Gāluega 14
14
Kua Tālaki te Tala Lelei e Paulo ma Panapa i Ikononu
1Ko te mea na fai e Paulo ma Panapa i Anitioka na fai foki e ki lāua i Ikononu. Kua olo ki te hūnako e tāpuaki ai nā tino Iutaia ma folafola atu ai te Tala Lelei, ma e tokalahi lele nā tino na talitonu ki a Iehu, ni tino Iutaia vēnā ma ni tino nukukehe. 2Kae ko tagata Iutaia e hēki mafai ke talitonu, ma kua fakakino e ki lātou ia loto o tagata nukukehe, kae ke teteke atu ai ki lātou ki nā tino kua talitonu. 3Na mataloa te taimi na nonofo ai nā apohitolo i kinā. Nae hē mātataku lele oi tautatala e uiga ki te Aliki, tē kua ia fakamāoniagia te moni o te lā fekau e uiga ki tona alofa tūnoa, e ala i te mana na ia tuku akea ki a te ki lāua ke fai ai nā vāvega ma nā mea ofoofogia. 4Na vaelua nā tino o te kakai: ko iētahi kua kau ki nā tino Iutaia, ka ko iētahi kua kau ki nā apohitolo.
5Oi fai ai te tonu a ni tino nukukehe ma ni tino Iutaia fakatahi ma o lātou takitaki, ke honafai nā apohitolo ma ke fetogi i nā fatu. 6I te iloaga e nā apohitolo te mea tēnei, oi hōhola ai ki nā kakai ko Luotala ma Tepene i Lukaonia, ma iētahi koga e pili ki ei. 7I kinā na folafola ai e ki lāua te Tala Lelei.
Kua Tālaki te Tala Lelei e Paulo ma Panapa i Luotala ma Tepene
8Nae i Luotala he tamāloa nae pipili talu te fānau mai, ma e hēki mafai lele ke havali. 9Nae nofo i kinā ma fakalogologo ki nā kupu e tautala ai ia Paulo. Kua kitea atu e Paulo ko te tamāloa kua talitonu ma e mafai ke fakamālōlōgia, oi na kikila hako atu ai ki ei, 10ma lea vē atu i he leo lahi, “Tū hako ake ki luga!” Na tū loa ki luga te tamāloa ma kāmata oi hāvalivali holo. 11I te kitea atuga e te kaifenua te mea kua fai e Paulo, oi kāmata ai oi taukalalaga i te lātou gagana Lukaonia, “Ko nā atua kua liu tagata ma kua ōifo ki lalo ki a te ki tātou!” 12Oi fakaigoa ai e ki lātou ia Panapa ki te atua ko Teuhe, kae fakaigoa ia Paulo ki te atua ko Hemene, auā ko ia lava te nae māhani oi tautala.#14.12 Teuhe…Hemene: Mo nā tino Eleni ko Teuhe ko te atua pule hili ma ko Hemene ko te failāuga mo nā atua. Ko nā tino i nā koga iēnei nae māhani fai a lātou tala ko Teuhe ma Hemene e māhani oi kitea e vē ni tagata ola. 13Ko te ohitāulaga a te atua ko Teuhe, tēia nae tū tona mālumalu i fafo mālie atu o te kakai, kua kave e ia ni povi poa ma ni pale tiale ki te faitotoka ki loto o te mālumalu, auā na fofou ia fakatahi ma te kaifenua, ke ohi he tāulaga ki nā apohitolo.
14I te lagona atuga e Paulo ma Panapa te lātou mea ka tau fai, oi tahae ai o lā kofu ma fētutuli ki te kogātotonu o te kaifenua ma taukalalaga vē atu, 15#Eho 20.11; Hal 146.6“He ā te fai ai e koutou he mea vēnei? Ko ki māua ni tagata ola e vē foki lava ko koutou! Ko ki māua e i kinei ke folafola atu te Tala Lelei ki a te koutou, kae ke mafai koutou ke olo kehe mai nā mea iēnā e hēai he aogā, kae liliu ki te Atua na faia te lagi, te lalolagi, te tai, ma nā mea uma lele i ei, ma e ola pea lava. 16I nā aho kua loa, na ia tukua ia tagata uma ke fai lava te mea e loto ki ei te tino. 17Kae nae ia fakaalia pea lava nā fakamāoniga ke iloa ai e tagata ko ia ko te Atua, e ala i nā gāluega lelei a ia e fai; e ia fōkia atua nā ua mai te lagi ma nā fuata o lākau i nā taimi e tatau ai; e ia fōkia atua nā meakai, ma fakatūtumu outou loto i te fiafia.” 18E ui i nā kupu iēnei, kae na tau hē kilā mafaia oi tāofiofi te kaifenua, mai te ohiga o a lātou tāulaga ki a te ki lāua.
19E i ei ni tino Iutaia na ōmamai mai Anitioka i Pihitia ma Ikononu; na ki lātou mafaia oi tataki ia manatu o te kaifenua ke kau ake ki a te ki lātou. Na fetogi e ki lātou ia Paulo i nā fatu ma toho ki fafo o te kakai, ma to lātou manatu lava ko Paulo kua mate. 20Kae i te maopoopo atuga o te kau Kelihiano ki te mea e i ei ia Paulo, oi tū ake ai ki luga oi toe foki ki te kakai. I te aho alafaki, oi olo ai ma Panapa ki Tepene.
Kua Toe Foki ia Panapa ma Paulo ki Anitioka i Hulia
21Na tālaki e Paulo ma Panapa te Tala Lelei i Tepene, ma e tokalahi nā tino na maua ke fai ma hoko o Iehu. Oi toe foki ai ki Luotala, ma Ikononu, ma ki Anitioka i Pihitia. 22Na fakamālohi atu ki lāua ki nā tino kua talitonu ki a Iehu ma apoapoaki ki ei ke pipiki mau ma te fakamāoni ki to lātou fakamoemoe ki a Iehu. Kua lea vē atu ki lāua, “E tatau ki tātou ke kui i loto o ni puapuagā e lahi, oi ulu atu ai ki tātou ki te Mālō o te Atua.” 23Na tōfia e ki lāua ni toeaina mo nā Ekalehia takitahi, ma i na kua uma ona tatalo ki te Atua ma fakalāina, oi ofo atu ai ki lātou ki te Aliki, tē kua tuku atu ki ei to lātou fakamoemoe.
24Oi kui atu ai ki lāua i loto o Pihitia ma taunuku atu ki Pamefulia. 25I kinā, na tālaki ai e ki lāua te Tala Lelei i Pelekē, oi olo ai ki Ataleia, 26ma mai kinā, na folau atu ai ki Anitioka, te nofoaga na tuku atu ai ki lāua ki te kikilaga ma te alofa tūnoa o te Atua, mo te gāluega tēia kua uma te fakatino e ki lāua.
27Kua pa atu ki lāua ki Anitioka, oi fakapotopoto ai e ki lāua ia tagata o te Ekalehia, ma fakamatala ai ki ei nā mea na fai e te Atua ki a te ki lāua, ma te auala na ia hāuniagia ke mafai ai ia tagata nukukehe ke talitonu. 28Na mataloa te taimi na nonofo ai ki lāua ma te kau Kelihiano i kinā.
Currently Selected:
Gāluega 14: TNT
Tõsta esile
Share
Kopeeri
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.