Gāluega 18
18
Kua Folafola e Paulo te Tala Lelei i Kolinito
1Kua teka atu nā mea iēnā, oi fano ai ia Paulo mai Atenai ki Kolinito. 2I kinā, na fetaui ai ma he tino Iutaia e igoa ki a Akula, na fānau i Ponitoho, ma na fātoā ōmamai i Italia ma tana āvaga ko Pihila, ona ko te fakatonuga a Kaihala Kalautiona, ko nā tino Iutaia uma i Loma ke olo kehe. Na fano ia Paulo oi fakahula ki ei, 3oi nofo ai ma faigāluega ma te toka lua tēnei, auā ko tana gāluega nae fai ke ola ai ia ko te fai falekie, e vē foki lava ko nā gāluega a te toka lua tēnei. 4Nae fai ana talatalanoaga i te hūnako i nā Hāpati takitahi uma, i ana taumafaiga ke talitonu nā tino Iutaia ma nā tino Eleni ki nā mea e akoako ake ai ki lātou e ia.
5I te taunuku ifoga o Hila ma Timoteo mai Maketonia, oi tuku ai loa e Paulo nā gāluega a ia nae fai kae kua fakaaogā tona taimi kātoa ke folafola ai te fekau ma fakamanino lelei ki tagata Iutaia, ko Iehu ko te Mehia. 6Na teteke ki lātou ki a Paulo ma faikupu kino ki ei, oi na tali vēnei atu ai ia Paulo ki a te ki lātou ma lūlū kehe te pefu i ona kofu, “Kāfai koutou e momotu kehe mai te Atua, ko koutou lava te na māfua ai! E hē ko he hehē e o oku. E kāmata atu nei, ko au ka fano oi tālaki ki tagata nukukehe.” 7Oi na fano ai loa kua nofo i te fale o he tino nukukehe e igoa ki a Titiona Iuhito, he tino nae tāpuaki ki te Atua i te lotu Iutaia; ko tona fale nae tū i tafa o te hūnako. 8Ko Kilihipo te takitaki o te hūnako, na talitonu ki te Aliki, vēnā ma tona kāiga kātoa; ma e tokalahi foki iētahi tino i Kolinito na fakalogo ki te fekau ma talitonu, ma na papatihogia.
9I tētahi pō, na kitea ai e Paulo te Aliki i he fakaaliga e lea vē mai ki a te ia, “Ia koe nahe mataku, kae tautala pea lava ki a te ki lātou, ma nahe kē fakavāivai lele, 10auā ko au e i ei fakatahi ma koe. E hēai he tino e ia mafaia oi fai he mea ke ogohia ai koe, auā i te kakai tēnei, e tokalahi oku tagata e nonofo ai.” 11Oi na nofo ai ia Paulo i kinā i he tauhaga ma te āfa, ma akoako atu te kupu a te Atua ki tagata.
12I te kaveaga o Kaliono ma kōvana o Akaia, oi kau fakatahi ai ia tagata Iutaia ma puke e ki lātou ia Paulo, ma kave ki te fakamahinoga. 13Kua lea vēnei atu ki lātou, “Ko te tino tēnei kua taumafai ke tauanau ia tagata ke tāpuaki ki te Atua, i he auala e hē tuha ma te tūlāfono!”
14E tau fai atu he fakamatalaga a Paulo, kae lea vē atu ia Kaliono ki nā tino Iutaia, “Anei ake te mea tēnei ko he holitūlāfono kino pe he mea hehē kua fai, e tatau la au ke onohai ma fakalogo ki a te koutou tagata Iutaia. 15Kae ona ko koutou e fai fīnauga e uiga ki ni kupu ma ni igoa ma tautou lava tūlāfono, e tatau la ke fai lava e koutou he fakaikuga ki ei. E hē faia au ma fakamahino ki nā mea iēnā!” 16Oi tuli kehe ai ki lātou e ia mai loto o te fale fakamahino. 17Kua puke e ki lātou uma ia Hohetene te takitaki o te hūnako, ma kini i mua o te fakamahinoga. Kae e hēki tokaga lele ki ei ia Kaliono.
Kua toe Foki ia Paulo ki Anitioka
18 #
Nūm 6.18
Na nonofo fakatahi ia Paulo ma te kau Kelihiano i Kolinito i ni aho e lahi, oi tukua ai e ia ki lātou, kae folau ma Pihila ma Akula ki Hulia. Ka ko hēki folau kehe ia Paulo mai Kegeleaiha, na tafi tula tona ulu ona he tautōga e a ia na fai.#18.18 he tautōga e a ia na fai: E fakatatau te mea tēnei ki te agānuku a tagata Iutaia e tafi tula te ulu ke fakailoa ai te tauhi pea lava ki he tautōga. 19Kua taunuku atu ki lātou ki Efeho, oi tuku ai i kinā ia Pihila ma Akula e Paulo kae fano ki te hūnako, ma talatalanoa ai ma nā tino Iutaia. 20Na fakatālohaga nā tino ki a Paulo ke nofo mataloa i kinā, kae e hēki fofou ia ki ei. 21Ka kua lea vēnei atu ki ei i te taimi ka fano kehe ai, “Kāfai ko te finagalo ia o te Atua, e toe foki mai lava au ki a te koutou.” Oi folau kehe ai loa mai Efeho.
22I te pa atuga o ia ki Kaihaleia, oi fano ai ki Ieluhalema oi feiloaki ma te Ekalehia, ma toe fano ai ki Anitioka. 23Na mataloa malie i kinā, oi fano ai kua kui loto i te kogāfenua o Kalatia ma Fulugia, ma fakamākeke atu ki te kau Kelihiano uma.
Kua Folafola atu e Apolo te Auala o te Aliki i Efeho ma Kolinito.
24I te taimi tēnā na fano ai ki Efeho ia Apolo, he tino Iutaia na fānau i Alehania. He tino poto tautala, ma mālamalama lelei i nā Tuhituhiga Paia. 25Na fakaako lelei ia e uiga ki te Ala o te Aliki,#18.25 Ala o te Aliki: Kikila ki te 9.2. ma nae fiafia lahi lele oi folafola ma fakailoa hako atu nā fakamatalaga e uiga ki a Iehu. Kae oioti lava te mea na ia iloa ko te papatihoga a Ioane. 26Na kāmata loa oi tautala atu ia Apolo ma te hē mataku i loto o te hūnako. I te lagonaga e Pihila ma Akula te tautalaga a Apolo, oi kave ai e ki lāua ki to lā fale ma fakamālamalama hako ki ei e uiga te Ala o te Atua. 27Na fai te tonu a Apolo ko ia ka fano ki Akaia, oi kave ai te tuhi a te kau Kelihiano i Efeho ki te kau Kelihiano i Akaia, ke ki lātou talia i Apolo kāfai e pa ake. I te taunukuga o Apolo ki Akaia, na fai ia ma fehoahoani lahi ki a te ki lātou kua talitonu, e ala i te alofa tūnoa o te Atua. 28Auā nae fīnau mālohi ma nā tino Iutaia i mua o tagata, ma na fakailoa ai e ia te hehē o ki lātou. Na fakamāonia e ia ki a te ki lātou e ala i nā Tuhituhiga Paia, ko Iehu ko te Mehia.
Currently Selected:
Gāluega 18: TNT
Tõsta esile
Share
Kopeeri
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.