Luke 17
17
Veitemaki ki nai Valavala Ca
(Maciu 18.6-7,21-22; Marika 9.42)
1Sa qai kaya vei ira na tisaipeli ko koya, “E dredre sara me sega ni yaco na veivakacalai, ia sa na ca sara vua sa vakavuna na ka oqo! 2Ena vinaka cake vua kevaka sa vau ki domona e dua na vatu-i-qaqi levu, me qai biu ko koya ki na wasaliwa, ka ca ni sa vakacala e dua vei ira na lalai oqo. 3#Maciu 18.15Dou raici kemudou vinaka! Kevaka sa cala vei iko na wekamu, vunauca, ia kevaka sa veivutuni, mo vosoti koya. 4Ia kevaka sa cala vakavitu vei iko e na siga e dua, ka saumaki vakavitu vei iko, ka kaya, ‘Au sa veivutuni,’ ia e dodonu mo vosoti koya.”
Ni Vakalevutaka na Neitou Vakabauta
5A sa kaya vua na Turaga ko ira na apositolo, “Ni vakalevutaka na neitou vakabauta!” 6A sa kaya na Turaga, “Kevaka sa tu vei kemudou na vakabauta e vaka na sore ni musita, dou na kaya ki na lolo oqo, ‘Mo cavu laivi mada, ka mo tei sara e na wasaliwa,’ ena qai talairawarawa vei kemudou.
7 “Ia ko cei vei kemudou, sa dua na nona tamata sa cuki were se vakania na manumanu, me kaya vua, ni sa lako tale mai na were, ‘Mo laki tiko sobu mada mo kana’? 8Ena sega beka ni kaya vua, ‘Mo vakarautaka na ka me’u vakayakavi mada, ka vauca na nomu wa ni sulu, mo qaravi au, me’u kana mada ka gunu; ka oti ko na qai kana ka gunu’? 9Ena vakavinavinaka li vua na tamata oqo ko koya, ni sa kitaka ko koya na ka sa vakaroti vua? Au nanuma, e segai. 10Me vakakina koi kemudou, ni dou sa kitaka na ka kecega sa vakaroti vei kemudou, dou kaya, ‘Keitou sa tamata tawa yaga; keitou sa kitaka ga na ka e kilikili kei keitou me keitou kitaka.’ ”
Sa Vakasavasavataki Iratou e Tini na Vukavuka ko Jisu
11Ia ni sa lako ko koya vaka ki Jerusalemi, sa lako voli e loma i Samaria kei Kalili. 12Ia ni sa curu ki na dua na koro lailai, sa sota kaya e lewe tini na tamata vukavuka, a ra sa tu vakayawa; 13a ra sa kaci, ka kaya, “I Jisu, na Turaga, ni lomani keitou mai.” 14#Vsoro 14.1-32Ia ni sa raici ira ko koya, sa kaya vei ira, “Dou lako ka vakaraitaki kemudou vei ira na bete.” Ia ni ra sa lako tu, era sa vakasavasavataki. 15A sa dua vei ira, ni sa raica sa vakabulai, sa lesu tale, a sa vakarokorokotaka na Kalou e na domo levu. 16A sa cuva vakatoboicu ki na yava i koya, ka vakamolimoli vua. Ia sa kai Samaria ko koya. 17A sa vosa ko Jisu, ka kaya, “Era sega li ni lewe tini sa vakasavasavataki? Ia sa evei na lewe ciwa? 18Sa sega ni kune e dua me lesu tale mai me vakarokorokotaka na Kalou, ko koya duaduaga na kai tani oqo.” 19A sa kaya vua, “Tucake, mo lako ga; sa vakabulai iko na nomu vakabauta.”
Na Yaco mai ni Matanitu ni Kalou
(Maciu 24.23-28,37-41)
20Ia ni sa tarogi koya ko ira na Farisi, se na yaco ninaica na matanitu ni Kalou, sa kaya vei ira ko koya, “A matanitu ni Kalou sa sega ni yaco mai me vaka na ka e vakarairaitaki, 21ena sega talega ni kainaki, ‘Raica, sa tiko eke!’ se ‘Raica ki kea!’ Ni sa tu e na lomamudou na matanitu ni Kalou.”
22A sa kaya vei ira na tisaipeli, “Ena yaco na siga, dou na gadreva kina mo dou raica e dua na nona siga na Luve ni Tamata, ia dou na sega ni raica. 23Ena qai kainaki vei kemudou, ‘Raica eke!’ se ‘Raica ki kea!’ Dou kakua ni lako kina, se muri ira. 24Ia me vaka na livaliva ni sa tibi mai na dua na yasana ni lomalagi ka rarama yani ki na yasana kadua ni lomalagi, sa na vaka talega kina na Luve ni Tamata e na nona siga. 25Ena vosota mada eliu na ka e vuqa ko koya, ena biuti koya talega nai tabatamata oqo. 26#Vteki 6.5-8Ia me vaka sa yaco e na gauna i Noa, ena vaka talega kina e na gauna ni Luve ni Tamata. 27#Vteki 7.6-24Era kana tiko, era gunu, era vakawati, era veimusumusukitaki me ra vakawati, ka yacova na siga ka vodoka kina na waqa ko Noa, ka qai lako mai na waluvu, ka vakamatei ira kecega. 28#Vteki 18.20—19.25Sa na tautauvata talega kei na gauna i Loti—era a kana ka gunu tiko, ka ia na veivoli, ka ra teitei ka tara vale, 29ia e na siga ka lako tani kina ko Loti e Sotoma, sa qai tau mai lomalagi na bukawaqa kei na sulifure ka vakamatei ira kecega— 30ena vaka talega kina e na siga me na vakatakilai kina na Luve ni Tamata. 31#Maciu 24.17,18; Mari 13.15,16E na siga ko ya, ko koya sa tiko e dela ni vale, ka sa tu e loma ni vale na nona i yau, me kakua ni lako sobu mai me kauta tani; ko koya talega sa tiko mai na were, me kakua ni lesu tale mai. 32#Vteki 19.26Dou nanuma na wati Loti. 33#Maciu 10.39; 16.25; Mari 8.35; Luke 9.24; Joni 12.25O koya yadua sa segata me maroroya na nona bula, ena vakayalia; ia ko koya yadua ena vakayalia, ena maroroya. 34Au sa kaya vei kemudou, e na bogi ko ya erau na lewe rua e na dua nai mocemoce; ena kau tani e dua, ka biu tu e dua. 35Ena lewe rua na yalewa erau na veivuke me qaqi sila; ena kau tani e dua, ka biu tu e dua.” 36Ena lewe rua na tagane erau na tiko e na were; ena kau tani e dua, ka biu tu e dua. 37A ra sa vosa, ka kaya vua, “Evei, Turaga?” A sa kaya vei ira ko koya, “E na yasana kece sa no kina na yago mate, ena soqoni vata talega kina na vulituri.”
Currently Selected:
Luke 17: FRV21
Tõsta esile
Share
Copy
Want to have your highlights saved across all your devices? Sign up or sign in