iutaia nae fakatalitali ke uga mai e te Atua he pelofeta e vē ko Mohe (kikila ki te Teutelenome 18.15,18), ma nae fakamoemoe e ia fakailoa maia te afio mai o te Mehia. kua lea mai ki lātou.
“Hēai,” kua tali atu ia Ioane.
22“Taku mai la ki a te ki mātou pe ko ai koe,” kua toe lea atu ki lātou. “E tatau ke olo ki mātou ma he tali ki nā tino na uga maia ki mātou. Lea mai ake pe ko ai koe?”
23 #
Iha 40.3
Ka kua tali atu ia Ioane i nā kupu a te pelofeta ko Ihaia:
“Ko au ‘ko te leo e taukalaga i te vao:
Fakahakohako he auala mo te Aliki ke kui ai!’ ”
24Ko nā kavefekau na uga atu e te kau Falehaio,#1.24 Ko nā kavefekau na uga e te kau Falehaio; pe Ko ki lātou na uga atu, ni Falehaio. 25kua fehili vē atu ki a Ioane, “He ā la te papatiho ai e koe nā tino kāfai ko koe e hē ko te Mehia, pe ko Elia pe ko te Pelofeta?”
26Kua tali mai ia Ioane, “E kō papatihoa koutou i te vai, kae e i kinā ia te koutou he tino, e hē koutou iloa. 27E mulimuli mai ia ia te au, kae e hē aogā au ke kō tatala ona hēvae.”
28Ko nā talatalanoaga iēnei, nae fai i Petania i te itū i hahae o te Vaitafe ko Iolitana, te mea nae fai ai te papatihoga a Ioane.
Ko te Punuamāmoe a te Atua
29I te aho alafaki na kitea atu ai e Ioane ia Iehu e agai mai ki a te ia, oi lea ai vē, “Kikila, tēia te Punuamāmoe a te Atua e kave keheagia ia agahala a te lalolagi! 30Ko ia tēnei na lea atu ai au, ‘E i ei he tino e mulimuli mai ia te au, kae e hili atu ia i lo au, auā nae i ei ia ka ko hēki fānau mai au.’ 31Nae hē kō iloa pe he tino vēhea, kae ko au na hau ke papatiho i te vai, kae ke fakailoa atu ai ia, ki tagata o Ihalaelu.”
32Oi fai ai te molimau a Ioane: “Na kō kitea te Agaga Paia e fanaifo mai te lagi e vē he lupe, ma nofo i ona luga. 33Nae hē kō iloa pe he tino vēhea, kae ko te Atua, na ia uga maia au ke papatiho i te vai, na vāgana mai ki a te au, vē mai, ‘Ka kitea e koe te Agaga e fanaifo oi nofo i luga o he tino; ko ia tēnā te ia papatihoa i te Agaga Paia.’ 34Kua kō kitea,” kua lea vēnā atu ia Ioane, “ma e lea atu au ki a te koutou, ko ia tēnei ko te Ataliki o te Atua.”
Ko nā Hoko Muamua o Iehu
35I te aho alafaki, na toe tū ai foki ia Ioane i kinā fakatahi ma ona hoko e toka lua, 36ma i te ia kitea atuga o Iehu e havali ake, oi lea ai vē, “Kikila, tēia te Punuamāmoe a te Atua!”
37Kua lagona atu e nā hoko e toka lua o ia te mea tēnei, oi olo ai kua mulimuli ki a Iehu. 38Kua fāliu mai ki tua ia Iehu, oi kitea ai e ia te toka lua e mulimuli ake ki a te ia, oi fehili atu ai ki ei, “He ā ta koulua e hakili?”
Kua tali mai ki lāua, “Lāpi, ko koe e nofo i fea?” (Ko te uiga o te kupu tēnei, “Te Faiakoga.”)
39“Ōmai oi kikila,” kua tali atu ia Iehu. I te taimi tēnā kua ta te fa i te afiafi. Oi olo ai te toka lua ma Iehu, ma na ki lā kitea ai te mea e nofo ai Iehu, oi nonofo ai lava fakatahi ma ia i kinā, i te aho tēnā.
40Ko tētahi o ki lāua iēnei, ko Anitelea, te uho o Himona Petelu. 41Na maua muamua e ia tona uho ko Himona, oi lea vē atu ai ki ei, “Kua maua e ki māua te Mehia” (Ko te uiga o te kupu tēnei “Keliho.”) 42Oi kave ai e ia ia Himona ki a Iehu.
Kua kikila atu ia Iehu ki a Himona, oi vāgana atu ai ki ei, “Ko tō igoa ko Himona te ataliki o Ioane, kae ko koe ka fakaigoa ki a Kepa.” (Ko he kupu i te gagana Alamaika e tutuha ma te igoa Petelu i te gagana Eleni, ko tona uiga “papa.”)
Kua Kalaga ia Iehu ki a Filipo ma Natanielu
43I te aho alafaki, na tonu ai ia Iehu ko ia ka fano ki Kalilaia. Na maua e ia ia Filipo, oi lea vē atu ai ki ei, “Mulimuli mai ki a te au.” 44Ko Filipo e hau mai Petehaita, te kakai e nonofo ai ia Anitelea ma Petelu. 45Kua maua e Filipo ia Natanielu, oi lea atu ai ki ei, “Kua maua e ki mātou te tino na lea ai ia Mohe i te tuhi o te Tūlāfono, ma na tākua foki i nā tuhituhiga a te kau pelofeta. Ko Iehu tona igoa, te ataliki o Iohefa mai Nahaleta.”
46Kua lea atu ia Natanielu “Kogā e i ei he mea lelei e mafai ke hau mai i Nahaleta?”.
“Hau oi kikila,” kua tali mai ia Filipo.
47I te kitea atuga e Iehu ko Natanielu e hau ki a te ia, oi lea ai vēia, “Kikila, he Ihalaelu moni tēnei; he tino e hē mafai ke pepelo!”
48Kua fehili atu ia Natanielu ki a Iehu, “Na kē iloa vēhea au?”
Kua tali mai ia Iehu, “Na kō kitea koe i lalo o te mati, ka ko hēki kalaga atu ia Filipo ki a te koe.”
49“Te Faiakoga,” kua tali atu ia Natanielu, “ko koe ko te Ataliki o te Atua! Ko koe ko te Tupu o Ihalaelu!”
50Kua lea atu ia Iehu, “Ko koe nei kua talitonu ona ko au na lea atu, na kō kitea koe i lalo o te mati? Ka kē kiteagia nā mea e tutupu, e hili atu lele te ofoofogia i lo te mea tēnei!” 51#Ken 28.12Oi toe lea atu ai ia Iehu, “E takutino atu e au ki a te koutou te meamoni; ka kitea e koutou te lagi e matala, ma nā agelu a te Atua e ōake ki luga ma ōifo ki lalo i luga o te Ataliki o te Tagata.”#1.51 e ōake ki luga ma ōifo ki lalo i luga o te Ataliki o te Tagata; I te vili kehega o Iakopo (kikila ki te fuaikupu 47) mai tona uho ko Ehau, na ia kitea i hana miti na fai, nā agelu e ōake ki te lagi ma ōifo ki te lalolagi i he kākega (kikila ki te Kenehe 32.22-32).
Currently Selected:
Ioane 1: TNT
Tõsta esile
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.