Gāluega 2
2
Ko te Afio Ifo o te Agaga Paia
1 #
Lev 23.15-21; Teu 16.9-11 Kua pa ki te aho o te Penitekoho, oi fakapotopoto ai ki lātou uma kua talitonu, ki he mea e fokotahi. 2Kae teki lava kua fanaifo he leo mai te lagi e vē ko te agi a he matagi mālohi, kua agi ki loto o te fale ma fakatumulia ai te fale kātoa e maopoopo ai ki lātou. 3Ma ki lātou kitea ai nā mea e vēia ni laulaufaiva afi kua i luga o ki lātou tau tokatahi uma nae i kinā. 4Na fakatumulia ai ki lātou uma i te Agaga Paia, oi kāmata ai oi tautatala i iētahi gagana, e vē ona tuku atu e te Agaga ki a te ki lātou te mana ke tautatala ai.
5Nae i ei ni tino Iutaia nae nonofo i Ieluhalema, ni tino lolotu i te lotu Iutaia, na ōmamai i nā atunuku uma o te lalolagi. 6I te ki lātou lagonaga o te leo tēnei, oi na potopoto ai he kaifenua e tokalahi. Na tēteki uma ki lātou auā na lagona atu e ki lātou tau tokatahi uma, ko nā tino kua talitonu ki a Iehu e tautatala i nā gagana a ki lātou tau tokatahi. 7Oi na taufai ōfo uma lele ai ki lātou ma lea vē, “Ko nā tino iēnei e tautala vēia, ni tino Kalilaia! 8E vēhea la oi mafai ke lagona atu e ki tātou uma ki lātou e tautatala i nā gagana a ki tātou? 9Ko ki tātou ni tino e ōmamai mai Pahoi, Mētoi ma Elamitai; mai Mehopotamia, Iutea ma Kapatokia; mai Ponitoho ma Ahia, 10mai Fulugia ma Pamefulia, mai Aikupito ma nā koga o Lipuē#2.10 Lipuē ko te igoa i nā aho nei ko Libya. e pili ki Kulene; ko iētahi o ki mātou e ōmamai mai Loma, 11ni tino Iutaia ma ni tino nukukehe kua talitonu ki nā tāpuakiga faka-Iutaia; ka ko iētahi e ōmamai mai Kelete ma Alapi — kae na fakalogo uma lava ki tātou ki a te ki lātou e tautatala i nā gagana a ki tātou, ki te uiga kehe o nā mea kua fai e te Atua!” 12Ona ko te ōfo lahi ma te nunumi o nā māfaufau o ki lātou, na fakatau fehili ai lava tētahi ki tētahi vēia, “He ā te uiga o te mea tēnei?”
13Kae ko iētahi tino kua faikupu fakatauemu ma lea vē, “Ko nā tino iēnei e konanā!”
Kua Tautala ia Petelu ki te Kaifenua
14Oi tū ai ki luga ia Petelu fakatahi ma iētahi apohitolo e toka hefulutahi, ma kāmata oi tautala leo lahi vēnei atu ki te kaifenua, “Oku uho Iutaia ma koutou uma iēnā e nonofo i Ieluhalema, fakalogo mai ke lea atu au i te mea tēnei. 15Ko nā tino iēnei e hē konanā e vē ko nā manatu o koutou; ko tēia fātoā ta te iva i te taeao; 16kae ko te mea tēnei te na tautala fakatatau ki ei te pelofeta ko Ioelu:
17‘Kua vāgana te Atua: Ko tēnei te mea ka kō faia i nā toe aho:
Ka kō liligia toku Agaga ki luga o tagata uma.
Ka tālaki e autou fānau taku fekau;
ka kitea e outou taulelea talavou ni fakaaliga,
ma ka fai miti nā tino mātutua.
18Io, ke pa foki lava ki aku kaukauna, nā taulelea ma nā fafine,
ka kō liligia ki o lātou luga toku Agaga i nā aho iēnā,
ma ka ki lātou tālakia taku fekau.
19Ka kō faia ni vāvega i te lagi i luga,
ma ni fakailoga i te lalolagi i lalo.
Ka i ei te toto, te afi, ma te ahu māfiafia;
20ka pōulitia te la,
ma ka mu toto te māhina,
ka ko hēki pa mai te Aho tāua lahi ma te mamalu o te Aliki.
21Ma ko ai lava e kalaga ki te igoa o te Aliki mo he fehoahoani ka fakaolagia.’
22“Koutou nā tino o Ihalaelu, fakalogo mai ki nā kupu iēnei! Ko Iehu te Nahaleta, ko he tino na filifilia e te Atua e vē ona fakaali tino atu ki a te koutou, e ala i nā gāluega mamana, nā vāvega, ma nā fakailoga na fai e te Atua kui mai ia te ia. E iloa lelei lava e koutou te mea tēnei, auā ko nā mea iēnei na tutupu lava i kinei i te mea e i ei koutou. 23#Mat 27.35; Mlk 15.24; Luk 23.33; Ioa 19.18Ko he peleni lava e a te Atua te na ia tukulima atu ai ia Iehu ki a te koutou; ma na tāmate e koutou i te kua fakataga e koutou nā tino agahala, ke ki lātou fakahātauloagia. 24#Mat 28.5-6; Mlk 16.6; Luk 24.5Kae na toe fakatū e te Atua ia Iehu mai te oti, ma fakahaoloto mai nā tīgā matuitui o te oti, auā e hē mafai e te oti oi tāofi fakapagotā ia Iehu. 25Auā na lea vē ia Tavita e uiga ki a Iehu;
‘Na kō kitea te Aliki i mua o oku i taimi uma lava;
auā e i oku tafa i toku itū taumatau, kae ke nahe i ei ai he mea e mataku ai au.
