Kèʼlo 6
6
Liì kisaŋ wìr msòŋ
1Mo wìr‑iì kèʼèn, a kùʼ e kitu ke nsay, á nèn a dzəə́ sa wón vee vikìy anín. 2Wón Nyùy#6.2: Wón Nyùy: A dzə̀ kinyo kìn ki wàa dzə e Lǎm Hibru sa ji wón anyùy, kìn ji vifá veé yuv. Wíri nén a toʼtí nsàv kinyo kìn dzə́ə sitaár. (1) Wón Nyùy vìne dzə̀ á wír ve á ghvə́m Nyùy, aá rám fo Set, ve á liìn vikìy fo rám Ken ye bó yí yòʼ ghvə́m Nyùy. (2) Nsàv dzə̀ jii, wón anyùy, a dzə̀ ji wír ve tavkíné ve á səən vitaáví fo anyùyi, e bóo lì vikǐy wìr vee viy, a dzəə́ rám ye ghaʼtíné shó. (3) Nsàv dzə̀ jii, vifá veé yuv vee nsheèlav se Satan se sí tatin wùn à rám wìr msòŋé. (Leéy sá: Remrí 32.8; Nsùyrì Nyùy Nyùy 89.6). ámóʼó yén, a wón wíri vee vikìyí bóŋkír é ŋàŋ, yén ve á toon sí yév, á kù nèn a lì liìn ji vikìy vév. 3Nyùy Tàr nèn sùúy jii, «Bó m yòʼ wíy màʼtì wír, é wù shaari gheéy,#6.3: bó m yòʼ wíy màʼtì wír, é wù shaari gheéy; Kìn jii: Kiyoy kém kí yòʼ wíy a kàtìr wùn à wìr msòŋ ŋkuuŋkùŋ gheéy. wù dzə̀ ben, a wù kér fóo wìy kpu. Kèʼ fo lèn, wù yòʼ dzəə́ wìy dzə̀ʼə̀m, e shaà kiyá kishóv mbaà é wiì (120).» 4Yì‑iì dzə̀ é ghan fóo fèy, e dù, e meé e ghan símóʼ sí, a viŋgáʼ ve wíri ví dzə̀ é kitu ke nsay, a dzə̀ rám ye wón Nyùy vìyi‑iì dzəən wùn à vikìy ve yì‑iì dzəə̀n wón wíri. Kù dzə̀ wír vìn ve yì‑iì dzəə̀n antav vee fó ŋgùʼ, ve wíri rə́si fer vimfèr vév.
5 Nyùy Tàr lòo leéy, e yèn, a liì kisaŋ wìr msòŋ gháʼ ne e kitu ke nsay, a wù kù sí kér a dzə̀ kwaʼtì kisaŋe e wun shiliv ghán sidzə̀m, 6shilív sə́ shí seèm, wù wáa rə̀m ntéŋ ji wun sà‑aà bòm wír, e lèm e kitu ke nsay ji kaá. 7Bìʼ bey, Nyùy Tàr nèn sùúy jii, «M yíi laàr wír wo mò‑oò bomen é kitu ke nsay, e tatí wùn à nyám si, à vifá ve ŋaŋrìn ví, à menə́n mè. M kér mendzən ji mò‑oò bòm vifá vìn.» 8Yii bèy, Nyùy Tàr leéy Noa, a kòŋ bìʼ liì və.
Kinyo ke Noa
9Kimfèr ke Noa wùn à kfə́ə rə́ kí nén a dzə jii, Noa‑aà yii mo Nyùy taʼà, dzə́ là nsem e wun ghan, wáy shilív e Nyùy wùn, ghán e Nyùy mbòv. 10A wù‑uù kér wón vee vilum ataár, aá dzə̀ jii, Shem wùn à Ham, à Jafet.
11Wáa dzə e ghan fen, a kitú ke nsay ki bír ne bírín fo Nyùy si, a wíri buʼtì vinyo ve ghaʼtín ví kitú ke nsay kidzə̀m. 12Nyùy nèn yèn ji kitú ke nsay ki fòy a ne, bìʼ fo wìr dzə̀m‑eè sí kér a dzə̀ liì kisaŋ. 13Wù nèn sùúy e Noa jii, «M wày ne, m yíi laàr wir msòŋ e dzə̀m, bìʼ fo vinyo ve ghaʼtín ve á buʼtì vi ràmèn ne kitú ke nsay kidzə̀m. M kér fóo yìi laàr áwune, à kitú ke nsay ki shó. 14Tàʼ kicí ke tavín kí, e fèr kikóŋ ki shó, e tìnrí e melav melav, e teè mvəm kikoŋ wùn à fó ndzəə e kiláy kí. 15Mfìʼ se à yíi fèr kikóŋ kìn sho si síne. Vida vi yíi a dzə kóy nshòv sitàn e msaàmbà, é mbvə̀ʼ wáa dzə kóy nshòv sibaà e ghvə̀m, é vida ve koʼón ví wáa dzə kóy saàmbà.#6.15: Ŋwàʼ woó Lǎm Hibrùu kér mfìʼ a dzə̀ «kubit», a kubit mòʼón dzə̀ ntàm se kiwo sibaà. Kóy mòʼóne nén a ker akubit akweè. 16À lóo fèr vitú ve kikoŋ, à ŋàʼár, é ví wáa yav e kitu ke virəv ntàm se kiwo sibaà. Fèr shúu kikoŋe fó kirəv ke da ki, e fèr mvəm kikoŋ ŋkèʼ sitaár, yìmòʼ fó sar, yìmòʼ fó ntìntìn, yìmòʼ fó yuv. 17Kiíy jii, m yíi fəə́r ndzə́v, é yí rún kitú ke nsay, e laàr kifá kidzə̀m ke kí ŋeʼè, a bó kimòʼón ki yòʼ yíi gòʼ. 18Yii bèy, fo ké ki, m wíy gwàr *mensaŋ mem a dzə̀ wòsò. À wíy nəə́ e kikoŋ vèn à wón vée, à wiiy wò, à vikǐy won vée, e fíʼ lùŋ. 19À wíy lì kfəə́ se vifa ve ŋeʼèn ví sidzə̀m, vibaà vibaà, kee lumèn wùn à kee wiíy ki, é vèn áwune nəə́ é kikoŋ, e fíʼ bòy fo kpu. 20Kfəə́ se vifa ve ŋeʼèn ví wíy wìy, e yen wò, vibaà vibaà, kfəə́ se menə̀n, à sé nyàm si, à vifá ve ví ŋaŋrì ŋàŋrìn ví, é vèn áwune nəə́ é kikoŋ, é ví fiʼ gòʼ vitin. 21Áà li sá kfəə́ se vifa ve yi sidzə̀m, e wày é kikoŋ, é vèn à kfə́ə yée, à nyám si yiì a yi.»
22Noa yú bey, e kù nèn yiì vinyo vidzə̀m réŋréŋ mo Nyùy kì suuyin e wun.
Currently Selected:
Kèʼlo 6: LNB
Tõsta esile
Share
Copy
Want to have your highlights saved across all your devices? Sign up or sign in
© 2022 CABTAL