26Ma ko te mea ia e fiafia ai toku loto,
ma ko aku kupu e tumu i te fiafia.
Ma e ui ko au, he tagata e fano e mate,
ka nofo au ma te fakamoemoe mautinoa,
27auā ka hē tuku tiakia au e koe te Atua, i te lalolagi o tagata oti;
ka hē tukua e koe te tino o tau kaukauna fakamāoni ke pala i te tugamau.
28Kua kē fakahinoa mai ki a te au nā auala e maua ai te ola,
ma ko tō fakatahi mai, ka fakatumulia ai au i te fiafia.’
29“Te kau uho, e tatau ke fakamanino atu e au e uiga ki to tātou tupuna takutakua, te Tupu ko Tavita. Ko Tavita na oti ma na tanu, ma ko tona tugamau e i kinei lava ke pa mai ki te aho nei. 30#Hal 132.11; 2 Ham 7.12-13Nae he pelofeta ka koi ola ai, ma na ia iloa te folafolaga a te Atua na fai e uiga ki a te ia: na fai te tautōga a te Atua ka ia faia he lāpuna o Tavita ke kavea ma tupu e vē foki lava ko Tavita. 31Na kitea e Tavita te mea e tuku e fai e te Atua i he taimi i mua, ma na tautala ai e uiga ki te toetū o te Mehia mai te oti, i te leaga vē,
‘E hēki tuku tiakia ia e te Atua i te lalolagi o tagata oti;
e hēki pala tona tino i loto o te tugamau.’
32Kua toe fakatū mai i te oti e te Atua te Iehu lava tēnei, oi ko ki mātou uma iēnei ni molimau ki te mea tēnā. 33Kua hikitia ake ia ki te itū taumatau o te Atua tona Tamana, ma kua tuku atu ki a te ia te Agaga Paia, e vē oi folafola e tona Tamana ki a te ia. Ko te mea la kua kikila ma fakalogo koutou ki ei nei, ko tana meaalofa tēnā kua liligi ifo ki o mātou luga. 34Auā e hē ko Tavita te na hikitia ki te lagi; kae na lea vēia,
‘Kua vāgana te Aliki te Atua ki toku Aliki:
Nofo i toku itū taumatau
35ke pa ki te taimi e kō faia ai ō fili, ma nofoa e mapu ki luga ō vae.’
36“Ko te mea ia e tatau ai ke iloa ma mautinoa e koutou nā tino Ihalaelu uma, ko te Iehu tēnei, tēia na koutou fakahātauloagia, ko te tino ia kua fai e te Atua ma Aliki, ma ko ia ko te Mehia!”
37Na tuia lahi lele nā loto o tagata i te fakalogo atuga ki te mea tēnei, oi na lea vē atu ai ki lātou ki a Petelu ma iētahi apohitolo, “O mātou uho, he ā nei ta ki mātou ka fai?”
38Oi lea atu ai ia Petelu ki a te ki lātou, “Ko koutou uma tau tokatahi e tatau ke liliu kehe mai autou agahala ma papatihogia i te igoa o Iehu Keliho, kae ke fakamāgalo ai autou agahala; ma koutou maua ai te Agaga Paia, te meaalofa mai te Atua. 39Auā ko te folafolaga a te Atua, na fai ki a te koutou ma autou fānau vēnā ki nā tino uma lele e nonofo mamao — ki lātou uma kua valakaugia e te Atua to tātou Aliki, ke ōake ki a te ia.”
40E hē ko iēnei oioti nā mea na lea ai ia Petelu ki a te ki lātou, na fautua mālohi lele ki a te ki lātou i te lahi o iētahi kupu, kua lea vē atu, “Koutou la ke hao mai te fakahalaga ka pa ki ei tēnei tupulaga kino!” 41E tokalahi na talitonu ki tana fekau ma na papatihogia, ma na maua te tai toluafe o ki lātou na fakaopoopo ki te vāega kua talitonu, i te aho tēnā. 42Na fakafano to lātou taimi lahi ke akoako ai ki lātou e te kau apohitolo, ma māfuta fakatahi, kakai fakatahi, ma fai talohaga fakatahi.
Ōlaga o nā Tino kua Talitonu ki a Iehu
43E lahi nā vāvega ma nā fakailoga na fai e ala i te kau apohitolo, ma na mātataku lele ai ia tagata uma. 44#Gāl 4.32-35Na tūmau pea lava te māfuta fakatahi o nā tino kua talitonu ki a Iehu, ma fakaaogā fakatahi a lātou meatōtino. 45Nae fai ma fakatau atu o lātou fenua ma a lātou meatōtino, ma fakahoahoa te tupe mā ki lātou fakatahi, fuafua ki o lātou manakoga tau tokatahi. 46I aho takitahi uma, e fakapotopoto fakatahi ki lātou i loto o te Mālumalu ma kakai fakatahi fakaholoholo i nā fale o ki lātou, i te agaga fiafia ma te loto maulalo, 47ma viviki ake ki te Atua ma na talia fiafia ki lātou e tagata uma. Ma ko aho uma lava e fakaopoopo e te Aliki ki te lātou vāega nā tino kua fakaolagia.
Currently Selected:
Gāluega 2: TNT
Tõsta esile
Share
Kopeeri
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.